Kabbokesi Kamubuzyo

◼ Nguni weelede kupaila kumiswaangano yambungano?

Mupailo wambungano ncibeela ciyandika kapati mubukombi bwesu. Ikwiiminina bamwi kuli Jehova ncoolwe cipati kapati alimwi mmukuli mulemu. Akaambo kamulimo mupati oyu wamupailo, ibaalu beelede kusala kabotu nobasala bakwesu ibeelela kupaila kumiswaangano. Ibakwesu babbapatizidwe ibaiminina mbungano yoonse beelede kuba babelesi Banakristo basimide aabo ibajisi cikozyanyo cibotu alimwi balemekwa ambungano. Mipailo yabo njobapaila cabulemu kuli Jehova Leza yeelede kutondezya cilongwe cibotu ncobajisi kulinguwe. Cibalo camutwe wakuti “Ikwiiminina Bamwi Mumupailo a Moyo Mubombe” mu Ngazi Yamulindizi ya Chichewa yamu May 15, 1986 ilatubandauka twaambo tuyandika kapati alimwi tugwasya kuli baabo ibapaila kubuleya kabaiminina mbungano.

Ibaalu tabeelede kulekela mukwesu uuzizilwe kuti uulaa micito iitali kabotu naa uutalilemeki kuti ayiminine mbungano mumupailo. Imukwesu uuvwula kutongooka zintu zimwi naa uuyanda kubelesya mupailo wakubuleya ikwaambilizya matongoosi aakwe kujatikizya bamwi tayelede kusalwa kuti apaile pe. (1 Tim. 2:8) Nokuba kuti mukwesu mukubusi kabbapatizidwe, ibaalu beelede kubona naa ulisimide munzila yakumuuya cakuti ulakonzya kwiiminina mbungano mumupailo.—Incito 16:1, 2.

Muziindi zimwi kumiswaangano yakulibambila kuunka mumulimo wamumuunda, imucizi uubbapatizidwe ulakonzya kwiiminina kabunga mumupailo ikuti naa kakutakwe mukwesu weelela weelede kusololela. Weelede kusama ntaulu yeelede kumutwe. Ikuti kabazi kuti taakwe mukwesu weelela utiikajanike kumiswaangano imwi yakulibambila kuya mumuunda, ibaalu beelede kusala mucizi uusimide kuti akasololele kabunga.

Kanjikanji sicuuno wa Muswaangano Wabuleya nguuyiminina mbungano mumupailo wakujula. Nokuba boobo, kumiswaangano imbi yambungano eelyo nokuli ibakwesu banji basimide, umbi buyo ikuleka sicuuno naa ooyo uujisi cibeela camamanino ulakonzya kwaambilwa kuti ape mupailo wakujula naa wakujala. Pele kumuswaangano umwi aumwi, imukwesu wasalwa kuti ayiminine mbungano mumupailo weelede kwaambilwa kakucili ciindi kutegwa aziyeeyele limwi nzyatiiambe. Mpoonya ulakonzya kupa mupailo uujatikizya boonse alimwi weendelanaa muswaangano ooyo.

Imipailo iili boobo, tayelede kuba milamfwu pe. Imukwesu napaila, kanjikanji ibamwi bayoomumvwa kabotu ikuti naa waimikila buya, akwaambisya amajwi aalimvwisya kabotu. Eci ciyoopa kuti aabo babungene boonse baumvwe mupailo alimwi akuti kumamanino bacikonzye kwaamba kuti “Ameni” camoyo woonse.—1 Mak. 16:36; 1 Kor. 14:16.

◼ Mbaani beelede kupegwa mabbaaji aakumuswaangano wacooko?

Mabbaaji alagwasya kapati mukuzyiba bakwesu alimwi amukwaambilizya muswaangano. Nokuba boobo, taayelede kupegwa cipaape. Ibbaaji izyibya yooyo wiisamide kuti ujisi mpuwo mbotu mumbungano ya Bakamboni ba Jehova yakooko nkwazwa.

Akkaadi ali masena obilo mulembelwa zina lyamuntu alimwi azina lyambungano. Aboobo, muntu amuntu weelede kuti kali yooyo wayanzana kwaciindi cili mbocibede ambungano eyo yalembwa. Iba Sosaiti balatuma makkaadi aakkwene kumbungano yomwe-yomwe kweelanaa Mulimo Wesu Wabwami njiitambula. Inga cainda kubota ikuti naa mwapa kkaadi yomwe kuli sikumwaya umwi aumwi uubbapatizidwe alimwi autanabbapatizigwa. Abalo bana kubikkilizya abambi buyo ibajanika lyoonse kumiswaangano yambungano alimwi ibatondezya kuyaambele mukutola lubazu mumulimo wamumuunda balakonzya kupegwa. Tacili cibotu pe ikupa bbaaji kumuntu wakagwisigwa mumbungano.

Aatambulwa buyo makkaadi, ibaalu beelede kubona kuti baabanya kweelanaa amalailile aaya.