Sena Mulabikkila Maanu Kubona Kuti Kwalembwa Lipooti Iiluzi?
1 Makani manji ngotubala mu Bbaibbele mujanika myeelwe iigaminide, yalo iitugwasya kuzyiba kabotu izintu zyakacitika. Mucikozyanyo, Gideoni abaalumi ibali 300 buyo wakazunda makamu aabasinkondonyina aabana Midyani. (Bab. 7:7) Mungelo wa Jehova wakajaya basilumamba bana Asuri ibali 185, 000. (2 Bam. 19:35) Ilya Pentekoste mu 33 C.E., ibantu basika ku 3,000 bakabbapatizyigwa, alimwi nokwakainda buyo ciindi cisyoonto imweelwe wabasyomi wakayungizyigwa kusika ku 5,000. (Inc. 2:41; 4:4) Kuzwa kumakani aaya, cilisalede kuti babelesi ba Leza bakaindi bakali kubikkila maano ikulemba malipooti oonse alimwi aaluzi.
2 Mumbunga ya Jehova mazubaano tulalaililwa kuti katupa lipooti yamulimo wamumuunda mwezi amwezi. Ikutobela bubambe oobu cakusyomeka kupa kuti cikonzyeke kuweendelezya kabotu mulimo wabukambausi. Malipooti alakonzya kutondezya naa kuli cibeela camulimo cimwi ceelede kubikkilwa maano antela kuli cilawo cimwi camumuunda kuciyandika babelesi banji. Mumbungano, malipooti amumulimo wamumuunda agwasya baalu kubona baabo bakonzya kuyaambele mumulimo wabo alimwi abaabo ibayandika lugwasyo. Alimwi malipooti aatondezya kuyaambele kwamulimo wabukambausi alabakulwaizya bakwesu Banakristo munyika yoonse. Sena mulabikkila maanu kubona kuti kwalembwa lipooti iiluzi?
3 Mukuli Ngomujisi: Sena cilamukatazya kwiibaluka mbomwakabeleka mumulimo wanu kumamanino aamwezi? Ikuti kacili boobo, ino ncinzi ncomutalembeli mbomwamanizyila buyo mulimo wanu wamumuunda ciindi coonse nomutola lubazu? Bamwi babelesya kkalenda antela kabbuku mulembelwa zicitika buzuba abuzuba. Bamwi balabwezelezya akapepa aalembelwa mulimo wamumuunda ikatalembedwe cintu pe. Wamana buyo mwezi, amufwambaane kumupa lipooti yanu mulangizi wanu waciiyo cabbuku. Ikuti kamuyanda, mulakonzya kubikka lipooti yanu mukabbokesi kamalipooti kali mu Ŋanda ya Bwami. Ikuti naa mwaluba kupa lipooti yanu, amufwambaane kumupa mulangizi wanu waciiyo cabbuku muciindi cakulindila kuti amubuzye buya. Ikubikkila maano kupa lipooti yamulimo wanu kutondezya kuti mulabutobela bubambe bwa Jehova akuti muli aluyando kubakwesu ibapedwe mukuli wakubweza alimwi akwaabikka antoomwe malipooti.—Lk. 16:10.
4 Mukuli Ngwajisi Mulangizi wa Ciiyo Cabbuku: Mbwali mweembezi uupakamene alimwi uulanganya, mulangizi waciiyo cabbuku ulabikkila maano kubona mbobabeleka basikumwaya bali mukakamu kakwe mwezi woonse. (Tus. 27:23) Ulizyi naa sikumwaya umwi aumwi ulatola lubazu lyoonse alimwi ulafwambaana kumugwasya ikuti kakuli umwi watatola lubazu mwezi woonse. Iciyandika kanjikanji nkumukulwaizya, kumupa nzila iikonzya kumugwasya antela kumulomba kuti babeleke antoomwe mumulimo wamumuunda.
5 Wamana buyo mwezi, mulangizi waciiyo cabbuku ulabona kuti boonse mukakamu bazuzikizya mukuli wabo wakupa lipooti yamulimo wabo kutegwa mulembi atumine lipooti yambungano iiluzi kuofesi lyamutabi kabutanainda buzuba bwacisambomwi bwamwezi uutobela. Mbouyabumana mwezi, cilakonzya kugwasya kapati ikuti mulangizi wabayeezya basikumwaya mukakamu kakwe alimwi akubona kuti tupepa aalembelwa mulimo wamumuunda nkotuli abusena mpobayiila ciiyo cabbuku. Ikuti kakuli bamwi ibaluba kupa lipooti yamulimo wabo, ulakonzya kubayeezya munzila yeelede alimwi akubakulwaizya kuti balembe.
6 Ikufwambaana kupa malipooti eesu amumulimo wamumuunda kupa kuti tube alipooti iitondezya kabotu mulimo ngotwakabeleka mumuunda. Sena muyoozuzikizya lubazu lwanu kwiinda mukufwambaana kupa lipooti yamulimo wanu mwezi amwezi?