Mbomunga Mwajana Mpindu Mukabunga Kanu Kamulimo Wamumuunda
1. Ino nimpindu nzi zyabubambe bwa Ciiyo Cabbuku Cambungano ziciliko kwiinda mukabunga kesu kamulimo wamumuunda?
1 Sena kuli mbazu zimwi zya Ciiyo Cabbuku Cambungano nzyomulombozya? Tubunga twakali tusyoonto-syoonto alimwi kwakali kuliiba. Eeci cakali kupa kuti kacuuba-uba kupanga zilongwe zyakali kutugwasya kuyumya lusyomo lwesu. (Tus. 18:24) Mulangizi waciiyo cabbuku wakalituzyi kabotu alimwi wakali kukonzya kutukulwaizya cacigaminina. (Tus. 27:23; 1 Pe. 5:2, 3) Mpindu eezyi nkozicili kwiinda mutubunga twesu twamulimo wamumuunda.
2. Mbuti mbotukonzya kubweza ntaamu yakutalisya zilongwe zikulwaizya kumuuya mutubunga twesu twamulimo wamumuunda?
2 Amubweze Ntaamu: Kanji-kanji tubunga twamulimo wamumuunda tuleelene kukomena ambotwakabede tubunga twaciiyo cabbuku. Kwiinda ‘mukubelekala antoomwe’ abamwi mumuunda, tulakonzya kuba acilongwe ciyumu. (Flp. 1:27) Ino bali bongaye mukabunga kanu mbomwakabeleka kale limwi? Sena inga ‘mwajalula myoyo yanu’ mumbazu eeyi? (2 Ko. 6:13) Kuyungizya waawo, zimwi ziindi tulakonzya kutamba muntu umwi kuti atusangane mukukomba kwesu kwamumukwasyi naa kucakulya. Mumbungano zimwi, tubunga twamulimo wamumuunda tulacincana kusamausya baambi baswaya. Nsondo eeyo njobapedwe, kabunga kalabungana kulya alimwi akukulwaizyanya nokuba kuti mwaambi taacikonzya kujanika.
3. Ino nzyoolwe nzi nzyotujisi zyakuswayigwa abeembezi mukabunga kesu kamulimo wamumuunda?
3 Nokuba kuti lino mbungano ziswaangana buyo ziindi zyobilo ansondo, eeci tacaambi kuti azyalo nyendo zyabweembezi kuli basikumwaya zyeelede kuceya. Balangizi batubunga balibikkidwe mukabunga kamwi akamwi kutegwa kabakulwaizya bakwesu alimwi akubayiisya mumulimo. Ikuti mulangizi wakabunga kanu tanamulombede kuti mubeleke anguwe mumulimo wamumuunda, amumulombe kuti mubeleke anguwe. Kuyungizya waawo, mulangizi wamulimo ulabeleka mumulimo wamumuunda akabunga kambi kumamanino ansondo yomwe mwezi amwezi. Mumbungano muli basikumwaya basyoonto mwalo muli buyo tubunga twamulimo wamumuunda tusyoonto, ulakonzya kuswaya kabunga kamwi akamwi ziindi zyobilo amwaka. Sena mulabamba bubambe bwakuunka mumuunda ciindi naswaya kabunga kanu?
4. (a) Ino miswaangano yamulimo wamumuunda yeendelezyegwa buti? (b) Nkaambo nzi ncotweelede kuyanda kujalula ŋanda yesu kutegwa kaibelesyegwa kucitila miswaangano yamulimo wamumuunda?
4 Kanji-kanji cilagwasya kapati kuti kabunga kamwi akamwi kakaswaangana kalike kumamanino aansondo kulibambila mulimo wamumuunda. Ikuba amasena manji aakuswaanganina kulibambila kuya mumulimo aciindi comwe cilakonzya kubaubila-ubila basikumwaya kuunka kumuswaangano wamumulimo wamumuunda alimwi akucilawo cakukambaukila. Basikumwaya balakonzya kulibambila cakufwambaana akuunka kucilawo cakukambaukila kakunyina kusowa ciindi. Alimwi ncuubauba kumulangizi wakabunga kubalanganya kabotu aabo bali mukabunga kakwe. Nokuba boobo, zimwi ziindi inga kwayandika kuti tubunga tobilo naa twiinda waawo katuswaanganina antoomwe. Ikuti mbungano yoonse kayiswaangana antoomwe kulibambila kuya mumulimo mubuzuba bwa Mujibelo bwakusaanguna mumwezi naa musyule lyaciiyo ca Ngazi Yamulindizi, kanji-kanji cilagwasya kuti kabunga kamwi akamwi kaswaangana antoomwe alimwi mulangizi wakabunga wapegwa ciindi cisyoonto cakulanganya kabunga kakwe muswaangano wamulimo wamumuunda kautanamana amupailo.—Amubone kabbokesi kakuti “Sena Inga Mwajalula Ŋanda Yanu?”
5. Nokuba kuti bubambe bwa Ciiyo Cabbuku Cambungano bwakamana, ino ncinzi ncotukonzya kuba masimpe?
5 Nokuba kuti bubambe bwa Ciiyo Cabbuku Cambungano bwakamana, Jehova ulazumanana kutupa zyoonse nzyotuyandika kuti tucite kuyanda kwakwe. (Heb. 13:20, 21) Kunyina ncotubula mubweendelezi bwa Jehova. (Int. 23:1) Kuli zilongezyo zinji ziboola kwiinda mububambe bwakabunga kamumuunda. Ikuti twalisungula alimwi ‘akusyanga apati,’ ‘tuyootebula zinji.’—2 Ko. 9:6.
[Kabbokesi kali apeeji 6]
Sena Inga Mwajalula Ŋanda Yanu?
Mumbungano zimwi, tubunga twamulimo tulaswaangana antoomwe kumamanino aansondo akaambo kakuti kunyina maanda manji aakuswaanganina. Miswaangano yamulimo wamumuunda ndubazu lwabubambe bwambungano, aboobo kuzumizya kuti miswaangano eeyi kaicitilwa muŋanda yesu ncoolwe cipati. Sena inga mwajalula ŋanda yanu? Mutawayiwayi akaambo kakulimvwa kuti mulibacete. Baalu bayakulanga busena ŋanda yanu nkoibede, alimwi atwaambo tumwi mbuli tooto ntobakali kulanga-langa nobakali kusala busena bwaciiyo cabbuku. Ikuti kamuyanda kujalula ŋanda yanu, inga mwamuzyibya mulangizi wakabunga kanu.