Bukambausi Bwamunkamu Buletela Kukondwa
1 Ciindi Jesu naakatuma basikwiiya bali 70 kuyookambauka, wakabayiisya ncobakeelede kuyoowamba, akubabikka bobile-bobile alimwi wakabaambila cilawo nkobakali kuyoobelekela. Eeci cakabaletela lukkomano oolo ndobakajana. (Lk. 10:1-17) Mbweena buyo asunu, kukambauka kwamunkamu kulagwasya mukusensemunwa, ikweendelezya kabotu alimwi akukulwaizya bantu ba Leza kucita mulimo wakukambauka.
2 Baalu Balasololela: Baalu balijisi mulimo uuyandika kapati wakugwasyilizya boonse kutola lubazu lyoonse mumulimo wakukambauka. Mulangizi wamulimo ulasololela mukweendelezya bubambe bwamulimo weelede kucitwa mukati kamvwiki. Mulangizi waciiyo cabbuku umwi aumwi ulijisi mulimo wakulanganya mulimo uucitwa munkamu njayendelezya, ikapati kumamanino kwamvwiki. Muziindi zimwi, imbungano yoonse noyiswaangana kuunka mumulimo wamumuunda, mbuli leelyo nocamana Ciiyo ca Ngazi Yamulindizi, imulangizi waciiyo cabbuku aumwi weelede kucita bubambe kujatikizya nkamu njayendelezya.
3 “Kabotu Akucililana”: Ooyo weendelezya muswaangano wamulimo wamumuunda weelede kutalika aciindi ceelede akutayindilizya kumaminiti aali 15. Cili kabotu kubaandaanizyila limwi basikumwaya akubapa cilawo ncobeelede kubelekela (ccita kuti balangizi baciiyo cabbuku bayoocilanganya eeci, mbuli mbokwaambwa kale) kautaninga pailwa mupailo wakujala. Eeci cicesya basikumwaya kuyaana ciyaane-yaane mucilawo ikunga kwapa kuti bantu baleke kuulemeka mulimo wesu. Alimwi cileendelana alulayo lwa Paulo lwakuti: “Zintu zyoonse buyo zicitwe kabotu akucililana.” (1 Kor. 14:40) Boonse aabo bajanika kumiswaangano yamulimo wamumuunda beelede kutola lubazu mukuzwidilizya bubambe oobu kwiinda mukufwambaana kusika, kubelekela antoomwe aweendelezya alimwi akufwambaana kuunka kucilawo mbozyamwaisyigwa buyo nkamu.
4 Ikubaa Cilongwe Akaambo Kalukamantano: Ibubambe bwabukambausi bwamunkamu nciindi cibotu citugwasya kuzyibana kabotu abamwi mumbungano. Nokuba kuti tacilubide ikucitila limwi bubambe bwakubeleka amuntu umwi, akwalo ikujanika kumuswaangano wamulimo wamumuunda katutacitide bubambe bwakubeleka aumwi kulakonzya kutugwasya. Tulakonzya kubikkwa kubeleka amuntu ngotutazyi kabotu, calo icinga catugwasya ‘kujalula myoyo yesu’ kujatikizya luyando ndotujisi.—2 Kor. 6:11-13.
5 Bukambausi bwamunkamu bulatukulwaizya akutupa kubaa cilongwe katuli “basikubelekanyina mumilimo yalusinizyo.” (3 Joh. 8) Atuzumanane kutola lubazu lyoonse mumulimo ooyu!