Cilakonzya Kuubauba Kutalisya Ziiyo zya Bbaibbele Abantu Mbotusiila Mamagazini Lyoonse
1. Nkaambo nzi mbunga ya Jehova kuzwa kaindi ncoyali kukulwaizya basikumwaya kuba abantu mbobasiila mamagazini lyoonse?
1 Bantu banji balawayawaya kwiiya Bbaibbele andiswe, pele balakkomana kubala mabbuku eesu. Aboobo, mbunga ya Jehova kuzwa kaindi yali kukulwaizya basikumwaya kuba abantu mbobasiila mamagazini lyoonse. Ikuti kanji-kanji muntu kabala mamagazini eesu, ulaba aluyandisisyo lwa Jwi lya Leza. (1 Pe. 2:2) Mukuya kwaciindi, cintu cimwi ncaabala cilakonzya kumukkomanisya akumupa kuzumina kwiiya Bbaibbele.
2. Mbuti mbotukonzya kubapa kuba aluyandisisyo aabo mbotusiila mamagazini lyoonse?
2 ‘Amutilile’ Mbuto Zyakasimpe: Muciindi cakumusiila buyo mamagazini mukamwini ŋanda, amubandike akupanga cilongwe anguwe. Eeci ciyootugwasya kuzyiba bukkale bwakwe, zyintu nzyayandisisya, alimwi anzyasyoma, calo cikonzya kutupa kuti tubandike anguwe cabusongo. (Tus. 16:23) Kamulibambila lyoonse nomucita nyendo zyakupilukila. Ikuti kacikonzyeka, mubufwaafwi amwaambe kaambo komwe alimwi alugwalo lujatikizya kaambo aako kuzwa mumagazini, kutilila mbuto iili yoonse yakasimpe iili mumoyo wakwe. (1 Ko. 3:6) Amulembe buzuba mbomwaswaya, bbuku ndyomwasiya, twaambo ntomwabandika alimwi amagwalo ngomwabala.
3. Ino tweelede kupilukila ziindi zyongaye kubantu aabo mbotusiila mamagazini lyoonse?
3 Ino Tweelede Kupilukila Ziindi Zyongaye? Tweelede kupilukila ciindi comwe amwezi kubatolela mamagazini mapya aabo mbotusiila lyoonse. Nokuba boobo, ciya buyo abukkale bwesu alimwi aluyandisisyo lwamuntu ooyo, tulakonzya kupilukila ziindi zili mbozibede. Mucikozyanyo, kwainda nsondo yomwe naa zyobilo kuzwa ciindi notwakasiya mamagazini, tulakonzya kupilukila akwaamba kuti, “Ndainda buyo kuti ndimutondezye kaambo kamwi kali mumamagazini ngondakamusiila.” Eeci ciyoopa kuti muntu abe aaluyandisisyo lwakubala cibalo eeco. Ikuti naa wakacibala kale cibalo eeco, tulakonzya kumubuzya mbwaakalimvwa, mpoonya akucibandika antoomwe mubufwaafwi. Alimwi kuti kaakkomanina kwaabala mabbuku eesu, tulakonzya kupilukila akumutondezya katulakiti, broshuwa, naa bbuku ndyotwaabila mwezi ooyo.
4. Ciindi aciindi, ncinzi ncotukonzya kucita kutegwa tubone naa aabo mbotusiila mamagazini lyoonse inga bazumina kwiiya Bbaibbele?
4 Mutalindili mukamwini ŋanda kumulomba kuti kamumuyiisya. Amumulombe ndinywe. Nokuba kuti wakalikakide ciiyo ca Bbaibbele, ciindi aciindi tulakonzya kumutondezya cibeela camu Ngazi Yamulindizi cakuti “Mibuzyo Yamu Bbaibbele Yaingulwa” akubona naa inga wazumina kubandika andiswe. Ambweni inga twatalisya ciiyo mumaminiti masyoonto. Nokuba boobo, ikuti katutakonzyi kutalisya ciiyo, tulakonzya kuzumanana kunoomusiila mamagazini kutegwa abe aaluyandisisyo.