Miswaangano Yamulimo Wamumuunda
1. Ino nkaambo nzi ncotubikkila maano kukuba abubambe bwakulibambila kuunka mumulimo wakukambauka?
1 Jesu wakapa cikozyanyo cibotu cakulanganya mulimo wakukambauka Bwami munzila iili kabotu alimwi iigwasya. Mbubwenya buyo amazuba aano, aabo bajisi mukuli wakulanganya mulimo wakukambauka Bwami munyika yoonse balabikkila maano kukubona kuti mulimo ooyu walanganizyigwa munzila njiyonya. Kweelana amakanze aaya, miswaangano yamulimo wamumuunda nenzila imwi iibelesyegwa ambungano zyoonse munyika ikugwasya tubunga twabakambausi ba Bwami kuti balibambile kuunka mumulimo wakukambauka.—Mt. 24:45-47; 25:21; Lk. 10:1-7.
2. Ino nzyintu nzi ziyandika kucitwa kujatikizya miswaangano yamulimo wamumuunda?
2 Bubambe Bubotu: Miswaangano yamulimo wamumuunda yakabambilwa kukulwaizya alimwi akupa malailile aajatikizya mbobakonzya kukambauka aabo balibambilide kuunka mumulimo wakukambauka. Lugwalo lwabuzuba inga lwabandikwa mubufwaafwi ikuti kalujisi twaambo tujatikizya mulimo wamumuunda. Zimwi ziindi, malailile aali mu Mulimo Wesu wa Bwami, mubbuku lya Kukambitsirana, naa ambweni aali mubbuku lya Cikolo Camulimo, alabandikwa kutegwa agwasye boonse aabo balibambilide kubeleka mubuzuba oobo. Citondezyo cifwaafwi cijatikizya bbuku lyaabilwa mumwezi ooyo inga acalo cacitwa. Kautanapegwa mupailo wakujala, boonse beelede kuzyiba ngobatibeleke limwi mumulimo wakukambauka alimwi acilawo nkobayoobelekela. Wamana buyo muswaangano ooyu uutola maminiti aataindilili ku 15, basikumwaya boonse beelede kutalika kweenda kuunka kucilawo.
3. Ino mbaani bajisi mukuli wakulanganya miswaangano yamulimo wamumuunda?
3 Ino Yeendelezyegwa Buti? Mulangizi wamulimo nguujisi mukuli wakulanganya miswaangano yamulimo wamumuunda. Balangizi batubunga naa bagwasyi babo bajisi mukuli wakuunka mumulimo wamumuunda antoomwe abasikumwaya bali mutubunga twabo mu Mujibelo amu Nsondo. Baalu bamwi naa bakutausi inga baunka antoomwe abasikumwaya bamutubunga ibalibambila kuunka mumulimo mukati kansondo. Balangizi batubunga babelekela antoomwe amulangizi wamulimo kutegwa babone masimpe kuti bamutubunga twabo bajisi cilawo cipati cakubeleka mulimo wakuŋanda aŋanda mu Mujibelo amu Nsondo. Mumazuba aamukati kansondo, mulangizi wamulimo nguunoolanganya bubambe bwabaabo bayoobelekela antoomwe atubunga ootu mumulimo wamumuunda.
4-6. (a) Ino miswaangano yamulimo wamumuunda ijisi mulimo nzi caboola kukulanganya cilawo cambungano? (b) Ino ntwaambo nzi ntotweelede kulanga-langa kutegwa tuzyibe mboikonzya kubambwa miswaangano yamulimo wamumuunda?
4 Nkukuli Alimwi Ndilili Miswaangano Eeyi Noyeelede Kucitwa? Muciindi cakuti mbungano yoonse iswaanganine abusena bomwe, cilagwasya ikubikka bubambe bwakuti miswaangano eeyi kaicitilwa mumasena aali mufwaafwi abasikumwaya, kanji-kanji mumaanda aabakwesu naa aabacizyi aali mumasena aaindene-indene mucilawo coonse kutegwa cilawo coonse cambungano cibelekwe kabotu. Aalo Maanda aa Bwami alakonzya kubelesyegwa kucitila miswaangano eeyi. Mbungano zinji zibelesya Ŋanda ya Bwami kucitila miswaangano yamulimo wamumuunda bamanizya buyo miswaangano yamu Nsondo yalo iijatikizya makani aabuleya alimwi a Ciiyo ca Ngazi Yamulindizi. Kweelede kubonwa masimpe kuti musinzo wakuunka kucilawo cakukambaukila wafwinsyigwa. Aboobo, bubambe bubikkidwe bweelede kulangwa-langwa ciindi aciindi kutegwa babone naa masena aasalidwe acizumanana kweelela mukugwasya kuti cilawo coonse cibelekwe kabotu.
5 Iciindi cibotu cakucita miswaangano eeyi alimwi abunji bwaziindi noyeelede kucitwa munsondo yoonse naa mubuzuba bubikkidwe cilakonzya kusalwa kweelana acilawo. Mibuzyo eeyi iitobela ilakonzya kugwasya mukubona busena alimwi aciindi miswaangano yamulimo wamumuunda noyeelede kucitwa.
6 Ino ncibeela cili cacilawo iciyandika kubikkilwa maano? Ino nciindi nzi icili kabotu icakucita bukambausi bwakuŋanda aŋanda? Sena kweelede kubikkwa ciindi ikumangolezya cakucita bukambausi bwakuŋanda aŋanda naa kupilukila? Bubambe boonse bujatikizya mulimo wamumuunda bweelede kubikkwa abboodi lyamakani. Basikumwaya ba Bwami boonse beelede kubeleka cilawo coonse ncobapedwe kutegwa andiswe tukonzye kwaamba bwakaamba mwaapostolo Paulo kuti: “Kucinyina cilawo nkondatakakambaukila kale muzyooko eezyi.”—Rom. 15:23, NW.
7. Ino mmukuli nzi ngwajisi ooyo wasalwa kweendelezya muswaangano wamulimo wamumuunda?
7 Kweendelezya Miswaangano Yamulimo Wamumuunda: Muntu uusalidwe kweendelezya muswaangano ooyu ulatondezya bulemu kububambe oobu bweendelezyegwa a Leza kwiinda mukulibambila kabotu. Miswaangano eeyi yeelede kutalika aciindi cibikkidwe alimwi yeelede kucitwa mubufwaafwi mumaminiti aali 10 kusika ku 15 alimwi kweelede kupegwa malailile aagwasya. Imuswaangano kautanatalika, mukwesu weendelezya muswaangano weelede kuzyiba cilawo ceelede kubelekwa buzuba oobo. Nokuba kuti takuyandiki kubalindila aabo bamuka, cilakonzya kugwasya ikusiya mulumbe uujatikizya cilawo nkomuyoobelekela. Wamana buyo muswaangano, boonse beelede kutalika kuunka kucilawo ncobapegwa. Cakutadooneka, muswaangano wamulimo wamumuunda weendelezyegwa kabotu ulakonzya kugwasya bantu boonse bajanika kuti bacite mulimo wabo buzuba oobo.—Tus. 11:14.
8. Ino munzila nzi aabo bajanika kumiswaangano yamumuunda mbobakonzya kubelekela antoomwe abaabo babasololela?
8 Ikujanika Kumiswaangano Yamulimo Wamumuunda: Kubelekela antoomwe kulayandika. (Heb. 13:17) Ikuti kacikonzyeka, ooyo weendelezya kakamu ulakonzya kugwasya baabo ibayanda muntu wakubeleka limwi. Basikumwaya bacibwene beelede kujanika kutegwa bagwasyilizye basikumwaya bapya alimwi abasikumwaya batanasima. Aabo ibayanda kubeleka abasikumwaya baindene-indene ziindi zimwi, balakonzya kugwasya kapati. (Tus. 27:17; Rom. 15:1, 2) Boonse beelede kusola canguzu kuti batanikuccelwi. Ikulemeka bubambe oobu bweendelezyegwa a Leza alimwi akubabikkila maano babelesima kuya kutukulwaizya kucinca bukkale bwesu mumakani aaya.—2 Kor. 6:3, 4; Flp. 2:4.
9. Ino mmuunzila nzi ziyandika kapati bapainiya mobakonzya kugwasyilizya bubambe oobu?
9 Bapainiya Mbobakonzya Kugwasya: Boonse balakulwaizyigwa kapati ciindi bapainiya nobajanika kumiswaangano yamulimo wamumuunda. Mubwini, bapainiya bajisi mikuli minji. Kunze lyakweendelezya ziiyo zya Bbaibbele alimwi akucita nyendo zyakupilukila, beelede kulanganya mikwasyi alimwi akubeleka milimo yakumubili buzuba abuzuba. Aboobo, bapainiya tabeelede kulimvwa kuti beelede kujanika kumiswaangano yoonse yamulimo wamumuunda yakabambwa ambungano, kwaambisya ikuti naa miswaangano eeyi kiicitwa abuzuba. Pele bapainiya balakonzya kujanika kumiswaangano imwi yakulibambila kuunka mumuunda nsondo ansondo. Tulakonzya kwaamba kuti twiiya zyintu zinji kumiswaangano yamulimo wamumuunda, alimwi bamwi balakonzya kugwasyigwa kapati aluzyibo lwamu Bbaibbele alwakukambauka ndobajisi bapainiya. Ikujanika mumulimo wamumuunda lyoonse kwapa kuti bapainiya babe bantu bacibwene mumulimo wakukambauka. Balakonzya kugwasya bamwi aluzyibo ndobajisi. Bapainiya bapa cikozyanyo cibotu ncobeelede kutobela bamwi kwiinda mukutola lubazu cabusungu mumulimo wakukambauka alimwi akumiswaangano yamulimo wamumuunda. Alimwi tulabalumba kapati akaambo kakutola lubazu kumiswaangano eeyi yamumuunda.
10. Ino nkaambo nzi basikumwaya boonse bamakani aa Bwami ncobeelede kugwasyilizya bubambe oobu camoyo woonse?
10 Mbubonya mbocakabede kuli Jesu alimwi abasikwiiya bakwe, cibeela cipati camulimo wakukambauka Bwami cilacitwa kwiinda mubukambausi bwakuŋanda aŋanda. Miswaangano yamulimo wamumuunda ipa kuti tukulwaizyanye akutola lubazu mumulimo wakukambauka. Basikumwaya boonse bamakani mabotu beelede kusoleka canguzu kujanika kububambe oobu bweendelezyegwa a Leza. (Inc. 5:42; 20:20) Toonse twakulwaizyigwa kuti tubambulule bukkale bwesu kutegwa katujanika kumiswaangano yamulimo wamumuunda. Kwiinda mukucita boobo, tulakonzya kuba masimpe kuti Jehova uyakutulongezya alimwi tulakonzya kukkomanisya Musololi wesu Jesu Kristo, ciindi notukambauka makani mabotu aa Bwami bwa Leza.—Mt. 25:34-40; 28:19, 20.