Ecino Nceciindi Cakukambauka!
1. Nkaambo nzi ecino ncecili ciindi cakukambauka?
1 “Amuyoowe Leza akumupa bulemu.” Kwiinda mubusolozi bwa bangelo, mulumbe ooyu ulaambilizyigwa “kubamasi boonse akumisyobo yoonse akumyaambo yoonse akumikowa yoonse.” Nkaambo nzi? “Nkaambo casika ciindi calubeteko lwakwe [Leza].” Mazubaano, tupona ‘muciindi calubeta’ calo ciyoomana ciindi bukkale bwamazuba ano nobuyoonyonyoonwa. Cilayandika kuti bantu ‘bakombe Ooyo iwakalenga ijulu anyika alwizi atusensa twamaanzi.’ Taaku mulimo umbi uuyandika kapati mazubaano alimwi weelede kufwambaana kucitwa mbuli wakwaambilizya “Makani Mabotu aateeli.” Inzya, ecino nceciindi cakukambauka!—Ciy. 14:6, 7.
2. Mbuti babelesi ba Jehova mbobatondezya kuti balicizyi ciindi ncotupona?
2 Mumyaka iili kkumi yainda, babelesi ba Jehova bakatola mawoola aatandila ku mabbiliyooni aali 12 mumulimo wakukambauka Bwami akugwasya bamwi kuba basikwiiya. Ibanji bacinca bukkale bwabo kutegwa bajane ciindi cinji cakutola lubazu mubutebuzi bwakumuuya. (Mt. 9:37, 38) Mucikozyanyo, mwakali, mweelwe waakati-kati wabasikumwaya bali 850,000 amwezi bakabeleka kabali bapainiya. Kubapainiya baciindi coonse, eeci caamba kuti bayandika kubeleka mawoola aasika ku 70 amwezi mumulimo wakukambauka. Bapainiya bakugwasyilizya beelede kubeleka mawoola aasika ku 50.
3. Nkucinca kuli buti kanji-kanji basikumwaya nkobeelede kucita kutegwa babeleke mulimo wabupainiya?
3 Ciyandika Mumulimo wa Bupainiya: Akaambo kakuti balizyi kuti “ciindi ncifwiifwi” ciceede, bapainiya balasoleka kupona buumi buuba-uba. (1 Kor. 7:29, 31) Balajana nzila zyakubelesya mali masyoonto kutegwa batanikutoli ciindi cinji kubeleka mulimo wakumubili. Mucikozyanyo, ibamwi balongela mumaanda aansaizi. Bamwi baleka kuyoobola zintu zitayandiki kapati. (Mt. 6:19-21) Kanji-kanji beelede kuleka kucita zintu zimwi nzyobayandisya. Zyoonse eezyi zilacitwa kutegwa babeleke ciindi cilamfwu mumulimo alimwi akuubikkila maano. (Ef. 5:15, 16) Kwiinda mukuzumanana, kulyaaba alimwi akusyoma Jehova kwiinda mukulomba lugwasyo lwakwe, basikumwaya banji bacikonzya kuba abubambe bugwasya ibwabapa kuti babeleke mulimo wabupainiya.
4. Nintaamu nzi zikonzya kumugwasya kuti muzuzikizye mbaakani yabupainiya?
4 Sena mulakonzya kubeleka mulimo wabupainiya? Mbuti kuti mwabuzya bapainiya ibazwidilila kumwaambila cabapa kuti bacikonzye kucita boobo? Amubeleke ambabo mumulimo kutegwa andinywe mukkomane mbobakkomana. Amulange-lange zibalo zijatikizya mulimo wabupainiya izili mu mabbuku eesu. Amulibikkile mbaakani iziyoomugwasya kuti mutalike bupainiya. Ikuti ciindi cino kakuli zisinkilizyo izimupa kuti mutanjili mulimo wabupainiya, amumulombe Jehova mumupailo kuti amugwasye kuzigwisya.—Tus. 16:3.
5. Mbuti bupainiya mbobutugwasya kuyungizya luzyibo lwesu mumulimo?
5 Zilongezyo Zijanika: Bupainiya bupa kuti tube aluzyibo lunji mukubelesya Jwi lya Leza kwalo ikuletela lukkomano. Mupainiya umwi mukubusi wakaamba kuti: “Ikucikonzya kupandulula Ijwi lya Leza lyakasimpe mbokweelede ncilongezyo cini-cini. Ikuti koli mupainiya, inga ulalibelesya kapati Bbaibbele. Nonduunka kuŋanda aŋanda, ndilayeeya magwalo aakonzya kugwasya mwiniŋanda aumwi.”—2 Tim. 2:15.
6. Ino bupainiya buyiisya nzi?
6 Alimwi bupainiya bulayiisya nzila zinji zigwasya kusumpula buumi bwesu. Bulakonzya kugwasya bakubusi kucizyiba kwaabanya ciindi, kubelesya kabotu mali alimwi akukkala abantu. Akaambo kakucita bupainiya, ibanji bayaambele ikubikkila maano kuzintu zyakumuuya mubuumi bwabo. (Ef. 4:13) Kuyungizya waawo, kanji-kanji bapainiya balijisi coolwe cakubona janza lya Jehova mbolibagwasya.—Inc. 11:21; Flp. 4:11-13.
7. Mbuti bupainiya mbobutugwasya kuba acilongwe a Jehova?
7 Ambweni cimwi cazilongezyo cipati mumulimo wabupainiya ncakuti bulatugwasya kuba acilongwe a Jehova. Eeci cilakonzya kutugwasya notuli mumapenzi. Mucizyi umwi iwakaliyumya mumapenzi mapati wakaamba kuti: “Icilongwe cini-cini ncondaba ancico a Jehova kwiinda mukuba mupainiya cakandigwasya kuliyumya mumapenzi oonse aakandisikila.” Wakayungizya kwaamba kuti: “Ndilikkomene kapati kuti kuzwa nindakakomena ndali kumubelekela Jehova ciindi coonse. Candipa kuti ndilyaabe munzila zinji nzyondatali kuyeeyela.” (Inc. 20:35) Andiswe atujane zilongezyo zili boobu eelyo notusoleka kubeleka mulimo uuyandika kapati wakukambauka.—Tus. 10:22.