Makani Aayungizyidwe

Mulumbe Kubazyali Banakristo:

Mbomuli muzyali, muyanda kugwasya bana banu mbomuyanda kapati kuti bamuyande Jehova alimwi akulyaaba kulinguwe. Ncinzi ncomukonzya kucita kutegwa mubagwasye kulibambila kubbapatizyigwa? Ndilili nobakonzya kwaambwa kuti balilibambilide kubweza ntaamu eeyi iiyandika kapati?

Jesu wakalailila basikumutobela kuti: “Kamuya mukayiisye bantu bazisi zyoonse kuti babe basikwiiya.” (Mt. 28:19) Kweelana amalailile aaya, cintu cipati ciyandika kutegwa muntu ayelele kubbapatizyigwa nkuba sikwiiya—nkokuti kuba muntu uumvwisya akusyoma njiisyo zya Kristo alimwi akuziccilila. Eeci ncintu ncobakonzya kucita nobaba bana baniini.

Amube cikozyanyo cibotu kubana banu, alimwi amubayiisye njiisyo zya Jehova. (Dt. 6:6-9) Eeci cibikkilizya kubelesya makani aali mubbuku lya kuti Amupone Kukabe Kutamani! kubayiisya njiisyo zyantalisyo zyakasimpe kamu Bbaibbele alimwi akubagwasya kuti kabaziyeeya akuzitobela njiisyo zyamu Bbaibbele nobalanga-langa twaambo. Amubagwasye bana banu kutegwa kabakonzya kupandulula nzyobasyoma mumajwi aabo beni. (1Pet. 3:15) Nzyomubayiisya akubakulwaizya alimwi anzyobaiya muciiyo cabo beni, mukukomba kwamumukwasyi, mumiswaangano yambungano alimwi akubalongwe ibali kabotu ziyoobagwasya kuyaambele mane akusika antaamu yakubbapatizyigwa alimwi akuzumanana kusyomeka mubuumi bwabo. Amubakulwaizye kuba ambaakani zyakumuuya.

Lugwalo lwa Tusimpi 20:11 lwaamba kuti: “Naba mwana musyoonto ulazyibwa kumicito yakwe, kuti naa ulasalala alimwi uliluleme mukulilemeka kwakwe.” Ino micito nzi iikonzya kutondezya kuti mwana musimbi naa musankwa waba sikwiiya wa Jesu Kristo akuti ulilibambilide kubbapatizyigwa?

Mwana uuyanda kubbapatizyigwa weelede kuti kali mwana uumvwida bazyali bakwe. (Mil. 5:29; Kol. 3:20) Kujatikizya Jesu naakali amyaka iili 12, Bbaibbele lyaamba kuti: “Wakazumanana kubamvwida [bazyali bakwe].” (Lk. 2:51) Ncobeni, tamweelede kulangila kuti mwanaanu unoocita zintu munzila iilondokede. Pele mwana ooyo uuyanda kubbapatizyigwa ulasola kuccilila cikozyanyo ca Jesu alimwi weelede kuzyibwa kuti mwana uumvwida bazyali bakwe.

Kunze lyaboobo, weelede kutondezya kuti ulayanda kwiiya kasimpe kamu Bbaibbele. (Lk. 2:46) Sena mwanaanu ulayandisya kujanika kumiswaangano alimwi akutola lubazu mulinjiyo? (Int. 122:1) Sena ulaanzala yakubala Bbaibbele lyoonse alimwi akucita ciiyo cakwe mwini?—Mt. 4:4.

Mwana uuyaambele kuti abbapatizyigwe ulasola ikubikka zintu zya Bwami mubusena bwakusaanguna. (Mt. 6:33) Uluuzyi mukuli ngwajisi wakwaambila bamwi nzyasyoma. Ulatola lubazu mumbazu ziindene-indene zyamulimo wakukambauka alimwi tafwi nsoni kulizyibya kuli bamayi bakwe akubeenzinyina mbaiya limwi kuti ngumwi wa Bakamboni ba Jehova. Ulabikkila maano akulomya kulibambila makani aakwe mu Muswaangano Wabuumi Amulimo.

Kuyungizya waawo, ulasoleka kapati kuzumanana kusalala mumakani aakulilemeka kwiinda mukutamvwana abantu babyaabi. (Tus. 13:20; 1Kor. 15:33) Eeci cilalibonya twalanga mbwasala nyimbo, mafilimu, mapulogilamu aa TV, mavidiyo geemu, alimwi ambwaibelesya Intaneti.

Bana banji balazicita nzyobabayiisya bazyali babo basungu, balisalila beni kweenda mukasimpe alimwi beelela kubbapatizyigwa kabacili bana. Tupailila kuti Jehova amulongezye nomugwasya bana banu kubweza ntaamu eeyi iiyandika kapati mucilongwe cabo a Jehova.

Mulumbe Kuli Sikumwaya Uutabbapatizyidwe:

Ncoolwe cipati ikubeleka ambungano kamuli sikumwaya uutabbapatizyidwe. Mulalumbwa akaambo kakuyaambele kumuuya nkomwacita. Mwamuzyiba Leza kwiinda mukwiiya Jwi lyakwe alimwi mulazisyoma zisyomezyo zyakwe.—Joh. 17:3; Heb. 11:6.

Ambweni kamutanatalika kwiiya a Bakamboni ba Jehova, mwakali mucikombelo cimbi naa tiimwakali kunjila cikombelo cili coonse. Andiza mwakali kutola lubazu mumicito imwi iiteendelani anjiisyo zyamu Bbaibbele. Pele lino mwatondezya lusyomo lwanu kwiinda mukweempwa, calo icaamba kuusa kapati akaambo kazintu zibi nzyomwakali kucita musyule, alimwi mwatondezya lusyomo ndomunya oolu kwiinda mukusanduka, calo icaamba kuleka bukkale butali kabotu akuyandisya kucita zintu ziluzi mumeso aa Leza.—Mil. 3:19.

Kulubazu lumwi, ambweni mulaazyi malembe aasalala “kuzwa kubuvwanda.” Aboobo mwakakwabililwa kuti mutajatikizyigwi mubukkale ibutali bwa Bunakristo alimwi akuti mutaciti cibi cipati. (2Tim. 3:15) Mwaiya kutayungwa abeenzinyoko alimwi akutoongelezyegwa kucita zintu zibi mumeso aa Jehova. Mwatondezya lusyomo lwanu kwiinda mukukakatila kubukombi bwakasimpe alimwi akwaambila bamwi nzyomusyoma. Mwayiisyigwa mulimo wa Bunakristo. Lino mwalisalila nobeni kuti mumubelekele Jehova kamuli sikumwaya uutabbapatizyidwe.

Kufwumbwa naa mwakamuzyibila kubupati Jehova naa mwakayiisyigwa nzila zya Jehova kuzwa kubuvwanda, ambweni lino muyeeya kubweza ntaamu zimbi zyobilo kutegwa muyaambele kumuuya, nkokuti kulyaaba alimwi akubbapatizyigwa. Mulalyaaba kuli Jehova kwiinda mukumusikila mumupailo akumwaambila kuti mwasala kukomba buyo nguwe alikke mane kukabe kutamani. (Mt. 16:24) Mpoonya ikutegwa mutondezye kulyaaba kwanu, mulabbapatizyigwa mumeenda. (Mt. 28:19, 20) Kwiinda mukulyaaba akubbapatizyigwa, muba mubelesi wa Jehova Leza. Eelo kaka eeci ncoolwe cipati!

Pele, mbubonya mbomwabona kale nomwali kwiiya Bbaibbele, muyoojana mapenzi aayindene-indene akaambo kanzila eeyi njomwasala. Kamuyeeya kuti mbwaakabbapatizyilwa buyo, “Jesu wakasololelwa amuuya munkanda kutegwa akasunkwe a Diabolosi.” (Mt. 4:1) Mwamana kubbapatizyigwa kamuli sikwiiya wa Kristo, mulakonzya kulangila kusikilwa masunko aambi. (Joh. 15:20) Ayakuboola munzila ziindene-indene. Mulakonzya kukazyigwa abanamukwasyi. (Mt. 10:36) Mulakonzya kufwubaazyigwa abasicikolonyoko, mbomubeleka limwi alimwi ambomwakali kusobana limwi. Pele lyoonse mweelede kwaayeeya majwi aa Jesu aajanika kuli Marko 10:29, 30, aakuti: “Ncobeni ndimwaambila kuti, kunyina wakasiya ŋanda naa banabokwabo naa bacizyi bakwe naa banyina naa bausyi naa bana bakwe naa myuunda akaambo kandime alimwi akaambo kamakani mabotu uutakajani zintu ziyungizyidwe ziindi zili 100 muciindi cino—nkokuti maanda, banabokwabo, bacizyi, bamamama, bana alimwi amyuunda antoomwe akupenzyegwa—eelyo mubweende bwazintu buboola, ibuumi butamani.” Aboobo amuzumanane kubeleka canguzu kuti mukakatile kuli Jehova akutobela zyeelelo zyakwe ziluleme.

Mwaakuyanda kubbapatizyigwa, amukamuzyibye sicuuno wakabunga kabaalu. Mibuzyo iitobela mulumbe ooyu mpaayeeme mibandi njobanoojisi andinywe baalu kutegwa babone naa muleelela kubbapatizyigwa. Mulakonzya kutalika kwiinduluka mibuzyo eeyi molikke nomucita ciiyo canu ca Bbaibbele calyoonse.

Nomulibambila mibandi eeyi, amubale alimwi akuzinzibala kuyeeya Magwalo aazubuludwe. Ikuti kamuyanda inga mwalemba twaambo mubbuku eeli naa kumbi buyo. Ciindi nomubandika abaalu, mulakonzya kubelesya twaambo ooto alimwi mulakonzya kujalula bbuku eeli akulanga zilembedwe mumo. Ikuti kamutaimvwisyi mibuzyo imwi, mulaangulukide kulomba lugwasyo kumuntu ooyo uumuyiisya Bbaibbele naa kubaalu.

Nomubandika abaalu, mutayeeyi kuti muyandika kwaamba zinji naa twaambo tukatazya nomwiingula mibuzyo. Ibwiinguzi buuba-uba alimwi bwacigaminina mbomwiingula mumajwi aanu mbobuyandika kapati. Kumibuzyo minji, cilagwasya ikwaamba alugwalo lomwe naa obilo aamu Bbaibbele aapa bumboni bwamu Magwalo kubwiinguzi bwanu.

Ikuti naa tamuningaba aluzyibo lunji lwanjiisyo zyamu Bbaibbele zyantalisyo, ibaalu bayoobikka bubambe bwakuti muzumanane kugwasyigwa kutegwa mukacikonzye kwaamba mumajwi aanu nobeni bupanduluzi buluzi bwa Magwalo alimwi akweelela kuyoobbapatizyigwa aciindi cimbi kumbele.

[Malailile kubaalu bambungano: Malailile aambokubandikwa abantu ibayanda kubbapatizyigwa alajanika amapeeji 208-212.]