Amulwiiye Luzyalo lwa Jehova

“Amweetelele mbuli Usowanu mbweetelela.”—LUKA 6:36.

1. Ino ba Farisi bakalitondezya buti kuti tabakwe luzyalo?

NOKUBA kuti bantu bakalengwa mucinkozya ca Leza, ikanjikanji balaalilwa kwiiya luzyalo lwakwe. (Matalikilo 1:27) Mucikozyanyo, amulange ba Farisi. Kunyina nobakakkomana pe ciindi Jesu icaluzyalo naakaponya muntu wakapuutide janza mubuzuba bwa Sabata. Pele bakamuvwiya Jesu “kuti bamujaye.” (Matayo 12:9-14) Kuciindi cimbi, Jesu wakaponya muntu wakali moofwu mbwaakazyalwa. Alimwi, “bamwi baba-Farisi” tiibakabona kuti luzyalo lwa Jesu lwakali kukondelezya. Pele bakatongauka ategwa: “Muntu oyu tazwi kuli-Leza, nkaambo tabambi buzuba bwa-Sabata.”—Johane 9:1-7, 16.

2, 3. Ino Jesu wakali kwaamba nzi mukaambo kakuti, “Amucenjele kubumena bwaba-Farisi”?

² Oyu moyo walunya waba Farisi, cakali cinyonyoono kubantu akuli Leza. (Johane 9:39-41) Nkakaambo kaako Jesu wakacenjezya basikwiiya bakwe kuti, “Amucenjele kubumena” bwankamu eyi yanguzu alimwi abasizikombelo bambi mbuli ba Saduki. (Matayo 16:6) Mu Bbaibbele, bumena bubelesyegwa kwiiminina cibi naa busofwaazi. Aboobo Jesu wakali kwaamba kuti ikuyiisya kwa “balembi aba-Farisi” kwakali kukonzya kusofwaazya bukombi busalala. Munzila nzi? Mukuti kwakali kuyiisya bantu kuti kabalanga Mulawo wa Leza kweelana amilawo alimwi azilengwa zyabo pele kabafwutatila “makani mapati” kubikkilizya aluzyalo. (Matayo 23:23) Ibukombi bwazilengwa buli boobu bwakapa kuti bukombi bwa Leza bube mukuli uuminya.

³ Mucibeela cabili cacikozyanyo camutaka, Jesu wakayubununa kuyeeya kusofweede kwabasololi bacikombelo caba Juda. Mucikozyanyo, imuzyali walo wiiminina Jehova wakaliyandide kulekelela mwanaakwe wakeempwa. Pele imupati aamusankwa oyo walo wakali kwiiminina “ba-Farisi abalembi” wakajisi mizeezo yaandeene kapati kujatikizya makani aya.—Luka 15:2.

Ikunyema kwa Musankwa Mupati

4, 5. Muunzila nzi ‘mwaakasweekede’ mwanaakwabo mutaka?

⁴ “Eno mwanaakwe mupati wakali mumuunda. Naakasika afwaafwi aŋanda, wakamvwa kwiimba akuzyana. Wakaita muzike umwi, wamubuzya kuti, Ino ninzi eco? Wakamuvuwa kuti, Mwanaakwanu wasika, uso wajaya moombe uuneneede, mbwaamubona ucipona. Pele wakanyema, wakaka kunjila.”—Luka 15:25-28.

⁵ Cakutadooneka, mucikozyanyo ca Jesu, tali mutaka alikke wakajisi penzi. Ibbuku limwi lyaamba kuti, “Ibana basankwa boonse bobile baambwaawa balisweekede, imuniini ulisweekede akaambo kakutalulama kwalo ikumutola ansi, awalo mupati nkaambo kakulyaamba kululama kwalo ikumusinkilila kubona cintu ciluzi.” Amubone kuti imwanaakwabo aamutaka tanaakakaka buyo kusekelela pele “wakanyema.” Ibbala lya Cigiliki ikuzwa bbala lyakuti “kunyema” talyaambi kapati kumakani aakukalala pele lyaamba kuzumanana kwamizeezo kuba muciimo eci. Imwanaakwabo mutaka wakabikkilila aboobo wakayeeya kuti tiicakeelede pe kusekelela kupiluka kwaumwi muntu iwatakeelede kuzwa akuzwa aŋanda.

6. Ino mwanaakwabo mutaka wiiminina bani, alimwi nkaambo nzi?

⁶ Imwanaakwabo mutaka ubaiminina kabotu abo batakaluyanda luzyalo ndwaakatondezya basizibi Jesu alimwi akubikkila maanu nkwaakababikkila. Aba ibakali kulyaamba kululama kunyina ambubakalimvwa akaambo kaluzyalo ndwaakatondezya Jesu; alimwi kunyina nobakatondezya kubotelwa mbuli kuba kujulu ciindi sizibi nalekelelwa. Pele iluzyalo lwa Jesu lwakapa kuti banyeme, elyo bakatalika ‘kuyeeya bubi’ mumyoyo yabo. (Matayo 9:2-4) Kuciindi cimwi, ikunyema kwaba Farisi kwakaindila cakuti bakaita mwaalumi iwakaponesyegwaa Jesu mpoonya “bakamutanda” mucikombelo—bakamugwisyila limwi buya! (Johane 9:22, 34) Mbubwenya mbuli mwanaakwabo mutaka walo “wakaka[ka] kunjila,” ibasololi bacikombelo caba Juda bakakaka ciindi nobakapedwe coolwe ‘cakusekelela abantu basekelela.’ (Ba-Roma 12:15) Jesu wakayaambele kuyubununa kuyeeya kwabo kubyaabi mbwaakali kuyaabuzumanana mucikozyanyo cakwe.

Ikuyeeya Kutaluzi

7, 8. (a) Ino muunzila nzi mwanaakwabo mutaka mwaatakateelesya ncocaamba kuba mwana? (b) Ino musankwa mupati wakaandeene buti ausyi?

⁷ “Elyo wisi wakazwa wamukombelezya. Kwalo mwana wakavuwa, waambila wisi kuti, Bona, imyaaka yavula njendakubelekela, nsinasotokede nuuba omwe mulao wako, nekubaboobo tonandipede nekaba kapongo kuti tusekelele abeenzuma. Pele oyu mwanaako uwakamwaya lubono lwako antoomwe abasibaalumi, mbwaasika buyo wamujayila moombe uuneneede.”—Luka 15:28-30.

⁸ Ikwiinda mumajwi aya imwanaakwabo mutaka wakatondezya caantangalala kuti tanaakaciteelelesya cini-cini ncocaamba kuba mwana. Bausyi wakali kubabelekela mbuli similimo mbwabelekela simalelaakwe. Mbubwenya mbuli mbwaakaambila bausyi kuti: “Ndakubelekela.” Masimpe kuti oyu mwana mupati kwiina naakazwide aŋanda naa kutyola mulawo wausyi. Pele sena ikumvwa kwakwe kwakali kukulwaizigwaa luyando? Sena wakali kukkomana ncobeni ikubelekela usyi naa wakazyootalika kulengaana kasyoma kuti wakali mwana mubotu akaambo buyo kakuti wakali kucita milimo yakwe “mumuunda”? Ikuti naa wakali mwana uulyaabide ncobeni, nkaambo nzi ncaakaalililwa ikutondezya mizeezo mbuli yausyi? Iciindi naakapegwa coolwe cakuti atondezye luzyalo kumwanaakwabo, nkaambo nzi ncokwakanyina luzyalo mumoyo wakwe?—Amweezyanisye Intembauzyo 50:20-22.

9. Amupandulule mbubakakozyene basololi bacikombelo caba Juda amusankwa mupati.

⁹ Ibasololi bacikombelo caba Juda bakali kukozyanyaa musankwa mupati. Bakali kusyoma kuti bakali kusyomeka kuli Leza nkaambo kakuti bakali kwiitobela milawo. Masimpe, ikumvwa kulayandika kapati. (1 Samuele 15:22) Pele ikukankaizya milimo nkobakali kukankaizya kwakasandula bukombi bwa Leza kuti bube bwacilengwa buyo, ibwamambonwa pele kakunyina kulyaaba kwini-kwini munzila yakumuuya. Imizeezo yabo yakazwide buyo zilengwa. Mumyoyo yabo kwakanyina luyando. Ibantu buyo bakali kubalanga mbuli tombe lili kumatende abo, alimwi akubaamba cakusampula kuti ‘mbantu boombwezedwe.’ (Johane 7:49) Ino ono Leza naakaikkomanina buti milimo yabasololi bali boobu kakuli myoyo yabo yakali kule anguwe?—Matayo 15:7, 8.

10. (a) Nkaambo nzi majwi aakuti “Ncinjanda nduse, teensi cipaizyo pe” ncolwakali lulayo lweelede? (b) Ino mapati buti makani aakubula luzyalo?

¹⁰ Jesu wakabaambila ba Farisi kuti “kamuya, mukaiye ncikaamba kapango aka kati, Ncinjanda nduse, teensi cipaizyo pe.” (Matayo 9:13; Hosea 6:6) Izintu nzyobakali kubikka ambele zyakalinyongene nkaambo ikuti kakunyina luzyalo izipaizyo zyabo zyakanyina mpindu. Aya makani mapati ncobeni nkaambo Bbaibbele lyaamba kuti “bateeteleli” babalilwa akati kabaabo Leza mbabona kuti “baleelede kufwa.” (Ba-Roma 1:31, 32) Aboobo tacigambyi kuti Jesu wakaamba kuti ciinga coonse cabasololi bacikombelo cakali kulangila kunyonyoonwa kutamani. Kulibonya kuti ikubula luzyalo kwabo nkokwakapa kuti bapegwe lubeta olu. (Matayo 23:33) Pele ambweni bantu kuzwa kuciinga eci balakonzya kugwasigwa. Mukumanizya cikozyanyo cakwe eci, Jesu wakasolekesya kubambulula kuyeeya kwabama Juda bali boobu kwiinda mumajwi ngaakaamba usyi kumwanaakwe mupati. Atubone naa muunzila nzi?

Iluzyalo Lwausyi

11, 12. Ino muzyali wamucikozyanyo ca Jesu wakasoleka buti kubandika amwanaakwe mupati, alimwi nkaambo nzi usyi ncaakabelesyela bbala lyakuti ‘mwanaakwanu’?

¹¹ “Wakati kulinguwe Mwanaangu, tuli ayebo ciindi coonse, zyoonse zyangu nzizyako. Twaleelede kusekelela akubotelwa, nkaambo oyu mwanikaako wakalifwide, sunu wapona, wakalisweekede, sunu wabonwa.”—Luka 15:31, 32.

¹² Amubone kuti imuzyali wakabelesya jwi lyakuti “mwanikaako.” Nkaambo nzi? Amuyeeye kuti kukusaanguna musankwa mupati naakali kwaambaula kuli usyi, imutaka wakamwaamba kuti “mwanaako”—ikutali kuti “mwanaakwesu.” Kulibonya kuti kunyina naakamubona mwanaakwabo kuti munyina ncobeni. Aboobo lino usyi waambila mwanaakwe mupati kuti: ‘Oyu tali mwanaangu buyo pe. Mwanaakwanu, muli bulowa bomwe. Uleelede kusekelela kupiluka kwakwe!’ Imajwi aa Jesu ayelede kuti akalisalede kubasololi bama Juda. Basizibi mbibakali kusampula bakali ‘banabakwabo.’ Masimpe “taakwe muntu omwe ansi ano uucita ziluleme lyoonse akutabisya.” (Mukambausi 7:20) Aboobo, bama Juda bakasumpukide bakaleelede kusekelela nobakeempwa basizibi.

13. Ikumana nkucakaide kumana caano ca Jesu kutusiila mubuzyo nzi?

¹³ Icikozyanyo caide kumana nokwainda kukombelezya kwausyi. Cili mbuli kuti Jesu uyanda kuti baswiilizi bakwe balilembele mamanino aacaano eci. Nokuba buti kwiingula nkwaakaingula musankwa mupati, imuswiilizi omwe-omwe wakali amubuzyo wakuti, ‘Sena uyoonjila mukusekelela ikucitika kujulu ciindi sizibi neempwa?’ Abalo Banakristo sunu balijisi coolwe cakutondezya bwiinguzi bwabo kumubuzyo oyo. Munzila nzi?

Ikwiiya Luzyalo lwa Leza Sunu

14. (a) Mbuti mbotunga twalubelesya lulayo lwa Paulo ilujanwa ku Ba-Efeso 5:1, caboola kumakani aaluzyalo? (b) Nkutateelelesya nzi nkotweelede kucenjelela kujatikizya luzyalo lwa Leza?

¹⁴ Paulo wakalailila bana Efeso kuti: “Amube basikwiiya ba-Leza mbuli bana bayandwi.” (Ba-Efeso 5:1) Aboobo mbotuli Banakristo tweelede kuluziba luzyalo lwa Leza, ikulubikka mumyoyo yesu mpoonya akutondezya ciimo eci notweendelezyanya abamwi. Nokuba boobo, kuleelede kucenjela. Iluzyalo lwa Leza talweelede kubonwa kuti ncintu cuubya-ubya cinyonyoono. Mucikozyanyo, kuli bamwi bakonzya kuyeeya cakutakombelela ategwa, ‘Ikuti naa ndabisya ndilakonzya kupaila kuli Leza kuti andilekelele elyo uyoondifwida luzyalo.’ Iciimo cili boobu cilakonzya kweelana aceeco sikulemba Bbaibbele Juda ncaakati ‘nkusandula luzyalo lwa-Leza wesu kuba zisusi zibi.’ (Juda 4) Nokuba kuti Jehova ulaaluzyalo, “takooyooleka naa kutasubula” ciindi nayendelezya basikulubizya bateempwi.—Kulonga 34:7, BT; amweezyanisye Joshua 24:19; 1 Johane 5:16.

15. (a) Nkaambo nzi baalu ncobeelede kuzumanana kutaciindizya mbuli mbobalanga luzyalo? (b) Nokuba kuti baalu tabalekeleli kulubizya kucitwa caali, ncinzi ncobeelede kusolekesya kucita alimwi nkaambo nzi?

¹⁵ Pele, tweelede kucenjela kapati kutegwa twataciindizya akwalo kulubazu lumbi—icilengwa cakuyumya moyo alimwi akubetekana kuli baabo batondezya kweempwa kwini-kwini alimwi akuusa kwabunaleza akaambo kazibi zyabo. (2 Ba-Korinto 7:11) Mbwaanga baalu mbabapedwe mulimo wakulanganya mbelele zya Jehova, kulayandika kapati kuti kabataciindizyi kumakani aya ikapati nobalanga-langa milandu. Imbungano ya Bunakristo yeelede kuti kiisalala alimwi Magwalo alazumizya ‘ikutanda oyo mubi’ kwiinda mukumugwisya mumbungano. (1 Ba-Korinto 5:11-13) Alimwi ncibotu ikutondezya luzyalo ikuti kakuli kaambo kasalala kakucitila boobo. Aboobo nokuba kuti baalu tababalekeleli abo balubizya caali, balasolekesya ikuyandaula nzila yaluyando alimwi yaluzyalo ikusikila waawo aagolela bululami. Balaiyeeya njiisyo ya Bbaibbele lyoonse yakuti: “Lubeta talujisi lweetelelo kuliyooyo uuteeteleli mweenzinyina. Lweetelelo lulalilumbaizya amulubeta.”—Jakobo 2:13; Tusimpi 19:17; Matayo 5:7.

16. (a) Ikwiinda mukubelesya Bbaibbele, amutondezye mbuli mbwayandisya Jehova kuti basikulubizya bapiluke kulinguwe. (b) Ino inga twatondezya buti kuti aswebo tulakuyanda kupiluka kwabasizibi beempwa?

¹⁶ Icikozyanyo camutaka cilakasalazya kaambo kakuti Jehova uyanda kuti basikulubizya boonse bapiluke kulinguwe. Masimpe ulazumanana kubatamba mane kusikila limwi balitondezya kuti tabalangilwi kweempwa. (Ezekiele 33:11; Malaki 3:7; Ba-Roma 2:4, 5; 2 Petro 3:9) Mbubwenya mbuli usyi mutaka, Jehova ulabalanganya munzila yabulemu abo bapiluka kulinguwe, ikubatambula kabali banamukwasyi beni-beni. Sena mulamwiiya Jehova mumakani aya? Iciindi musyomima iwakagwisidwe mumbungano napilusigwa, mulimvwa buti? Tulizi kale kuti kuli ‘kubotelwa kujulu.’ (Luka 15:7) Pele sena kuli kubotelwa anyika, mumbungano yanu mane amumoyo wanu? Naa mbubwenya mbuli kumusankwa mupati wamucikozyanyo, sena kuli kubikkilila mbuli kuti kunyina kutambulwa kuyandika kuli yooyo iwatakeelede kuzwa akuzwa mubutanga bwa Leza?

17. (a) Ino mbukkale buli buti bwakazyooba mu Korinto mumwaanda wamyaka wakusaanguna, alimwi ino Paulo wakabalailila kuti baalanganye buti makani ayo abo bakali mumbungano? (b) Nkaambo nzi ncaakali mabotu malailile aa Paulo, alimwi inga twaatobela buti sunu? (Amubone akabbokesi kali a peeji 29.)

¹⁷ Ikutegwa tugwasigwe kulilanga-langa tobeni mumakani aya, amulange cakacitika mu Korinto ambweni mumwaka wa 55 C.E. Okuya imwaalumi umwi wakagwisidwe mumbungano wakabaa bukkale busalala alimwi. Ino ncinzi ncobakeelede kucita babunyina? Sena bakeelede kudooneka kweempwa kwakwe akuzumanana kumutantamuka? Pele Paulo wakalailila bana Korinto kuti: “Muleelede kulekelela muntu oyo caluzyalo akumuumbulizya, kuti ataindi kulemenwa abuusu bunji. Ndamukumbila kuti mumuboozye muluyando lwanu.” (2 Ba-Korinto 2:7, 8) Ikanjikanji basikulubizya beempwa balafwambaana kubaa nsoni alimwi akutyompokelwa. Aboobo ibali boobu beelede kutondezyegwa kuti balayandwa abasyominyina alimwi a Jehova. (Jeremiya 31:3; Ba-Roma 1:12) Eci cilayandika kapati. Nkaambo nzi?

18, 19. (a) Ino bana Korinto bakalitondezya buti kuti musyule bakali kulekela bantu kucita kufwumbwa mbubayanda? (b) Ino ciimo cakubula luzyalo nocakapa buti kuti bana Korinto ‘bapubbulwe kuli Saatani’?

¹⁸ Paulo naakali kulailila bana Korinto kuti kabalekelelana, wakapa kaambo komwe kakucitila boobo ategwa “kuti tutapubbulwi kuli-Saatani, nkaambo tatuli bafubafuba batezi makanze aakwe mbwaabede.” (2 Ba-Korinto 2:11) Ino wakali kwaamba nzi awo? Kukusaanguna Paulo wakapede lulayo kumbungano yaku Korinto akaambo kakulekela bantu kucita mbuli mbobayanda. Bakali mulekede muntu nguwenya oyu ikuzumanana kucita cinyonyoono kakunyina kubweza ntaamu. Mukucita boobu, imbungano—ikapati baalu bamulinjiyo—bakamukkomanisya Saatani nkaambo naakakondwa kubikka mbungano muciimo camasampu.—1 Ba-Korinto 5:1-5.

¹⁹ Ikuti lino nobakalemenena kulubazu lumbi akukaka kulekelela yooyo muntu weempwa, Saatani naakabacenjelela muli zimbi. Munzila nzi? Muukuti lino naakabelesya lunya lwabo alimwi akubula luzyalo. Ikuti naa sikubisya iweempwa ‘waindila kulemenwa abuusu bunji’—naa mbuli bwaamba Today’s English Version kuti, “waindila kuusa cakuti watyompelwa limwi”—inga babaa mulandu mupati kaka baalu kuli Jehova! (Amweezyanisye Ezekiele 34:6; Jakobo 3:1.) Nkakaambo kaako Jesu naakamana kucenjezya basikumutobela kuti batalebyi “umwi wabaniini aba” wakati: “Amukalilangisye. Kuti munyoko wakubisizya umutapatile, kuti weempa umujatile.”a—Luka 17:1-4.

20. Ino muunzila nzi mokuli kubotelwa kujulu aansi ciindi sikubisya neempwa?

²⁰ Izyuulu zili mbozibede zyabaabo bapiluka kubukombi busalala mwakaa mwaka balalumba akaambo kaluzyalo ndwatondezya Jehova kulimbabo. Umwi mucizi Munakristo wakaamba boobu kujatikizya kupilusigwa kwakwe mumbungano: “Kunyina ciindi ncondiyeeya mubuumi bwangu nondakakkomene boobu akaambo kacintu cimwi.” Aino ikubotelwa kwakwe kulavwiilizigwa akati kabangelo. Aswebo atusangane ‘mukubotelwa kwakujulu’ kwalo kucitika sizibi ayempwa. (Luka 15:7) Twacita boobu, twiiya luzyalo lwa Jehova.

Bupanduluzi buyungizidwe

Ikwiindulula

◻ Ino muunzila nzi imwanaakwabo mutaka mwakakonzyanyaa basololi bacikombelo caba Juda?

◻ Muunzila nzi imwanaakwabo mutaka mwaatakateelelesya ncocaamba kuba mwana?

◻ Notuyeeya luzyalo lwa Leza, nimbazu nzi zyobile zyakuciindizya nzyotweelede kulikasya?

◻ Ino inga twalwiiya buti luzyalo lwa Leza sunu?

[Kabbokesi kali apeeji 29]

“MUMUBOOZYE MULUYANDO LWANU”

Ikujatikizya sikulubizya wakagwisidwe mumbungano walo wakeempwa, Paulo wakaambila mbungano yaku Korinto kuti: “Ndamukumbila kuti mumuboozye muluyando lwanu.” (2 Ba-Korinto 2:8) Ibbala lya Cigiliki ilyakasandululwa kuti ‘kuboozya’ ndibbala lyamumulawo ilyaamba “kusinizya.” Ee, abo beempwa ibapilusigwa mumbungano beelede kuziba kuti balayandwa alimwi akuti batambulwa kuti mbaasimbungano alimwi.

Nokuba boobo, tweelede kuyeeya kuti ibunji bwabaabo bali mumbungano tabacizi cini-cini cakapa kuti muntu agwisigwe mumbungano naa capa kuti apilusigwe. Kunze lyaboobo, kulakonzya kakuli bamwi ibajatikizidwe naa bacimidwe—ambweni kwaciindi cili mbocibede—akaambo kakubisya kwayooyo weempwa. Aboobo akaambo katwaambo tuli boobu, iciindi kwaambilizigwa kuti muntu oyo wapilusigwa mumbungano, inga calulama kuti twataambilizya kuti twamutambula muntu oyo kusikila mane zintu zyakkalikila.

Cilayumya lusyomo kaka kuli baabo bapilusigwa mumbungano kuziba kuti batambulwa alimwi kuti mbaasimbungano ya Bunakristo! Tulakonzya kubakulwaizya aba beempwa kwiinda mukubandika ambabo alimwi akubaa mbabo ku Ŋanda ya Bwami, mumulimo alimwi akuziindi zimbi zyeelede. Aboobo kwiinda mukuboozya naa kusinizya luyando lwesu kuli baaba bayandwa, tatucesyi-cesyi zinyonyoono nzyobakacita. Pele tulasekelela antoomwe amakamu aakujulu akaambo kakuti baileka nzila yabo yabubi akupiluka kuli Jehova.—Luka 15:7.

[Cifwanikiso icili apeeji 31]

Imusankwa mupati wakakaka kusekelela kupiluka kwamwanaakwabo