Amuyobole
Ikweendelezya Ziiyo zya Bbaibbele Ziyaambele
Pepa eeli lyamukati lilijisi twaambo tupati-pati tuzwa mumulongo wazibalo zijatikizya kweendelezya ziiyo zya Bbaibbele ziyaambele zyakali mu Mulimo Wesu wa Bwami. Boonse bakulwaizyigwa kuliyobola pepa eeli kutegwa kabalibelesya nobeendelezya ziiyo zya Bbaibbele. Kuyungizya waawo, twaambo tuli mupepa eeli lyamukati tulakonzya kubandikwa lya miswaangano yamulimo wamumuunda alimwi balangizi bamulimo balakonzya kulibelesya ikwaamba makani ngobakanana nobaswaya tukamu twaciiyo cabbuku.
Cibeela 1: Ino Ciiyo ca Bbaibbele Ninzi?
Ikuti lyoonse kamubandika zyamu Bbaibbele cakusitikila nokuba kuti ciindi ncifwaafwi, kamubelesya Bbaibbele lelikke naa mabbuku aakabambilwa kuyiisya, nkokuti mweendelezya ciiyo ca Bbaibbele. Iciiyo cilakonzya kulipootwa ikuti cacitwa ziindi zyobilo kuzwa leelyo nokwakatondezyegwa mbokuyiigwa akuti kakulibonya kuti ciiyo ciyoozumanana.—km 7/04 p. 1.
Mabbuku Ayiigwa
◼ Ncinzi Leza Ncayanda Kulindiswe?
◼ Luzibo Lutola Kubuumi Butamani
◼ Amukombe Leza Mwini-Mwini Uuli Alikke
◼ Mulakonzya Kuba Mulongwe wa Leza! ilakonzya kubelesyegwa kwiiya abantu batayiide kapati naa batacizyi kubala kabotu.
Cibeela 2: Kulibambila Kweendelezya Ciiyo
Tweelede kutwaamba twaambo munzila motukonzya kumunjila mumoyo sikwiiya. Eeci ciyandika kulibambila kabotu kumwi katumubikkide mumizeezo sikwiiya.—km 8/04 p. 1.
Mbokulibambilwa
◼ Amulingule mutwe, tutwe azitondezyo ziboneka zyacibalo naa ciiyo.
◼ Amujane bwiinguzi bwamibuzyo iisimbidwe akweenga buyo mabala aajisi twaambo tuyandika.
◼ Amusale magwalo aatazubuludwe ayelede kubalwa muciiyo. Amulembe twaambo tufwaafwi mumbali-mbali aabbuku liyiigwa.
◼ Amulibambile kwiinduluka mubufwaafwi twaambo tupati-pati.
Acimugwasye Sikwiiya Ciiyo
◼ Amumupailile sikwiiya alimwi anzyayandika.
◼ Amutuyeeyele twaambo tukonzya kumukatazya kumvwisya naa kuzumina sikwiiya.
◼ Amulibuzye kuti: ‘Ncinzi nceelede kuti asalazyilwe naa mpaayelede kuti abelekele kutegwa ayaambele kumuuya? Mbuti mbondikonzya kwaamba twaambo tukonzya kumunjila mumoyo?’
◼ Nokuyandika, amulibambile cikozyanyo, bupanduluzi naa mibuzyo iili mbwiibede kutegwa mugwasye sikwiiya kumvwisya kaambo kamwi naa lugwalo.
Cibeela 3: Kwaabelesya Kabotu Magwalo
Ncotuyanda notweendelezya ziiyo zya Bbaibbele ncakuti tugwasye ‘bantu kuba basikwiiya’ kwiinda mukubagwasya kumvwisya akuzumina njiisyo zya Jwi lya Leza akuzyibelesya mubuumi bwabo. (Mt. 28:19, 20; 1 Tes. 2:13) Aboobo ciiyo ceelede kuzwa mu Magwalo.—km 11/04 p. 4.
Amubelesye Jwi lya Leza Mukuyiisya
◼ Amumutondezye sikwiiya mbwakonzya kujana lugwalo lumwi mu Bbaibbele lyakwe.
◼ Amulange-lange akubandika Magwalo amu Bbaibbele aatondezya nzyotusyoma.
◼ Amubelesye mibuzyo. Muciindi cakupandulula magwalo amu Bbaibbele kuli sikwiiya, amumuleke amupandulude.
◼ Amucuubye-ubye. Mutani kupandululi mbazu zyoonse zya lugwalo. Amubikkilizye buyo mbazu iyandika kutegwa kaambo kalimvwisye.
◼ Acimugwasye. Amumugwasye sikwiiya kubona magwalo amu Bbaibbele mbwakonzya kwaabelesya mwini.
Cibeela 4: Kuyiisya Basikwiiya Kulibambila
Sikwiiya uubala cibalo kabutanasika buzuba bwakwiiya, kweenga bwiinguzi alimwi akuyeeya mbwakonzya kwaamba mumajwi aakwe, ulafwambaana kuya ampela kumuuya. Aboobo mwatalisya buyo ciiyo cisitikide, amulibambile cibalo antoomwe anguwe kutegwa mumutondezye mbokulibambilwa. Kuli basikwiiya banji, cilakonzya kugwasya kulibambila antoomwe cibalo naa ciiyo coonse.—km 12/04 p. 1.
Kweenga Bwiinguzi Akulemba Twaambo Mumbali-mbali
◼ Amupandulule mbokujanwa bwiinguzi bugaminide kumibuzyo iisimbidwe.
◼ Amumutondezye bbuku lyanu sikwiiya mwalo momwakeenga buyo twaambo tupati-pati.
◼ Amumugwasye sikwiiya kubona kuti lugwalo alumwi lutazubuludwe lugwasyilizya kaambo kali mumuncali alimwi amumutondezye mbokulembwa twaambo mubufwaafwi mumbali aabbuku ndyaiya.
Kulanga-langa Cibalo Akwiinduluka
◼ Amumutondezye sikwiiya mbwakonzya kulanga-langa mutwe wacibalo naa ciiyo, tutwe azifwanikiso katanasitikila kulibambila.
◼ Amumukulwaizye sikwiiya kwiinduluka twaambo tupati-pati katana bikka ambali ncaali kulibambila.
Cibeela 5: Ikuzyiba Mmakani Manji Buti Ayoobandikwa
Iluzyibo alimwi abukkale bwa boonse bobile mwiiyi asikwiiya mpaayeeme ibunji bwamakani akonzya kubandikwa.—km 1/05 p. 1.
Amubagwasye Kuba Alusyomo Luyumu
◼ Cilayandika kapati kuti tugwasye sikwiiya kumvwisya makani, muciindi cakwiile kubinda kubandika makani manji ngatakonzyi kumvwisya.
◼ Amubelesye ciindi coonse ncomujisi kugwasya sikwiiya kumvwisya akuzumina nzyali mukwiiya.
◼ Amutole ciindi ceelede cakulanga-langa magwalo ajisi twaambo tupati-pati motujana zintu zyili mukuyiisyigwa.
Amubikkile Maano Kumutwe Wamakani Ngomubandika
◼ Ikuti sikwiiya kajisi cilengwa cakwaambaula kapati kujatikizya makani aamugeme, inga mwabikka bubambe bwakuti mwaabandike camana ciiyo.
◼ Mutani kwaambauli kapati ciindi caciiyo. Amucesye twaambo tumwi azyakuluula kutegwa mutasinkili sikwiiya kujana luzyibo lwini-lwini lwa njiisyo zyamu Bbaibbele zyantalisyo.
Cibeela 6: Cakucita Ikuti Sikwiiya Wabuzya Mubuzyo
Mbocatalikila buyo ciiyo ca Bbaibbele, cilainda kubota ikulanga-langa njiisyo zyamu Bbaibbele cakutobelanya, muciindi cakulanga makani aya ayaaya. Eeci cilamugwasya sikwiiya kuba antalisyo ya luzyibo lwini-lwini alimwi akuyaambele kumuuya.—km 2/05 p. 6.
Amubelesye Bupampu
◼ Mibuzyo yeendelana amakani ali mukuyiigwa inga yaingulwa mpoonya-mpoonya.
◼ Mibuzyo iteendelani amakani ali mukuyiigwa naa iiyandika kuvwuntauzya ilakonzya kulangwa-langwa aciindi cimbi. Cilakonzya kugwasya kulemba mibuzyo iili boobo.
◼ Ikuti naa sikwiiya kajisi buyumu-yumu kuzumina njiisyo imwi, amulange-lange makani aayungizyidwe aapandulula makani aayo.
◼ Ikuti sikwiiya kazumanana kutaasyoma, amwaaleke makani aayo mane ciindi cimbi eelyo amuzumanane aciiyo calyoonse.
Amulibombye
◼ Ikuti kamutabuzyi bwiinguzi, mutabi acilengwa cakwiingula buyo kweelana anzyomuyeeya.
◼ Amuyaambele kumuyiisya sikwiiya mbwakonzya kuvwuntauzya.
Cibeela 7: Kupaila lya Ciiyo
Kutegwa basikwiiya Bbaibbele bayaambele kumuuya, cilongezyo ca Jehova cilayandika. Aboobo, ciiyo cikkalikene cilayandika kutalika akumanizyigwa amupailo.—km 3/05 p. 4.
Mbotukonzya Kupaila lya Ciiyo
◼ Bunji bwaziindi tulakonzya kupaila mbutwatalisyila buyo ciiyo abantu bakomba.
◼ Kuli bamwi, tweelede kubelesya bupampu kutegwa tuzyibe notweelede kupaila lya ciiyo.
◼ Intembauzyo 25:4, 5 a 1 Johane 5:14 ilakonzya kubelesyegwa kupandulula ikaambo ncociyandika kupaila.
◼ Mulakonzya kubelesya Johane 15:16 kutondezya kuti tweelede kupaila kuli Jehova kwiinda muli Jesu Kristo.
Zyeelede Kubikkilizyigwa Mumipailo
◼ Cileelela kutembaula Jehova Uupa malailile.
◼ Amutondezye kuti mulamubikkila maano sikwiiya.
◼ Amutondezye kulumba kumbunga njali mukubelesya Jehova.
◼ Amumulombe Jehova kuti alongezye kusoleka nkwali mukucita sikwiiya ikubelesya nzyali mukwiiya.
Cibeela 8: Kusololela Basikwiiya ku Mbunga
Makanze eesu notweendelezya ziiyo zya Bbaibbele taali buyo aakuyiisya nzyotusyoma, pele akugwasya basikwiiya kuba cibeela cambungano ya Bunakristo. Amvwiki amube aciindi cakumuyiisya kaambo komwe kujatikizya mbunga ya Jehova nomweendelezya ciiyo.—km 4/05 p. 8.
Miswaangano ya Mbungano
◼ Amupandulule muswaangano aumwi wambungano. Mbumwatalikila buyo ciiyo, amubatambe kuti kabajanika.
◼ Amubaambile twaambo tupati-pati twakabandikwa kumiswaangano.
◼ Amubakulwaizye kuti kabacilangila Ciibalusyo, miswaangano mipati akuswaya kwa mulangizi wabbazu.
◼ Amubelesye zifwanikiso zili mumabbuku eesu ikubagwasya kubona zitola busena.
◼ Amubakulwaizye kubala broshuwa ya Mboni za Yehova—Kodi Iwo Ndani? Kodi Amakhulupirira Chiyani?
Amubelesye Mavidiyo Kuti Babe Aluyandisyo
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
Cibeela 9: Kugwasya Basikwiiya Kupa Bumboni Bwamukwiizya
Eelyo basikwiiya Bbaibbele nobatalika kutondezya lusyomo muzintu nzyobaiya, balakulwaizyigwa kwaamba nzyobaiya.—km 5/05 p. 1.
Amubakulwaizye Ikupa Bumboni
◼ Sena kuli balongwe abasazinyina mbobakonzya kutamba kuti babasangane aciiyo?
◼ Sena kuli mbobabeleka limwi, basicikolonyina, naa beenzinyina ibatondezya luyandisyo?
Amubayiisye Kwaambila Bamwi Nzyobasyoma
◼ Nomubandika twaambo tuyandika nomwiiya, amubuzye sikwiiya kuti, “Mbuti mbomunga mwabelesya Bbaibbele kupandulula kasimpe aaka kumukwasyi wanu?”
◼ Amumugwasye sikwiiya kumvwisya mbociyandika kutondezya bulemu aluzyalo ciindi naambila bamwi kujatikizya Leza amakanze aakwe.
◼ Ibroshuwa ya Mboni za Yehova—Kodi Iwo Ndani? Kodi Amakhulupirira Chiyani? ilakonzya kubelesyegwa abasikwiiya ikugwasya balongwe abasazinyina kumvwisya nzyotusyoma amilimo yesu iiyeeme aa Bbaibbele.
Cibeela 10: Kuyiisya Basikwiiya mu Mulimo Waku Ŋanda Aŋanda
Ciindi baalu nobabona kuti sikwiiya Bbaibbele uleelela kuba sikumwaya uutabbapatizyidwe, inga watalika kutola lubazu ambungano mumulimo wakukambauka kubuleya.—km 6/05 p. 1.
Kulibambila Antoomwe
◼ Amumutondezye sikwiiya mpakonzya kujana zyakwaamba.
◼ Amumugwasye kusala nzila nguba-uba ikonzya kubelesyegwa nkomuzwa.
◼ Amumukulwaizye kuti kabelesya Bbaibbele mumulimo wakwe.
◼ Amwiinduluke antoomwe. Amumutondezye mbwakonzya kwiingula cabupampu imibuzyo iibuzyigwa kapati.
Kukambauka Antoomwe
◼ Amumwaambile kuti amulangilile nomukambauka kwiinda mukubelesya nzila njomwalibambila antoomwe.
◼ Amubikkile maano kubube aluzyibo lwa sikwiiya. Muzimwi ziindi inga cainda kugwasya ikuti waamba buyo cibeela canzila eeyo.
◼ Amumugwasye sikumwaya mupya kuba abubambe bwakutola lubazu mumulimo lyoonse.
Cibeela 11: Kugwasya Basikumwaya Bapya Kupilukila
Ikulibambila kupilukila kutalikila kukuswaya kwakusaanguna. Amumukulwaizye sikwiiya kuba aluyandisyo lwini-lwini kubantu mbabandika limwi. Amuyaambele kumuyiisya kuti kabapa ciindi bali aŋanda cakwaamba mbobayeeya, kuswiilila nobaambaula alimwi akubikkila maano nzyobalibilika.—km 7/05 p. 1.
Kulibambila Kupilukila
◼ Amwiinduluke mubandi wainda, eelyo amumutondezye sikwiiya mbokusalwa kaambo kamwi ikakonzya kumukkomanisya uuli aŋanda.
◼ Amulibambile antoomwe nzila mfwaafwi yakubelesya lugwalo lomwe lwamu Bbaibbele amuncali uuli mubbuku liyiigwa.
◼ Amulibambile mubuzyo ukonzya kubuzyigwa kumamanino amubandi.
Amusungwaale Kupilukila
◼ Amumukulwaizye sikwiiya kuti kafwambaana kupilukila kuli boonse ibatondezya luyandisyo.
◼ Amumugwasye sikwiiya kubona mbokuyandika kuzumanana kupilukila kubantu batajaniki-janiki.
◼ Amumutondezye sikumwaya mupya mbwakonzya kusyomezya kuti uyoopilukila akumugwasya kumvwisya mbociyandika ikuzuzikizya cipangano.
Cibeela 12: Kugwasya Basikwiiya Kutalisya a Kweendelezya Ziiyo zya Bbaibbele
Cilayandika kapati kuti mumwiiye Jesu kwiinda mukupa cikozyanyo cibotu mumulimo wanu. Ciindi sikwiiya nabona cikozyanyo canu mumulimo, uyoozyiba kuti ncotupilukilida nkutalisya ziiyo zya Bbaibbele.—km 8/05 p. 1.
Kutalisya Ciiyo ca Bbaibbele
◼ Amumupandulude sikwiiya kuti takuyandiki kupandulula zyoonse zijatikizyidwe mububambe bwaciiyo.
◼ Bunji bwaziindi cilainda kugwasya kwiile kutondezya mbocicitwa ciiyo kwiinda mukubelesya muncali omwe naa yobile iili mubbuku liyiigwa.
◼ Amwiinduluke nzila zipedwe zyakutalisya ziiyo zya Bbaibbele.—km 8/05 p. 8; km 1/02 p. 6.
Kuyiisya Basikwiiya Kuba Bayi
◼ Amubakulwaizye basikwiiya kulilembya mu Cikolo Camulimo Weendelezyegwa a Leza.
◼ Amutambe basikumwaya bapya kumusangana kuziiyo zimbi zya Bbaibbele ooko nkobakonzya kutola lubazu nokuceya mukuyiisya.