Mamagazini Aambilizya Bwami
1 To Bakamboni ba Jehova, tulizizyilwe kapati akaambo kakukambauka kwesu nkotucita cabusungu kujatikizya Bwami bwa Leza. Imamagazini aa Ngazi Yamulindizi alimwi a Galamukani! ngotumwaya abeleka mulimo mupati mukugwasya ituulunzuma twabantu kwiiya makanze aa Leza. Imulumbe ngwaajisi mmakani mabotu meni-meni, nkaambo waambilizya Bwami bwa Leza bwakujulu kuti mbobulangizi bulikke bwabantu.
2 Imamagazini alabandika zintu iziyandika kubantu—ikujatikizya mbobalimvwa, zyabukkale alimwi azyakumuuya. Mbwaanga bukkale bwamukwasyi buyaabunyongana koonse-koonse, imamagazini aa Ngazi Yamulindizi alimwi a Galamukani! alimukugwasya bantu ikukondezya maumi aabo kwiinda mukubatondezya mbobanga batobela njiisyo zya Bbaibbele. Tuyookkomana ikumwaya tupepa twakulembya kwa Ngazi Yamulindizi mu April a May.
3 Alayandwa a Bantu Banji: Mamagazini aa Ngazi Yamulindizi alimwi a Galamukani! alajanika mumilaka iikonzya kubalwaa bantu bamunyika yoonse mbwiizulwa. Akaambo kaceeci, imamagazini esu alidumide kapati. Ntootu twaambo tumwi tucitya kuti bantu kabaayandisisya:
◼ Mbwaanga mamagazini aasyomeka alimwi aamba kasimpe, alatondezya munzila iisalala kwiimpana kuliko akati kabubotu abubi.
◼ Apa bulangizi bwaparadaiso iiluleme iiboola, ibuzwa mucisyomezyo ca Leza cakuti uyooyendelezya nyika a Bwami bwakwe.
◼ Kuli mitwe yamakani iitalivwulili iikananwa, yalo iikkomaninwaa bantu babukkale boonse amisyobo.
◼ Izibalo nzifwaafwi, zilayiisya, nzyakasimpe alimwi kwiina nozitongooka bamwi alimwi tazileki kwaamba zyakasimpe.
◼ Izifwanikiso zyeebeka zikulwaizya bantu kwaayanda mamagazini aaya, alimwi taakatazyi kubala nkaambo alembedwe munzila nguba-uba.
4 Amulibambile Mumiyeeyo Yanu: Ikuzwidilila ikulembya alimwi akumwaya mamagazini kanji-kanji kuyaamaa busungu bwesu mukulibambila makani esu aantalisyo, ikujana ciindi alimwi amulimo wesu wakukambauka. Imizeezo iigwasya yakapegwa mu Mulimo Wesu Wabwami wa September 1995 alimwi awamu April 1992, ilakonzya kutugwasya naa twayiinduluka akwiibelesya.
5 Amuzizibe Kabotu Zili mu Mamagazini: Nomubala magazini yimwi aimwi, amuyeeye muntu uunga wayanda kulembya. Amujane twaambo tumwi naa magwalo ngomunga mwabelesya mumakani aanu. Amujane mubuzyo ngomunga mwabuzya kutalisya mubandi akubusya kuyanda mucibalo eco.
6 Makani Aanu Aayendelane Abube Bwamuntu: Amulibambile makani aantalisyo aatakatazyi, aanyoneka mwajana mwaalumi, mukaintu, mucembele naa mukubusi, imuzyibe naa ngomutazyi.
7 Lyoonse Kamulibambilide Kukulwaizya Kulembya: Ikuti naa kulembya kwakakwa amumwaye mamagazini. Mbwaanga mamagazini alakonzya kuyumunwa kabotu mucibbeeke, mucikwama, nomuba munkomo, tulakonzya kuyumuna amwi notuli mulweendo naa notuula zintu. Amwaamwaye ciindi nomukanana aabasazinyoko, basimukobonyoko, mbomubeleka limwi, basicikolonyoko a bamayi.
8 Amutondezye kuti Mulaakkomanina Mamagazini: Kwiina naajujuka. Ikubaa kaindi kwiina nokucesya mulumbe ngwaajisi. Aino, ikuti twasoleka kumwaya mamagazini oonse ngotubweza, imamagazini aakaindi taayelede kuvwuzyanya aabusena mpotwaayoboda.
9 Amujane Ciindi Cibotu Cakukambauka Nkomubelekela: Mucizi umwi wakabikka mamagazini ayiindene-indene aatebule mpabelekela ikutegwa mbocibeleka limwi baabone banikwiinda. Mafwumina ngoonaayo, imamagazini oonse akamana kumwaigwa. Mbocibeleka limwi ibanji bakatondezya luyandisisyo lwini-lwini, alimwi wakakonzya kumwaya tupepa twakulembya ituli 18.
10 Izilawo Zyamakwebo Nzibotu: Notucita bukambasi bwakucintoolo acintoolo, imutajaniki bantu musyoonto. Ibunji bwabasimakwebo balaabulemu. Amubakulwaizye kulembya. Ikuti naa tabalibambilide kulembya, amubakulwaizye kubweza mamagazini mapya aa Ngazi Yamulindizi a Galamukani!, ibanji balaatambula mamagazini cakukondwa. Amumwaye mamagazini aayendelana amusyobo wamakwebo ngomwajana.
11 Momusiya Mamagazini Lyoonse Mulangilwa Zibotu: Mbwaanga mamagazini alamwaigwa ziindi zyobile naa comwe mwezi amwezi, cilayandika kupilukila kubantu ibakaabala akubasiila mapya. Tweelede kucita nyendo zyakupilukila lyoonse, ikutali buyo kuya kumwaya mamagazini pele alimwi akusololela luyando lwamuntu mu Bbaibbele. Imusiigwa mamagazini lyoonse mmasena mabotu munga mwajanika ibayanda kulembya alimwi aziiyo zya Bbaibbele.
12 Amubelekesye mu April amu May: Mumwaka wamulimo wa 1997, kwakaba kuyaansi a 19% mumulimo wakulembya. Mbwaanga mamagazini eesu alagwasya kapati mukwaambilizya Bwami, tweelede kubona kwaamba kuti twakulwaizya bantu kulembya kufwumbwa coolwe nocaboneka. Imyeezi ya April alimwi a May ayibe yaalubazu mumulimo wakulembya akumwaya mamagazini buyo aa Ngazi Yamulindizi!