Ibalangizi Basololela—Imulembi
1 Imulembi wambungano ujisi mulimo mupati wakubona kwaamba kuti “zintu zyoonse buyo zicitwe kabotu akucililana.” (1 Kor. 14:40) Mbwali umwi wabasi Kkomitii Yambungano Yamulimo, nguulanganya kulembelana koonse kucitwa mumbungano alimwi amakani amwi aalembedwe aayandika. Nokuba kuti imilimo yakwe inga taiko kulibonya kapati kuli bambi mbuli yabaalu bambi, imilimo yakwe ilayandika kapati alimwi ilalumbwa.
2 Nokutambulwa magwalo kuzwa ku Sosaiti naa ikumbi, mulembi ulaalanga-langa alimwi ulabona kwaamba kuti ibwiinguzi bwapegwa naa kakuyandika. Nguubona kuti imagwalo oonse aatambulwa abalwaa baalu boonse mpoonya ulaabikka mufailo kuti akalangwe aakuyandika. Ulaalingula mafoomu aakooda mamagazini alimwi amabbuku akwaatuma ku Sosaiti. Nguubalanga cakaanzambwene aabo ibajisi mukuli wakulanga maakkaunti akulembya kwamamagazini alimwi nguulanga-langa makani oonse aajatikizya miswaangano mipati.
3 Mbwaanga mulembi uyandika kutumina lipooti yambungano yamweezi amweezi yamulimo wamumuunda ku Sosaiti kabutanainda buzuba bwacisambomwe bwamweezi, ncintu ciyandika kapati kuti toonse tupe malipooti aamulimo wesu wamumuunda cakufwambaana kumamanino aamweezi omwe-omwe. Mpoonya ulaatumina malipooti aamulimo aali aamakkaadi Aalembwa Zyasikumwaya Aambungano. Sikumwaya umwi aumwi ulakonzya kulomba kubona kkaadi yakwe aalembwa zyamulimo wakwe.
4 Sikumwaya umwi nalonga kuzwa mumbungano naa nalongela mumbungano, mulembi ulalomba naa kutumina kubaalu bambungano iimbi ilugwalo lupandulula sikumwaya ooyo antoomwe akkaadi yakwe Aalembwa Zyasikumwaya Iyambungano.—Mulimo Wesu, pp. 104-5.
5 Mulembi ulaulingula mulimo wabapainiya, ubona kwaamba kuti ibaalu ikapati mulangizi wamulimo waambilwa mapenzi aali woonse bapainiya ngobajisi. Ulabazyibya ibacitya Ciiyo Cabbuku Cambungano kujatikizya basikumwaya ibasotauka mumulimo wamumuunda. Mulembi amulangizi wamulimo mbobalaambele kucita bubambe bwakugwasya baabo ibakacileka kuya mumulimo.—Mulimo Wesu Wabwami, November 1987, p. 1.
6 Mbwaanga twaizyiba kabotu imilimo yamulembi, toonse atubone kwaamba kuti twacita mpotugolela ikugwasya kuubya-ubya mukuli wakwe wabubanzi kutegwa auzuzikizye.—1 Kor. 4:2.