Mbobabikkila Maano Balangizi ba Ziiyo Zyabbuku Zyambungano
1 Ciiyo Cabbuku Cambungano cibambilidwe kuti cigwasye “ikulanganya umwi aumwi kumugama mbuli mbwayaabukomena munzila yakumuuya. . . . Eeci ncitondezyo caluzyalo lwa Jehova alimwi ambwababamba kabotu bantu bakwe.” (om p. 75; Is. 40:11) Imulangizi waciiyo cabbuku ujisi mulimo mupati mukupa lugwasyo luli boobo.
2 Aciiyo Cabbuku: Mbwaanga tukamu twaziiyo zyabbuku ntusyoonto, eeci cipa kuti cikonzyeke kumulangizi waciiyo cabbuku kubazyiba kabotu boonse ibali mukakamu kakwe. (Tus. 27:23) Ikanjikanji kulaba zyoolwe zyakuyanzana antoomwe kacitanatalika ciiyo alimwi anocamana nsondo ansondo. Ikusikila mpouya kumanina mwezi, ulakonzya kubandika amuntu umwi aumwi uuli mukakamu kakwe. Eeci cipa kuti aabo bali mukakamu muciiyo cabbuku kabalimvwa kwaanguluka kumusikila eelyo nobali mumasunko naa nobayandika kukulwaizyigwa.—Is. 32:2.
3 Mulangizi waciiyo cabbuku ulasoleka kubakulwaizya boonse ibali mukakamu kutola lubazu muciiyo. Inzila yomwe njabelesya kucita boobo, nkwiinda mukusololela ciiyo munzila yaluzyalo alimwi nguba-uba. (1 Tes. 2:7, 8) Ulasoleka kujana nzila mbwakonzya kubajatikizya boonse mumubandi kubikkilizya abana. Ikuti kakuli bamwi ibayoowa-yoowa kutola lubazu mukwiingula, ulakonzya kupa lulayo lucitwa ambali kwiinda mukulibambilila limwi ambabo kuti bakabale lugwalo naa kuyooyingula mumuncali umwi. Inzila imwi njakonzya kubelesya, nkwiinda mukubatondezya mbobakonzya kwiingula mumajwi aabo.
4 Ikuti naa ooyo uugwasyilizya mulangizi waciiyo cabbuku kali mukutausi, mulangizi ulacita bubambe bwakuti kasololela ciiyo ciindi comwe kwainda myezi yobile. Eeci cipa kuti mulangizi amulangilile sikumugwasyilizya alimwi akumugwasya munzila imwi. Elo kaka tabuliboteli bubambe oobu ikugwasya bakwesu kucizyiba kabotu kuyiisya!—Tit. 1:9.
5 Mumulimo Wamumuunda: Imukuli umwi mupati ngwajisi mulangizi waciiyo cabbuku, ngwakusololela mumulimo wabukambausi. (My. 27:16, 17) Ulacita bubambe buli kabotu kutegwa nkamu kiijana ciindi cakuunka mubukambausi alimwi ulasolekesya kubagwasya boonse bali munkamu kujana lukkomano mumulimo wabo. (Ef. 4:11, 12) Ikutegwa acikonzye kucita boobo, ulabikka mbaakani yakubeleka amuntu umwi aumwi uuli munkamu mumulimo. Alimwi ubelekela antoomwe a mulangizi wamulimo mukucita bubambe bwakuti aabo bayanda kuyaambele mucibeela cimwi camulimo bagwasyigwe kuli sikumwaya uucibwene kabotu.
6 Mbwali Mweembezi Siluyando: Mulangizi waciiyo cabbuku ulibikkilide maano kulibaabo batola buyo ciindi cisyoonto mumulimo wabukambausi akaambo kabukkale mobabede. Ulabona kwaamba kuti aabo batacikonzyi kubeleka kapati akaambo kakukkomena naa kukompama alimwi abaabo baciswa kapati kwaciindi cili mbocibede antela kulicisa bazibisyigwa kujatikizya bubambe bubazumizya kupa lipooti yamumulimo wamumuunda yamaminiti aali 15 ikuti naa tiibacikonzya kukkwanya woola mumwezi omwe. (Kkomitii Yamulimo Yambungano njiisala baabo beelela mububambe oobu.) Alimwi ulabikkila maano kulibaabo munkamu ibatacisungweede akusoleka kubagwasya kutegwa babukulusyigwe akutalika kubeleka ambungano.—Lk. 15:4-7.
7 Elo tulalumba kaka akaambo kaluyando ndobatondezya balangizi baziiyo zyabbuku! Ikubikkila maano nkobajisi kulagwasya kutegwa “toonse tube abujatane bomwe bwabuzumini . . . abwiime buzulide bwa-Kristo.”—Ef. 4:13.