Ncotuyandika Ciiyo Cabbuku Cambungano
1. Ino bwakatalika buti bubambe bwa Ciiyo Cabbuku Cambungano?
1 Mu 1895, tukamu twaziiyo twa Basikwiiya Bbaibbele, kweelana ambobakali kwiitwa Bakamboni ba Jehova aciindi eeco, twakali kwiitwa kuti tukamu Twakwiiya Bbaibbele twa Dawn Circles. Mabbuku aakali kuyiigwa ngakuti Millennial Dawn. Kumbele miswaangano eeyi yakazooitwa kuti Tukamu Twakwiiya Bbaibbele twabana Bereya. (Inc. 17:11) Kanji-kanji kakamu kabantu basyoonto buyo kakali kuswaangana muŋanda ciindi cakumangolezya iceelede kuli mbabo. Oobu mbobwakatalika bubambe bwa Ciiyo Cabbuku Cambungano.
2. Ino mbuti mbotunga twacita kutegwa kube ‘kuyumizyanya mulusyomo’ aciiyo cabbuku?
2 Kuyumizyigwa Alimwi Akugwasyigwa: Mbwaanga tukamu twaciiyo cabbuku tubambwa abantu basyoonto, kuli coolwe cinji kulibaabo ibajanika cakutondezya lusyomo lwabo caantangalala kwiinda mukwiingula. Iciyootobela ncakuti kuyooba ‘kuyumizyanya mulusyomo.’—Rom. 1:12.
3, 4. Ino mbuti bubambe bwaciiyo cabbuku mbobutugwasya kuzuzikizya mulimo wesu?
3 Ikulangilila mbwayiisya mulangizi waciiyo cabbuku kulakonzya kutugwasya ‘kwaapandulula makani aalusinizyo mbukweelede.’ (2 Tim. 2:15) Amubone alimwi akwiiya mbwaakankaizya Magwalo aayeeme cibalo. Ikuti kaceelela kubbuku lili mukulangwa-langwa, ulakonzya kukankaizya twaambo tupati-pati kwiinda mukucita kwiinduluka kumamanino ikubelesya buyo Bbaibbele. Icikozyanyo cakwe cibotu cilakonzya kutugwasya kuyaambele mukuyiisya kwesu mumulimo wa Bunakristo.—1 Kor. 11:1.
4 Kunze lyakweendelezya ciiyo cansondo ansondo, mulangizi waciiyo cabbuku ulasololela mubukambausi. Kwiinda mukubelekela antoomwe amulangizi wamulimo, ulacita bubambe bweelede bwamulimo wamumuunda. Ulalanga mbwakonzya kubagwasya boonse mukakamu kuzuzikizya mukuli wabo wa Bunakristo wakukambauka makani mabotu alimwi akugwasya bantu kuba basikwiiya.—Mt. 28:19, 20; 1 Kor. 9:16.
5. Ino ndugwasyo nzi lugaminina luliko kwiinda mububambe bwaciiyo cabbuku?
5 Mulangizi waciiyo cabbuku ulibikkilide maano kuli umwi aumwi mukakamu mbwali mukucita kumuuya. Ulatondezya kubikkila maano ooku lyamiswaangano yambungano alimwi anabeleka abambi mumulimo wamumuunda. Alimwi ulacibelesya ciindi naswaya bakwesu mumaanda aabo kuti abakulwaizye kumuuya. Boonse beelede kulimvwa kwaanguluka kumusikila mulangizi waciiyo cabbuku kuti abagwasye kumuuya kufwumbwa ciindi nobayanda lugwasyo.—Is. 32:1, 2.
6. (a) Ino mbuti bakwesu mumasi aamwi mbobali kukulwaizyanya kwiinda mukuswaangana mutubunga tusyoonto? (b) Mbuti nywebo mbomwagwasyigwa kububambe bwaciiyo cabbuku?
6 Amukulwaizyanye: Mumasi mulimo wabantu ba Leza moulesyedwe, bakwesu kanji-kanji balaswaangana mutubunga tusyoonto-syoonto. Mukwesu umwi ulayeeya kuti: “Nokuba kuti milimo yesu ya Bunakristo yakalilesyedwe, ikuti cakonzyeka twakali kuba amiswaangano yansondo ansondo mutubunga twabantu bali 10 alimwi a 15. Kumiswaangano twakali kuyumizyigwa kumuuya muciiyo cesu ca Bbaibbele alimwi amukuyanzana twamana kwiiya. Twakali kuluula zintu zyakali kutucitikila alimwi eeci cakatugwasya kubona kuti aumwi wesu wakalijisi nkondo iikozyenye.” (1 Pet. 5:9) Aswebo mbubonya, atukulwaizyanye kwiinda mukububikkila maano kapati bubambe bwa Ciiyo Cabbuku Cambungano.—Ef. 4:16.