Kabbokesi Kamubuzyo

◼ Sikumwaya uutanabbapatizyigwa kataneelela kubbapatizyigwa, ino kujanika kwakwe kumiswaangano yambungano alimwi akutola lubazu mumulimo wakukambauka kweelede kutondezya nzi?

Kubbapatizyigwa ncakusala ciyandika kapati muntu ncakonzya kusala. Aboobo, muntu natanasika akweelela kubbapatizyigwa, weelede kuzyiba ncayanda Leza kulinguwe. Kuyungizya waawo, weelede kuti wakatalika kale kutondezya kuti uliyandide kupona kweelana azyeelelo zya Leza.

Banakristo balaililwa kuti batanooleki kuswaangana antoomwe, aboobo sikumwaya uutanabbapatizyigwa weelede kuti kalimusungu kale kujanika kumiswaangano yambungano. (Heb. 10:24, 25) Alimwi weelede kuti katola lubazu mukwiingula. Kulalangilwa kuti unoolilembesezye kale mu Cikolo Camulimo Weendelezyegwa a Leza, nokuba kuti eeci tacili ceelelo.

Kuyungizya waawo, mbwaanga Banakristo bapedwe mulimo wakukambauka makani mabotu alimwi akupanga basikwiiya, sikumwaya uutanabbapatizyigwa weelede kuti katola lubazu lyoonse mumulimo wakukambauka katanabbapatizyigwa. (Mt. 24:14; 28:19, 20) Ino kweelede kwiinda myezi yongaye kakambauka kutegwa ayelele kubbapatizyigwa? Aboobo, weelede kupegwa ciindi cili mbocibede kutegwa atondezye kuti unootola lubazu lyoonse cabusungu mumulimo wakukambauka mwezi amwezi. (Int. 78:37) Nokuba boobo, takweelede kwiinda ciindi cilamfwu kapati kuzwa naakaba sikumwaya kusikila aciindi cakuti ayelele kubbapatizyigwa, ambweni kweelede kwiinda buyo myezi misyoonto. Ino weelede kunoolipoota mawoola ongaye aamumulimo wakukambauka? Kunyina mulawo wacigaminina uubikkidwe. Baalu beelede kububikkila maano bukkale mbwajisi sikumwaya alimwi akulanga zyintu munzila yeelede.—Lk. 21:1-4.

Baalu (naa bakutausi bali mumbungano zijisi baalu basyoonto) ibaswaangana asikumwaya uuyanda kuyoobbapatizyigwa beelede kuyeeya kuti bantu baliindene, aboobo beelede kubelesya bupampu ciindi nobalanga-langa kuti naa uleelela kubbapatizyigwa naa pe. Beelede kubona kuti ulayandisisya ncobeni kuba Kamboni wa Jehova alimwi ulatondezya kulumba akaambo kakuba acoolwe cakuyanzana ambunga ya Jehova alimwi akutola lubazu mumulimo wakukambauka. Baalu balizyi kuti tanasima kumuuya naa kuba aluzyibo mbuli lujisi bakambausi babbapatizyidwe. Ikuti baalu babona kuti sikumwaya taneelela kubbapatizyigwa, calubomba beelede kumwaambila twaambo twamu Magwalo ncobayeeyela boobo, alimwi akumugwasya kumuuya.