“Ikuminza Mbuto zya Bwami” Mumasena Imusiigwa Mamagazini
1 Lwiimbo 133 mubbuku lya Chichewa lya Amwiimbile Jehova Ntembauzyo lulaamutwe wakuti “Ikuminza Mbuto zya Bwami.” Luzwa kucikozyanyo ca Jesu icikozyanisya mulimo wakugwasya bamwi kuba basikwiiya kukuminza mbuto. (Mt. 13:4-8, 19-23) Imajwi amulwiimbo aamba kuti: “Ikuvwula kwambuto zyanu iziwidaa vwu ibbotu/Kanjikanji kuyeeme aalindinywe.” Ino inga twayungizya buti busungu bwesu cakuzwidilila mumulimo? Inzila imwi njakubaa masena nkotusiya mamagazini alimwi akuzumanana mumasena aayo.
2 Imakanze manji alakonzya kuzwidilila kwiinda mukubaa masena imusiigwa mamagazini. (1) Ikuswaya lyoonse kwainda mvwiki zyobile kucitya kuti mukonzye kupanga cilongwe amuntu oyo uuyanda kwiiya. (2) Muntu ooyo lyoonse mulamutolela imakani aafwutula aajanika mu Ngazi Yamulindizi alimwi a Awake! (3) Kwiinda mumibandi yanu mulakonzya kugwasya muntu oyo kuyandisya kasimpe ka Magwalo, ikukonzya kusololela kuciiyo ca Bbaibbele.—1 Pet. 2:2.
3 Mbokutalikwa Nzila Imusiigwa Mamagazini: Kufwumbwa ciindi muntu umwi naatondezya luyandisisyo mumamagazini, amupandulule kuti izibalo izilibeledelede zilajanika mumagazini imwi aimwi akuti inga mwakkomana kunoomutolela lyoonse. Mwazwa waawo, amulembe izina lyamuntu oyo akkeyala, ideeti nomwamuswaya, imadeeti aamamagazini ngomwamusiila, icibalo cakabelesyegwa alimwi amitwe yakamukkomanisya muntu oyo.
4 Mulakonzya kutalisya nzila eyi kakuli buyo bantu basyoonto. Mpoonya amukanze kuvwuzya bantu kwiinda mukwaabila bambi mamagazini. Imasena momusiya mamagazini mbwaavwulila, mulakonzya kwaacimbaula mbuli cilawo ikutegwa cimuubile-ubile kwaasika oonse. Amwaambe kabotu-kabotu makani aajatikizya mamagazini ngomwakasiya kumuntu amuntu alimwi abuzuba nomwakaasiya. Amubikkilizye atwaambo kujatikizya mibandi alimwi ambomunga mwazumanana kuyungizya luyandisisyo lwamuntu mukasimpe mukuswaya kutobela.
5 Amubikkilizye Abantu Basimakwebo alimwi Abahaazibwene Mumilimo imwi: Kwabonwa kuti basizintoolo alimwi abahaazibwene mumilimo imwi kanjikanji balangilwa kwaazumina mamagazini eesu lyoonse. Mwaalu umwi mane wakali kusiya mamagazini kumweendelezi wamudolopo mwaakali kukkala. Sikumwaya umwi wakatalisya ciiyo amukamwini kkampani yuulisya mpasya zyakuyasya wamyaka yakuzyalwa iili 80 naakamana kumutolela mamagazini kwamyaka iili kkumi kakunyina kusotauka!
6 Mucizi umwi painiya wakanjila mucintoolo mwaakajana banabukwetene ibatakamutambula kabotu. Pele mbwaanga bakaatambula mamagazini, wakasala kuyungizya banabukwetene aaba aali baabo mbaakali kusiila mamagazini lyoonse. Mukuya kwaciindi, mucizi oyu wakatityompwe kunoobatolela nkaambo tiibakali kumutambula kabotu alimwi tiibakali kumwiingula kabotu neciba ciindi naabuzya mubuzyo uujatikizya mbobayeeya acintu cimwi. Pele mucizi oyu wakapaila kujatikizya makani aaya elyo mukuya kwamazuba wakasiya bbuku lya Kupona Kukabe Kutamani kubanabukwetene aba. Nobakamana kulibala, mukaintu cakukkomana wakati: “Limwi ndakajana kasimpe!” Ciiyo ca Bbaibbele cakatalisigwa alimwi kumbele banabukwetene aaba bakabbapatizigwa. Ncobeni, ikuzumanana kwamupainiya kwakazyala micelo mibotu.
7 Ikucita Nyendo Zyakupilukila: Iciindi nomutambula magazini impya, amuzibale zibalo zyoonse. Amujane twaambo tukonzya kukkomanisya muntu amuntu mumasena momusiya mamagazini. Mpoonya nomwapilukila, mulakonzya kwaamba kuti: “Nondakali kubala cibalo eci, ndakayeeya ndinywe ambocinga camukkomanisya.” Basikumwaya bamisela yoonse balakonzya kukukkomanina ikubaa masena mobasiya mamagazini. Naba mwana musyoonto ulakonzya kwaamba kuti: “Ndakkomana kumubona alimwi. Imamagazini aanu mapya aa Ngazi Yamulindizi alimwi a Awake! akasika. Ndasyoma mulacikkomanina cibalo eci camutwe wakuti . . . ”
8 Amubusye luyandisisyo lwakulangila zibalo ziyootobela kwiinda mukubatondezya kabbokesi kamutwe wakuti “Mukumwaya Kutobela.” Izibalo nozili zeeziya zitobelana kubandika cintu comwe, amupandulule obo alimwi amukulwaizye sikubala ikutaindwa cibeela nociba comwe. Mutalubi kuti ciindi aciindi nomutola mamagazini kumuntu ngomusiila mamagazini lyoonse, ilweendo lwakupilukila lulakonzya kubalwa. Kwiinda zyoonse amuyeeye kuti imbaakani yesu njakucitya kuti tutalisye ziiyo zya Bbaibbele zyaaŋanda kubantu aabo.
9 Kamubaswaya Bantu Mbomusiila Mamagazini Lyoonse: Mulakonzya kubasikila bantu nkomusiya mamagazini iciindi cili coonse cikonzyeka—mukati kamvwiki imafwumofwumo, kumazuba, imangolezya naa kumamanino aansondo mwazwa mumulimo waŋanda aŋanda. Ikuti naa mwakakilwa kubasikila bantu nkomusiya mamagazini akaambo kakuciswa naa nkaambo mwakaya kukweendeenda, amwaambile sikumwaya uumbi mumukwasyi wanu naa mumbungano kuti aakaatole mamagazini. Munzila eyo, ibantu aabo mbomusiila mamagazini tabakaindwi naa kwaatambula mukucedwa mamagazini.
10 Inzila imwi yakuminza mbuto zya Bwami nkutola Ngazi Yamulindizi a Awake! kuli baabo mbomusiila mamagazini ciindi coonse. Mbomubayiisya kasimpe kamu Magwalo, mukuya kwamazuba bayooamvwisya majwi aa Bwami akuzyala micelo ya Bwami antoomwe andinywe.—Mt. 13:8, 23.