Cibeela 7—Ikweendelezya Ziiyo zya Bbaibbele Ziyaambele
Kupaila lya Ciiyo
1. (a) Nkaambo nzi cilayandika kutalika akumanizya ciiyo ca Bbaibbele amupailo? (b) Mbuti mbotunga twabikkilizya mupailo lyaciiyo ca Bbaibbele?
1 Kutegwa basikwiiya Bbaibbele bayaambele kumuuya, cilongezyo ca Jehova cilayandika. (1 Kor. 3:6) Aboobo, cilayandika kutalika akumanizya ciiyo cikkalikene amupailo. Bunji bwaziindi tulakonzya kucita oobu mbutwatalisyila buyo ciiyo abantu basibukombi. Kuli bamwi basikwiiya, tweelede kubelesya bupampu kutegwa tuzyibe notweelede kupaila lyaciiyo. Mulakonzya kubelesya Intembauzyo 25:4, 5 alimwi a 1 Johane 5:14 kutegwa mugwasye sikwiiya kuzyiba ikaambo ncociyandika kupaila alimwi inga mwabelesya Johane 15:16 kupandulula mbociyandika kupaila kuli Jehova kwiinda muli Jesu Kristo.
2. Ikuti mucizyi kali aciiyo ca Bbaibbele amukwesu uubbapatizyidwe naa asikumwaya uutabbapatizyidwe mwaalumi, nguni weelede kupaila?
2 Nguni weelede kupaila lyaciiyo ca Bbaibbele? Ikuti mukwesu uubbapatizyidwe kali amucizyi aciiyo, mukwesu weelede kupaila nokuba kuti mucizyi inga weendelezya ciiyo kasamide citambala. (1 Kor. 11:5, 10) Kulubazu lumwi, ikuti sikwaambilizya zya Bwami mwaalumi uutabbapatizyidwe kali amucizyi aciiyo, mucizyi weelede kupaila. Mubukkale buli boobo, mucizyi weelede kusama citambala ciindi napaila akweendelezya ciiyo.
3. Ntwaambo nzi tweelede kubikkilizyigwa mumipailo iipailwa lyaciiyo ca Bbaibbele?
3 Zyeelede Kubikkilizyigwa Mumupailo: Imipailo lyaciiyo ca Bbaibbele tiiyandiki buya kuti kiili milamfwu, pele yeelede kuba iigaminide. Kunze lyakulomba kulongezyegwa a Leza lyaciiyo akulumba akaambo kakasimpe kayiigwa, cileelela kutembaula Jehova Uupa malailile. (Is. 54:13) Alimwi tulakonzya kubikkilizya amajwi aatondezya kuti tulamubikkila maano sikwiiya alimwi akulumba nkotujisi kumbunga njali mukubelesya Jehova. (1 Tes. 1:2, 3; 2:7, 8) Kulomba kwesu kwakuti Jehova alongezye kusolekesya nkwali mukucita sikwiiya ikubelesya nzyali mukwiiya, kuyoomugwasya kubona mbociyandika kuba ‘sikucita makani.’—Jak. 1:22.
4. Nimpindu nzi ziboola kwiinda mukutalisya akumanizya ciiyo ca Bbaibbele amupailo?
4 Kuli mpindu zinji ziboola kwiinda mukupaila. Kuletela kulongezyegwa a Leza. (Lk. 11:13) Kupa kuti kwiiya Majwi aa Leza kubikkilwe maano kapati. Sikwiiya naswiilila mipailo yesu, awalo ulaiya mbokupailwa. (Lk. 6:40) Kuyungizya waawo, imipailo iipailwa amoyo woonse kamujisi luyando kuli Leza alimwi akulumba kubube bwakwe butalikomeneni, ilakonzya kugwasya sikwiiya kuba acilongwe cini-cini a Jehova.