Kabbokesi Kamubuzyo
◼ Mmakani aali buti ayeelede kubandikwa ciindi nomucita muswaangano wamulimo wamumuunda?
Ikaambo kapa kuti katubaa muswaangano wamulimo wamumuunda nkakuti tubone mbuli mulimo uuccilila mbotunga twaubeleka—imulimo wamumuunda. Aboobo, mweendelezi weelede kulibambila kabotu kutegwa kaamba twaambo tukulwaizya, tugaminina alimwi tubeleka. Ikuti lugwalo lwabuzuba kalujisi twaambo tugaminide mulimo wakukambauka, lulakonzya kubalwa alimwi akwaambaulwa mubufwaafwi. Nokuba boobo, muswaangano weelede kubikkila kapati maano kumulimo uyanda kucitwa, ikugwasya boonse aabo baunka mumulimo wabukambausi kabalibambide kabotu kutegwa bauzuzikizye mulimo wabuzuba oobo.—2 Tim. 4:5.
Twaambo tubeleka tujanwa mu Mulimo Wesu Wabwami inga twabandikwa kutegwa boonse bazyibe zyakumwaya zipya alimwi aambozyeelede kumwaigwa. Mubuzuba bwa Mamagazini, citondezyo cili mumutwe wakuti “Nzyomweelede Kwaamba Kujatikizya Mamagazini” cilakonzya kutondezyegwa. Munzila zimwi zyibelesyegwa mukumwaya, intalisyo yamibandi yomwe naa zyobilo mubbuku lya Kukambitsirana eezyo zikonzya kubeleka kabotu mucilawo eeco zilakonzya kwaambwa. Ikaambo kajatikizya mulimo kalakonzya kubandikwa nikuba kupa citondezyo mbuli mbolikonzya kubelesyegwa Bbaibbele aŋanda yamuntu, mbomunga mwazumanana kubandikaa sikutyompya mubandi, mbomunga mwaabila mukamwini ŋanda kujatikizya ciiyo ca Bbaibbele naa mbomukonzya kupilukila kulibaabo batondezya luyandisyo.
Muswaangano wamulimo wamumuunda weelede kucitwa mumaminiti aali 10 kusikila ku 15, kubikkilizyaa kubabika mutubunga mbubatiiyende, kwaabila zilawo zyakukambaukila alimwi amupailo. Mbowamanina buyo muswaangano, boonse aabo bajanika umwi aumwi weelede kumuzyiba ngwatiibeleke limwi ankobayacibelekela alimwi cakutasowa ciindi beleede kuunka kucilawo ooko. Mbwaanga muswaangano ooyu ngwakaindi buyo kaniini, cilayandika kuti boonse kabasika muciindi ceelede. Kuti muswaangano wamulimo wamumuunda kautobelanaa muswaangano wambungano, mbuli Ciiyo ca Ngazi Yamulindizi, weelede kufwiisyigwa. Taceelede buya kutalika kubandika lugwalo lwabuzuba mbwaanga mubandi wamu Magwalo uukondelezya wacitwa kale.
Bakwesu babbapatizidwe balaa luzyibo, beleede kupegwa mulimo wakweendelezya muswaangano wamulimo wamumuunda muciindi ceelede. Ikuti kakutako uukonzya kusololela mubuzuba oobo, ibaalu beelede kujana mucizyi uubbapatizidwe uukonzya kweendelezya ciindi nokwayandika. Kumwi kakkede, mucizyi ulakonzya kutalisya mubandi mulugwalo lwabuzuba naa twaambo buyo tumbi twalo tweendelanaa ziyandika mumuunda alimwi ulakonzya kutwaamba mubufwaafwi. Weelede kusama citambala.
Muswaangano wamulimo wamumuunda, nciindi cikondelezya calo citukulwaizya alimwi akuba bantu balibambide kutola lubazu mumulimo. Ikuti mweendelezi walibambila bweelede, nkokuti andiswe tuyoogwasyigwa kapati.