Amumutondezye Cibalo Comwe, Pele Amumusiile Mamagazini Oonse Obilo
Mamagazini eesu oonse obilo alijisi twaambo tukkomanisya twiindene-indene. Muciindi cakutondezya zibalo zinji aŋanda imwi aimwi, inga cabota kubandika buyo kaambo komwe. Kuti katubikkila maano alimwi katutuzyi kabotu twaambo tuli mumamagazini, tulakonzya kusala kaambo komwe kuzwa mu Ngazi Yamulindizi naa mu Sinsimuka! ikakonzya kumukkomanisya mukamwini ŋanda. Mucikozyanyo, kuti naa twabona zidooli zyabana kazyaalabene aŋanda, tulakonzya kusala kubelesya cibalo cijatikizya buumi bwamumukwasyi. Kuti twajana mwaalumi, inga twasala kumutondezya kaambo kamwi nkobakkomanina kapati bamaalumi banji, mbuli mfwulumende iili kabotu. Nokuba kuti tulakonzya kubandika buyo kaambo komwe, tweelede kumusiila mamagazini oonse obilo mukamwini ŋanda kuti naa watondezya luyandisisyo.