Ikutondezya Kulumba Kuluzyalo lwa Leza
1 Kataningaba Munakristo, calunya imwaapostolo Paulo wakali kulesya Bunakristo kuzumanana. Nokuba boobo, akaambo kakuti wakacita oobo mukutazyiba, wakafwidwa lubomba. Jehova wakatondezya luzyalo, eelyo Paulo wakapegwa mulimo wakukambauka. Wakaukkomanina mulimo ooyo. (Inc. 26:9-18; 1 Tim. 1:12-14) Paulo wakalumba Jehova akaambo kalubomba ndwakamufwida calo cakamukulwaizya kubeleka camoyo oonse mukuzuzikizya mulimo ngwaakapegwa.—2 Kor. 12:15.
2 Andiswe twakapegwa mulimo kacili citondezyo calubomba lwa Leza. (2 Kor. 4:1) Mbubwenya mbuli Paulo, inga twatondezya kuti tulalumba kulubomba ndotwakatondezyegwa kwiinda mukubeleka canguzu ikugwasya bamwi kuyaambele kumuuya. Inzila imwi njotukonzya kucita boobu nkwiinda mukutalisya akweendelezya ziiyo zya Bbaibbele.
3 Kutalisya Ziiyo zya Bbaibbele: Inzila yomwe yakutalisya ziiyo zya Bbaibbele njakubaa bantu mbotweelede kunootolela mamagazini lyoonse. Notubaswaya lyoonse aabo mbotutolela mamagazini, tulazizyiba kabotu nzyobayandika. Mukuya kwaciindi, icibalo cimwi cili mumagazini imwi inga cagwasyilizya mukutalisya ciiyo ca Bbaibbele mubroshuwa lya Ncayanda. Twanoopilukila, ikuti kacikonzyeka inga twazumanana kubelesya broshuwa ya Ncayanda twanoomutolela mamagazini mukamwiniŋanda.
4 Kupaila Akubeleka Canguzu Kulayandika: Mupailo akubeleka cabusungu ziyootugwasya kuyaambele mumulimo wesu wakukambauka. Mucizyi mupainiya umwi iwakajisi ciiyo ca Bbaibbele comwe buyo wakapaila kuli Jehova kuti amulongezye kubaa ziiyo zya Bbaibbele zimbi. Alimwi wakacita kweelana amipailo yakwe. Wakazinzibala kuyeeya mbwaakali kucita mumulimo wamumuunda, eelyo wakajana kuti taanakali kutalisya ziiyo zya Bbaibbele munyendo zyakupilukila. Wakatalika kucita oobo, eelyo ndilyonya wakaba aziiyo zimbi zyobile.
5 Elo kaka tulaa coolwe ikutola lubazu mukuzyibya “Makani Mabotu aaluzyalo lwa-Leza”! (Inc. 20:24) Ikulumba Leza akaambo kalubomba lwakwe akutukulwaizye kunoobeleka canguzu mukugwasyilizya bantu kujana mpindu kuluzyalo lwa Jehova.