Amulibambile “Kucita Cintu Ciluzi Coonse”
1 Jesu naakatalika mulimo wakukambauka mupya, wakatola ciindi cili mbocibede kupa malailile kuli basikwiiya bakwe. (Mt. 10:5-14) Nokuba kuti toonse tujisi bubi, ikubelesya buyo maminiti masyoonto kutegwa tulibambile katutanatalika mulimo wakuŋanda aŋanda, kuyoopa kuti tuzwidilile.—2 Kor. 9:6.
2 Mbokulibambilwa: Ikuti katwaazyi kabotu makani aali mumabbuku ngotuyanda kwaabila bantu, kulibambila kwesu kunooli kabotu. Alimwi tweelede kuyeeya kujatikizya bantu bali mucilawo cesu. Ino mmapenzi nzi aabakatazyide? Ino mmakani nzi aabukombi ngobasyoma aakonzya kubuka? Tulakonzya kuvwuntauzya nzila mbotukonzya kwaatalika makani mu Mulimo Wesu wa Bwami, alimwi amubbuku lya Kukambitsirana za m’Malemba kutegwa tujane twaambo.
3 Ikuswiilila kapati nozicitwa zitondezyo mu Muswaangano wa Mulimo akwalo kuyootugwasya. Twaakuzizyiba kabotu nzila zyakubelesya nzyotulibambila, tunootola buyo ciindi cisyoonto kulibambila. Nokuba boobo, ciindi coonse katutanaunka mumulimo, ikuti katuyeeya mbotuya kwaamba akuzumanana kulondola nzila eeyo, tuyooba baabo bacibwene kumutwe. Alimwi tweelede kubona masimpe kuti kabbeeke kesu kalijisi mabbuku oonse ngotuyanda kuyoobelesya.
4 Ino ncinzi ciyootugwasya kuyeeya nzila njotuyanda kuyoobelesya? Kwaambaula cakupozya notulibambila njenzila imwi iigwasya kutegwa nzila eeyo ikkalilile mumizeezo. Ibamwi cilabagwasya kwiinduluka nzila eezyo ciindi nobacita ciiyo camukwasyi. Ibambi cilabagwasya kwiilemba mubufwaafwi akapepa nzila eeyo njobayanda kubelesya, eelyo akubbida kwiilanga kabatanasika aŋanda yamuntu.
5 Ncokugwasya: Kulibambila kabotu kupa kuti tubeleke cabusungu kapati alimwi akuukkomanina mulimo. Kulatugwasya kwaambaula cakukkazika moyo alimwi cakutazyangama twasika aŋanda yamuntu. Tuyoobikkila maano kapati kuli mukamwini ŋanda ikutali mbotuyoomwaambila makani. Kunze lyaboobo, ikwaazyiba kabotu makani aali mubbuku kuyootugwasya kuba basungu notulyaabila bbuku eelyo kumuntu.
6 Magwalo atukulwaizya kuba bantu balibambilide “kucita cintu ciluzi coonse.” (Tit. 3:1) Ino ncintu nzi cimbi ciluzi ciinda kukambauka makani mabotu? Ikulibambila kabotu kuyootondezya kuti tulamulemeka mukamwini ŋanda uuzumina kuswiilila alimwi a Jehova, Leza ngotwiiminina.—Is. 43:10.