Kabbokesi Kamubuzyo

◼ Sena tweelede kupaila notweendelezya ciiyo ca Bbaibbele anze?

Kuli mpindu zinji zijanika mukupaila katutanatalika kwiiya Bbaibbele anotwamana. Kwiinda mukupaila, tulomba muuya uusalala wa Jehova kuti utugwasye notubandika. (Lk. 11:13) Mupailo alimwi ulakankaizya kuli sikwiiya wesu mbociyandika kwiiya Bbaibbele alimwi akumuyiisya mbokupailwa. (Lk. 6:40) Aboobo, cakufwambaana kuti kacikonzyeka, cilayandika kutalika kupaila amuntu iwiiya Bbaibbele ambweni mwamana buyo kwiiya ziindi zisyoonto. Pele akaambo kakuti bukkale bulaindana-indana, imwiiyi weelede kubelesya bupampu kubona naa inga wapaila aciiyo ca Bbaibbele cicitilwa anze.

Kaambo kamwi kayandika kulangwa-langwa kajatikizya busena aacitilwa ciiyo. Ikuti kakunyina bantu basabila, mulakonzya kupaila mupailo mufwaafwi kamutanatalika kwiiya anomwamana. Pele, ikuti kucita boobo inga kwapa kuti bagambwe bantu balangilila naa kupa kuti sikwiiya Bbaibbele atalikwayi, inga cabota kulindila kusikila ciindi nomuyoocita ciiyo abusena mpomunooliibide. Kufwumbwa naa mpaabusena buli buti ciiyo mpocicitilwa, tweelede kubelesya bupampu kutegwa tuzyibe notweelede kupaila.—Amubone Mulimo Wesu wa Bwami wa March 2005, apeeji 8.