Bubambe bwa Ciiyo Cabbuku Cambungano Mbobutugwasya
1. Ino miswaangano iili yosanwe iicitwa ansondo itugwasya buti?
1 Umwi aumwi wamiswaangano iili yosanwe njotuba anjiyo ilaindana mboyeendelezyegwa amakanze aayo. Pele yoonse ilayandika kutegwa tugwasyigwe ‘kukuyeeyana, kukubusyanya-busyanya mukuyandana akucita milimo mibotu.’ (Heb. 10:24, 25) Ino nzibeela nzi zibotu alimwi zigwasya zyabubambe bwa Ciiyo Cabbuku Cambungano?
2. Ino tugwasyigwa buti akaambo kakuswaangana mukakamu kasyoonto kaciiyo cabbuku?
2 Bulatugwasya Kuyaambele Kumuuya: Ibantu bajanika kuciiyo cabbuku mbasyoonto kwiinda baabo bajanika kumiswaangano imwi. Eeci cipa kuti kacuubauba kubamba zilongwe zikonzya kutugwasya kumuuya. (Tus. 18:24) Sena mwasola kubaziba bantu boonse bali mukakamu kaciiyo canu cabbuku, andiza kulomba sikumwaya aumwi kuti mubeleke limwi mumuunda? Bubambe bwaciiyo cabbuku alimwi bupa sikweendelezya ciiyo cabbuku kuziba bukkale bwamuntu aumwi uuli mukakamu akubapa lugwasyo luyandika akubakulwaizya.—Tus. 27:23.
3. Ino bubambe bwaciiyo cabbuku bubakulwaizya buti basikwiiya Bbaibbele kwiingula akujanika kuciiyo?
3 Sena kuli nomwakali batambide mbomwiiya limwi Bbaibbele kujanika kuciiyo cabbuku andinywe? Bantu bajisi luyandisisyo aabo batalisunguli kujanika kumiswaangano mipati akaambo kabuyoofwu inga balalimvwa kutayoowa ikuti bajanika kumiswaangano misyoonto ikapati eeyo iicitilwa kuŋanda. Cilongwe ciba ncecipa kuti bana basyoonto abapya kabaingula. Alimwi mbwaanga kakamu nkasyoonto, tulijisi zyoolwe zyakwiingula akutembaula Jehova.—Int. 111:1.
4. Ibubambe bwaciiyo cabbuku bulakonzya kugwasya munzila nzi?
4 Ziiyo zyabbuku kanji-kanji zibeda abusena afwaafwi abasikumwaya bali mucilawo. Nokuba kuti tacikonzyeki kuli basikumwaya boonse kubabikka muciiyo cabbuku cili afwaafwi ankobakkala, ikujanika kuciiyo cabbuku ncotwaabilidwe takuyandiki kweenda musinzo mulamfwu kwiinda kwaakujanika kumiswaangano imwi yambungano. Busena bucitilwa ciiyo cabbuku bulakonzya kubelesyegwa kucitila miswaangano yamulimo yamumuunda.
5. Ino mbuti mbotukonzya kugwasyigwa mumulimo asikweendelezya ciiyo cabbuku?
5 Bulatugwasya Mumuunda: Sikweendelezya ciiyo cabbuku ulayanda kugwasya muntu aumwi kutola lubazu mumulimo lyoonse. Aboobo, ulasoleka kubeleka amuntu uuli woonse mukabunga akubagwasya mumbazu ziindene-indene zyamulimo. Ikuti mbazu imwi yamulimo kaikatazya, mbuli kupilukila, amumuzyibye sikweendelezya ciiyo cabbuku. Ambweni inga ulabikka bubambe bwakuti mukabeleke asikumwaya uucizi mukakamu oomu. Mbomuyiisya aziiyo zya Bbaibbele kuyooya ambele kwiinda mukubikkila maano kunzila mbotu njabelesya mukuyiisya sikweendelezya ciiyo cabbuku.—1 Kor. 4:17.
6. Nkaambo nzi ncotweelede kugwasyigwa abubambe bwaciiyo cabbuku?
6 Elo mbubambe bubotu bwakuba a Ciiyo Cabbuku Cambungano! Bubambe oobu bubotu buzwa kuli Jehova bulatugwasya kutajoka munsi kumuuya mumazuba aano aakatazya ngotupona.—Int. 26:12.