Amumugwasye Mulangizi Wanu wa Ciiyo Cabbuku Cambungano
1 Ciiyo Cabbuku Cambungano cilamugwasya umwi aumwi wesu. Mwezi wamana twakabandika mbuli mulangizi wa Ciiyo Cabbuku Cambungano mbwazuzikizya mikuli yakwe. Pele, ino zintu zyili buti nzyotukonzya kucita kutegwa tumugwasye akuti aswebo abantu bambi tugwasyigwe?
2 Amujanike Nsondo Ansondo: Mbwaanga tubunga twaziiyo tubambwa abantu buyo basyoonto, cilayandika kapati kuti kamujanika. Amube aciyanza cakujanika nsondo ansondo. Alimwi ncibotu kuti kamufwambaana kusika nkaambo eeci ciyoomugwasya mulangizi kutalika muswaangano munzila iili kabotu naa boonse kabakkede kale.—1 Kor. 14:40.
3 Kwiingula Munzila Iikulwaizya: Inzila iimbi njomukonzya kumugwasya nkwiinda mukulibambila kabotu alimwi akwiingula munzila iikulwaizya. Ibunji bwaziindi, ncibotu kwiingula kaambo kagaminide alimwi eeci cilabakulwaizya bamwi kwiingula. Nomwiingula mutani kumanizyili limwi twaambo toonse ituli mumuncali. Ikuti naa kaambo kamwi mucibalo kamunjila kapati mumoyo, mulakonzya kupa bwiinguzi bwanu kutegwa mutole lubazu mukubotezya mubandi.—1 Pet. 4:10.
4 Ikuti kamujisi coolwe cakubala mincali kutegwa bantu bali munkamu bagwasyigwe, amusungwaale kapati kuzuzikizya mukuli ooyo. Ikubala kabotu kupa kuti ciiyo kacili cibotu alimwi kacikondelezya.—1 Tim. 4:13.
5 Kukambauka Kamuli Nkamu: Mumasena manji mucitilwa ziiyo zyabbuku, kulaswaangana bantu kutegwa baye mumulimo wamumuunda, aboobo ikujanika kwanu kububambe oobu kulamugwasya mulangizi eelyo nasololela mumulimo wabukambausi. Amubelesye bubambe oobu kuba ciindi cibotu cakuyumya cilongwe canu abanyoko bakumuuya alimwi akubakulwaizya.
6 Malipooti Aamulimo Wamumuunda: Ikufwambaana kupa malipooti aanu aamulimo wamumuunda kumamanino aamwezi umwi aumwi ninzila iimbi momukonzya kumugwasya mulangizi wa Ciiyo Cabbuku Cambungano. Mulakonzya kumupa lipooti yanu naa kwiibikka mukabbokesi ikali mu Ŋanda ya Bwami oomo mweelede kubikkwa malipooti aamulimo wamumuunda. Mulembi ulakonzya kubelesya kabbokesi aako kabikkidwe kutegwa aabikke antoomwe malipooti aamulimo wamumuunda aayo ngobaleta balangizi baziiyo zyabbuku.
7 Muyoolumbwa kapati mukubelekela antoomwe kwanu amulangizi wa Ciiyo Cabbuku Cambungano. Kwiinda zyoonse, mulakonzya kusyoma kuti Jehova unooli ‘mumoyo wanu.’—Flp. 4:23.