Sena Inga Mwakonzya Kwaaba Ŋanda Yanu?
1 Mumwaanda wamyaka wakusaanguna, Banakristo banji bakali kwaaba maandaabo kuti kaabelesyegwa kucitila miswaangano yambungano. (1 Kor. 16:19; Kol. 4:15; Flm. 1, 2) Mazubaano mbungano zinji zinyina masena manji tukamu twabantu nkotukonzya kucitila Ciiyo Cabbuku Cambungano alimwi amiswaangano yamulimo wamumuunda. Eeci cilakonzya kupa kuti tukamu twaciiyo cabbuku tumwi katula abantu basika ku 30 naa kwiinda aawo antela kwiindilila kapati amweelwe uuyandika wabantu basika ku 15 buyo.
2 Coolwe Caalubazu: Sena kuli nomwakayeeya kale kwaaba ŋanda yanu kuti kakucitilwa Ciiyo Cabbuku Cambungano? Kuyandika ŋanda yansaizi alimwi iilibonya kabotu, imuli mumuni munji alimwi mwiinda muwo mubotu. Mbwaanga ciiyo cabbuku mmuswaangano wambungano alimwi ncibeela cabubambe bwa Jehova bwakuyiisya bantu bakwe, ikucitila ciiyo cabbuku muŋanda yanu ncoolwe caalubazu. Ibanji baluula kuti bakagwasyigwa kumuuya kwiinda mukwaaba maanda aabo.
3 Ikuti kamujisi ŋanda yeelela, mwalombwa kuti mubazyibye baalu cakufwambaana. Ambweni bali bujisi ikuyandaula masena aambi. Ikuti naa tacikonzyeki kucitila ciiyo cabbuku muŋanda yanu, sena inga mwazumizya kuti kakucitilwa muswaangano wamumulimo wamumuunda? Nokuba kuti tababulidwe kwaciindi ecino, ibaalu bayoobotelwa kuzyiba kuti balaangulukide kwiibelesya kufwumbwa nokwayandika. Mulakonzya kuyooba acoolwe kumbele.
4 Kulilemeka Kabotu: Eelyo notuswaangana muŋanda yamuntu umwi, boonse bajanika tabeelede kujata-jata zintu zyamukamwiniŋanda. Bazyali beelede kubona kuti bana babo bakkede mubusena mucitilwa ciiyo, ikutali kuti kabaide kweendeenda mumasena mobateelede kusika. Alimwi tweelede kutondezya kuti tulababikkila maano basimukoboma kwiinda mukubona kuti tatubanyonganyi munzila iili yoonse.—2 Kor. 6:3, 4; 1 Pet. 2:12.
5 Ibbuku lya Ba-Hebrayo 13:16 litukulwaizya kutaluba “kucita [zibotu] akupana, nkaambo Leza ulakondwa kuzipaizyo zili bobuya.” Ikwaaba ŋanda yanu kuti kakucitilwa muswaangano wambungano ninzila iimwi mbotu yakwaabilana zintu zibotu abantu bamwi alimwi ‘akulemeka Jehova ambono zyanu.’—Tus. 3:9.