Ino Mbaani Bakonzya Kucikkomanina Cibalo Eeci?
1. Twanoobala Ngazi Yamulindizi naa Sinsimuka!, ncinzi ncotweelede kubikkila maano, alimwi nkaambo nzi?
1 Mamagazini aa Ngazi Yamulindizi alimwi a Sinsimuka! alembelwa bantu boonse munyika. Aboobo, zibalo zijanika mumo zijisi twaambo tunji twiindene-indene. Twanoobala cibalo cimwi acimwi mumagazini yesu iitugeme, tweelede kuzyiba bantu ibakonzya kucikkomanina cibalo eeco, mpoonya akuba ambaakani yakwaabila magazini eeyo kubantu aabo.
2. Ntwaambo nzi tubandikwa mumamagazini eesu tukonzya kubakkomanisya bantu?
2 Sena kuli Ngazi Yamulindizi yaino-ino yaamba kaambo kamwi kamu Bbaibbele nkomwakabandikide amuntu ngomubeleka limwi? Sena kuli cibalo cijatikizya buumi bwamumukwasyi cikonzya kukkomanisya babbululu banu? Sena kuli mulongwe ngomujisi uuyanda kuunka kucisi cimwi icilembedwe mu Sinsimuka!? Sena kuli magazini imwi iikonzya kukkomanisya basimakwebo naa babelesi bamfwulumende bamwi bamucilawo canu? Mucikozyanyo, magazini iyaamba buyumuyumu mbobajana bacembeede inga baikkomanina bantu kwaambisya ibali mumaanda mobalanganya bantu bacembeede. Baiminizi bamilawo amapulisa inga baikkomanina magazini iijisi cibalo caamba zyabugwebenga.
3. Amwaambe cakuluula citondezya bubotu bwakwaabila mamagazini kubantu mbotuyeeyela kuti inga bazikkomanina zili mukati?
3 Bubotu Bujanika: Banabukwetene bakucisi ca South Africa nibakatambula magazini ya Sinsimuka! yamu October-December 2011, iyakajisi mutwe wakuti “Mbomukonzya Kukomezya Bana Babikkila Maano,” bakatuma fooni kuzikolo zili 25 izili mucilawo cambungano yabo. Zikolo zili 22 zyakazumina kutambula mamagazini akupa basicikolo babo. Banabukwetene abamwi bamucisi eeci bakacita mbubwenya oobo mpoonya bakaabila mamagazini kuzikolo zili mucilawo cabo. Bamayi bakucikolo cimwi bakayeeya kunoobelesya magazini eeyo mupulogilamu yabo yakubala yansondo ansondo. Banabukwetene aaba bakaamba cakuluula eeci kumulangizi wabbazu. Mpoonya wakakulwaizya basikumwaya bali mumbungano zili mubbazu lyakwe kuti basikile zikolo zili muzilawo zyabo. Ofesi yamutabi yakatambula maoda aambi manji aamagazini eeyi cakuti yakayandika kuti isimbwe alimwi.
4. Nkaambo nzi ncotweelede kwaabila mamagazini kubantu banji?
4 Mamagazini eesu aamba kaambo ncozicitika zyintu zicitika mazuba aano alimwi akugwasya bantu kubikkila maano ku Bbaibbele alimwi aku Bwami bwa Leza. Ngamamagazini alikke munyika iino aamba “makani aalufwutuko.” (Is. 52:7) Aboobo, tweelede kwaabila kubantu banji. Nzila mbotu yakucita boobo nkwiinda mukulibuzya kuti, ‘Ino mbaani bakonzya kucikkomanina cibalo eeci?’