Miswaangano Yakulibambila Kuunka Mumulimo Wakukambauka Iizuzikizya Makanze Aayelede

1. Ino miswaangano yakulibambila kuunka mumulimo wakukambauka ijisi makanze nzi?

¹ Ciindi cimwi, Jesu wakaswaangana abasikwiiya bakwe bali 70 kabatanaunka mumulimo wakukambauka. (Lk. 10:1-11) Wakabakulwaizya kwiinda mukubayeezya kuti tiibakali kuyooba balikke pe, alimwi akuti bakali kusololelwa a “Simalelo wabutebuzi,” Jehova. Alimwi wakabapa malailile aakabagwasya kubeleka mulimo, mpoonya wakababikka kuti babeleke “bobilo-bobilo.” Mazuba aano, miswaangano njotucita katutanaunka mumulimo wakukambauka ijisi makanze ngaonya—ilakulwaizya, ilatuyiisya, alimwi itupa kubelekela antoomwe.

2. Ino muswaangano wakulibambila kuunka mumulimo wakukambauka weelede kutola ciindi cilamfwu buti?

² Aciindi cino, muswaangano wakulibambila kuunka mumulimo wakukambauka utola maminiti aali 10 naa 15, calo icibikkilizya kwaabilwa wakubeleka limwi, kwaabilwa cilawo, alimwi amupailo. Lino kwaba kucinca. Kutalikila mu April, muswaangano wakulibambila kuunka mumulimo wakukambauka unootola buyo maminiti osanwe naa aali ciloba. Pele kuti naa ucitwa wamana muswaangano wambungano, weelede kutola buyo maminiti aatasiki aawo nkaambo aabo ibajanika amuswaangano ooyo baswiilila kale mubandi mubotu wamu Magwalo. Kuba amiswaangano mifwaafwi yakulibambila kuunka mumulimo wakukambauka kuyoogwasya boonse kuti babeleke ciindi cinji mumulimo wamuunda. Kuyungizya waawo, ikuti bapainiya naa basikumwaya bamwi balitalikide kale kukambauka kautanacitwa muswaangano wakulibambila kuunka mumulimo wakukambauka, nkokuti inga banyonganizyigwa buyo asyoonto.

3. Ino miswaangano yakulibambila kuunka mumulimo wakukambauka yeelede kulibambilwa buti kutegwa basikumwaya bagwasyigwe kapati?

³ Miswaangano yakulibambila kuunka mumulimo wakukambauka yeelede kulibambilwa kabotu munzila iigwasya kapati kuli basikumwaya. Mumbungano zinji cilagwasya kuti tubunga twamulimo twacita miswaangano mumasena aaindene-indene muciindi cakucitila abusena bomwe. Eeci cilakonzya kupa kuti basikumwaya cibaubile kusika kumuswaangano wakulibambila kuunka mumulimo wakukambauka alimwi akuunka kucilawo. Basikumwaya balakonzya kufwambaana kwaabilwa bakubeleka limwi alimwi cilakonzya kuuba-uba kubalangizi batubunga kubikkila maano kuli baabo bali mukabunga kabo. Kabunga kabaalu kalakonzya kulanga-langa bukkale bwakubusena oobo akusala cikonzya kugwasya kapati. Muswaangano kautanajalwa amupailo mufwaafwi, boonse beelede kuzyiba nkobatiibelekele alimwi angobatiibeleke limwi.

4. Nkaambo nzi miswaangano yakulibambila kuunka mumulimo wakukambauka ncotweelede kwiibona kuti ilayandika kapati mbubwenya mbuli miswaangano iimbi yambungano?

⁴ Ilayandika Mbubwenya Mbuli Miswaangano Yambungano: Akaambo kakuti miswaangano yakulibambila kuunka mumulimo wakukambauka ilacitwa kutegwa aabo baunka mumulimo bagwasyigwe, tabali boonse mumbungano bakonzya kujanika. Nokuba boobo, tweelede kwiibona kuti ilayandika kapati mbubwenya mbuli miswaangano iimbi yambungano. Mbubwenya mbuli miswaangano yesu yoonse, miswaangano yakulibambila kuunka mumulimo wakukambauka mbubambe buzwa kuli Jehova ibutugwasya kukulwaizyanya kutondezya luyando akucita milimo mibotu. (Heb. 10:24, 25) Aboobo, ooyo iweendelezya weelede kulibambila kabotu kutegwa mubandi ulemeke Jehova alimwi akugwasya baabo bajanika. Ikuti kacikonzyeka, basikumwaya ibaunka mumulimo beelede kusolekesya kujanika kumuswaangano ooyu.

5. (a) Ino mukuli nzi ngwajisi mulangizi wamulimo kujatikizya kubamba miswaangano yakulibambila kuunka mumulimo wakukambauka? (b) Ino mucizyi weelede kuweendelezya buti muswaangano wakulibambila kuunka mumulimo wakukambauka?

⁵ Mbwayelede Kulibambila Sikweendelezya: Kutegwa muntu alibambile kabotu cibeela cimwi camiswaangano, uyandika kupegwa cibeela eeco kakucili ciindi. Oobu mbocibede akumiswaangano yakulibambila kuunka mumulimo wakukambauka. Ciindi tubunga twamulimo notuswaangana tulikke, balangizi batubunga naa basikubagwasyilizya mbabeendelezya miswaangano mutubunga twabo. Pele ciindi mbungano noicitila antoomwe muswaangano wakulibambila kuunka mumulimo wakukambauka, mulangizi wamulimo weelede kusala muntu uuteendelezye. Balangizi bamulimo bamwi balabapa mulongo basikweendelezya boonse alimwi akubikka mulongo umwi abboodi. Mulangizi wamulimo weelede kubelesya bupampu ciindi nasala basikweendelezya kayeeyede kuti, kutegwa bantu bagwasyigwe amiswaangano eeyi ciyeeme akuyiisya kabotu alimwi aluzyibo lwabaabo beendelezya. Ikuti kakunyina mwaalu, mukutausi naa mukwesu uubbapatizyidwe weelela kuti ayendelezye mazuba aamwi, mulangizi wamulimo weelede kusala mucizyi weelela kuti akeendelezye​—Amubone cibalo cakuti “Ikuti Mucizyi Nguweendelezya.”

6. Nkaambo nzi ncociyandika kapati kuti sikweendelezya kalibambilide kabotu?

⁶ Ciinedi notupegwa makani mu Cikolo Camulimo Weendelezyegwa a Leza naa cibeela mu Muswaangano Wamulimo, tulabikkila maano alimwi akulibambila kabotu. Mbasyoonto banga balindila mane bwasika buzuba, ciindi nobayaabuya kumiswaangano nkokuya batalike kuyeeya nzyobayakwaamba. Awalo mukuli wakweendelezya muswaangano wakulibambila kuunka mumulimo wakukambauka weelede kubonwa mbubonya mbuli miswaangano iimwi. Lino mbwaanga muswaangano wakulibambila kuunka mumulimo wakukambauka unootola buyo maminiti masyoonto, kulibambila kabotu kulayandika kapati kutegwa boonse bagwasyigwe amuswaangano ooyo. Alimwi kulibambila kabotu kulabikkilizya akuzyibila limwi cilawo nkotuyoobelekela.

7. Ino nzintu nzi zimwi nzyakonzya kubandika sikweendelezya?

⁷ Izyeelede Kubandikwa: Mbwaanga bukkale buliindene kucilawo cimwi acimwi, muzike uusyomeka kunyina napa autulaini yamuswaangano wakulibambila kuunka mumulimo wakukambauka umwi aumwi. Ikabbokesi kajisi mutwe wakuti “Nomucita Muswaangano Wakulibambila Kuunka Mumulimo Wakukambauka, Mulakonzya Kulanga-langa” kalaamba nzila zimwi. Kanji-kanji, muswaangano unoocitwa mbuli mubandi abaswiilizi. Zimwi ziindi, unoobikkilizya acitondezyo naa vidiyo yeelela kuzwa a webbusaiti ya jw.org. Ciindi nalibambila muswaangano wakulibambila kuunka mumulimo wakukambauka, sikweendelezya weelede kuyeeya ziyoobakulwaizya alimwi akubagwasya aabo baunka mumulimo buzuba oobo.

8. Ino ncinzi cikonzya kubandikwa ciindi camiswaangano yakulibambila kuunka mumulimo wakukambauka iicitwa mu Mujibelo amu Nsondo calo icikonzya kugwasya kapati?

⁸ Mucikozyanyo, mu Mujibelo basikumwaya banji baabila Ngazi Yamulindizi alimwi a Sinsimuka! Bunji bwabaabo ibakambauka mumazuba aamu Mujibelo inga tabaunki mukati kansondo, aboobo cilakonzya kubayumina kuyeeya nzyobakalibambila nobakali kucita Kukomba Kwamukwasyi. Aboobo, inga cagwasya kuti sikweendelezya wainduluka zitondezyo zyacikozyanyo comwe akati kazeezyo zili kupeeji lyamamanino mu Mulimo Wesu wa Bwami. Inzila zimwi zibikkilizya kubandika mbotukonzya kubelesya kaambo kamwi kakaambwa muli sikapepele, zintu zicitika, naa buzuba bwakulyookezya ciindi notwaabila magazini naa mbotukonzya kusiya ntalisyo yakupilukila ikuti naa baatambula mamagazini. Ikuti naa bamwi ibajanika kumuswaangano wakulibambila kuunka mumulimo wakukambauka bali kwaabelesya mamagazini aabilwa mwezi ooyo, sikweendelezya ulakonzya kubabuzya kutegwa baambe mbobaabelesya naa kwaamba zyakuluula zikulwaizya. Mumazuba aamu Nsondo, sikweendelezya ulakonzya kusala kucita mbubwenya oobu kujatikizya mabbuku aabilwa mwezi ooyo. Mabbuku aakwiiya mbuli broshuwa ya Makani Mabotu ayakuti Amumuswiilile Leza alimwi abbuku lya Bbaibbele Ncoliyiisya alakonzya kwaabilwa kufwumbwa buzuba, aboobo sikweendelezya ulakonzya kulanga-langa mubufwaafwi mbolikonzya kwaabilwa bbuku lyomwe akati kayaaya.

9. Ino ncinzi cikonzya kubandikwa mu Mujibelo amu Nsondo ciindi notutola lubazu mumilimo yaalubazu?

⁹ Ikuti naa mbungano itola lubazu mukutamba kwaalubazu mu Mujibelo amu Nsondo, sikweendelezya ulakonzya kulanga-langa mbwaakonzya kwaabilwa mamagazini mapya antoomwe akapepa kakutamba naa katulakiti, naa kubandika cikonzya kucitwa ikuti naa muntu watondezya luyandisisyo. Nzila imbi njakwaamba zyakuluula izitondezya mpindu yamilimo yaalubazu eeyi.

10, 11. Nkaambo nzi kulibambila kwabasikumwaya ncokuyandika kapati kutegwa muswaangano wakulibambila kuunka mumulimo wakukambauka uzwidilile?

¹⁰ Mbobeelede Kulibambila Basikumwaya: Abalo basikumwaya ibajanika kumuswaangano wakulibambila kuunka mumulimo wakukambauka balijisi lubazu mukupa kuti muswaangano ooyu uzwidilile. Kwiinda mukulibambilila limwi, ambweni ciindi cakukomba mumukwasyi, balakonzya kuba acakuluula kuli basikumwayanyina. Kulibambila kabotu alimwi kulabikkilizya akubweza mamagazini alimwi amabbuku aambi kamutanaunka kumuswaangano wakulibambila kuunka mumulimo wakukambauka kutegwa boonse bafwambaane kuunka mucilawo kakunyina kusowa ciindi.

¹¹ Alimwi cilayandika kapati kufwaambana kusika kumuswaangano wakulibambila kuunka mumulimo wakukambauka kakucili maminiti masyoonto kuti utalike. Masimpe kuti, tulasolekesya kufwaambana kusika kumiswaangano yambungano yoonse. Nokuba boobo, cilakonzya kunyonganya kapati kuti twamuka kusika kumuswaangano wakulibambila kuunka mumulimo wakukambauka. Munzila nzi? Mukwesu weendelezya inga kuli twaambo tunji ntwalanga-langa katanabaaba basikumwaya. Ikuti kakuli basikumwaya basyoonto, ulakonzya kusala kuti boonse baunke buyo mucilawo citanamana kubelekwa. Ikuti bamwi beenda amaulu kuboola kumuswaangano wakulibambila kuunka mumulimo wakukambauka mpoonya acalo cilawo kacili kule, sikweendelezya ulakonzya kwaaba basikumwaya aabo kuti babeleke abaabo baboola amyootokala. Ikuti naa cilawo kacili kubusena bugwebenga nkobudumide, ulakonzya kusala bakwesu kuti babelekele antoomwe abacizyi naa kuti babelekele kufwaafwi akooko nkobabelekela bacizyi. Basikumwaya baciswa-ciswa naa balema balakonzya kupegwa kuti babelekele mumasena mutakwe tulundu naa munsi-munsi amaanda. Basikumwaya bapya balakonzya kubikkwa kuti babeleke abasikumwaya balaaluzyibo. Pele kuti basikumwaya bamuka kusika, kanji-kanji bubambe inga bwayandika kucincululwa kutegwa basikumwaya ibamuka kusika bajane bakubeleka limwi. Masimpe kuti zimwi ziindi tulakonzya kuba akaambo katupa kuti tumuke. Nokuba boobo, ikuti twaba acilengwa cakumuka, tulakonzya kulibuzya kuti sena tulamuka akaambo kakutalumba bubambe bwamiswaangano yakulibambila kuunka mumulimo wakukambauka naa akaambo kakwaalilwa kubamba kabotu zyakucita zyesu kakucili ciindi.

12. Ikuti kanji-kanji kamulisalila ngomuyanda kubeleka limwi mumulimo, ino ncinzi ncomweelede kucita?

¹² Basikumwaya ibaboola kulibambila kuunka mumulimo balakonzya kusala kupanga bubambe bwabo kautanatalika muswaangano naa balakonzya kupegwa muntu wakubeleka limwi. Ikuti kanji-kanji mulalisalila wakubeleka limwi, sena inga ‘tiimwajalula moyo wanu’ kwiinda mukubeleka abasikumwaya basiyene-siyene muciindi cakubeleka buyo abalongwe banu lyoonse? (2Kor. 6:11-13) Sena zimwi ziindi inga tiimwapangana kubeleka asikumwaya mupya kutegwa mumugwasye kuyaambele mukuyiisya kwakwe? (1Kor. 10:24; 1Tim. 4:13, 15) Amwaaswiilile kabotu-kabotu malailile aali woonse ngomwapegwa, kubikkilizya amalailile aajatikizya nkomweelede kutalikila kukambauka. Wamana muswaangano, mutacincululi bubambe bwapangwa kale alimwi amuunke kucilawo mbowamanina buyo muswaangano.

13. Ikuti naa boonse bajatikizyidwe kababikkila maano akucita lubazu lwabo, ino miswaangano eeyi inga yatugwasya buti?

¹³ Nobakamana kukambauka, basikwiiya bali 70 Jesu mbaakatumide kuunka mumulimo “bakapiluka kabakkomene.” (Lk. 10:17) Tacidoonekwi kuti muswaangano ngwaakajisi Jesu ambabo kabatanaunka mukukambauka wakabagwasya kuti bazwidilile. Mazuba aano, miswaangano yakulibambila kuunka mumulimo ilakonzya kutugwasya mbubwenya. Ikuti naa boonse bajatikizyidwe kababikkila maano akucita lubazu lwabo, miswaangano eeyi inookulwaizya, inoogwasya alimwi akutukamantanya kuti tuzuzikizye mulimo wesu wakupa “bumboni kumasi oonse.” —Mt. 24:14.