Sena Mulyango Wakucita Bupainiya Wajuka Lino Kulindinywe?
1 Ilugwalo lwesu lwamwaka wa 1999 lutuyeezya kuti tucili “mubuzuba bwa Jehova bwalufwutuko.” (2 Kor. 6:2) Pele buzuba bwakwe bwalufwutuko buyoomana ino-ino. Mpoonya kuyootalika “buzuba bwalubeta” lwakwe. (2 Pet. 2:9) Jehova nacibapede ciindi cakufwutuka bantu, cilakkomanisya kubona bantu ibayabuvwula ibabweza ntaamu!
2 Bantu ba Jehova babweza mukuli wakusikila bantu bamvwa nociciliko ciindi. Ibanji basikumwaya ba Bwami banjila mumulimo wabupainiya. Sena mulyango wakucita bupainiya wajuka kulindinywe lino? Nkaambo nzi ncotubuzizya?
3 Ikutondezya Kulumba: Imawoola aayandika kubapainiya baciindi coonse abakugwasilizya acesegwa mbubonya mbuli mbokwakaambilizigwa mu Mulimo Wesu Wabwami wa January 1999. Ikutegwa basike aamweelwe oyu uuyandika mupya, ibapainiya baciindi coonse bayandika kubeleka mawoola aasika ku 70 mumulimo wamumuunda mwezi amwezi. Ikwaasanganya antoomwe mawoola aamwaka umwi aumwi wamulimo ayelede kusika ku 840. Ibapainiya bagwasilizya banoobeleka mawoola aasika ku 50 mumulimo wamumuunda mwezi amwezi. Ngaaya majwi masyoonto aakutondezya kulumba ngotwakatambula akaambo kamweelwe wamawoola wakacesegwa:
“Eeci ncipego citaliboteli kuzwa kuli Taateesu wakujulu!”
“Majwi oonse alabula aakutondezya mbotukkomene, ambotuciyanda alimwi ambotulumba akaambo kacipego eci!”
“Cilauba-uba kunookkwanya mawoola eesu!”
“Mupailo wesu ngwakuti abambi banjile mumulimo oyu waciindi coonse bazibone zileleko zizwa mukubelekela Jehova munzila eyi mpati.”
4 Mbotuyaabuswena munsi aabuzuba bwa Leza bwalufwutuko, cilalibonya kuti Jehova uyanda kuti bantu bamutembaule camamanino cakoompolola anguzu. Icapa kuti mulumbe oyu wakutembaula uye ambele kapati (1) mbaasikukambauka ba Bwami ibayabuvwula alimwi (2) akusola-sola kwaumwi aumwi mbuli mbwakonzya kuyaambele mukukambauka makani aa Bwami. Jehova “uumenya” zintu nguwapa kuti kube kuzwidilila munzila zyoonse zyobile kwiinda mukuleleka muuya wakulisungula wabaabo batambula lufwutuko—1 Kor. 3:6, 7; Int. 110:3.
5 Luzyalo lwa Leza Lutabi Lwabuyo: Paulo wakali kwaamba buzuba bwa Jehova bwalufwutuko naakalailila Banakristonyina kuti: “Lino mbuli mbutuli basimulimonyina [Jehova] Leza, tulamukumbila, kuti luzyalo lwa-Leza ndumutambwide lutabi lwabuyo.’’ “Talukooba lwabuyo” kuti naa eeci twabona kuti ‘nceciindi ceelede’ cakubelekela lufwutuko lwabantu kufwumbwa wajuka mulyango. (2 Kor. 6:1, 2) Sunu majwi aa Paulo ayandika kufwambaana kubwezela ntaamu. Ibanakristo ibamuyanda Jehova amoyo woonse babona kuti ncoolwe kutola lubazu kapati mumulimo ngwaabapa. Sena lino mulakonzya kutola lubazu luzwide mumulimo wamumuunda kwiinda mubupainiya bwaciindi coonse?
6 Nimbaakani Yeelede: Mu Zambia tubikkide mbaakani yakubaa bapainiya baciindi coonse ibasika ku 10,000 kuyoosikila mu September 1. Tusyoma kuti mbaakani eeyi ileelede alimwi ilakonzeka kusika. Ino nkaambo nzi ncotujisi lusyomo luli boobu? Mu May 1997 ibakwesu abacizi ibasika ku 7,695 bakacita bupainiya bwakugwasilizya, mpoonya mu April 1998 ibatandila ku 6,106 bakacita mbubonya. Ibanji bakacita lipooti mawoola aasika ku 60—bakalezya buyo amawoola aali 10 kuti basisye kumawoola aayandika kubapainiya baciindi coonse! Ikuti naa ibali buyo 3,000 akati kabaabo ibakacita bupainiya bwakugwasilizya balilembya mubupainiya bwaciindi coonse kautanamana mwaka uno wamulimo, mwezi wa September inga twautalika abapainiya baciindi coonse basika ku 10,000 naa baindaawo!
7 Mulongo Wazyakucita Ulayandika: Sena cicili ciyumu kulindinywe kunookkwanya mawoola aali 70 amwezi? Ambweni inga camugwasya kuti mwabikka mbaakani yakukkwanya mawoola aali 17 nsondo ansondo. Amusole kubelesya milongo yacitondezyo iili apeeji iitobela ikulibambila mulongo wanu wabupainiya bwaciindi coonse ngomuyeeya kuti inga wamweelela nywebo. Mwatalika kuubamba mulongo oyu amukanane abapainiya bazibide kutegwa bamwaambile mbobacikonzya kucita mulimo wabupainiya antoomwe akulanga mukwasyi amilimo imbi njobajisi. Amubuzye mulangizi wanu wabbazu amwaambile ibapainiya bali mubbazu mbobabamba mulongo wabo wamulimo wamumuunda nsondo ansondo. Kuzwawaawo muzisiye mumaanza aa Jehova kuti aleleke makanze aanu aakucita bupainiya.—Tus. 16:3.
8 Aube Mulimo Wamukwasyi Woonse: Sena kuli nomwakayeeyede kuucita kuti ube mulimo wamukwasyi woonse mulimo wabupainiya? Mulakonzya mwakkala antoomwe nyoonse mumukwasyi akubandika mbuli mbomunga mwagwasya omwe naa bobile kucita bupainiya—kwiinda mukulibambila kabotu alimwi akubelekela antoomwe. Ibamwi bajana kuti lino taakwe nobanga bakonzya kucita bupainiya bwaciindi coonse pe akaambo kakuti balipakasizye. Ikuti naa kamuli muciimo eco ikucita bupainiya kumbele aamazuba aibe mbaakani yanu. Pele amutalikile limwi kucita bubambe bwakubikka buzuba mbomuyootalika bupainiya. Ambweni inga mwacita bupainiya bwakugwasilizya ziindi zinji mukati kamwaka kutegwa mulibambile kucita bupainiya bwaciindi coonse.
9 Ibapainiya baciindi coonse ibainda ku 8,000 ibali amulongo lino wabupainiya mu Zambia bali muziimo ziindene-indene. Tabali boonse ibapona kabotu alimwi ibanji bajisi mikwasyi yakulanga alimwi azimwi zintu ziyanda mali. Aakati kabaabo ibali 2,500 bakalilembya bupainiya mumyaka yainda yobile, ibainda ku 400 bajisi myaka iinda ku 50 yakuzyalwa alimwi ibatandila ku 200 bajisi myaka iinda ku 65 yakuzyalwa. Ibali 1,600 tabakwete naa kukwatwa alimwi ibainda ku 200 bajisi myaka yakuzyalwa iili 20 kuyaansi. Ibainda kucibeela catatu cabaabo bakalilembya mumyaka yobile yainda mbakwesu, ibunji bwabo ibajisi mikwasyi yakulanganya alimwi amikuli mumbungano. Boonse aba “bacibelesya loko ciindi cabo” kucita bupainiya. Eeci kanjikanji cabapa kuti bapone bukkale buuba-uba bukkazika moyo kapati.— Kol. 4:5.
10 Sena Muyandika Kuubya-ubya Zintu? Ikuubya-ubya bukkale bwanu cilakonzya nceciyandika kuti mucite bupainiya. Sena bukkale bwanu buli mbuli ŋanda mpati iijisi twaandaanda alimwi azintu zinji zitayandiki izimusowela buyo ciindi alimwi iziyanda mali kubamba-bamba? Ikuti naa zintu kazili boobo, mweelede kuubya-ubya zintu kutegwa mukonzye kucita bupainiya. Sena inga mwacicesya ciindi ncomubeleka mumulimo wakunyika? Sena tamukonzyi kucesya ciindi ncomubelesya kuzintu zitayandiki naa kutaciindizya caboola kuciindi ncomubelesya mukulikondelezya?
11 Ibbaibbele ku 1 Timoteo 6:8 litulailila kuti: “kufumbwa twanoojisi cakulya acakulivumba, nciconya eco mbubo ncinji.” Icintu ciyandika kuti tusole kapati mbuli mbotukonzya mumulimo wa Jehova alimwi cinga catugwasya kubikkila maanu kapati kuzintu zyakumuuya nkukkomana azintu zisyoonto. (Mt. 6:22, 33) Apeeji 104 mu Yearbook ya 1998 mulipooti ya Japan kuli mizeezo minjaanji iipedwe kujatikizya ncokuli muuya mubotu wabupainiya mucisi eco. Umwi ngwakuti: Ibunji bwamaanda aaku Japan taajisi zintu zinji, aboobo taayandiki ciindi cinji kubamba-bamba. Kunze lyaboobo bukkale bwabo mbuuba-uba.” Sena tacili ncecaambwa ku 1 Timoteo 6:8?
12 Nyika yoonse mbwiizulwa, ibabelesi ba Leza balimukuyaambele kukambauka makani mabotu ibuzuba bwa Jehova bwalufwutuko kabutanamana. Cilakkomanisya kubona kuti mwakali ibali akati-kati 700,000 bakatola lubazu mumulimo umwi wabupainiya mwezi amwezi. Sena tamukonzyi kucinca bukkale bwanu kutegwa mube akati kabo? Twamulomba kuti muliyeeye kapati nomwiingula mubuzyo wakuti: “Sena mulyango wakucita bupainiya wajuka lino kulindinywe?”
Majwi aakwelelezya sikubala aali apeeji 3]
MBAAKANI: IBAPAINIYA BACIINDI COONSE IBALI 10,000!
Kabbokesi kali apeeji 4]
Mulongo Wacitondezyo Wabupainiya Bwaciindi Coonse
Mawoola aayandika ansondo: 17
Buzuba Bomwe Mukati Kansondo Alimwi a Kumamanino Aansondo
Buzuba Mawoola
Bwasanu 8
Mujibelo 6
Munsondo 3
Mawoola Oonse Kwaasanganya:17
Mazuba Obile Mukati Kansondo Alimwi a Mujibelo
Buzuba Mawoola
Bwabili 7
Bwane 7
Mujibelo 3
Mawoola Oonse Kwaasanganya:17
Mazuba Otatwe Mukati Kansondo Alimwi a Munsondo
Buzuba Mawoola
Muhhulo 5
Bwatatu 5
Bwasanu 5
Munsondo 2
Mawoola Oonse Kwaasanganya:17
Kumangolezya Mazuba Obile Mukati Kansondo Alimwi Akumamanino Aansondo
Buzuba Mawoola
Muhhulo 3
Bwatatu 3
Mujibelo 8
Munsondo 3
Mawoola Oonse Kwaasanganya:17
Amulibambile Mulongo Wanu Wabupainiya Bwaciindi Coonse
Buzuba Mawoola
Muhhulo
Bwabili
Bwatatu
Bwane
Bwasanu
Mujibelo
Munsondo
Mawoola Oonse Kwaasanganya:17