Amwaabelesye Mamagazini mu Mulimo Wenu
1, 2. Mbuti mamagazini a Ngazi Yamulindizi alimwi a Galamukani! mbwaabajatikizya bantu?
1 “Alakkomanisya, ngaaciindi ceelede, alakulwaizya.” “Mmagazini aakondelezya kapati kwiinda ngondakabalide mubuumi bwangu.” Ootu twaambo tulapandulula kabotu-kabotu mbobalimvwa babali bamagazini a Ngazi Yamulindizi alimwi a Galamukani! nyika yoonse mboizulwa. Ncobeni, mamagazini eesu asinizya kuba zibelesyo zigwasya kapati mukusikila “bantu boonse” amakani mabotu.—1 Tim. 2:4.
2 Mwaalumi umwi wakali kuyandisya zyamakwebo, wakatambula magazini ya Galamukani! yakajisi mutwe wamakani wakamukkomanisya. Kumbele, wakabala magazini yeendela antoomwe ayeeyi ya Ngazi Yamulindizi, yalo yakajisi cibalo cakamukulwaizya kulanga-langa lusyomo ndwaakajisi kuzwa kubwana lwakuti Leza uli Mubutatu. Kwiinde buyo myezi iili cisambomwe wakabbapatizyigwa. Aumwi mwaalumi wakali kutambula mamagazini lyoonse pele tanaakali kwaabala. Kulubazu lumwi, mukaintu wakwe wakali kukaka kukanana a Bakamboni pele wakali kwaabala mamagazini ngaakali kutambula mulumi wakwe. Icisyomezyo camu Bbaibbele icaamba zya nyika yaparadaiso iyookalwa abantu baluleme cakamunjila mumoyo. Mukuya kwaciindi, walo, mwanaakwe musankwa, amusyoonto wakwe mukaintu bakaba babelesi ba Jehova.
3. Mbubotu nzi buliko mukwaabila mamagazini kaali obile?
3 Amwaabile Kaali Obile: Mbuli mbokutondezyedwe muzikozyanyo zili atala, tatukonzyi kuzyiba muntu uuti kabale mamagazini eesu naa kuzyiba icitiikabape luyandisyo. (Muk. 11:6) Aboobo, cilagwasya kwaabila Ngazi Yamulindizi a Galamukani! kaali obile, nokuba kuti bunji bwaziindi twaamba buyo kujatikizya magazini yomwe ciindi notwaabila. Muziindi zimwi inga caba buyo kabotu kwaabila mamagazini eesu ayindene-indene aciindi comwe.
4. Mbuti mbotunga twabikka bubambe bwakutola lubazu mukumwaya mamagazini?
4 Cilagwasya kubikka buzuba bomwe mumvwiki bwakutola lubazu mumulimo wakwaabila mamagazini. A Kalendala ya 2005 ya Mboni za Yehova, buzuba bwa Mujibelo bulibikkidwe kuba “Buzuba bwa Magazini.” Masimpe, mbwaanga bukkale bwakubusena ooko naa bukkale bwamuntu umwi aumwi buliindene, ibamwi inga babikka buzuba bumbi kutegwa bakaabile buyo mamagazini. Sena kwaabila mamagazini ncibeela camulongo wenu wazyakucita amvwiki?
5. Mbukkale buli buti bwakwaabila mamagazini mbotweelede kubikkila maano, alimwi ncinzi cikonzya kutugwasya kucita oobo?
5 Amulibikkile Mbaakani: Ikulibikkila mbaakani yakwaabila mamagazini amwezi kulakonzya kumugwasya kubikkila maano kukwaabila mamagazini. Sena kuli bantu mbomutolela mamagazini lyoonse? Sena mulaabila mamagazini kuli baabo mbomujana mumulimo? Sena inga mwaabila mamagazini mumulimo wamumugwagwa, mucilawo camakwebo, alimwi amumasena aabuleya? Sena mulatoleela mamagazini ciindi nomuli alweendo, nomuya kukuula zintu, alimwi anomuya kukubona baabo mbomwakasyomezya kuti muyakuboola? Amucibelesye kabotu ciindi cili coonse cikonzya kujanwa kugwasya bamwi kuti bagwasyigwe a Ngazi Yamulindizi alimwi a Galamukani!
6. Mbuti mbotukonzya kwaabelesye kabotu mamagazini eesu aakaindi?
6 Alimwi inga twalibikkila makanze akwaabila mamagazini aakaindi ngotujisi. Nokuba kuti mamagazini tanaabilwa kakwiindide kale mwezi omwe naa yobile kweelana adeeti iili amagazini, mulumbe uuli mumo uciyandika. Amwaabile kubantu aabo bali aluyandisyo. Kutuulunzuma twabantu, mamagazini a Ngazi Yamulindizi alimwi a Galamukani! aba “majwi aambwa kuciindi ceelede.” (Tus. 25:11) Atwaabelesye kutegwa tugwasye tuluunzuma twabantu atumbi kuzyiba alimwi akubelekela Jehova.