Ikucita Bupainiya—Nkokubelesya Kabotu Ciindi Cesu!
1 ‘Ndilipakasizye kale! Sena inga ndacikonzya kucita bupainiya lino?’ Oobu mbwaakali kuyeeya umwi mucizi naakali kuswiilila makani kumuswaangano wabbazu aakali kukananwa aamwaalu mupainiya aakajisi mutwe wakuti “Ikuzumanana Mumulimo Wabupainiya.” Umwi wabaswiilizi aaba musankwa wakali kuyeeya kuti ‘Ino walo ucikonzya buti kucita bupainiya? Mebo tandili mwaalu, nokuba boobo ndilipakasizye!
2 Ooyu mwaalu wakazumanana kukanana zileleko zijanika mukucita bupainiya, wakabuzya-buzya bapainiya banji-banji bazwa mubbazu ibakaamba ntaamu nzyobakabweza kutegwa bacikonzye kucita bupainiya ambwaakabaleleka Jehova kukusola nkobakasola. Umwi wakali mulema, umwi wakakwetene amuntu uutali mukasimpe alimwi ooyu umbi wakalekede mulimo wakunyika pele wakali kukonzya kulisanina. Ooyu mukwesu amucizi nobakamvwa bapainiya aba mbobakali kucikonzya kwiinda mulugwasyo lwa Jehova, bakatalika kuliyeeya. Tumulomba kuti andinywe muliyeeye mbwaanga lino mweelwe wamawoola aayandika kubapainiya wacesegwa cakuti basikumwaya bambi banji inga bacikonzya kuuzuzikizya.
3 Tulizi kuti Jehova Mulengi alimwi Ngomweendelezi kujulu aansi alimwi akuti tulapona akaambo kanguwe. (Dan. 4:17; Inc. 17:28) Tulizi kuti Jehova ulimukubelesya buyo mbunga yomwe. Tulaa coolwe cakubelekela antoomwe anjiyo cakusyomeka, katugwasilizya “muzike musyomesi uucenjede” mukukambauka makani aa Bwami mamanino naataninga sika. (Mt. 24:45; 25:40; 1 Pet. 2:9) Mbwaanga tukkede “kumazuba aakumamanino” kwini-kwini tulibwene kuti ciindi cakukambauka cili mukumana. (2 Tim. 3:1) Kunze lyaboobo, tweelede kusanina mikwasyi yesu. (1 Tim. 5:8) Mali ngotuvwola taacigwasyi mbuli mbwaalikugwasya kaindi. Ambweni lino tulaciswa-ciswa kwiinda kaindi. Alimwi kwaamba masimpe tuyanda buyo ciindi cisyoonto alimwi azintu zisyoonto zyakuligwasya. (Muk. 3:12, 13) Aboobo inga katulibuzya naa inga cagwasya kutobela malailile aakuti tucite bupainiya.
4 Cili kulindiswe kuliyeeya akubona naa inga twacita bupainiya. (Rom. 14:12; Gal. 6:5) Cilakulwaizya kubona kuti ibantu banji bali mukumvwa malailile aakucita bupainiya. Nokuba mumapenzi amakataazyo aaya aamazubaa mamanino, ilipooti yamulimo yakazwa mu 1999 Yearbook itondezya kuti ibantu ba Jehova ibatandila ku 700,000 nyika yoonse mbwiizulwa balimukuzumanana mumulimo wabupainiya. Nokuba kuti buumi bwadula, zyakweendela taziko, balaciswa-ciswa, naa kujana buyumuyumu bumbi, aaba bakwesu abacizi tabalengaani kucita kabotu, aboobo tulabalumbaizya. (Gal. 6:9) Bamvwa Jehova naabaambila kuti bamusole. (Malk. 3:10) Bayeeya kuti kucita bupainiya nkokubelesya kabotu ciindi cabo ambono zyabo akuti Jehova wabalemeka cini-cini kukusola nkobasola kunjila mumulimo wabupainiya akuzumanana mulinguwo.
5 Ibapainiya Balimukulelekwa: Umwi mucizi ku Cameroon uujisi kana kasimbi kacili kaniini ulapandulula kuti: “Ikuzwa ciindi mwanaangu naakazyalwa ndalikweendaawe mumulimo wamumuunda. Nociba ciindi katanaiya kweenda, ndali kumubbala kusyule. Bumwi buzuba kuseeni nindakali mumulimo wamumuunda, ndakaima akantoolo kali mumbalaa mugwagwa. Kana kangu kakazwa munsi lyangu, kaunka katolelela amamagazini kuzwa mucoola cangu. Kakadabalika kaya kukantoolo kambi. Nokuba kuti teekakali kukonzya kukananisya, kakakonzya kuyunga mukaintu umwi kamutambikizya magazini. Oyu mukaintu wakagambwa kapati kubona kana kaniini boobu kakatola lubazu mumulimo oyu. Wakatambula magazini akuzumina kucita ciiyo ca Bbaibbele!”
6 Akaambo kakumvwa kuti kuyandika bapainiya bambi bakugwasilizya, umwi mwaalu simukwasyi mu Zambia uubeleka mulimo wakunyika wakasala kucita bupainiya bwakugwasilizya napakasizye. Wakali kuyanda kuti abe cikozyanyo kumbungano alimwi akumukwasyi wakwe. Cimwi ciindi wakali kunga waima amootokala wakwe kumbalaa mugwagwa mpoonya walizya teepu yakuswiilila ya Inzila Yakujana Lukkomano mumukwasyi mpoonya watamba basimweenda nzila kuti baboole bazooswiilile makani aabalwa cakupozya. Eci cakapa kuti amwaye mabbuku aa Lukkomano Mumukwasyi aali 16 alimwi aa Luzibo aali 13, kunze lyaboobo wakatalisya ziiyo zya Bbaibbele zyobile.
7 Akumbi nkowakalibonya muuya mubotu wabupainiya nkuucisi ca Zimbabwe icibambene aacisi cesu. Mu April 1998, imwi mbungano yabasikumwaya bali 117 yakalaa bapainiya bakugwasilizya basika ku 70, ibaciindi coonse ibali 9. Imbungano imbi yabasikumwaya bali 94 yakalaa bapainiya ibali 58 bakugwasilizya ibakatuma malipooti. Aimbi mbungano yabasikumwaya bali 126 yakaluula kuti ibali 58 bakasala kucita bupainiya bwakugwasilizya antoomwe abapainiya baciindi coonse bali 4. Mwaka wamulimo wakainda wakali mwaka mubotu kwiinda kucisi ca Zimbabwe. Nokuba kuti bakwesu kucisi eci bakajisi bubi akulanganya mikwasyi, milimo yambungano alimwi akuyaka mutabi, bakabikkila maanu kapati kukukambauka.
8 Ibapainiya balizi kuti kutalika mulimo wabupainiya akuzumanana mulinguwo tacikonzeki munguzu zyabo beni. Mbebakusaanguna kwaamba kuti kufwumbwa ncobakonzya kucita balacicita ‘kunguzu nzyabapa Leza.’ (1 Pet. 4:11) Ilusyomo lwabo lubapa kuti bazumanane amulimo wabo wakukambauka buzuba abuzuba. Muciindi cakuyanda kukkala kabotu, ibapainiya bazwidilila balizi kuti kuzumanana mumulimo wabo ‘ninkondo zinjizinji,’ pele balalelekwa kapati.—1 Tes. 2:2.
9 Icikozyanyo ca Paulo Ciyandika Kutobela: Mu Bbaibbele kulembedwe milimo minji njaakacita mwaapostolo Paulo yakukambauka alimwi ambwaakabagwasya bantu banji. Ikuti naa kuli muntu wakapakasizye, ngu Paulo. Wakaliyumya napenzegwa, napenga kutegwa akambauke makani mabotu akuyumya mbungano. Alimwi wakajisi bulwazi bupati bwakali kumucisa. (2 Kor. 11:21-29; 12:7-10) Wakali kanzide kubelesya kabotu ciindi cakwe. Wakaamba kuti icakamupa kuti akonzye kucita mulimo wakwe woonse ninguzu nzyaakali kumupa Jehova. (Flp. 4:13) Taakwe muntu akati kabaabo mbaakagwasya iwakali kunga waamba kuti Paulo wakali kusowa buyo ciindi cakwe mumulimo wa Jehova, naakacita buyo cintu cimbi cigwasya. Kayi noliba lino tucigwasigwa akaambo kakuti Paulo wakacibelesya kabotu ciindi cakwe! Ilulayo lwakwe ndwaakapa kwiinda mumuuya uusalala lulatugwasya cini-cini kweendelezya kabotu milimo yesu kutegwa tuzumanane akasimpe mumazuba aya aakatazya!
10 Sunu ‘ciindi ncifwiifwi ciceede cakuti tukambauke makani mabotu.’ (1 Kor. 7:29; Mt. 24:14) Aboobo tuleelede kulibuzya kuti, ‘Ikuti naa ndalifwide juunza, sena inga ndakonzya kumwaambila Jehova sunu kuti ciindi cangu ndakacibelesya kabotu?’ (Jak. 4:14) Ino kayi nomutaambauli a Jehova lino mumupailo, mumusyomezye kuti mulayanda kucibelesya kabotu ciindi canu kamuli Bakamboni bakwe? (Int. 90:12) Amupaile kuli Jehova kutegwa amugwasye kuubya-ubya bukkale bwanu. Nokuba kuti mwalikuyeeya kuti tamukonzyi, sena teemwabona na lino kuti inga mwacita bupainiya?
11 Amusole Mbuli Mbomukonzya: Akaambo kazintu zitakwe ambozicitwa, tabali boonse ibayanda ibanga bacikonzya kuzuzikizya mawoola aali 70 amwezi aayandika mubupainiya bwaciindi coonse. Nokuba boobo basikumwaya banji balalibambila kubeleka mawoola aali 50 amwezi mumulimo wamumuunda kabacita bupainiya bwakugwasilizya kanjikanji naa ciindi coonse. Ikuti mwajana kuti calino tamukonzyi kucita bupainiya bwakugwasilizya naa bwaciindi coonse, mutatyompwi. Amuzumanane kupaila kutegwa mucikonzye. Icalino kuti kamutakonzyi, kamuumbulizigwa akuziba kuti Jehova ulakkomana azyoonse nzyomukonzya kucita camoyo woonse mumulimo wakwe. (Mt. 13:23) Ulibwene kuti mulikakatide kulubazu lwakwe alimwi akuti mulasola canguzu kuba basikumwaya basyomeka batazumizyi mwezi kwiinda buyo kamutakambauki. Ambweni inga mwayaambele kuciziba kukambauka kabotu, kamubeleka canguzu kutegwa mube bayi bamakani mabotu bazwidilide.—1 Tim. 4:16.
12 Mbwaanga “buzuba bwa-Jehova obo bupati buyoosya” bulaafwaafwi kusika, tweelede kucibelesya kabotu ciindi cesu ciceede kutegwa tukonzye kumanizya mulimo ngotupedwe. (Joel. 2:31) Saatani ulizi kuti ciindi cakwe camumanina, elyo ulimukusola canguzu kwiinda lyoonse kuyumya buumi bwesu kutegwa twaalilwe kubikkila maanu kuzintu ziyandika kapati. (Flp. 1:10; Ciy. 12:12) Mutayeeyi kuti Leza tamubikkili maanu. Jehova inga wamugwasya kuubya-ubya buumi bwanu kutegwa muucite mulimo kusikila mpomugolela. (Int. 145:16) Ibanji nobaliyeeya bajana kuti balakonzya kunjila mulimo wabupainiya bwakugwasilizya abwaciindi coonse. Masimpe, ibapainiya bakkalwa moyo mukubelesya kabotu ciindi cabo. Sena andinywe mulabasangana?