Amusale Zibalo Izigama Zintu Nzyobayandisisya Kumvwa Bantu
1 Mbubwena mbuli basibuta ibaigamika kabotu-kabotu myuumba yabo, basikumwaya bambungano banji alimwi abapainiya balimukuzwidilila kapati mukubelesya zibalo zimwi zyamu Ngazi Yamulindizi alimwi a Awake! ikubandika zintu bantu bamuzilawo mobabelekela nzyobayandisisya kumvwa. Balabaziba bantu banga balayanda kubala zibalo zimwi mumamagazini. Mbuti mbobacicita eci?
2 Cakusaanguna balaibala magazini yomwe-yomwe kuzwa kumatalikilo kusikila kumamanino. Mpoona balalibuzya kuti, Mbantu nzi banga bacikkomanina cibalo cimwi acimwi? Mpoona balasoleka kuswaya bantu mbobayeeyela kuti inga bakukkomanina kubala cibalo camumagazini eco. Ciindi nobalangila kuti magazini eyo iyooyandwaa bantu banji mucilawo cabo, balaayungizya maoda aabo.
3 Mamagazini Eesu Alalemekwa Kapati: Muntu umwi uutambula mamagazini eesu kwiinda mukulembya uubeleka munkamu iimwaya magazini yakucisi ca Nigeria iibalwa kapati muzisi zinji, kujatikizya magazini ya Awake! wakati: “Ndamulumbaizya kujatikizya magazini iyiinda mamagazini woonse mukupa lugwasyo kubuleya.” Umwi muntu uuyandisisya kubala mamagazini eesu wakati: “Taziliboteli ngale zyabusongo busumpukide cini-cini! Kwiina makani aandikkomanisya ngonditajani kaabandikidwe mumagazini imwi ya [kumwaya kwamagazini eyi].”
4 Mamagazini abandika zintu zisiyene-siyene, kubikkilizyaa Bbaibbele, zicitika zyamunyika, mapenzi aamumikwasyi, mapenzi aabukkale, makani aansiku, sayaansi, banyama amasamu, kwaamba buyo zisyoonto. Muntu amuntu ulayandisisya kubala cintu kuti kacijatikizya zintu nzyayanda, bukkale bwakwe naa mulimo wakwe. Mbwaanga tukananaa bantu basiyene-siyene, umwi aumwi kajisi nzyayanda amapenzi aamugeme, ikusala zibalo izinga zyagama muntu amuntu ngotuswaangana anguwe inga kwagwasya kapati.
5 Amubone cakacitika ciindi mulembi wapepa lyamakani nobakamusiila imagazine ya Awake! ya September 8, 1996 Bakamboni bobile. Wakalemba kuti: “Kanditana akwaamba kuti nsiyandi, umwi akati kabo wakati: ‘Kuli cibalo caamba Bansame baku Amelika. Tulizyi kuti nzinji nzyomwalemba kujatikizya makani aaya.’” Wakaitambula magazini ilya, mpoona ciindi naakali kukoboka, wakabala makani aa Bansame, elyo wakazikuzumina kuti cibalo eco “cakali kwiininizya kapati” alimwi “cakali camasimpe cini-cini.”
6 Nzintu nzi Nzyobayandisisya Kumvwa Bantu Mucilawo Canu? Ncinzi ncomwakabona cili mumamagazini mumyeezi yaonoono cinga cakkomanisya basizintoolo abantu bayiide mucilawo canu naa cinga cakkomanisya basimukobonyoko, mbomubeleka limwi abasicikolonyoko? Ncinzi cinga cakkomanisya basimilawo, bamayi, basikulaya mikwasyi azikolo abakubusi, basikubuzigwa twaambo twabukkale, ibapa lulayo mubukkale alimwi abahaazibwene mumisamu yabusilisi? Kuyeeya bantu mbomukambaukila ciindi nomulanga-langa magazini imwi aimwi kulamugwasya kujana nzila zibotu zyakumwaya jwi lyakasimpe.
7 Amuzibe kabotu-kabotu naa mbaani akati kabantu mbomupilukila alimwi ambomucita limwi makwebo ibanga balaakkomanina mamagazini aa Ngazi Yamulindizi a Awake! mapya. Mpoona amusoleke acanguzu kubasikila. Amubasikile bantu banji mbomukonzya amamagazini aaya aagwasya kapati.
8 Amube Aambaakani Yakumuuya: Myaka misyoonto yainda, imuntu umwi iwakali kuyanda kuyaambele muluzibo lwamilimo wakatambula magazini ya Awake! yakajisi mutwe wamakani wakamukkomanisya. Pele, oyu muntu mukombi alimwi wakabala amagazini yeendela antoomwe ayeeyi ya Ngazi Yamulindizi, iyakajisi cibalo cakamukulwaizya kuti alange-lange lusyomo lwakwe ndwaakajisi kuzwa kubwana lwakuti Leza uli Mubutatu. Kwiinde buyo myeezi iili cisambomwe, wakabbapatizigwa! Aboobo, muteenkeenki kunjizya basikubala bamamagazini eesu mumibandi yamu Magwalo. Mulakonzya kubatondezya ibroshuwa ya Ncinzi Leza Ncayanda Kulindiswe? akubasyomezya kunikubandikwa ciiyo comwe lyoonse nomupilukila amamagazini mapya.
9 Mwezi wa May ngowamamanino mumyezi yobile yakumwaya kwakulembya. Kuli nzila zinji zyakujana bantu bayanda kulembya mumwezi. Nzila imwi njakukulwaizya basikwiiya Bbaibbele besu abamwi batondezya luyandisisyo kuti balembye. Mikwasyi inga yakulwaizigwa kuti omwe-omwe mumukwasyi alembye Ngazi Yamulindizi ikutegwa kabalibambila kabotu ciiyo ca Ngazi Yamulindizi. Alimwi tweelede kulisungula kwiiya Bbaibbele abantu balaaluyandisisyo. Mulakonzya kubatondezya ibroshuwa ya Ncinzi Leza Ncayanda Kulindinywe? akubasyomezya kunikubandika ciiyo comwe lyoonse nomubaswaya. Alimwi mutalubi kuti lyoonse nomusoleka kugwasya bantu bambi banji kubala mamagazini eesu, mulimukutuma ‘zilyo zyanu atala lyamaanzi.’ Mukuya kwamazuba, mulakonzya kuzwidilila mukujana bantu batikabe basikwiiyama kumbele.—Muk. 11:1, 6.