Kabbokesi Kamubuzyo
◼ Ndilili nokunga kweelela ikubamba nkamu aimbi ya Ciiyo Cabbuku Cambungano?
Ikubamba nkamu mpya kulakonzya kulangwa-langwa eelyo nokuyandika kucita boobo kutegwa kakuli buyo bantu basika ku 15 naa batasiki aawo bajanika kubusena bumwi abumwi kucitilwa ciiyo cabbuku kubikkilizyaa ku Ŋanda ya Bwami. Nkaambo nzi eeci ncociyandika?
Ciindi nkamu zya Ciiyo Cabbuku Cambungano nozili abantu basyoonto, cilamuubila-ubila mweendelezi ikubikkila maanu kuli umwi aumwi wabaabo ibajanika. Kunze lyaboobo, cipa ciindi cakwiingula kuli boonse bajanika nkaambo bubambe bulabazumizya kwaamba kubuleya kujatikizya lusyomo lwabo. (Heb. 10:23; 13:15) Ikubaa tukamu tusyoonto mumasena asiyene-siyene mumbazu zyoonse zyambungano yanu kupa kuti kacuuba-uba ikujanika ku Ciiyo Cabbuku Cambungano alimwi amiswaangano yamulimo wamumuunda. Mbungano eezyo zyakayungizya masena mucitilwa ziiyo zyajana kuti mweelwe wabantu bajanika kuciiyo cabbuku kuubikka antoomwe wayaambele awalo.
Kulakonzya kuba twaambo twaalubazu tunga twapa kuti kubambwe aimbi nkamu nokuba kuti inooli nsyoonto kapati. Eeci cilakonzya kuba boobo kumasena aali kule naa ooko kumasena kujanika bantu banji kapati antela ooko bamwi nkobaatikizyanya kukkala. Ikuti naa kakuyandika, kulakonzya kubambwa nkamu inooswaangana ciindi camasikati ikutegwa baceembede abaabo babeleka masiku naa bacizi bakwetwe kubaalumi ibatali Bakamboni kabagwasigwa abalo.
Nkamu imwi aimwi yaciiyo cabbuku yeelede kuti kaijisi basikumwaya basimide munzila yakumuuya alimwi basungweede ibali mbobabede antoomwe amweendelezi uusimide kubikkilizya aubala. Bakwesu beelede kubelekela kusima munzila yakumuuya kutegwa babweze mikuli eeyi mumbungano.
Ibaalu balakonzya kugwasilizya mukuyaambele kwambungano kwiinda mukubona kuti nkamu zyaciiyo cabbuku cambungano zijisi bantu beelede ikutali baindilila alimwi akulanganizigwa kabotu munzila yakumuuya akuti balaswaangana kumasena aatakatazyi kweenda. Kufwumbwa kuti kacikonzyeka, nkamu zipya zyeelede kubambwa kutegwa boonse kabagwasigwaa bubambe oobu bwakumuuya bulibedelede. Sena inga mwalisungula kuti ŋanda yanu kaibelesyegwa kucitila ciiyo cabbuku? Ibanji bakalisungula balongezyegwaa zilongezyo zyakumuuya.