Sena Kuli Nomubuzya naa Kuli Bayanda Kwiiya Zyamu Bbaibbele?
Ikuti kamweendelezya ciiyo ca Bbaibbele lino, mulakonzya kubuzya sikwiiya ikuti naa kuli bamwi balongwe bakwe, basazinyina naa bamwi mbazi ibakonzya kukukkomanina kwiiya ncoliyiisya Bbaibbele. Kanji-kanji sikwiiya uyooamba mazina aabantu banji. Ikuti sikwiiya wamuzumizya, mulakonzya kuyoolyaamba zina lyakwe mwaakubaswaya bantu aabo kutegwa mutalisye ciiyo ca Bbaibbele. Mulakonzya kwaamba kuti, “[Zina lyasikwiiya] ulakkomana kwiiya Bbaibbele, eelyo uyeeya kuti andinywe inga mwayanda kugwasyigwa kububambe bwaciiyo ca Bbaibbele citabbadelwi.” Mpoonya amutondezye mubufwaafwi mboceendelezegwa ciiyo kwiinda mukubelesya bbuku lya Bbaibbele Ncoliyiisya.
Ikuti naa kuli ngomwiiya limwi Bbaibbele uuyaambele kapati, mulakonzya kumukulwaizya kwaamba bubambe bwaciiyo kubalongwe alimwi abamumukwasyi wakwe ibakonzya kuba aluyandisisyo. Ulakonzya kubatamba kuti bajanike nomwiiya anguwe. Ikuti naa eeco kacitakonzeki, ulakonzya kupanga bubambe bwakuti mukabonane ambabo kutegwa mukabapandulwide mbocicitwa ciiyo. Kucita boobu kuyookulwaizya sikwiiya kutalika kwaambila a bamwi luzibo lwamu Bbaibbele ndwaiya.
Kuli baabo nkomupilukila lyoonse abalo balakonzya kumwaambila bamwi bayanda kwiiya nokuba kuti balo tabana kuzumina kuba aciiyo ca Bbaibbele calyoonse. Ciindi nomubaabila bbuku lya Bbaibbele Ncoliyiisya, mulakonzya kubabuzya kuti, “Sena kuli umwi ngomuzi uukonzya kuyanda kuba abbuku eeli?”
Mukulanga kuceya kwaciindi cisyeede, tuyanda kubelesya nzila iili yoonse njotukonzya kutegwa tugwasye bantu kumvwa akutambula makani mabotu. Sena kuli nomubuzya naa kuli bayanda kwiiya zyamu Bbaibbele?