Babelesi Bamakani Mabotu

JEHOVA wakatupa cikozyanyo cibotu kapati ncotweelede kutobela, nkokuti Mwanaakwe, Jesu Kristo. (1Pet. 2:21) Ciindi muntu umwi naba sikutobela Jesu, ulatalika kukambauka makani mabotu kali umwi wababelesi ba Leza. Ikutondezya kuti eeci cakali kunookatalusya kumuuya, Jesu wakati: “Amuboole kulindime nyoonse nomukatede akulemenwa, eelyo ndilamukatalusya. Amulikulike joko lyangu, mwiiye kulindime, nkaambo ndili mubombe moyo, alimwi ndilalicesya, eelyo mulakatalusyigwa.” (Mt. 11:28, 29) Eeci ncaakasyomezya cazuzikizyigwa kuli baabo boonse ibabuzumina bwiite oobu!

² Mbwali Mubelesi Mupati wa Leza, Jesu wakaita bantu bamwi kuti babe basikumutobela. (Mt. 9:9; Joh. 1:43) Wakabayiisya mumulimo mpoonya akubatuma kuyoocita mulimo ngomunya ngwaakali kucita walo. (Mt. 10:1–11:1; 20:28; Lk. 4:43) Kumbele aamazuba, wakatuma abambi bali 70 kuti abalo bakaambilizye makani mabotu aa Bwami bwa Leza. (Lk. 10:1, 8-11) Ciindi Jesu naakatuma basikwiiya bakwe, wakabaambila kuti: “Kufwumbwa uumuswiilila nywebo ulandiswiilila andime. Alimwi kufwumbwa uutamulemeki nywebo tandilemeki andime. Kuyungizya waawo, kufwumbwa uutandilemeki mebo tamulemeki awalo ooyo wakandituma.” (Lk. 10:16) Munzila eeyi Jesu wakakankaizya mbouli mupati mukuli ngobakapedwe basikwiiya. Bakali kwiiminina Jesu alimwi a Leza Mupatikampatila! Amazuba aano, oobo mbocibede akuli bambi boonse ibazumina bwiite bwa Jesu bwakuti: ‘Boola ube sikunditobela.’ (Lk. 18:22; 2Kor. 2:17) Boonse aabo ibazumina balipedwe mulimo wa Leza wakukambauka makani mabotu aa Bwami akuyiisya bamwi kuba basikwiiya.—Mt. 24:14; 28:19, 20.

³ Mbokunga twakabuzumina bwiite bwa Jesu bwakuti tumutobele, tulilongezyedwe akaambo kakuti ‘twamuzyiba’ Jehova Leza alimwi a Jesu Kristo. (Joh. 17:3) Twayiisyigwa nzila zya Jehova. Kwiinda mukugwasyigwa anguwe, twacikonzya kucinca mizeezo yesu, kusama buntu bupya alimwi akulilemeka kweelana azyeelelo zya Jehova ziluleme. (Rom. 12:1, 2; Ef. 4:22-24; Kol. 3:9, 10) Akaambo kakulumba kuzwa ansi aamoyo, twakalyaaba kuli Jehova akutondezya kulyaaba ooko kwiinda mukubbapatizyigwa mumeenda. Ciindi notwabbapatizyigwa tuba babelesi ba Leza basalidwe.

⁴ Lyoonse kamuyeeya kuti mulimo wa Leza weelede kucitwa amaanza aatakwe mulandu alimwi amoyo uusalala. (Int. 24:3, 4; Is. 52:11; 2Kor. 6:14–7:1) Kwiinda mukusyoma Jesu Kristo, twaba amanjezyeezya aasalala. (Heb. 10:19-23, 35, 36; Ciy. 7:9, 10, 14) Mwaapostolo Paulo wakakulwaizya Banakristo kucita zintu zyoonse kuti Leza alemekwe kutegwa batalebyi bamwi. Mwaapostolo Petro wakatondezya kuti kuba abukkale bubotu kugwasya kuti bantu ibatasyomi basanduke akuzumina kasimpe. (1Kor. 10:31, 33; 1Pet. 3:1) Ino inga mwamugwasya buti umwi kuti ayelele kuba mubelesima wamakani mabotu?

BASIKUMWAYA BAPYA

⁵ Kuzwa ciindi nomwatalika kweendelezya ciiyo ca Bbaibbele kumuntu uuyanda kwiiya kasimpe, amumukulwaizye kwaambila bamwi nzyaiya. Ulakonzya kwaambila babbululu bakwe, beenzinyina, mbabeleka limwi alimwi abamwi buyo ciindi nobaizya. Eeyi nintaamu iiyandika kapati mukuyiisya bapya kuba basikutobela Jesu Kristo kabali babelesi bamakani mabotu. (Mt. 9:9; Lk. 6:40) Cakutadooneka, ciindi ooyo mupya nayaabukomena kumuuya akuyungizya luzyibo lwakwe mubukambausi bwamukwiizya, uyakwaamba kuti uyanda kutola lubazu mumulimo wamumuunda.

KUZUZIKIZYA ZYEELELO

⁶ Kamutanaambila muntu umwi kuti amusangane mumulimo wakuŋanda aŋanda kwaciindi cakusaanguna, kuli zyeelelo zimwi nzyayelede kuzuzikizya. Muntu natusangana mumulimo wamumuunda, ulatondezya kubuleya kuti uzulilwa kuli Bakamboni ba Jehova. Aboobo ubonwa kuti wakatalika kale kutobela zyeelelo zya Jehova ziluleme mubuumi bwakwe akuti ulakonzya kuba sikumwaya uutabbapatizyidwe.

⁷ Cakutadooneka, nomuyiisya muntu alimwi akubandika njiisyo zyamu Bbaibbele anguwe, mulabuzyiba bukkale bwakwe. Mulakonzya kubona kuti buumi bwakwe buleendelana azintu nzyaiya. Pele kuli mbazu zimwi zyabuumi bwasikwiiya ooyo baalu nzyobanga bayanda kubandika anguwe andinywe kamuliko.

⁸ Sicuuno wakabunga kabaalu uyoobikka bubambe bwakuti baalu bobilo (umwi kali wabaabo bamukkomiti yamulimo) baabandike makani aaya andinywe antoomwe asikwiiya Bbaibbele. Mumbungano oomo imuli baalu basyoonto, mwaalu alimwi amukutausi iweelela balakonzya kucita oobo. Bakwesu aabo ibasalwa beelede kusolekesya kufwambaana kuba amubandi ooyu. Mubwini, atwaambe kuti, ikuti bamvwa makanze aasikwiiya ooyo kumuswaangano wambungano, balakonzya kubandika andinywe alimwi asikwiiya ooyo wamana muswaangano. Mubandi ooyu weelede kucitwa cakulikwaya. Sikwiiya ooyo katanazumizyigwa kuba sikumwaya uutabbapatizyidwe, weelede kuti kapona kweelana atwaambo ootu tutobela:

1. (1) Ulasyoma kuti Bbaibbele ndi Jwi lya Leza ilyakasololelwa amuuya.—2Tim. 3:16.

2. (2) Ulizizyi alimwi ulazisyoma njiisyo zyantalisyo zyamu Magwalo cakuti ikuti naa wabuzyigwa mibuzyo, ulakonzya kwiingula kweelana ancolyaamba Bbaibbele ikutali kweelana anjiisyo zyabukombi bwakubeja naa kweelana amizeezo yakwe mwini.—Mt. 7:21-23; 2Tim. 2:15.

3. (3) Ulaatobela malailile aamu Bbaibbele aakuswaangana abantu ba Jehova kumiswaangano yambungano ikuti kacikonzya kucita oobo.—Int. 122:1; Heb. 10:24, 25.

4. (4) Ulicizyi ncolyaamba Bbaibbele kujatikizya bwaamu, bumambe, maali, koonana kwabasankwa naa basimbi balikke-likke, alimwi ulazitobela njiisyo eezyi mubuumi bwakwe. Ikuti muntu ooyo kakkala amukaintu naa musankwa uutali mubbululu wakwe, beelede kuti kabakwetene mumulawo.—Mt. 19:9; 1Kor. 6:9, 10; 1Tim. 3:2, 12; Heb. 13:4.

5. (5) Ulautobela mulawo wamu Bbaibbele uukasya kukolwa alimwi tabelesyi misamu iili yoonse iikola, ibe yacilengwaleza naa iipangwa abantu.—2Kor. 7:1; Ef. 5:18; 1Pet. 4:3, 4.

6. (6) Ulizyi mbociyandika ikutayanzana abantu batali kabotu.—1Kor. 15:33.

7. (7) Wakazwa alimwi wakamwaisya zina lyakwe mumbunga zyabukombi bwakubeja izili zyoonse ooko nkwaakali kuzulilwa. Wakacileka kujanika kumiswaangano yanzizyo alimwi akuzigwasyilizya naa kutola lubazu mumilimo yanzizyo.—2Kor. 6:14-18; Ciy. 18:4.

8. (8) Tajatikizyigwi mumakani aatwaambo twacisi aali oonse.—Joh. 6:15; 15:19; Jak. 1:27.

9. (9) Ulasyoma alimwi akupona kweelana ancolyaamba Bbaibbele kulugwalo lwa Isaya 2:4 kujatikizya mazwanga aazisi.

10. (10) Uliyandide ncobeni kuba umwi wa Bakamboni ba Jehova.—Int. 110:3.

⁹ Ikuti baalu kabatazyi kabotu mbwalimvwa sikwiiya kujatikizya kaambo kali koonse akati katwaambo ootu, beelede kumubuzya akubandika anguwe, ambweni kwiinda mukubelesya magwalo aabikkidwe aawa. Weelede kuzyiba kuti aabo ibatola lubazu mumulimo wakukambauka antoomwe a Bakamboni ba Jehova beelede kupona munzila yeendelana azyeelelo eezyi zyamu Magwalo. Nzyaamba ziyoobagwasya baalu kubona naa ulizizyi zilangilwa kulinguwe akuti naa uleelela kweelana abukkale bwakwe kutalika kuunka mumulimo wamumuunda.

¹⁰ Baalu beelede kufwambaana kumwaambila naa uleelela kuba sikumwaya. Kanji-kanji, eeci cilakonzya kucitwa mbowamanina buyo mubandi. Ikuti keelela, baalu balakonzya kumutambula camaanza obilo kali sikumwaya. (Rom. 15:7) Weelede kukulwaizyigwa kutalika kutola lubazu mumulimo wamumuunda mbwaazumizyigwa buyo mpoonya akupa lipooti yamulimo wamumuunda kumamanino aamwezi. Baalu balakonzya kumupanduluda kuti sikwiiya Bbaibbele mbwaazumizyigwa buyo kuba sikumwaya uutabbapatizyidwe akupa lipooti yamulimo wamumuunda kwaciindi cakusaanguna, Kkaadi Yambungano Aalembwa Milimo Yasikumwaya ilalembwa muzina lyakwe akubikkwa mufailo yambungano. Baalu balabweza makani aajatikizya sikumwaya ooyu kutegwa mbunga icikonzye kulanganya milimo iijatikizya bukombi ya Bakamboni ba Jehova nyika yoonse alimwi kutegwa sikumwaya ooyu acikonzye kutola lubazu mumilimo yakumuuya akutambula lugwasyo lwakumuuya. Kuyungizya waawo, baalu balakonzya kumuzyibya sikumwaya mupya ooyu kuti makani oonse aajatikizya nguwe alayobolwa kweelana a Global Data Protection Policy ya Bakamboni ba Jehova iijanika aa jw.org.

¹¹ Ikumuzyiba kabotu sikumwaya mupya akubikkila maano kumulimo ngwacita kulakonzya kumukulwaizya kapati sikumwaya ooyo. Kulakonzya kumukulwaizya kuzumanana kupa malipooti aamulimo wamumuunda lyoonse alimwi akusungwaala kubelekela Jehova.—Flp. 2:4; Heb. 13:2.

¹² Baalu mbobabonena buyo kuti sikwiiya Bbaibbele uleelela kutola lubazu mumulimo wamumuunda, ulakonzya kupegwa bbuku limugeme lya Bakamantene Mukucita Kuyanda kwa Jehova. Aakuleta lipooti yamulimo wamumuunda kwaciindi cakusaanguna, weelede kwaambilizyigwa kumbungano kuti ngusikumwaya mupya uutabbapatizyidwe.

KUGWASYA BANA BASYOONTO

¹³ Bana baniini abalo balakonzya kweelela kuba basikumwaya bamakani mabotu. Jesu wakabatambula bana baniini alimwi wakabaleleka. (Mt. 19:13-15; 21:15, 16) Nokuba kuti bazyali mbabajisi mukuli wakulanganya bana babo, ibamwi mumbungano inga bayanda kugwasya bana aabo ibakulwaizyigwa amyoyo yabo kutola lubazu mumulimo wakukambauka Bwami. Ikuti kamuli bazyali, cikozyanyo cibotu ncomupa mumulimo wamumuunda ciyoobagwasya kapati bana banu kuba basungu mumulimo ngobabelekela Leza. Ikuti mwana kalilemeka kabotu alimwi kuzwa ansi aamoyo kayanda kwaambila bamwi nzyasyoma, ino muunzila nzi imbi mwakonzya kugwasyigwa?

¹⁴ Inga cabota ikuti muzyali wakwe wasikila umwi wabaalu ibali mu Kkomiti Yamulimo Yambungano kuti babandike naa mwana ooyo uleelela kuba sikumwaya. Sicuuno wakabunga kabaalu uyoobikka bubambe bwakuti baalu bobilo (umwi kali wabaabo bamukkomiti yamulimo) babandike amwana ooyo alimwi amuzyali, bazyali bakwe naa aabo ibamulela. Ikuti mwana kajisi luzyibo lwantalisyo lwakasimpe kamu Bbaibbele alimwi akutondezya kuti ulayandisya kutola lubazu mumulimo wa Bwami, eeci ciyoopa bumboni bwakuti kuli kuyaambele. Twamana kulangwa-langwa twaambo ootu alimwi atwaambo tumwi tweelene atooto tuyandika kubapati, ibaalu aabo bobilo balakonzya kubona naa mwana ooyo inga wazumizyigwa kuba sikumwaya uutabbapatizyidwe naa pe. (Lk. 6:45; Rom. 10:10) Ciindi nokubandikwa amwana muniini, inga tiikwayandika kubandika makani aamwi aavwula kubandikwa abapati alo aalibonya caantangalala kuti taamujatikizyi mwana ooyo.

¹⁵ Nobaswaangana anguwe, baalu beelede kumulumbaizya mwana ooyo akaambo kakuyaambele kwakwe alimwi akumukulwaizya kuti alibikkile mbaakani yakubbapatizyigwa. Alimwi mbokunga bazyali bakwe babeleka canguzu kumuyiisya kasimpe mwanaabo, abalo beelede kulumbaizyigwa. Kutegwa bazyali bazumanane kumugwasya mwanaabo, baalu beelede kubaambila kubona makani aajisi mutwe wakuti “Mulumbe Kubazyali Banakristo.”

KULYAABA AKUBBAPATIZYIGWA

¹⁶ Ikuti mwakamuzyiba alimwi akumuyanda Jehova kwiinda mukusika azyeelelo zya Leza alimwi akutola lubazu mumulimo wamumuunda, muyandika kuyumya cilongwe canu anguwe. Ino inga mwaciyumya buti? Inga mwacita oobo kwiinda mukulyaaba kulinguwe alimwi akutondezya kulyaaba ooku kwiinda mukubbapatizyigwa mumeenda.—Mt. 28:19, 20.

¹⁷ Kwaaba caamba kubikka cintu cimwi ambali kutegwa cibelesyegwe mumulimo uusetekene. Ikulyaaba kuli Leza caamba kwaambaula anguwe mumupailo alimwi akusyomezya cakusinizya kuti munoomubelekela mubuumi bwanu boonse alimwi akweenda munzila zyakwe. Caamba kukomba buyo nguwe alikke mane kukabe kutamani. (Dt. 5:9) Aaya makani muntu ngayelede kulicitila alikke. Kunyina umbi uukonzya kumucitila oobo pe.

¹⁸ Nokuba boobo, nzinji ziyandika kunze lyakwaambila Jehova mumupailo kamuli molikke kuti muyanda kuba wakwe. Mweelede kubatondezya bamwi kuti mulilyaabide kuli Leza. Mulabazyibya kwiinda mukubbapatizyigwa mumeenda mbubonya mbwaakacita Jesu. (1Pet. 2:21; 3:21) Ikuti naa mwakasala kumubelekela Jehova alimwi muyanda kubbapatizyigwa, ino ncinzi ncomweelede kucita? Mweelede kumuzyibya makanze aanu sicuuno wakabunga kabaalu. Uyoobikka bubambe bwakuti baalu bali mbobabede babandike andinywe kutegwa basinizye kuti mulazizuzikizya zyeelelo zya Leza iziyandika kutegwa mubbapatizyigwe. Ikutegwa muzyibe zinji, amubale “Mulumbe Kuli Sikumwaya Uutabbapatizyidwe,” uuli amapeeji 182-184 mubbuku eeli alimwi a “Mibuzyo Yakubuzya Baabo Bayanda Kubbapatizyigwa,” iili amapeeji 185-207.

KUPA LIPOOTI YAMBOUYAAMBELE MULIMO

¹⁹ Malipooti aatondezya mbobuyaambele bukombi busalala nyika yoonse abakulwaizya kapati bantu ba Jehova kwamyaka minji. Kuzwa leelyo Jesu naakaambila basikwiiya bakwe ciindi cakusaanguna kuti makani mabotu akali kuyookambaukwa nyika yoonse mboizulwa, Banakristo bakasimpe bali kuyandisya kuzyiba mbocakali kuyoocitwa eeci.—Mt. 28:19, 20; Mk. 13:10; Mil. 1:8.

²⁰ Basikutobela Jesu bakusaanguna bakali kukkomana kumvwa makani aajatikizya kuyaambele kwamulimo wakukambauka. (Mk. 6:30) Bbuku lyamu Bbaibbele lya Milimo litwaambila kuti kwakali bantu basika ku 120 ciindi muuya uusalala nowakatilwa aali basikwiiya lya Pentekoste 33 C.E. Mukaindi kasyoonto buyo, imweelwe wabasikwiiya wakakomena kusika ku 3,000 mpoonya akusika ku 5,000. Kwakalembwa lipooti yaamba kuti “buzuba abuzuba Jehova wakazumanana kubayungizyila baabo ibakali kufwutulwa,” akuti “nkamu mpati yabapaizi abalo bakatalika kusyoma.” (Mil. 1:15; 2:5-11, 41, 47; 4:4; 6:7) Eelo kaka kweelede kuti basikwiiya bakakulwaizyigwa kapati amakani aaya aajatikizya kuyaambele ooku! Masimpe, makani aaya aakkomanisya ayelede kuti akabakulwaizya kuzumanana kubeleka mulimo ngwaakabapede Leza nokuba kuti bakali kupenzyegwa kapati abantu ibakali kuyungwa abasololi bacikombelo caba Juda!

²¹ Mulugwalo ndwaakalembela bana Kolose cakuma 60 a 61 C.E., Paulo wakaamba kuti makani mabotu akali ‘kuzyala micelo akuvwula munyika yoonse’ akuti “akakambaukwa kuzilenge zyoonse zili ansi aajulu.” (Kol. 1:5, 6, 23) Banakristo bakusaanguna bakali kulitobela Jwi, alimwi muuya uusalala wakabapa nguzu cakunga bakacita mulimo mupati kapati wakukambauka kaatanasika mamanino aabweende bwazintu bwaba Juda mu 70 C.E. Eelo kaka cakabakulwaizya kapati Banakristo aaba ibasyomeka kumvwa malipooti aamulimo iwakali kucitwa!

²² Mbubonya buyo, mbunga ya Jehova yamazuba aano ilasoleka kuyobola makani aamulimo uucitwa ooyo uuzuzikizya lugwalo lwa Matayo 24:14 ilwaamba kuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.” Mbotuli babelesi ba Leza balyaabide, tujisi mulimo iweelede kucitwa cakufwambaana. Umwi aumwi wesu weelede kubikkila maano kubona kuti mulimo ooyu wacitwa cakulomya kaatanasika mamanino. Jehova uyoobona masimpe kuti mulimo ooyu wamana kucitwa, alimwi ikuti naa katutola lubazu mulinguwo, Jehova uyootukkomanina.—Ezk. 3:18-21.

LIPOOTI YANU YAMULIMO WAMUMUUNDA

²³ Ino ncinzi cini ncotweelede kulipoota? Ikapepa ka Lipooti Yamulimo Wamumuunda nkoyakapanga mbunga kalatondezya izyeelede kubikkilizyigwa. Kuyungizya waawo, twaambo ootu itutobela tulakonzya kumugwasya.

²⁴ Muzibeela zilembedwe kuti, “Zyaakabilwa (Zisimbidwe Amabbuku aa Intaneti),” amulembe mweelwe woonse wazintu—kufwumbwa naa zyakasimbwa buya naa zyaa Intaneti—nzyomwakaabila bantu batali Bakamboni babbapatizyidwe. Mucibeela cakuti “Mavidiyo Aakatondezyegwa,” amulembe mweelwe waziindi nzyomwakatondezya mavidiyo eesu mumulimo wamumuunda.

²⁵ Nomulemba “Nyendo Zyakupilukila,” amubale mweelwe woonse wanyendo zyakupilukila izyakacitwa mukugwasya umwi kuyandisya kwiiya ooyo uutali Kamboni uulyaabide alimwi uubbapatizyidwe. Nyendo yakupilukila ilakonzya kucitwa kwiinda mukuswaya muntu, kumulembela lugwalo, kumutumina fooni, kumutumina kagwalo kaafooni (SMS), naa kaaintaneti (e-mail), kumutolela mabbuku. Lyoonse nomweendelezya ciiyo ca Bbaibbele, mulakonzya kubala nyendo yakupilukila. Muzyali ulakonzya kubala nyendo yakupilukila yomwe nsondo ansondo ciindi nasololela mukukomba kwamumukwasyi ikuti kakuli mwana uutabbapatizyidwe akati kabo.

²⁶ Nokuba kuti ciiyo ca Bbaibbele kanji-kanji cileendelezyegwa mvwiki amvwiki, cilipootwa kuti nciiyo comwe buyo amwezi. Basikumwaya beelede kulemba mweelwe woonse waziiyo zya Bbaibbele ziindene-indene izyakasololelwa mumwezi. Ziiyo zya Bbaibbele zilipootwa zilakonzya kubikkilizya zyeezyo izyakasololelwa kubantu batali Bakamboni balyaabide alimwi babbapatizyidwe. Alimwi mulakonzya kubala ciiyo ca Bbaibbele ncomusololela kumukwesu naa mucizyi uutacisungweede ngomwakaambilwa kuyiisya amukwesu umwi wamukkomiti yamulimo, naa ncomusololela kumuntu wakabbapatizyigwa caino-ino uutanamanizya kwiiya bbuku lya Amupone Kukabe Kutamani!

²⁷ Cilayandika kapati ikupa lipooti iiluzi ya “Mawoola.” Mubufwaafwi, eeci nciindi ncomutola mumulimo wakuŋanda aŋanda, munyendo zyakupilukila, mukweendelezya ziiyo zya Bbaibbele, mubukambausi bwamukwiizya kubantu batali Bakamboni balyaabide alimwi babbapatizyidwe. Ikuti basikumwaya bobilo kababeleka antoomwe, boonse bobilo balakonzya kulemba ciindi, pele ngumwi buyo iweelede kubala nyendo zyakupilukila naa ziiyo zya Bbaibbele zili zyoonse zicitwa anguwe. Bazyali boonse bobilo ibatola lubazu mukuyiisya bana babo mu Kukomba Mumukwasyi balakonzya kulemba woola lyomwe mvwiki amvwiki. Bakwesu balakonzya kulemba ciindi ncobatola kwaamba makani aabuleya. Awalo sikusandulula makani aabuleya ulakonzya kulemba ciindi eeco. Kuli milimo imbi iiyandika kapati iitabalilwi ciindi, mbuli kulibambila kuunka mumulimo wamumuunda, kujanika amuswaangano wamulimo wamumuunda, kucita zintu zimwi zitajatikizyi bukambausi, azimwi zili boobo.

²⁸ Sikumwaya umwi aumwi weelede kutobela manjezyeezya aakwe aayiisyidwe Bbaibbele ciindi nakkala ansi kubalila ciindi ncaatola mumulimo wakukambauka. Basikumwaya bamwi babelekela mumasena mukkala bantu banji kapati, kakuli bambi babelekela muzilawo imuli bantu basyoonto buyo alimwi imweendwa misinzo milamfwu. Zilawo ziliindene; abalo basikumwaya baliindene mbobaubona mulimo wabo. Kabunga Keendelezya takabikkili mbungano yanyika yoonse mulawo wakuti kaitobela manjezyeezya aankako caboola kumakani aakubala ciindi citolwa mumulimo wamumuunda, alimwi kunyina uupedwe nguzu zyakubeteka bamwi mumakani aaya.—Mt. 6:1; 7:1; 1Tim. 1:5.

²⁹ Ciindi citolwa mumulimo wamumuunda taceelede kulipootwa mumaminiti pe, pele buyo mumawoola. Lilikke buyo sikumwaya nakonzya kulipoota ciindi mumaminiti ndileelyo natakonzyi kubeleka kwaciindi cilamfwu akaambo kakuti ulicembeede kapati, ngusibukilwi bulo, ubikkidwe mucibbadela cabacembeede, naa ulilemene cakunga takonzyi kubeleka kapati. Sikumwaya uuli boobo ulakonzya kupa lipooti yamulimo wamumuunda mutuga twamaminiti aali 15, nkokuti 15, 30 naa 45. Nokuba kuti wakakambauka buyo maminiti aali 15 mumwezi, weelede kwaalipoota maminiti aayo. Uyoobalwa kuti ngusikumwaya wa Bwami uusungweede. Bubambe oobu bulabeleka akuli sikumwaya uutacikonzyi kubeleka kwaciindi cilamfwu, ambweni takonzyi kuunka mubukambausi kwamwezi omwe naa kwamyezi misyoonto buyo akaambo kakuciswa kapati naa kulicisa. Bubambe oobu bwakabikkilwa buyo baabo ibatakonzyi kubeleka kwaciindi cilamfwu mumulimo. Kkomiti yamulimo iyoobona naa sikumwaya uleelela kubalilwa mububambe oobu naa pe.

KKAADI YAMBUNGANO AALEMBWA MILIMO YASIKUMWAYA

³⁰ Lipooti yanu yamulimo wamumuunda yamwezi amwezi ilalembwa akuyobolwa aa Kkaadi Yambungano Aalembwa Milimo Yasikumwaya. Makkaadi aaya ngambungano. Ikuti muyanda kulongela kumbungano imbi, amubone masimpe kuti mwabazyibya baalu. Mulembi uyooba masimpe kuti makani aajatikizya milimo yanu atumwa kumbungano yanu mpya. Munzila eeyi, baalu bayookonzya kumutambula amaanza obilo akumugwasya munzila yakumuuya. Ikuti naa kuli nkomwaunka, aboobo tamunooliko mumbungano yanu kwamyezi iitasiki kuli yotatwe, amuzumanane kutuma malipooti aanu aamulimo wamumuunda kumbungano nkomuzulilwa.

NCOTUPEDA MALIPOOTI AAMULIMO WAMUMUUNDA

³¹ Sena zimwi ziindi mulaluba kupa lipooti yamulimo wamumuunda? Cakutadooneka toonse tuyandika kwiibalusyigwa ciindi aciindi. Pele ikuti katwaabona munzila yeelede makani aakupa lipooti yamulimo wamumuunda alimwi ikuti katuzyi ncokuyandika kucita boobo, tacinikutukatazyi kuyeeya kupa lipooti yesu yamulimo wamumuunda.

³² Ibamwi balabuzya kuti: “Mbwaanga Jehova ulizyi ncondicita mumulimo wakwe, ino nkaambo nzi ncondeelede kupa lipooti kumbungano?” Masimpe, Jehova ulizizyi nzyotucita alimwi ulakonzya kubona naa mulimo ngotucita tulaucita camoyo woonse naa twiinzya buyo mulawo. Pele amuyeeye kuti Jehova wakalemba mweelwe wamazuba Nowa ngaakali mubwato alimwi amweelwe wamyaka bana Israyeli njobakeenda munkanda. Leza wakalemba mweelwe wabaabo ibakasyomeka alimwi awabaabo ibatakamumvwida. Wakalemba kujatikizya mbocakazundwa asyoonto-syoonto cisi ca Kanana alimwi azintu nzyobakacita babetesi basyomeka bamu Israyeli. Inzya, wakalemba twaambo tunji tujatikizya milimo njobakacita babelesi bakwe. Wakabelesya muuya wakwe kulemba makani aajatikizya zintu eezyi izyakacitika, ikututondezya munzila iisalede mbwaabona makani aakulemba malekkoodi aaluzi.

³³ Zintu izyakacitika kaindi izilembedwe mu Bbaibbele zitondezya mbwaaluzi malipooti alimwi amalekkoodi ngobakayobola bantu ba Jehova. Mumakani manji, icini ncolyaamba Bbaibbele nocatali kumvwika ikuti nokwatakalembwa myeelwe ini. Amulange-lange zikozyanyo zitobela: Matalikilo 46:27; Kulonga 12:37; Babetesi 7:7; 2 Bami 19:35; 2 Makani 14:9-13; Johane 6:10; 21:11; Milimo 2:41; 19:19.

³⁴ Nokuba kuti malipooti eesu taabikkilizyi zyoonse nzyotucita mukukomba Jehova, alabagwasya kapati boonse aabo ibali mumbunga ya Jehova. Mumwaanda wamyaka wakusaanguna, ciindi baapostolo nobakapiluka kuzwa mumulimo wakukambauka, bakaambila Jesu “zintu zyoonse nzibakacita anzibakayiisya.” (Mk. 6:30) Zimwi ziindi malipooti alakonzya kutondezya kuti mbazu zimwi zyamulimo wesu ziyandika kulangwa-langwa. Myeelwe ilakonzya kutondezya kuti nokuba kuti kuli kuyaambele mumbazu zimwi, inga kakuli kuyaansi mumbazu zimbi, mbuli mumweelwe wabasikumwaya. Kulakonzya kujanika kuti kuyandika kukulwaizya bakwesu abacizyi naa kulanganya mapenzi amwi ngobajana. Balangizi bapedwe mikuli bayoobona malipooti akusoleka kululamika zintu zili zyoonse zilesya bantu naa mbungano yoonse kuyaambele.

³⁵ Kunze lyaboobo, malipooti agwasya mbunga kubona masena aabulide aayandika babelesi abamwi mumuunda. Nimbazu nzi zyamulimo izyazwidilila kapati? Ino muumbazu zili muuteendi kabotu mulimo? Ino mabbuku nzi aayandika ikugwasya bantu kwiiya kasimpe? Malipooti apa kuti mbunga ikonzye kuzyiba mabbuku aayandika mumulimo wakukambauka mumasena aaindene-indene nyika yoonse mboizulwa alimwi akulibambilila limwi mabbuku manji kutegwa kutabi kubulila.

³⁶ Tobanji, malipooti aaya alatukulwaizya. Sena tatukkomani notumvwa mulimo ngobacita bakwesu mukukambauka makani mabotu nyika yoonse mboizulwa? Malipooti aakuti myweelwe yayungizyigwa atugwasya kubona mbwiiyaabukomena mbunga ya Jehova yoonse. Zyakuluula zyabamwi zilatukkomanisya akutupa busungu, zitupa kutola lubazu cakumaninina mumulimo wakukambauka. (Mil. 15:3) Aboobo ikulisungula kupa malipooti aamulimo wamumuunda kulayandika kapati alimwi mbumboni bwakuti tulababikkila maano bakwesu kufwumbwa nkobabede. Munzila eeyi, tutondezya kuti tulalibombya kububambe bwambunga ya Jehova.—Lk. 16:10; Heb. 13:17.

KULIBIKKILA MBAAKANI

³⁷ Kunyina kaambo keelede kutupa kweezyanisya mulimo wesu wamumuunda awamuntu umbi. (Gal. 5:26; 6:4) Bukkale bwamuntu umwi aumwi buliindene. Kulubazu lumwi, tulakonzya kugwasyigwa kapati kwiinda mukulibikkila mbaakani zyeelede nzyotukonzya kubelesya kulipima tobeni kubona mbotuyaambele mumulimo. Ikuzuzikizya mbaakani eezyi kulakonzya kutupa kuba alukkomano iluboola akaambo kakuzyiba kuti twazizuzikizya mbaakani nzyotwakalibikkila.

³⁸ Cilisalede kuti Jehova lino ulimukufwambaanya mulimo wakuyobolola bantu aabo mbayookwabilila “mumapenzi mapati.” Tupona kuciindi cakuzuzikizyigwa kwabusinsimi bwa Isaya ibwaamba kuti: “Muniini uyooba cuulu awalo musyoonto uyooba cisi cilaanguzu. Mebo lwangu, nde Jehova, ndiyoopa kuti eeci cifwambaane kucitika muciindi cancico ceelede.” (Ciy. 7:9, 14; Is. 60:22) Eelo kaka ncoolwe cipati ikuba babelesi bamakani mabotu kuciindi eeci icitakalubwi cakumazuba aamamanino!—Mt. 24:14.