Amugwasyigwe Kapati a Miswaangano Yamulimo Wamumuunda
1. Ino mbuti miswaangano yamulimo wamumuunda mboikonzya kutugwasya?
1 Miswaangano yamulimo wamumuunda iigwasya ilakulwaizya kapati alimwi ilapa malailile aagwasya katutanaunka mumulimo. Itupa kutola lubazu mumulimo wabuleya abasikumwaya bamwi kutegwa tukonzye kubeleka abamwi mukugwasyanya alimwi akuyiisyanya. (Tus. 27:17; Muk. 4: 9, 10) Ino ncinzi ncotukonzya kucita kutegwa kugwasyigwe kapati kumiswaangano eeyi?
2. Ino nzintu nzi sikweendelezya nzyakonzya kulanga-langa?
2 Sikweendelezya: Twaambo tugaminide tuyoolangwa-langwa lyamiswaangano eeyi, tatwaambilwi limwi kakucili ciindi. Aboobo, kulibambila kabotu kulayandika ikuti naa ndinywe muyooyendelezya. Mutabi acilengwa cakulibambila kulanga-langa lugwalo lwabuzuba, nokuba kuti inga mwasala kulubikkilizya mumubandi ikuti kalujatikizya mulimo. Amuyeeye ciyookonzya kugwasya kuli baabo baunka mumulimo wakukambauka buzuba oobo. Mucikozyanyo, inga mwayanda kubandika naa kuba acitondezyo. Mulakonzya kusala kulanga-langa cintu cimwi kuzwa mubbuku lya Kukambitsirana, bbuku lya Cikolo Camulimo, naa cibeela caino-ino ca Muswaangano wa Mulimo. Ziindi zimwi, mulakonzya kulanga-langa mbolikonzya kulanganyizigwa penzi likonzya kuba mucilawo canu, naa kubandika mbomukonzya kupa bantu kuba aluyandisisyo alimwi akutalisya ziiyo zya Bbaibbele, ikapati kuti basikumwaya banji banoopilukila buzuba oobo. Tacikwe makani aceeco cilangwa-langwa, amube bantu bakulwaizya.
3. Ino muswaangano weelede kutola ciindi cilamfwu buti, alimwi ino ncinzi ceelede kucitwa ciindi eeco?
3 Amutalike muswaangano aciindi ceelede nokuba kuti mulizi kuti bamwi balamuka. Amubelesye bupampu nomubabikka mutubunga mbobatiiyende, alimwi akubaabila cilawo aabo bayanda. Muswaangano taweelede kwiindilila amaminiti aali 10 kusika ku 15 naa kutasika waawa ikuti kauccililana amuswaangano wambungano. Muswaangano kautanamana, boonse beelede kubaziba mbobabeleka limwi alimwi ankobayoobelekela. Muswaangano weelede kumanizigwa amupailo.
4. Ino ncinzi ciyoobagwasya boonse kugwasyigwa kapati amiswaangano yamulimo wamumuunda?
4 Mulakonzya Kugwasya: Mbubonya mbuli miswaangano yambungano, tutondezya bulemu kuli Jehova alimwi akubabikkila maanu ibamwi kwiinda mukusika aciindi ceelede. Amutole lubazu mumubandi. Inga mwalindila kuti sikweendelezya amwaabile ngomutiibeleke limwi, naa inga mwasala kuba abubambe bwanu muswaangano kautanatalika. Ikuti naa muyandisya kuba abubambe bwanu, amusolekesye ‘kujalula moyo wanu’ kwiinda mukubeleka abasikumwaya basiyene-siyeni, muciindi cakubeleka abalongwe banu ciindi coonse. (2 Kor. 6:11-13) Kufwumbwa kuti muswaangano wamana, mutacinci bubambe pe, alimwi amutalike cakufwambaana kwiinka kucilawo.
5. Ino makanze nzi aamiswaangano yamulimo wamumuunda?
5 Makanze aamiswaangano yamulimo wamumuunda ngamwi aayaayo aamiswaangano yambungano. Ilabambwa kutegwa tucikonzye ‘kuyeeyana, kubusyanya-busyanya mukuyandana akucita milimo mibotu.’ (Heb. 10:24, 25) Ikuti twasolekesya kugwasyigwa amiswaangano eeyi, tuyoogwasyigwa kuzuzikizya mulimo wesu—‘mulimo mubotu’ ncobeni!