Tubelekela Leza “Ulaaluse Kapati”

1. Ncinzi ciboola mumizeezo notuyeeya muntu uulaaluse?

CIINDI notuyeeya kujatikizya muntu uulaaluse, inga tuyeeya muntu uuli aluzyalo, lweetelelo, mubotu moyo alimwi mwaabi. Amana buya tulakonzya kuyeeya caano ca Jesu camu Samariya mubotu. Uuya mwaalumi uuzwa kucisi cimbi “wakamufwida luzyalo” mu Juda iwakafwumpwa ababbi. Mu Samariya “wakamufwida luzyalo” mu Juda iwakaumidwe alimwi caluyando wakabikka bubambe bwakuti alanganyizyigwe. (Lk. 10:29-37) Cikozyanyo eeci citondezya luse, bube bubotu bwa Leza wesu. Leza ulaaluse nkaambo ulatuyanda. Alimwi ulatondezya kuti ulaaluse kulindiswe munzila zinji buzuba abuzuba.

2. Muunzila nzi imwi motukonzya kutondezya luse?

² Kuli nzila iimbi muntu mwakonzya kutondezya luse. Muntu uulaaluse inga wasala kutamusubula muntu weelede kusubulwa. Mubukkale buli boobu, Jehova ulatondezya luse kapati kulindiswe. Sintembauzyo wakaamba kuti: ‘Kunyina natucitila kweelana azibi zyesu.’ (Int. 103:10) Nokuba boobo, zimwi ziindi, Jehova ulakonzya kumulaya canguzu muntu iwakacita cibi cipati.

3. Mibuzyo nzi njotutiilange-lange?

³ Mucibalo eeci tulabandika mibuzyo eeyi yotatwe: Nkaambo nzi Jehova ncatondezya luse? Sena lulayo lwanguzu alimwi aluse kuli mbozikozyenye? Ncinzi cikonzya kutugwasya kutondezya luse? Atubone Jwi lya Leza mboliingula mibuzyo eeyi.

KAAMBO JEHOVA NCATONDEZYA LUSE

4. Nkaambo nzi Jehova ncatondezya luse?

⁴ Jehova ulayanda kutondezya luse. Mwaapostolo Paulo wakalemba kuti Leza “ulaaluse kapati.” Paulo wakali kupandulula luse lwa Leza nkaambo upa bantu batalondokede, nkokuti babelesi bakwe bananike, bulangizi bwakupona kujulu. (Ef. 2:4-7) Pele Jehova tatondezyi buyo luyando kubabelesi bakwe bananike. Sintembauzyo Davida wakalemba kuti: “Jehova mubotu kuli boonse, alimwi luse lwakwe lulalibonya mumilimo yakwe yoonse.” (Int. 145:9) Mbwaanga Jehova ulabayanda bantu, ulatondezya luse lwakwe kufwumbwa leelyo nabona kuti cileelela kucita boobo.

5. Mbuti Jesu mbwaakaiya luse lwa Jehova?

⁵ Kwiinda muntu uuli woonse, Jesu ulizyi kabotu-kabotu Jehova mbwayanda kutondezya luse. Jehova a Jesu bakakkala kujulu kwaciindi cilamfwu kapati Jesu katanaboola aano anyika. (Tus. 8:30, 31) Jesu wakali kubona Bausyi kabatondezya luse kubantu basizibi kwaziindi zinji. (Int. 78:37-42) Ciindi naakali kuyiisya, Jesu kanji-kanji wakali kwaamba kujatikizya bube oobu bubotu bwa Bausyi.

6. Ncikozyanyo nzi Jesu ncaakabelesya kutugwasya kumvwisya luse lwa Bausyi?

⁶ Mbubwenya mbotwakaiya mucibalo cainda, Jesu wakabelesya cikozyanyo camwana mutaka kutugwasya kumvwisya Jehova mbwayanda kapati kutondezya luse. Mwana mutaka wakazwa aŋanda ‘akuyoosowaila lubono lwakwe kwiinda mukupona buumi bwakutalilemeka.’ (Lk. 15:13) Kumbele, wakeempwa akuleka bukkale bwakwe bwakutalilemeka, wakalicesya, akupiluka kuŋanda. Ino bausyi bakacita buti? Ooyu mwana tanaakeelede kulindila kwaciindi cilamfwu kutegwa azyibe. Jesu wakaamba kuti: “Kacili kulaale, bausyi bakamubona aboobo bakamufwida luzyalo, eelyo bakamubalikila, baakumukumbata akumumyonta.” Bausyi kunyina nobakamusampaula mwanaabo. Muciindi caboobo, bakatondezya luse, bakamulekelela akumutambula camaanza obilo mumukwasyi. Mwana mutaka wakabisya kapati, pele akaambo kakuti wakeempwa, bausyi bakamulekelela. Ooyu muzyali wamucikozyanyo siluse wiiminina Jehova. Munzila eeyi Jesu wakatondezya kuti Jehova ulayanda kubalekelela basizibi ibeempwa cakumaninina.—Lk. 15:17-24.

7. Mbuti busongo bwa Jehova mbobweendelana aluse ndwatondezya?

⁷ Jehova ulatondezya luse nkaambo kabusongo bwakwe buteeli. Jehova lyoonse usala zintu zikonzya kugwasya zilenge zyakwe. Bbaibbele lyaamba kuti ‘busongo buzwa kujulu bulizwide luse amicelo mibotu.’ (Jak. 3:17) Mbuli muzyali siluyando, Jehova ulizyi kuti luse lwakwe lugwasya bana bakwe. (Int. 103:13; Is. 49:15) Akaambo kakuti Jehova ulatondezya luse kubantu bakwe, balijisi bulangizi bwakumbele nokuba kuti tabalondokede. Aboobo mbwaanga Jehova ulijisi busongo buteeli, lyoonse ulatondezya luse ciindi naabona kuti cileelela kucita boobo. Pele alimwi ulizyi ciindi nateelede kutondezya luse. Mbwaanga musongo, kunyina natondezya luse kuti kucita boobo nkulekela bukkale bubyaabi.

8. Nintaamu nzi yeelede kubwezyegwa ziindi zimwi, alimwi nkaambo nzi?

⁸ Ikuti mubelesi wa Leza acaali wasala kutalika kupona buumi bwakutalilemeka. Tweelede kucita nzi? Jehova wakaambila Paulo kulailila mbungano ‘kucileka kuyanzana amuntu ooyo.’ (1Kor. 5:11) Basizibi bateempwi balagusyigwa mumbungano. Eeyi ntaamu ilayandika kutegwa bakwesu abacizyi basyomeka bakwabililwe alimwi akutondezya kuti nzila zya Jehova zilasalala. Pele bamwi bayeeya kuti ciindi muntu naagusyigwa mumbungano, nkokuti Leza taatondezya luse kulinguwe. Sena masimpe aayo? Atubone.

SENA KUGUSYA MUNTU MUMBUNGANO NDUSE?

9-10. Kweelana alugwalo lwa Bahebrayo 12:5, 6, nkaambo nzi ncotukonzya kwaamba kuti kugusya sizibi uuteempwi mumbungano nduse? Amupe cikozyanyo.

⁹ Ciindi notwamvwa cakwaambilizya kumuswaangano wa Bunakristo kuti muyandwa wesu ‘tacili umwi wa Bakamboni ba Jehova,’ tulausa kapati. Tulakonzya kuyeeya kuti mwati cakali kweelela kuti agusyigwe muyandwa wesu? Mwati kugusya muntu mumbungano mubwini nduse? Inzya. Kutapa muntu lulayo lumweelede tabuli busongo, nkubula luse naa luyando. (Tus. 13:24) Sena bubambe bwakugusya muntu mumbungano bulakonzya kugwasya sizibi uuteempwi kuti acince bukkale bwakwe? Inzya. Bakwesu abacizyi banji ibakali kucita zibi zipati bakaamba kuti kugusyigwa mumbungano kwakabagwasya kuyeeya mbobakasakene mukucita cibi, alimwi kwakabagwasya kucinca bukkale bwabo akupiluka kuli Jehova.—Amubale Bahebrayo 12:5, 6.

¹⁰ Atulange-lange cikozyanyo eeci. Mweembezi wabona kuti mbelele yakwe imwi yaciswa. Ulizyi kuti kusilika mbelele eeyi kuyandika kwiizandula kuzwa mubutanga. Nokuba boobo, mbelele nzinyama zilibedelede. Zilayanda kapati kuba mubutanga, alimwi zilalibilika kuti zyazandulwa kuzyeenzinyina. Pele sena eeci caamba kuti mweembezi ngusilunya ciindi naazandula mbelele eeyo kubutanga? Peepe. Ulizyi kuti, naa waizumizya mbelele eeyo kusangana ambelele zimbi mubutanga, ilakonzya kuyambukizya mbelele zimbi. Aboobo kwiinda mukwiizandula eeyo iicisidwe, ukwabilila butanga boonse.—Amweezyanisye a Levitiko 13:3, 4.

11. (a) Muunzila nzi muntu uugusyidwe mumbungano mbwakonzya kweezyanisyigwa kumbelele iiciswa? (b) Ncinzi ncobeelede kucita aabo bagusyidwe mumbungano alimwi inga bagwasyigwa buti?

¹¹ Ciindi Munakristo naagusyigwa mumbungano, tulakonzya kumukozyanisya kumbelele iiciswa. Ulaciswa kumuuya. (Jak. 5:14) Kuciswa kumuuya, mbubwenya mbuli malwazi aambi buyo, kulayambukila kapati. Aboobo cileelela zimwi ziindi kumuzandula muntu ooyo uuciswa kumuuya kuzwa mumbungano. Ooku kulaigwa kutondezya luyando ndwajisi Jehova kubantu basyomeka bali mumbungano alimwi cilakonzya kugwasya sikubisya kuliyeeya akweempwa. Ciindi nagusyidwe, muntu ooyo ulakonzya kujanika kumiswaangano, kwalo nkwanootambula malailile aamu Bbaibbele aakonzya kuyumya lusyomo lwakwe alimwi. Kuyungizya waawo, inga ulaangulukide kutambula mabbuku alimwi akweebelela JW Broadcasting^®. Ciindi baalu nobabona kuti uyaabucinca mubukkale bwakwe, ciindi aciindi balakonzya kumupa lulayo lukonzya kumugwasya kubambululula cilongwe cakwe a Jehova, kutegwa akapilusyigwe mumbungano mbuli umwi wa Bakamboni ba Jehova.b

12. Ncintu nzi citondezya luyando aluse baalu ncobakonzya kucita kugwasya sizibi uuteempwi?

¹² Cilayandika kuyeeya kuti balikke basizibi bateempwi mbabagusyigwa mumbungano. Baalu balizyi kuti aaya makani mapati, alo ateelede kuubaubisyigwa. Balizyi kuti Jehova ‘ulalulamika cansaizi.’ (Jer. 30:11) Balabayanda bakwesu, alimwi tabayandi kucita cintu cili coonse cikonzya kubanyonganya kumuuya. Nokuba boobo, zimwi ziindi, ncaluyando alimwi aluse kugusya sizibi mumbungano kwaciindi cili mbocibede.

13. Nkaambo nzi Munakristo umwi mumbungano yaku Korinto ncaakeelede kugusyigwa mumbungano?

¹³ Amubone mwaapostolo Paulo mbwaakeendelezya makani aajatikizya sizibi umwi iwatakeempwa mumwaanda wamyaka wakusaanguna. Munakristo umwi mu Korinto wakali kupona bukkale bwakutalilemeka abakaintu babausyi. Eelo cakali kujazya nsoni! Mubukkale buli boobu, Jehova wakaambila bana Israyeli bansiku kuti: “Mwaalumi woonana amukaintu wabausyi wausya bausyi nsoni. Mwaalumi amukaintu ooyo beelede kujaigwa.” (Lev. 20:11) Paulo kunyina naakaambila mbungano kuti imujaye mwaalumi ooyo. Pele wakalailila Banakorinto kuti bamugusye mumbungano. Micito yakutalilemeka yamwaalumi ooyu yakali kubajatikizya basimbungano bamwi, aabo ibatakali kusesemwa bukkale bwakwe bujazya nsoni.—1Kor. 5:1, 2, 13.

14. Mbuti Paulo mbwaakatondezya luse kumwaalumi wakagusyidwe mumbungano yaku Korinto, alimwi nkaambo nzi? (2 Bakorinto 2:5-8, 11)

¹⁴ Nikwakainda ciindi, Paulo wakazyiba kuti uulya mwaalumi wakacinca kapati mubukkale bwakwe. Wakeempwa cini-cini. Nokuba kuti mwaalumi ooyu wakapede kuti mbungano isampuke, Paulo wakaambila baalu kuti tanaakali kuyanda ‘kubanyemena.’ Pele wakabaambila “kumulekelela akumuumbulizya.” Amubone kaambo Paulo ncaakabaambilida kucita boobo: “Kutegwa atamenenwi limwi akaambo kakuusa kapati.” Paulo wakamweetelela mwaalumi iwakeempwa. Alimwi tanaakali kuyanda kuti mwaalumi azundwe akuusa akaambo kazintu nzyaakali kucita calo cakali kukonzya kupa kuti cimwaalile kulomba kulekelelwa.—Amubale 2 Bakorinto 2:5-8, 11.

15. Mbuti baalu mbobakonzya kutondezya kuti tabazungaani alimwi balaaluse?

¹⁵ Kwiinda mukwiiya Jehova, baalu balayanda kutondezya luse. Balatondezya kuti tabazungaani ciindi nokwayandika kucita boobo pele alimwi balakonzya kutondezya luse ciindi noceelela. Buyo-buyo, ikuti baalu tiibamupa lulayo naaceya buyo muntu wacita cibi cipati, ooko nkubula luse. Alimwi inga kwaba kulekela bukkale bubyaabi acaali. Aboobo sena baalu balikke mbabeelede kutondezya luse?

NCINZI CIKONZYA KUTUGWASYA TOONSE KUTONDEZYA LUSE?

16. Kweelana a Tusimpi 21:13, ino Jehova uyoobacita buti aabo ibaalilwa kutondezya luse?

¹⁶ Banakristo boonse beelede kusolekesya kubaaluse mbuli Jehova. Nkaambo nzi? Kaambo kamwi nkakuti, Jehova kunyina nayobaswiilila aabo baalilwa kutondezya luse. (Amubale Tusimpi 21:13.) Toonse tulayanda kuti Jehova kaswiilila mipailo yesu, aboobo tweelede kusolekesya kweeleba kuba amoyo muyumu. Muciindi cakuba amuuzyamvwide ciindi Munakristoma napenga, lyoonse tweelede kubikkila maano akuswiilila “kulila kwamuntu uupengede.” Kuyungizya waawo, tweelede kusolekesya kubelesya lulayo lujanika mukapango aaka kakuti: “Ooyo uutafwidi bamwi luse uyoobetekwa kakunyina kufwidwa luse.” (Jak. 2:13) Kuti cakulicesya katuzyi kuti tuyandika kutondezyegwa luse, andiswe tuyoolutondezya luse. Tweelede kulutondezya kapati luse kwaambisya ciindi sizibi naapiluka mumbungano.

17. Mbuti Mwami Davida mbwaakatondezya luse kuzwa ansi amoyo wakwe?

¹⁷ Zikozyanyo zyamu Bbaibbele zilakonzya kutugwasya kubaaluse akweeleba kuyuma moyo. Mucikozyanyo, amuyeeye kujatikizya Mwami Davida. Kanji-kanji wakali kutondezya luse kuzwa ansi amoyo. Nokuba kuti Saulo wakali kuyanda kumujaya, Davida wakatondezya luse kumwami munanike wa Leza, kunyina naakasola kumupilusyila cibi naa kumucisa.—1Sam. 24:9-12, 18, 19.

18-19. Muubukkale nzi bobilo Davida mwaatakatondezya luse?

¹⁸ Nokuba boobo, talili lyoonse Davida naakali kutondezya luse. Mucikozyanyo, ciindi Nabala mwaalumi mubyaabi, naakamusampaula alimwi akumwiima cakulya Davida abaalumi bakwe, Davida wakanyema kapati akukanza kuyoojaya Nabala alimwi abaalumi bamuŋanda yakwe boonse. Eelo kaka cilakkomanisya kubona ntaamu njaakabweza cakufwambaana mukaintu wa Nabala iwakali kukkazika moyo, Abigayeli, calo cakapa kuti Davida atabi amulandu wabulowa!—1Sam. 25:9-22, 32-35.

¹⁹ Aciindi cimwi, musinsimi Natani wakaambila Davida kujatikizya mwaalumi umwi muvwubi iwakanyanga simukobonyina kabelele nkaakali kuyandisya. Cabukali, Davida wakaingula kuti: “Masimpe mbubonya Jehova mbwali muumi, mwaalumi ooyo iwakacita boobo weelede kujaigwa!” (2Sam. 12:1-6) Davida wakaluuzyi Mulawo wa Musa. Muntu wabba mbelele yomwe, wakeelede kumupa mbelele zyone ooyo ngwaakabbida. (Kul. 22:1) Pele lino ati ajaigwe? Ooku kwakali kuyumya mulawo! Natani wakali kubelesya caano eeci kugwasya Davida kubona kuti walo wakacitide cibi cipati kapati. Alimwi akuti Jehova wakatondezya luse kuli Davida kwiinda walo mbwaakatondezya luse kumubbi wamucikozyanyo ca Natani.—2Sam. 12:7-13.

20. Ncinzi ncotukonzya kwiiya kucikozyanyo ca Davida?

²⁰ Amubone kuti ciindi Davida naakanyema kapati, wakasala kuti Nabala abaalumi bamuŋanda yakwe boonse bajaigwe. Mpoonya kumbele, Davida wakaamba kuti mwaalumi muvwubi wamucikozyanyo ca Natani wakeelede kujaigwa akaambo kancaakacita. Mubukkale bwabili, mbwaanga Davida wakali mwaalumi uulaaluzyalo, nkaambo nzi ncaakababeteka calunya beenzinyina? Amubone cakacitika mubuumi bwa Davida. Aciindi eeco, Davida wakali kupengezyegwa amanjezyeezya aakwe. Kuti muntu kabeteka bamwi calunya, ncitondezyo cakuti cilongwe cakwe a Jehova tacili kabotu pe. Jesu wakacenjezya basikumutobela kuti: “Amuleke kubeteka kutegwa mutabetekwi; nkaambo lubeta ndomubetesya, ndomuyoobetesyegwa andinywe.” (Mt. 7:1, 2) Aboobo atweelebe cilengwa cakuba bantu bayumu moyo, pele atusolekesye “kubaaluse kapati,” mbuli Leza wesu.

21-22. Muunzila nzi zyacigaminana motukonzya kutondezya luse?

²¹ Kuti katulaaluse, tatukalimvwi buyo kuba alweetelelo. Mubwini, bantu balaaluse balacita zintu kugwasya bamwi. Nkokuti toonse, tweelede kulanga-langa cakulomya nzyobayandika banamukwasyi, bamumbungano, alimwi abamucilawo motukkala. Kwaamba masimpe, kuli nzila zinji zyakutondezya luse. Sena kuli muntu uuyanda kuumbulizyigwa? Sena tulakonzya kumugwasya cacigaminina, ambweni kwiinda mukumupa cakulya naa kucita cimwi cigwasya? Sena Munakristo iwakapilusyigwa ino-ino uyanda mulongwe wakumukulwaizya? Sena inga twabaambila bantu mulumbe wamakani mabotu? Eeyi ninzila imwi iinda kubota motukonzya kutondezya luse.—Job. 29:12, 13; Rom. 10:14, 15; Jak. 1:27.

²² Kuti katubikkila maano kuzintu nzyobayandika bamwi, tuyoobona kuti kuli zyoolwe zinji zyakutondezya luse. Eelo kaka Taateesu wakujulu, Leza “uulaaluse kapati” ulakkomana kapati ciindi notutondezya luse!