Amulibambile Kabotu Kuti Mukayiisye
1. Ino nkaambo nzi ncotweelede kubikkila maanu kukugwasya sikwiiya kumvwisya makani ngaiya notweendelezya ciiyo ca Bbaibbele?
1 Notweendelezya ciiyo ca Bbaibbele, tweelede kulibambila kabotu kutegwa tukamukulwaizye sikwiiya kubelekela Jehova. Tweelede kumugwasya kumvwisya makani ngaiya kuzwa mu Bbaibbele. Eeci ciyookulwaizya sikwiiya kubweza ntaamu. (Dt. 6:5; Tus. 4:23; 1 Kor. 9:26) Pele ino mbuti mbotukonzya kucita oobu?
2. Ino mbuti mupailo mboukonzya kutugwasya notulibambila kuyooyendelezya ciiyo ca Bbaibbele?
2 Amupaile Nomulibambila: Mbokunga ngu Jehova uupa kuti mbuto yakasimpe ikomene mumoyo wasikwiiya, cilayandika kusaanguna kupaila kujatikizya sikwiiya alimwi azyintu nzyayandika kwiiya notutalika kulibambila ciiyo. (1 Kor. 3:6; Jak. 1:5) Alimwi mipailo iili boobu ilakonzya kutugwasya kubona mbotukonzya kuzumanana kumugwasya kuba “[a]luzibo” lwini-lwini lujatikizya makanze aa Jehova.—Kol. 1:9, 10.
3. Ino mbuti mbotukonzya kuyeeya nzyayandika kwiiya ngotwiiya limwi Bbaibbele ciindi notulibambila?
3 Kamuyeeya Nzyayandika Kwiiya: Jesu wakalizyi kuti kuyiisya kabotu kubikkilizya kuyeeya nzyobayandika kwiiya baswiilizi. Bantu bobile baindene bakabuzya Jesu mubuzyo omwe wakuti: “Ino ndicite buti kuti ndinjile mubuumi ubutamani?” Ciindi acimwi naakali kwiingula, Jesu tanaakapa bwiinguzi bukozyenye. (Lk. 10:25-28; 18:18-20) Tweelede kuyeeya nzyayandika kwiiya ngotwiiya limwi Bbaibbele ciindi notulibambila. Ino magwalo nzi aali mucibalo ngotweelede kuyoobala anguwe? Ino ntunji buti twaambo ntotuyoolanga-langa? Ino ntwaambo tuli buti ituli mucibalo tunga twamukatazya kumvwisya naa kuzumina? Ikuti katukonzya kuyeeyela mibuzyo imwi njanga wabuzya, eeci ciyootupa kulibambila kabotu kuti tukaingule bweelede.
4. Ino kulibambila kabotu kubikkilizya nzi?
4 Amwiinduluke Kucilanga-langa Cibalo: Kufwumba naa cibalo eeco mwakaciiya ziindi zyongaye, eeci ciyooba nceciindi cakusaanguna kuciiya asikwiiya ooyo. Kutegwa twaambo tumusike kumoyo sikwiiya, tuyandika kulibambila kabotu kujatikizya ciiyo acimwi. Eeci caamba kuti tweelede kucita zyintu nzyotukulwaizya ngotwiiya limwi kuti kacita. Amwiinduluke kucilanga-langa cibalo, kubikkilizya amagwalo aali mumo, kumwi kamuyeeya nzyayandika kwiiya ngomwiiya limwi Bbaibbele, alimwi akweengela twaambo tupati-pati.—Rom. 2:21, 22.
5. Ino mbuti mbotukonzya kwiiya Jehova?
5 Jehova ulakubikkila maanu kuyaambele kwamuntu aumwi wiiya Bbaibbele. (2 Pet. 3:9) Kwiinda mukujana ciindi cakulibambila ciiyo ca Bbaibbele acimwi, tutondezya kuti andiswe tulabikkila maanu kapati.