Atugwasyanye Ikubeleka Lyoonse
1 Sena mulizyi ikuti, ikuti boonse basikumwaya mu Zambia balipoota mulimo wabo wamumuunda mumwezi uumwi basikumwaya bamakani mabotu balakonzya kwiinda ku 137,000? Ino ncinzi ciyandika kulindiswe? Malipooti aanu aamwezi alayandika kapati. Atube amakanze aakuti mwaka uuno wamulimo waakumana, katujisi mpuwo mbotu kuli Jehova yakuba sikumwaya uusungweede mumulimo. Camasimpe, imulimo wanyika yoonse wabantu ba Leza waunka ambele koonse-koonse, alimwi eeci cituyeezya majwi abusinsimi aajatikizya Mwami ngwasalide Jehova aakuti: “Bwami bwakwe buyookomenesya, alwalo luumuno talukooyoomana.”—Is. 9:7.
2 Ibulangizi bwakuvwula mucisi eeci bulabonwa kwiinda mumalipooti aamweelwe wabantu bajanika licitwa Mulalilo wa Mwami amiswaangano yacooko. Aboobo, eeci nceciindi cakubikkila maano kapati ikufwambaana kubeleka mulimo wa Bwami. Ikuti twasola canguzu kubeleka lyoonse ‘akubikka myoyo yesu lyoonse kumilimo ya Mwami,’ ilusyomo lwesu ‘luyooyuma’ alimwi ‘akutazungaana.’ Tuyookonzya kugwasya bantu batatoli lubazu mumuunda naa batacisungweede. Tulakonzya kusyomezyegwa kuti ‘milimo yesu mu Mwami tiikonzyi kuba yabuyo.’—2 Tes. 3:1; 1 Kor. 15:58.
3 Mbwaanga mulembi weelede kutumina malipooti aamumulimo wamumuunda aambungano kuofesi lyamutabi kabutanainda buzuba bwacisambomwe bwamwezi, ncintu ciyandika kapati kuti toonse tupe malipooti aamulimo wesu wamumuunda cakufwambaana kumamanino aamwezi omwe-omwe. Eeci ncecikonzya kupa kuti katulipoota munzila iiluzi zintu zyotwakacita mumulimo. Sena muyoocita lubazu lwanu kwiinda mukulipoota cakufwambaana mwezi amwezi?