Mbelele zya Jehova Ziyandika Kubamba Kabotu
“Amuzibe kuti Jehova ngu-Leza. . . . Tuli bantu bakwe, imbelele zyamafula aakwe.”—INTEMBAUZYO 100:3.
1. Mbuti Jehova mbwabamba babelesi bakwe?
JEHOVA ngo Mweembezi Mupati. Kuti katuli babelesi bakwe, utubona kuba mbelele zyakwe alimwi ulatubamba kabotu. Taata wesu wakujulu ulatupa kukatalukwa alimwi ulatusolweda kuya “munzila zyabululami, nkaambo kazina lyakwe.” (Intembauzyo 23:1-4) Sikweembela Mubotu, Jesu Kristo, ulatuyanda kapati cakuti mane wakatutulila buumi bwakwe.—Johane 10:7-15.
2. Muuciimo nzi bantu ba Leza mobalijana?
2 Mbotuli basikubambwa kabotu, tulakonzya kwaamba antoomwe asintembauzyo kuti: “Amukombe Jehova cakukondwa, amuboole kubusyu bwakwe anyimbo. Amuzibe kuti Jehova ngu-Leza. Ngonguwe wakatulenga, tuli bakwe. Tuli bantu bakwe, imbelele zyamafula aakwe.” (Intembauzyo 100:2, 3) Ee, tulakondwa akuliiba. Cili mbuli kuti tulikwabilidwe kuzwa kuzinyama, muluba lulaa bwaanda bwamabwe.—Myeelwe 32:16; 1 Samuele 24:3; Zefaniya 2:6.
Beembezi Babutanga Ibalisungwide
3. Mbuti baalu Banakristo basalidwe mbobabamba butanga bwa Leza?
3 Anu ncencico ncotukondwa kuba mbelele zya Leza! Baalu babikkidwe balasololela akati kesu. Tabakwe “[noba]lipa busilutwe,” tabakwe nobacita kami-kami kulindiswe, naa nobaba bami balusyomo lwesu. (Myeelwe 16:13; Matayo 20:25-28; 2 Ba-Korinto 1:24; Ba-Hebrayo 13:7) Balo mbeembezi basiluyando ibatobela lulayo lwa Petro lwakuti: “Ndati, amweembele butanga bwa-Leza buli akati kanu, alimwi kutabi kwakusinikizigwa, pe, akube camoyo omwe. Kutabi kwakuunya kulubono lwaansi, pele kwamoyo uutuba. Mutabaciti kamikami abeembelwa ndinywe, pele amubabede citondezyo cakutobela.” (1 Petro 5:2, 3) Mwaapostolo Paulo wakaambila baalunyina ategwa: “Nkaako kamulibamba lwanu nobeni alimwi kamububamba butanga boonse oobo Muuya Uusalala mbwamupede kuti mubulange. Amweembele bambungano ya Leza eeyo njaakanununa alufu lwa Mwanaakwe mwini.” Alimwi zilalumba kaka mbelele ikuti aaba baalumi basalidwe aamuuya uusalala balabubamba kabotu butanga!—Milimo 20:28-30. Ci
4. Charles T. Russell wakalizizilwe loko akaambo kakuyanzana kuli buti abutanga?
4 Jesu wakapa mbungano “zipego kubantu,” kuti bamwi babe “beembeli [pastor, King James Version],” naa beembezi, balo babubamba kabotu butanga bwa Jehova. (Ba-Efeso 4:8, 11, Ci) Umwi wabaalumi aaba wakali Charles T. Russell, mweendelezi mutaanzi wa Watch Tower Society. Wakali kutegwa Pastor Russell akaambo kamicito yakwe yaluyando yalweetelelo mukweembela butanga mubweendelezi bwa Mweembezi Mupati, Jesu Kristo. Sunu baalu Banakristo balasalwa a Kabunga Keendelezya ka Bakamboni ba Jehova, alimwi alacenjelelwa mazina aakuti “pastor,” “mwaalu,” naa “mufwundisi” kuti atabelesegwi kuba mazina aabulemu. (Matayo 23:8-12) Pesi, baalu basunu balacita mulimo wabu pastor naa wabweembezi, ikugwasya mbelele mumacelelo aa Jehova.
5. Nkaambo nzi bapya ncobeelede kuzibana abaalu basalidwe ibamumbungano ya Bunakristo?
5 Mbobali beembezi, baalu batola lubazu lupati mukutola bapya ambele munzila yakumuuya. Aboobo bbuku lipya lya Luzibo Lutola Kubuumi Butamani apeeji 168 lyaamba boobu: “Amuzibane abaalu babikkidwe mumbungano. Balizibide loko kubelesya luzibo lwa Leza, nkaambo balisikide azyeelelo zyabalangizi (babbishopo) izibikkidwe mu Bbaibbele. (1 Timoteo 3:1-7; Tito 1:5-9) Muteenkeli pe kusika kuli umwi wabo kuti kamuyandika lugwasyo lwakumuuya ilwakuleka cilengwa cibi antela kampenda kakutayanda kweendelana anzyayanda Leza. Mulajana kuti baalu batobela malailile aa Paulo aakuti: “Mubaumbulizye batyompedwe mumyoyo, mubatabe bakompeme, amube acamba cilemu kubantu boonse.”—1 Ba-Tesalonika 2:7, 8; 5:14.”
Ciindi Bapya Nobayanda Kukambauka
6. Malailile nzi aatobelwa kuti sikwiiya Bbaibbele wayanda kuba sikwaambilizya mulumbe wa Bwami?
6 Amana kujana luzibo akujanika kumiswaangano kwaciindi cili mbocibede, sikwiiya Bbaibbele inga wayanda kuba sikumwaya mulumbe wa Bwami, sikukambauka makani mabotu. (Marko 13:10) Kwaba boobo, ooyo Kamboni weendelezya ciiyo cakwe ca Bbaibbele weelede kubona mulangizi weendelezya, walo uuyoomvwana amwaalu umwi wamu Kkomiti Yamulimo Wambungano alimwi aumbi mwaalu kuti bamuswaane sikwiiya Bbaibbele antoomwe amwiiyi wakwe. Mubandi unoogeme zili mubbuku lya Olinganizidwa Kusilidza Uministala Wathu amapeeji 98 alimwi a 99. Kuti aaba baalu bobile babona kuti ooyo mupya ulazisyoma ziyiisyo zya Bbaibbele zyantalisyo alimwi wazitobela njiisyo zya Leza, uyooambilwa kuti uleelela ikutola lubazu mumulimo wakubuleya.a Ciindi alungulula mulimo wakwe kwiinda mukupa lipooti yamulimo wamumuunda, iyoobikkwa akkaadi Aalembwa Zyasikumwaya Iyamumbungano iibambwa muzina lyakwe. Lino ooyo mupya ulakonzya kunoolungulula micito yakwe yabukamboni antoomwe amamiliyoni aabambi balo ‘[iba]amba makani aa Leza.’ (Incito 13:5) Mpoona kuyooambilizigwa kumbungano kuti waba sikumwaya uutabbapatizidwe.
7, 8. Muunzila nzi sikumwaya uutabbapatizidwe mwanga ulapegwa lugwasyo mumulimo?
7 Sikumwaya uutabbapatizidwe uyandika lugwasyo lwabaalu abambi Banakristo basimide. Mucikozyanyo, ikuya kwakwe ambele munzila yakumuuya ncintu ncanooyanda kubona sikweendelezya Ciiyo Cabbuku Cambungano icakooko nkwajanika. Sikumwaya mupya cilakonzya kumuyumina ikwaambaula kabotu mumulimo wakuŋanda aŋanda. (Incito 20:20) Aboobo ulalangilwa kuti inga ulayanda lugwasyo, ikapati kuzwa kuli yooyo wali kweendelezya ziiyo zyakwe zya Bbaibbele mubbuku lya Luzibo. Lugwasyo lwini-lwini luli boobu luleelede, nkaambo Jesu Kristo basiciiya bakwe wakabagwasya kulibambila mulimo.—Marko 6:7-13; Luka 10:1-22.
8 Kutegwa kukambauka kwesu kubeleke, kulibambilila limwi takweelede kucaala pe. Aboobo, basikumwaya aabo bobile balakonzya kusaanguna kuswaangana akusola-sola kubandika mibandi iikulwaizigwa mupepa lya Utumiki Wathu Waufumu ilimwaigwa mwezi amwezi. Ciindi batalika mulimo wabo mumuunda, ooyo uuzibide kale inga wasololela kwaambaula kuŋanda yomwe naa zyobile zyakusaanguna. Amana kutalisya mubandi kabotu-kabotu, boonse bobile balakonzya kutola lubazu mukupa bukamboni. Ikubeleka antoomwe kwansondo zili mbozibede kulakonzya kuleta nyendo zyakupilukila izibotu mane ndiza aciiyo ca Bbaibbele mubbuku lya Luzibo Lutola Kubuumi Butamani. Ooyo sikumwaya uuzibide kale inga waceendelezya ciiyo kwaciindi cili mbocibede amane wacisiila sikwaambilizya Bwami mupya. Ino inga bakondwa kaka boonse bobile basikumwaya kuti sikwiiya Bbaibbele walitondezya kubotelwa luzibo lwa Leza!
9. Nintaamu nzi zitolwa ciindi sikumwaya nayanda kubbapatizigwa?
9 Mbwayaabuya kumbele sikumwaya uutabbapatizidwe, inga walyaaba kuli Leza mumupailo akuyanda kuti abbapatizigwe. (Amweezyanye a Marko 1:9-11.) Weelede kuzibya mulangizi weendelezya iwamumbungano kuti uyanda kubbapatizigwa, walo uyoomvwana abaalu bamwi kuti balange antoomwe asikumwaya ooyo imibuzyo iili amapeeji 175 kusikila ku 218 mubbuku lya Olinganizidwa Kusilidza Uministala Wathu. Izibeela zyone izyaabanyizidwe mibuzyo eyi inga zyalangwa munyendo zyotatwe abaalu baindene kuti kakukonzeka. Kuti bazuminana kuti ooyo sikumwaya uutabbapatizidwe ulaziteelela-teelela ziyiisyo zya Bbaibbele zyantalisyo alimwi uleelela munzila zimbi, bayoomwaambila kuti inga wabbapatizigwa. Akaambo kakulyaaba kwakwe akubbapatizigwa, ulaba muntu ‘uulembedwe’ kuti akafwutuke.—Ezekiele 9:4-6.
Lugwasyo Lwaalubazu Iluyandika
10. Amana kwiiya bbuku lya luzibo akubbapatizigwa, mbuti muntu mbwayooyungizya luzibo lwakwe lwa Magwalo?
10 Imuntu amanizya ciiyo ca Bbaibbele mubbuku lya Luzibo akubbapatizigwa, inga takooyandika kweendelezya muli cimbi ciiyo cini-cini mubbuku limbi, mbuli lya Ogwiridzana m’Kulambiridwa kwa M’lungu Wathu Yekha Wowona.b Aneeno ooyo wazwaa kubbapatizigwa uyooiya zinji nalibambila miswaangano ya Bunakristo akujanika kulinjiyo cakusitikila. Alimwi uyoojana alumbi luzibo mbwiiyabumweenzya nyota yakwe yaluzibo kuti alibalile mwini akwiiya mabbuku aa Bunakristo alimwi akubandika tumwi twaambo twamu Magwalo abasilusyomonyina. Pele ino kuti kwayandika lugwasyo lwaalubazu?
11. (a) Mbuti Apolo mbwaakagwasigwa a Priskila a Akula? (b) Ndugwasyo nzi lunga lulapegwa kumwana-mwana uuyeeya zyakukwata naa kukwatwa?
11 Naba Apolo, walo “wa[ka]li singuzu mu-Magwalo” alimwi iwakayiisya zya Jesu munzila iiluzi, wakagwasigwa ciindi Banakristo basimide ba Priskila a Akula “[no]bakamutola kulimbabo, bamupandulwida kabotu nzila ya-Leza.” (Incito 18:24-26; amweezyanye a Incito 19:1-7.) Aboobo, atwaambe mwana-mwana wazwaa kubbapatizigwa kali uyeeya zyakweebana alukwatano. Munakristo uusimide inga wamugwasya kujana lulayo lujatikizya makani aaya mumabbuku aa Watch Tower. Mucikozyanyo, kuli lulayo lugwasya mutwaambo tuli boobu mubbuku lya Mafunso Acicepere Akufunsa—Mayankho Amene Amathandiza Cibeela 7.c Sikumwaya iwakeendelezya ciiyo ca Bbaibbele anguwe inga waabandika makani aaya ayooyo mupya, nokuba kuti ciiyo cini-cini tacikatalikwi pe.
12. Ndugwasyo nzi lunga lulapegwa kubanabukwetene bazwaa kubbapatizigwa balo balaa buyumuyumu?
12 Amuyeeye acimbi cikozyanyo. Ambweni banabukwetene bazwaa kubbapatizigwa cabayumina kutobela njiisyo zyabuna Leza. Balakonzya kubona mwaalu umwi, walo uukonzya kutola mazuba aali mbwaabede kumangolezya kabandika Magwalo antoomwe ambabo akubalailila kuli malembe aamumabbuku aa Watch Tower. Pesi mwaalu ooyo inga takootalika ciiyo ca Bbaibbele cini-cini kubanabubili aabo.
Kuti Walubizya Imupya
13. Nkaambo nzi baalu bamumbungano ncobeelede kubafwida luse ibantu bapya balubizya, pesi kabali beempwa?
13 Baalu baiya Mweembezi Mupati, Jehova, uuti: “Mebo njooembela imbelele zyangu . . . zityokede njoozyaanga tusengele, zilebukide njooziyumya.” (Ezekiele 34:15, 16; Ba-Efeso 5:1) Kutobela muzeezo nguwena oyu, sikwiiya Juda wakakulwaizya kuti kabafwidwa luse Banakristo bananike ibakalaa nzyobadooneka naa ibakawide muzinyonyoono. (Juda 22, 23) Mbokunga ncobeni Banakristo basimide tulabasyoma kapati, ede muntu wazwaa kubbapatizigwa weelede afwidwe luse—kayi nkabelele buyo—walubizya pesi weempwa. (Luka 12:48; 15:1-7) Aboobo baalu, balo ‘babetekela Jehova,’ balazibamba mbelele zili boobu akuziboozya amyoyo iibombede.—2 Makani 19:6; Incito 20:28, 29; Ba-Galatiya 6:1.d
14. Ncinzi ceelede kucitwa ciindi sikumwaya wazwaa kubbapatizigwa nalubizya kapati, alimwi mbuti mbwanga wagwasigwa?
14 Ino kuti sikumwaya wakazwaa kubbapatizigwa kali wakalaa penzi lyakunywa amane lino wapiluka mukukolwa ciindi comwe naa zyobile. Naa ndiza wakalilekede kufweba tombwe walo ngwaakazibide kwaciindi cilamfwu amane lino wazundwa kumasunko aakufweba cakusisikizya ciindi comwe naa zyobile. Nokuba kuti mukwesu oyo mupya wapaila kuli Leza kuti alekelelwe, weelede kulomba lugwasyo kumwaalu umwi kutegwa cibi eeco atacizibili buya. (Intembauzyo 32:1-5; Jakobo 5:14, 15) Ciindi naamba kulubizya kwakwe kumwaalu umwi, ooyo weelede kusola kumuboozya munzila yaluse. (Intembauzyo 130:3) Lulayo lwamu Magwalo lulakonzya kuzulila ikumugwasya koolola nzila zyakwe kuzwa waawo. (Ba-Hebrayo 12:12, 13) Ooyu mwaalu weelede kubandika amulangizi weendelezya wambungano kuti babone lugwasyo lumbi ilweelede kupegwa.
15. Ciindi muntu wazwaa kubbapatizigwa nabisya, ncinzi cinga cayandika kucita?
15 Zimwi ziindi inga kwayandika azimbi zyakucita. Kuti kali waba mpuwo mbi naa kwayoogwa kuba muuya mubi kubutanga, ikabunga kabaalu inga kalasala baalu bobile kuti bakalange-lange kaambo ako. Kuti aba baalu bajana kuti aka kaambo nkapati cakuti kayandika kkomiti yalubeta, beelede kuyoopandulula kukabunga kabaalu. Mpoona kabunga kabaalu inga kasala kkomiti yakugwasya sikulubizya oyo. Iba kkomiti yalubeta beelede kumweendelezya munzila nteteete. Beelede kusola kumuboozya kwiinda mu Magwalo. Kuti wakutambula kabotu kusoleka kwakkomiti ikwaluse, balakonzya kusala naa kuli mbocinga cagwasya kuti watabelesegwa muzibeela zyamiswaangano yaku Ŋanda ya Bwami kucibumbili naa uleelede kutabelesegwa. Kanji-kanji inga ulazumanana kutola lubazu mumulimo wamumuunda, alimwi inga wazumizigwa kwiingula mumiswaangano.
16. Ncinzi baalu ncobakonzya kucita kugwasya sikulubizya oyo?
16 Kuti ooyo sikulubizya walibombya, imwaalu omwe naa bobile bamukkomiti yalubeta balakonzya kulibambila kuyoomucitila kuswaya kwabweembezi ikwakuyumya lusyomo lwakwe akuyaka luyando lwakwe lwazyeelelo zya Leza zyabululami. Aumwi inga wabeleka anguwe mumulimo wamumuunda muziindi-ziindi. Inga babandika anguwe mu Magwalo, ambweni kababelesya zibalo zyamu Ngazi Yamulindizi alimwi amu Galamukani! izyeelede, pesi kutali kutalisya ciiyo cini-cini ca Bbaibbele. Akaambo kakumubamba kabotu munzila iili boobu, ooyo sikulubizya inga wayumizigwa kuti akulwane kukompama kwanyama mumazubaaza kumbele.
17. Nintaamu nzi zitolwa kuti sikubisya uubbapatizidwe wateempwa akucileka cibi cakwe?
17 Aino ikuba muntu wazwaa kubbapatizigwa tacili cilitamizyo cakuteempwa mukucita cibi. (Ba-Hebrayo 10:26, 27; Juda 4) Kuti muntu uubbapatizidwe wabula kweempwa alimwi watakuleka kubisya kwakwe, inga ulagwisigwa mumbungano. (1 Ba-Korinto 5:6, 11-13; 2 Tesalonika 2:11, 12; 2 Johane 9-11) Ciindi kwalibonya kuti ntaamu eeyi inga yayandika kutola, kabunga kabaalu kalasala kkomiti yalubeta. Kuti kwasalwa kumugwisya mumbungano, kulaambilizigwa oobu mukufwiinsya: “Ndaba wagwisigwa mumbungano.”e
Amubagwasye “[Ba]ye Kumbele Kumakani Aabupati”
18. Nkaambo nzi ncotunga twasyoma kuti Banakristo bazwaa kubbapatizigwa abamwi lyoonse banoolaa zyakwiiya zinji kujatikizya Jehova alimwi akuyanda kwakwe?
18 Bunji bwababelesi ba Leza bayookkalilila mubutanga. Alimwi mucoolwe, umwi aumwi wesu uyookonzya kuswena kuli Taata wesu wakujulu nkaambo lyoonse tunoolaa zimbi zyakwiiya kujatikizya nguwe akuyanda kwakwe. (Mukambausi 3:11; Jakobo 4:8) Izyuulu zyabakabbapatizigwa lya Pentekoste mu 33 C.E. ncobeni bakacijisi zinji zyakwiiya. (Incito 2:5, 37-41; 4:4) Ncimwi buyo a Banamasi, balo batakajisi luzibo lwa Magwalo. Mucikozyanyo, eeci ncecakali ciimo cabaabo bakabbapatizigwa naakamana kukambauka Paulo ku Areopagi mu Atene. (Incito 17:33, 34) Asunu aabo bazwaa kubbapatizigwa bayandika ciindi alugwasyo ikuyumya kusala kwabo kwakuti bazumanane kucita ciluzi kubusyu bwa Leza.—Ba-Galatiya 6:9; 2 Thessalonians 3:13.
19. Mbuti aabo babbapatizigwa mbobanga bagwasigwa kuti “[ba]ye ambele kumakani aabupati”?
19 Mwaka amwaka kulabbapatizigwa zyuulu zyabantu balo ibayandika lugwasyo kutegwa “[ba]ye ambele kumakani aabupati.” (Ba-Hebrayo 6:1-3) Kwiinda mumajwi, mucikozyanyo, alimwi alugwasyo lweelede mumuunda, inga mwakonzya kugwasya bamwi kuti balisamike buntu bupya “[kab]eenda mulusinizyo.” (3 Johane 4; Ba-Kolose 3:9, 10) Kuti kamuli basikumwaya basimide, baalu inga bamulomba kuti mugwasye silusyomonyoko mupya naa kuti mubandike tumwi twaambo twamu Magwalo anguwe kwansondo zili mbozibede kutegwa lusyomo lwakwe muli Leza luyumizigwe, abotelwe miswaangano ya Bunakristo, azimwi-zimwi. Kuyanzana kwabeembezi kubutanga kuli mbuli kwataata uukombelezya abaama mutete moyo. (1 Ba-Tesalonika 2:7, 8, 11) Nokuba boobo, baalu basyoonto abakutausi, tabakonzi kubamba zyoonse ziyandika mumbungano. Swebo toonse tuli mbuli mukwasyi mwalo banamukwasyi mobagwasyanya. Umwi aumwi wesu ulakonzya kucita ncakonzya ikugwasya bakombinyina. Nywebo lwenu inga mwakonzya kukulwaizya, kuumbulizya batyompedwe, akutabilila bakompeme.—1 Ba-Tesalonika 5:14, 15.
20. Ncinzi ncimunga mwacita kutegwa mumwaye luzibo lwa Leza alimwi akuzibamba kabotu mbelele zyamumacelelo aa Jehova?
20 Bantu bayandika luzibo lwa Leza, alimwi mbomuli akati ka Bakamboni ba Jehova, mulakonzya kukondwa kubaa lubazu mukulumwaya. Mbelele zya Jehova ziyandika kubamba kabotu, alimwi inga mwatola lubazu caluyando mukugwasya kubacitila boobu. Jehova aulongezye mulimo wenu, alimwi amupe bulumbu akaambo kakusola kwenu mukugwasya mbelele zyamumacelelo akwe.
Bupanduluzi buyungizidwe
a Aciindi awo, ooyo mupya inga wajana kkopi lyabbuku lya Olinganizidwa Kusilidza Uministala Wathu.
b Lyakamwaigwa aba Watchtower Bible and Tract Society of New York, Inc.
c Lyakamwaigwa aba Watchtower Bible and Tract Society of New York, Inc.
d Bubambe buli boobu ibwabasikumwaya batabbapatizidwe bwakaambwa mukukosaula-kosaula mucibalo cakuti: “Kuthandiza Ena Kulambira Mulungu,” icakazwa mu Nsanja Ya Olonda ya November 15, 1988, mapeeji 15-20.
e Ikuti kwasalwa kumugwisya amane walomba kuti mulandu wiindululwe, kwaambilizya kulalindila. Amubone mapeeji 147-8 mubbuku lya Olinganizidwa Kutsiridza Uministala Wathu.
Inga Mwaingula Buti?
◻ Mbuti Jehova mbwabamba mbelele zyakwe?
◻ Ncinzi cicitwa ciindi bantu bapya nobayanda kukambauka?
◻ Mbuti basilusyomonyina mbobanga bagwasya bapya ibayandika lugwasyo lwaalubazu?
◻ Ndugwasyo nzi baalu ndobanga bapa kulibaabo balubizya pesi beempwa?
◻ Mbuti mbomunga mwagwasya muntu wazwaa kubbapatizigwa kuti “[a]ye ambele kumakani aabupati”?
[Cifwanikiso icili apeeji 27]
Charles T. Russell wakazizilwe kuba mweembezi wabutanga siluyando
[Cifwanikiso icili apeeji 29]
Beembezi basilweetelelo balabubamba kabotu butanga bwa Leza