Nzila Zyosanwe Zikonzya Kumugwasya Kujana Ziiyo zya Bbaibbele
1. Kuti katujisi buyumuyumu bwakujana ziiyo zya Bbaibbele mucilawo cesu, ncinzi ncotweelede kucita, alimwi nkaambo nzi?
1 Sena mujisi buyumuyumu bwakujana muntu ngomukonzya kwiiya limwi Bbaibbele? Amuzumanane kusola. Jehova ulabalongezya aabo bataleki kucita kuyanda kwakwe. (Gal. 6:9) Ansi aawa kuli nzila zyosanwe zikonzya kumugwasya.
2. Mbuti mbotukonzya kubelesya nzila yacigaminina kutalisya ciiyo ca Bbaibbele?
2 Nzila Yacigaminina: Bantu banji balizyi kuti tulaabila Ngazi Yamulindizi alimwi a Sinsimuka!, pele ambweni tabazyi kuti tulasololela aziiyo zya Bbaibbele. Amusole kubelesya nzila yacigaminina nomubeleka kuŋanda aŋanda. Alimwi mulakonzya kubabuzya bantu mbomubandika limwi naa balayanda ciiyo ca Bbaibbele. Ikuti naa bakaka, mulakonzya kuzumanana kubasiila mabbuku alimwi akupa kuti babe aluyandisyo. Umwi mukwesu walikuswaya banabukwetene bamwi kwamyaka minji kabatolela mamagazini lyoonse. Naakamana kubapa mamagazini aaino-ino, wakalaya pele wakazooyeeya akubuzya kuti: “Sena mulayanda ciiyo ca Bbaibbele?” Wakagambwa nibakaingula kuti balayanda. Lino bakabbapatizyigwa.
3. Sena tweelede kuyeeya kuti boonse baboola kumiswaangano balijisi kale uubayiisya Bbaibbele? Amupandulule.
3 Bantu Bajanika Kumiswaangano: Mutaboni mbuli kuti bantu bapya boonse baboola kumiswaangano kuli kale uubayiisya Bbaibbele. Umwi mukwesu waamba kuti: “Bantu banji mbondakayiisya Bbaibbele ndakali kubajana kwiinda mukubandika abaabo baboola kumiswaangano.” Mucizyi umwi wakasikila mukaintu wakalaansoni walo wakajisi bana basimbi bakabbapatizyidwe ibakali mumbungano eeyo. Mukaintu ooyo wakali kuboola kumiswaangano kwamyaka iibalilwa ku 15 alimwi lyoonse wakali kusika ku Ŋanda ya Bwami yatalika buyo miswaangano amane wakali kuunka mboyamanina buyo miswaangano. Mukaintu ooyu wakazumina kuba aciiyo kusikila limwi wayiya kasimpe. Mucizyi wakalemba kuti: “Ndiluuside kuti ndakalindila myaka iili 15 kanditana kumubuzya naa ulayanda kwiiya.”
4. Ino inga twajana buti ciiyo kwiinda mukubuzya bamwi?
4 Amubuzye Naa Kuli Bayanda Kwiiya: Mucizyi umwi ulasolekesya kuunka abamwi kuziiyo zyabo zya Bbaibbele. Bamanizya kwiiya alimwi akuzumizyigwa amukamwini ciiyo, ulabuzya sikwiiya ikuti naa kuli ngwazyi uukonzya kuyanda kwiiya Bbaibbele. Mwanooabila bbuku lyakuti Bbaibbele Ncoliisya kumuntu ngomuswaya lyoonse, mulakonzya kubuzya kuti: “Sena kuli ngomuzyi uukonzya kulikkomanina bbuku eeli?” Zimwi ziindi bukkale bumwi tabubazumizyi basikumwaya abapainiya kweendelezya ciiyo amuntu ngobajana mucilawo. Aboobo amubazyibye bamwi kuti mulayanda kweendelezya ciiyo ca Bbaibbele.
5. Nkaambo nzi ncotweelede kubuzya bantu batali Bakamboni bakwetene abasikumwaya bamumbungano yesu kuti naa balayanda kwiiya?
5 Ngomukwetene limwi Uutali Kamboni: Sena kuli basikumwaya mumbungano yanu bakwete naa bakwetwe kumuntu uutali kamboni? Bantu bamwi batali Bakamboni balakaka kubandika makani aamu Bbaibbele amuna Kristo ngobakwetene limwi, pele balakonzya kuzumina kwiiya amuntu umbi uutali wamumukwasyi. Ncibotu kusaanguna kubuzya mwaalumi naa mukaintu Kamboni kutegwa mwazyiba nzila mbotu yakubelesya.
6. Nkaambo nzi mupailo ncouyandika kapati nomusoleka kujana ciiyo?
6 Mupailo: Mutadooneki nguzu zyamupailo. (Jak. 5:16) Jehova utusyomezya kuti uyakuswiilila nzyotulomba ikuti kazyeendelana akuyanda kwakwe. (1 Joh. 5:14) Mukwesu umwi wakajisi bubi wakatalika kupaila kuti ajane aciiyo ca Bbaibbele. Mukaintu wakwe wakali kumudooneka mulumi kuti naa inga waba aciindi cakulanganya sikwiiya, ikapati kuti sikwiiya kajisi mapenzi manji. Aboobo wakacaamba kuli Jehova mumupailo ciindi naakali kupailila mulumi wakwe kuti ajane ciiyo. Mipailo yabo yakaingulwa nsondo zyobilo zyakatobela ciindi mupainiya wamumbungano naakajana mwaalumi wakali kuyanda kwiiya mpoonya wakamupa ciiyo eeci mukwesu ooyu. Mukaintu wakalemba kuti: “Kulibaabo balimvwa kuti kweendelezya ciiyo ca Bbaibbele cilakonzya kubakatazya, ndibaambila kuti: Amwaambe cacigaminina mumipailo yanu alimwi mutaleki kupaila kujatikizya kaambo aako. Twaba aalukkomano ndondatakali kuyeeyela.” Kwiinda mukuzumanana, andinywe mulakonzya kujana ciiyo ca Bbaibbele alimwi akuba alukkomano luboola akaambo kakugwasya muntu kunjila ‘munzila iitola kubuumi.’—Mt. 7:13, 14.