Sena Mamagazini Mulaabala?
1 Ikujatikizya mamagazini eesu bamishinali bamwi banabukwetene mu Afulika bakaluula kuti: “Ngazi Yamulindizi itugwasya kuti katupakamane lyoonse munzila yakumuuya mucilawo cesu ncotubelekela. Tulakulwaizigwa akuyumizigwaa magazini yomwe-yomwe.” Sena andinywe mulalumba kapati kujatikizya mamagazini eesu? Alimwi sena andinywe mulayandisisya kwaabala?
2 Citola ciindi cili mbocibede ikulibambila ziiyo zyamumagazini zyalo izikonzyeka kubala mumaminiti masyoonto buyo. Mbwaanga mulikazyi kaambo aka, sena zibalo azifwanikiso muyooile kuzilanga-langa cakufwambaana akwiinda naa kwiile kubala cibalo camukkomanisya muziindi? Ikucita kwiinda waawo kwaamba kuti tuli basongo. Tweelede kusitikizya ikubala akulanga-langa zibalo zyoonse zili mumamagazini eesu oonse. Imagazini ya Ngazi Yamulindizi nimagazini iitugwasya kapati kujatikizya cakulya cakumuuya icipegwaa ciindi ceelede. Imagazini ya Awake! ijisi zibalo zikondelezya alimwi iziyiisya kujatikizya makani aasiyene-siyene. Nzyotwiiya kwiinda mukubala mamagazini aaya tazituyumyi buyo munzila yakumuuya pele alimwi zitucitya kuti tulibambile kabotu kutola lubazu mumulimo. Ikuti twabikkila maanu kukulibalila, tuyooba basungu ikwaabila bamwi mamagazini aaya.
3 Mbomunga Mwayaambele Muziyanza Zyakubala: Sena inga tamukonzyi kucita kabotu kwiinda waawo mukubala mamagazini lyoonse? Nzeezyi inzila zyobile izibagwasya banji. (1) Amucite bubambe bwakubala bwalyoonse. Kwiinda mukubikkaambali imaminiti aali 10 naa 15 buyo abuzuba kuti mubale, muyoogambwa ibunji bwazibalo nzyomunga mwabala mumvwiki. (2) Amujane nzila yakuzumanana kuyeeya zintu nzyomwabala. Ambweni mulakonzya kukkwenyuna kumatalikilo aacibalo comwe-comwe ncomwakamanizya kubala. Ikuti tiimwacita obo, mulakonzya kwiindwa kubala zibalo zimwi noiba magazini yoonse mbwiibede. Cilayandika kapati ikubaa bubambe bwaciindi cakubala ibukonzyeka kulindinywe alimwi akubutobela.—Amweezyanisye Ba-Filipi 3:16.
4 “Muzike musyomesi uucenjede,” cabusongo watobelezya kucinca kwaziindi kwiinda mukumwaya zibalo izyeendelana azintu zini-zini nzyobayandika bantu. (Mt. 24:45) Masimpe, imamagazini ajatikizya maumi eesu. Ikuyaambele kwesu munzila yakumuuya ikapati kweendelezyegwaa bubotu bwaziyanza zyesu zyakubala zyateokrasi. Izilongezyo zinji zyakumuuya zyabambilwa baabo ibabikkaambali ciindi kuti babale mamagazini oonse.