“Jehova! Leza Siluzyalo Asibuuya”
“Jehova! Jehova! Leza siluzyalo asibuuya uutafwambi kukalala, uuzwide luse alusyomo.”—KULONGA 34:6.
1. (a) Nduumbulizyo nzi ndolipa Bbaibbele kuli baabo balaa bayandwa baleya kuzwa kubukombi busalala? (b) Ino Jehova ubalanga buti bantu balubizya?
UMWI muzyali Munakristo wakati: “Mwanaangu musimbi wakandaambila kuti tanaakacili kuyanda kuba mumbungano ya Bunakristo. Kwamazuba aali mbwaabede, nsondo mane buya amyezi kuzwa ciindi eco ndakalimvwa kusululwa kapati. Cakandicisa kwiinda lufwu.” Masimpe cilatyompya ikubona muyandwa ikuleya kuzwa munzila yabukombi busalala. Sena cakamucitikila kale eco? Ikuti kabuli boobo, mulaumbulizigwa kuziba kuti Jehova ulamufwida luzyalo. (Kulonga 3:7; Isaya 63:9) Pele ino ubalanga buti basikulubizya bali boobu? Ibbaibbele litondezya kuti Jehova ulabatamba caluzyalo kuti bapiluke kulinguwe. Wakakombelezya bama Juda bazangi bakuciindi ca Malaki kuti: “Amuboole kulindime, lino ambebo nzooboola kulindinywe.”—Malaki 3:7.
2. Ino Bbaibbele litondezya buti kuti luzyalo nceciimo cipati ca Jehova?
2 Iluzyalo lwa Leza lwakatondezyegwa kuli Musa Kucilundu ca Sinai. Okuya, Jehova wakalitondezya kuti ngu “Leza siluzyalo asibuuya uutafwambi kukalala, uuzwide luse alusyomo.” (Kulonga 34:6) Oku kwaambilizya kusinizya kuti iluzyalo ncibeela cini-cini caciimo ca Jehova. Imwaapostolo Munakristo Petro wakalemba kuti “ulayanda kuti boonse bajane ciindi cakweempwa.” (2 Petro 3:9) Aino takuli kuti luzyalo lwa Leza talujisi magolelo. Musa wakaambilwa kuti: “Takooyooleka naa kutasubula.” (Kulonga 34:7, BT; 2 Petro 2:9) Nokuba boobo “Leza nduluyando” alimwi iluzyalo ndolunji muciimo eco. (1 Johane 4:8; Jakobo 3:17) Jehova “takakatili lyoonse bukali bwakwe” alimwi ‘ulabotelwa muluzyalo.’—Mika 7:18, 19.
3. Ino nzila njaakali kulanga luzyalo Jesu yakaandeene buti ayabalembi aba Farisi?
3 Jesu wakali mukozyede cakumaninina Usyi wakujulu. (Johane 5:19) Inzila yaluzyalo njaakali kulanganizyila basimucita zibi teeyakali yakuzuminizya zibi zyabo, pele wakali kutondezya luyando ndulwenya ndwaakali kutondezya kuli baabo bakali kuciswa munzila yakumubili. (Amweezyanisye Marko 1:40, 41.) Ee, Jesu wakali kubikka luzyalo akati ‘kamakani mapati’ aa Mulawo wa Leza. (Matayo 23:23) Pele amubone mbubakali kucita balembi aba Farisi balo mizeezo yabo yabululami kanjikanji iyakali kulugwisyila limwi luzyalo. Nobakabona Jesu kayanzana abasimucita zibi, bakatongauka ategwa: “Oyu muntu utambula bacitazibi, ulalya abalo.” (Luka 15:1, 2) Jesu wakaingula basikumupa mulandu aba ikubelesya zikozyanyo zyotatwe, acimwi kacitondezya luzyalo lwa Leza.
4. Nzikozyanyo nzi zyobile nzyaakaluula Jesu, alimwi ncizi cakali kwaambwa muli cimwi acimwi?
4 Ikusaanguna Jesu wakaamba zyamwaalumi wakasiya mbelele zyakwe izili 99 kutegwa akayandaule yomwe yakasweekede. Ncinzi ncaakali kwaamba? “Mbubonya obo akujulu kunooli kubotelwa nkaambo kaumwi mucitazibi uwasanduka, kwiinda baluleme abali makumi aali musanu mwaane amusanu mubane abatabuli kusanduka.” Mpoonya Jesu wakaamba zyamukaintu wakali kuyandaula sheleni lyakwe lyomwe lyakasweeka walo wakasekelela naakalijana. Wakacibelesya buti eco? “Nkokuli kubotelwa kubaangelo ba-Leza nkaambo kaumwi mucitazibi uwasanduka.” Jesu wakaluula cikozyanyo cakwe catatu.a Ibanji lino bacibona kuti ncecaano ciinda kubota. Ikulanga-langa cikozyanyo eci kuyootugwasya kuziba luzyalo lwa Leza akumwiiya.—Luka 15:3-10.
Wazwa Aŋanda Mwana Muzangi
5, 6. Ino musankwa muniini mucikozyanyo catatu ca Jesu wakatondezya buti kutalumba kwini-kwini?
5 “Muntu umwi wakali kujisi bana bobile balombe. Umuniini wakaambila wisi kuti, Taata, ndipa caabilo calubono iceelede ndime. Nkabela wakabaabanya lubono lwakwe. Naakamana mazuba mace buyo, oyo muniini wakabungika zyakwe zyoonse, wainka kucisi icili kule, oko wakaakusowaila lubono lwakwe kubutaka.”—Luka 15:11-13.b
6 Awa imusankwa muniini wakatondezya kutalumba kwini-kwini. Ikusaanguna wakayanda kuti apegwe lubono lwakwe mpoonya wakaakulusowaila lubono lwakwe kwiinda ‘mubutaka.’ Ibbala lyakuti “butaka” lisanduludwe kuzwa kubbala lya Cigiliki ilyaamba “buumi bwakutalyeendelezya.” Umwi haabupampu waamba kuti bbala elyo “lyaamba kubulila limwi buya ciimo.” Icakweelela, imwana musankwa wamucikozyanyo ca Jesu kanjikanji wiitwa kuti mutaka, ibbala lipandulula muntu muzabala, simasangusangu alimwi musowezi.
7. Ino mbaani bakozyanyaa mutaka sunu, alimwi nkaambo nzi bunji bwabantu bali boobu ncobayandila kuyoolyeendelezya “kucisi icili kule”?
7 Sena sunu nkobali bantu bakozyanya amutaka? Inzya nkobali. Icuusisya ncakuti imweelwe musyoonto wazwa “muŋanda” ya Taateesu wakujulu Jehova. (1 Timoteo 3:15) Bamwi babaaba balimvwa kuti ibukkale bwamuŋanda ya Leza mbuyumu kapati cakuti ikulangilila kwa Jehova kusinkilila buya muciindi cakukwabilila. (Amweezyanisye Intembauzyo 32:8.) Amulange mukaintu umwi Munakristo wakakomezyegwa munzila yeendelana anjiisyo zya Bbaibbele pele wakazyooba mudakwi alimwi uubelesya misamu iikola. Aciyeeya ciindi eco cibyaabi mubuumi bwakwe ulaamba: “Ndakali kuyanda kuti ndisinizye kuti ndilakonzya kubaa buumi bubotu ndemwini. Ndakali kuyanda kucita ncindakali kuyanda kucita alimwi tiindakali kuyanda kuti muntu umbi andaambile caandeene.” Mbubwenya mbuli mutaka ulya, oyu mukaintu mwana-mwana wakasala kulyeendelezya. Icuusisya ncakuti, akaambo kamicito yakwe yatakali kweendelanaa magwalo, wakagwisigwa mumbungano ya Bunakristo.—1 Ba-Korinto 5:11-13.
8. (a) Ndugwasyo nzi lunga lwapegwa kuli baabo ibalombozya kubaa bukkale bwaandeene azyeelelo zya Leza? (b) Nkaambo nzi muntu ncayelede kuyeeyesya kujatikizya kusala kwakwe kumakani aabukombi?
8 Cilatyompya kapati kuti naa musyomima walitondezya kuyanda kutobela zyeelelo izyaandeene azya Leza. (Ba-Filipi 3:18) Noziba boobo zintu, ibaalu alimwi abamwi ibeelela munzila yakumuuya balasolekesya kuboozya sikubisya oyo. (Ba-Galatiya 6:1) Nokuba boobo kunyina uusinikizigwa pe kuzumina jokwe lyabusikwiiya lya Bunakristo. (Matayo 11:28-30; 16:24) Abalo bakubusi bakomena, beelede kulisalila kumakani aabukombi. Umwi aumi wesu ulijisi nguzu zyakukonzya kulisalila alimwi tuyoobetekwa kuli Leza. (Ba-Roma 14:12) Aino aswebo ‘tuyootebula ncotubyala’—iciiyo ncaakali kulangilwa kwiiya mutaka wamucikozyanyo ca Jesu kalitana lampa pe.—Ba-Galatiya 6:7, 8.
Ikutyompokelwa Kucisi Cakulaale
9, 10. (a) Nkucinca kuli buti kwakaba kubukkale bwamutaka, alimwi ncinzi ncaakacita? (b) Amupe cikozyanyo cakupengana kwabamwi ibasiya bukombi bwini-bwini sunu ikukozyanyaa kwamutaka.
9 “Naakamana kulusowa loonse, kwakaba nzala mpati mucisi eco, walo wakatalika kupenga. Nkabela wakainka walinjizya kumuntu wamucisi eco, oyo wakamutuma mumakula aakwe kuti aembele ngulube. Wakali kuyanda kukusya ida lyakwe amakweleele aalya ngulube, kwalo taakwe muntu uwakamupa.”—Luka 15:14-16.
10 Nokuba kuti wakalipengede, oyu mutaka tanaakainayeeya muzeezo wakupiluka kumunzi. Pele wakaswaanganya sicisi iwakamunjizya mulimo wakweembela ngulube. Mbwaanga Mulawo wa Musa wakali kwaamba kuti ngulube nzinyama zisofweede, imulimo uli boobu tiiwakali kulangilwa kucitwa amu Juda. (Levitiko 11:7, 8) Pele kuti naa manjezeezya akamukatazya mutaka, tanaakaabikkila maanu pe. Kayi kwiina anaakali kulangila kuti simalelaakwe, sicisi akatazigwe akaambo kambuli mbwaakali kulimvwa muntu muzwakule uutubabu. Ipenzi lyamutaka lilakonzyanya alijisi bantu banji sunu balo ibaleka kutobela nzila iiluzi yabukombi busalala. Kanjikanji ibantu bali boobo balanjila mumicito yalo njobakali kubona kuti ilisofweede musyule. Mucikozyanyo, naakali amyaka iili 17, imwaalumi umwi uucili mwana wakaileka nzila ya Bunakristo njaakakomezyegwa anjiyo. Ulazumina ategwa: “Ibwaamu alimwi akubelesya misamu iikola zyakazimaazya njiisyo zya Bbaibbele nzyondakaiya kwamyaka iili mbwiibede.” Tiilyakalampa oyu mwaalumi wakalijanina muntolongo akaambo kakubba akujaya. Nokuba kuti kumbele wakazyoojokoloka munzila yakumuuya, wakasubuka kaka akaambo “[ka]kutangala akukkomana muzibi kwakaindi kasyoonto”!—Amweezyanisye Bahibulu 11:24-26, BT.
11. Ino penzi lyamutaka lyakaindila buti, alimwi mbuti bamwi sunu mbubajana kuti koongelezya kwanyika ‘nkwalucengo buyo’?
11 Ipenzi lyamutaka lyakazyooindila akaambo kakuti “taakwe muntu uwakamupa [cakulya].” Ino balongwe bakwe bapya bakali kuli lino? Mbwaanga lino wakanyina mali naaceya, wakaba muntu ‘uusulidwe’ kulimbabo. (Tusimpi 14:20) Mbubwenya buyo, ibanji sunu ibapambuka kuzwa kulusyomo balaziba kuti ikoongelezya alimwi akubona kwanyika ‘nzyalucengo buyo.’ (Bakolose 2:8, BT) Umwi mukaintu uucili mwana-mwana iwakazwide mumbunga ya Leza kwakaindi kaniini waamba kuti: “Ndakakatazigwa kapati akupenga akaambo kakubula busolozi bwa Jehova. Ndakasola kulyeelezya anyika pele akaambo kakuti teendakali mbuli bamwi, bakandikaka. Ndakalimvwa mbuli mwana uusweekede iwakali kuyandika muzyali wakundisololela. Nceciindi nondakayeeya kuti ndakali kuyandika kubaa Jehova. Kunyina nondakali kuyanda kuti ndikapone kakunyina nguwe alimwi.” Imutaka wamucikozyanyo ca Jesu wakayeeya munzila njiyonya eyi.
Imutaka Waliyeeya
12, 13. Ntwaambo nzi twabagwasya bamwi sunu kuti baliyeeye? (Amubone kabbokesi.)
12 “Pele naakayeeya wakati, Taata ulijisi bazike banjibanji abakuta nsima mane baliileka, pele mebo kuno ndafwa nzala. Nandoobuka, ndiinke kulitaata, ndikamwaambile kuti, Taata, ndabisizya ijulu ayebo, nsiceelede kutegwa mwanaako, undicite mbuli umwi wabazike bako. Ndilyonya wakanyamuka wainka kuliwisi.”—Luka 15:17-20.
13 Imutaka ‘wakaliyeeya.’ Kwaciindi cili mbocibede, wakajisi bubi kulikondelezya mbuli kuti uli munyika yakweezeezya buyo. Pele lino wakaciziba ncobeni ciimo cakwe cakumuuya. Ee, nokuba kuti wakaliwide, kwakacili bulangizi kumwaalumi oyu mwana-mwana. Cintu cimwi cibotu cakacili kujanika mulinguwe. (Tusimpi 24:16; amweezyanisye 2 Makani 19:2, 3.) Ino mbuti kumakani abaabo bazwa mubutanga bwa Leza sunu? Sena inga calulama kwaamba kuti tabacijisi bulangizi akuti muli zyoonse inzila yabo yabuzangi itondezya kuti babisyilide muuya uusalala wa Leza? (Matayo 12:31, 32) Tabuli boobo. Ibunji bwabo balapenzegwaa nzila yabo mbyaabi kwamana waawo ibanji balaliyeeya. Imucizi umwi naayeeya ciindi ncaakali kunze aambunga ya Leza ulaamba: “Kunyina nondakamuluba Jehova nobuba buzuba bomwe. Ndakali kukomba lyoonse kuti buzuba bumwi akanditambule alimwi mukasimpe.”—Intembauzyo 119:176.
14. Ncinzi ncaakasala kucita mutaka, alimwi wakatondezya buti ciimo cakulibombya mukucita boobu?
14 Pele ncinzi ncobanga bacita kujatikizya bukkale bwabo abo basweekede? Imutaka mucikozyanyo ca Jesu wakayeeya kuti ajokele kumunzi akuyoolomba kuti amulekelele usyi. Imutaka wakayeeya kuti akaambe kuti, “undicite mbuli umwi wabazike [babelesi] bako.” Imubelesi wakali muntu uunjizigwa mulimo alimwi iwakali kunga watandwa kufwumbwa ciindi. Oyu mulimo wakali waansi mane kwiinda abwakali muzike walo wakali mbuli umwi wamukwasyi. Aboobo mutaka tanaakali kuyeeya kuti abe mwana mbuli mbwaakabede kaindi. Wakalilibambilide kuzumina mulimo waansi kapati ikutegwa atondezye kulibombya alimwi nkwaakajisi kuli usyi buzuba abuzuba. Nokuba boobo imutaka wakali kulangilwa kugambwa kapati.
Ikutambulwa Munzila Iikkazika moyo
15-17. (a) Ino usyi wakalimvwa buti naakamubona mwanaakwe? (b) Ino cakusama, inweenwe alimwi andyasyo usyi nzyaakapa mwana zitondezya nzi? (c) Ncinzi citondezyegwaa pobwe lyakabambwaa usyi?
15 “Kwalo naakacili kulekule wisi wakamubona, wamufwida luzyalo, watijaana, wawida kunsingo yakwe, wamumyontesya. Mpoonya mwana wakamwaambila kuti, Taata, ndabisizya ijulu ayebo, nsiceelede kutegwa mwanaako. [Undicite mbuli umwi wabazike bako]. Pele wisi wakaambila bazike bakwe kuti, Kamuleta cisamo cibotu, mumusamike, mumubike nweenwe kujanza lyakwe, mumusamike endyasyo kumatende aakwe, alimwi mulete moombe uuneneede, mumujaye, tulye tusekelele. Nkaambo oyu mwanaangu wakali mufu, sunu wapona, wakalisweekede, sunu wabonwa. Ndilyonya bakatalika kusekelela.”—Luka 15:20-24.
16 Imuzyali uli woonse ulakulombozya kubukuluka kwamwanaakwe munzila yakumuuya. Aboobo, tulakonzya kweezeezya usyi wamutaka kalanga kukazila kali kumbele aamunzi wakwe buzuba abuzuba, kasyoma kuti mwanaakwe ulapiluka. Lino wamubona mwanaakwe kaboola mukazila! Cakutadooneka ciimo camusankwa oyo cakalisandukide. Pele usyi wakamuziba “kacili kulekule.” Wabona kuti uulya naboneka bobuya muzisani zizapukide alimwi nafwulukide; mwanaakwe buya elyo wamuzuzaanina!
17 Usyi naakasika kwakali mwana, wakamufwumbata akumumyonta cakukondwa. Mpoonya wakaambila bazike bakwe kuti bamupe cakusama, nweenwe alimwi andyasyo. Eci cakusama tiicakali cisani-sani buyo pe, pele cakali “cibotu”—ambweni icisumidwe kabotu icipegwa kumuntu uulemenede. Mbwaanga nweenwe alimwi andyasyo kwiina nozyakali kubonwa kubazike, usyi wakali kutondezya caantangalala kuti mwanaakwe wakali kutambulwa akubonwa kuti ngwamumukwasyi cini-cini. Pele nkozili azimbi nzyaakacita usyi. Wakaamba kuti kube pobwe lyakusekelela kupiluka kwamwanaakwe. Icakutadooneka oyu mwaalumi tanaakamulekelela cakusinikizigwa mwanaakwe pe naa kumulekelela akaambo buyo kakuti wakali mulawo buya kuti acite obo nkaambo mwanaakwe wakapiluka; wakali kuyanda kuti amulekelele. Cakamukonda.
18, 19. (a) Ino cikozyanyo camutaka cimuyiisya nzi kujatikizya Jehova? (b) Mbubwenya mbuli mbotubona mukweendelezegwa kwa Juda a Jerusalemu, ino Jehova ‘ulindila’ buti kuti sizibi apiluke?
18 Ikusikila waawa, ncinzi ncocituyiisya swebo cikozyanyo camwana mutaka kujatikizya Leza walo ngotupedwe coolwe cakumukomba? Icakusaanguna ncakuti, Jehova ngu “siluzyalo asibuuya uutafwambi kukalala, uuzwide luse alusyomo.” (Kulonga 34:6) Masimpe, iluzyalo nceciimo ciinda ncacijisi Leza. Njenzila mbwabalanganya abo bapengede. Mpoonya icikozyanyo ca Jesu cituyiisya kuti Jehova “ulafwamba kujatila.” (Intembauzyo 86:5) Ulabikkila maanu ikulanga naa ibantu bacita zibi babaa mbubacinca myoyo yabo calo cinga capa kuti walo atondezye luzyalo.—2 Makani 12:12; 16:9.
19 Mucikozyanyo, amuyeeye Leza mbwaakabeendelezya bana Israyeli. Imusinsimi Isaya wakasololelwaa Jehova kuti apandulule ciimo ca Juda a Jerusalemu kuti ‘balaciswa kuzwa kumutwe kusikila kumaulu.’ Pele wakaamba akuti: “Jehova ulalindila kuti amufwide luzyalo. Ulalisumpula kuti amufwide buuya.” (Isaya 1:5, 6; 30:18; 55:7; Ezekiele 33:11) Mbubwenya mbuli muzyali wamucikozyanyo ca Jesu, cili mbuli kuti Jehova ‘ulanga kukazila.’ Ulalangila kapati kuti bapiluke abo bakazwa aŋanda. Sena eci tacisyi ncotulangila kumuzyali siluyando?—Intembauzyo 103:13.
20, 21. (a) Muunzila nzi banji mobakulwaizigwaa luzyalo lwa Leza? (b) Ncinzi ciyoobandikwa mucibalo citobela?
20 Mwakaa mwaka, iluzyalo lwa Jehova lulabakulwaizya banji kuliyeeya akupiluka kubukombi bwini-bwini. Cilaleta lukkomano kaka kubayandwa babo! Mucikozyanyo amulange muzyali Munakristo waambwa kumatalikilo. Icikkomanisya ncakuti mwanaakwe musimbi wakajokoloka munzila yakumuuya aboobo lino mubelesi waciindi coonse. Ulaamba: “Ndili muntu uukkomene kusikila waawo mpanga wagolela muntu mubweende obu bwazintu. Imisozi yangu yabuumba yasandulwa kuba yakukkomana.” Masimpe awalo Jehova ulakondwa!—Tusimpi 27:11.
21 Pele tazili zyeezyo zyalo zijatikizidwe mucikozyanyo camutaka. Jesu wakacizumanana caano cakwe kutegwa aandaanye luzyalo lwa Jehova kuciimo cakutanyoneka cabalembi aba Farisi. Mbwaakacita—alimwi ancocaamba eci kulindiswe—ziyoobandikwa mucibalo citobela.
Bupanduluzi buyungizidwe
a Izikozyanyo ziluulwa mu Bbaibbele teezyakacitika ncobeni pe. Kunze lyaboobo, mbwaanga muzeezo wazyaano ezi ngwaakuyiisya bukkale bubotu, takuyandiki pe ikuyandaula ncoziiminina mutwaambo toonse.
b Ncociiminina cikozyanyo eci munzila yabusinsimi cakabandikwa mu Ngazi Yamulindizi ya February 15, 1989, mapeeji 16, 17.
Ikwiindulula
◻ Ino ciimo ca Jesu kujatikizya luzyalo cakaindene buti acaba Farisi?
◻ Ino mbaani bakozyanyaa mutaka sunu alimwi muunzila nzi?
◻ Mbukkale buli buti bwakapa kuti aliyeeye mutaka?
◻ Ino usyi wakatondezya buti luzyalo kumwanaakwe wakeempwa?
[Kabbokesi kali apeeji 25]
BAKALIYEEYA
Ino ncinzi cabagwasya kuti baliyeeye bamwi ibakagwisidwe mumbungano ya Bunakristo? Itwaambo tutobela tulacaamba eco.
“Mumoyo wangu ndakacili kukuzyi ikwakali bwini. Ikwiiya Bbaibbele alimwi akujanika kumiswaangano ya Bunakristo kwamyaka iili mbwiibede kwakandinjila kumoyo kapati. Ino nondakazumanana buti kumufwutatila Jehova? Taakandisiide pe; ndime ndakamusiide. Limwi ndakakubona kulubizya akutamvwa kwangu akuti Jwi lya Jehova lyakaliluzi ciindi coonse—‘ulatebula ncobyala.’”—C.W.
“Imwanaangu musimbi wakatalika kwiiya kwaambaula elyo eco cakandinjila nkaambo ndakali kuyanda kuti ndimuyiisye zintu zili mbuli zyakuti, ino Jehova nguni alimwi ambokukombwa kulinguwe. Ndakabaa cilabila aboobo buzuba bumwi masiku ndakabweza mootokala akuunka kupaaki ndaakulila kapati. Ndakalila, ndimane ndakakomba kuli Jehova icintu ncindakacita kwaciindi cakusaanguna mumazuba manji aakaindide. Ncindakalizi ncakuti ndakali kuyanda Jehova alimwi mubuumi bwangu alimwi ndakali kusyoma kuti ulandilekelela.”—G.H.
“Naakali kubandikwa makani aabukombi, ndakali kwaambila bantu kuti, ikuti naa ndaambilwa kuti ndisale bukombi bwakali kuyiisya bwini, inga ndasala kuba umwi wa Bakamboni ba Jehova. Mpoonya ndakali kwaamba kuti, ndakali umwi wabo pele ndakaalilwa kuzuzikizya zyakeelede, aboobo ndakacileka. Ndayeeya boobo, ndakali kulimvwa bubyaabi. Limwi ndakazumina kuti ‘Ndilipengede. Ndiyandika kucinca cini-cini.’”—C.N.
“Imyaka iinda ku 35 yainda, imebo amulumaangu twakagwisigwa mumbungano. Mpoonya mu 1991 twakagambwa kubona baalu bobile batuswaya balo bakatwaambila kuti cakali kukonzyeka kuti inga twapiluka kuli Jehova. Nokwakainda myezi iili cisambomwi twakakkomana kupilusigwa mumbungano. Imulumaangu ulaamyaka yakuzyalwa iili 79 elyo mebo ndilamyaka iili 63.”—C.A.