Mubandi Wamamanino Abaabo Bayanda Kubbapatizyigwa

Kanji-kanji lubbapatizyo lulacitwa kumiswaangano yabbazu ayacooko ya Bakamboni ba Jehova. Kumamanino aamakani aalubbapatizyo, mwaambi uyakulomba baabo bayanda kubbapatizyigwa kuti baimikile akuvwiila mibuzyo yobilo eeyi iitobela cakupozya:

1. Sena mwakeempwa zibi zyanu, mwakalyaaba kuli Jehova, alimwi akuzumina nzila yakwe yalufwutuko kwiinda muli Jesu Kristo?

2. Sena mulizyi kuti kubbapatizyigwa kwanu kumuzyibya kuti muli umwi wa Bakamboni ba Jehova ibayanzana ambunga yakwe?

Ikwiingula mibuzyo eeyi cakusinizya kutondezya kuti aabo bayanda kubbapatizyigwa ‘baambilizya caantangalala’ kuti balacisyoma cinunuzyo alimwi balilyaabide cakumaninina kuli Jehova. (Rom. 10:9, 10) Aabo bayanda kubbapatizyigwa bayandika kwiikkalila ansi akwiipailila mibuzyo eeyi kakucili ciindi kutegwa bakayiingule kweelana azini nzyobasyoma.

Sena mwakalyaaba kuli Jehova kwiinda mumupailo, kumusyomezya kuti munookomba buyo nguwe alikke alimwi akuti kucita kuyanda kwakwe cinooli ncecintu ciyandika kapati mubuumi bwanu?

Sena mulisinizyide lino kuti muyandika kubbapatizyigwa amuswaangano ooyu uutobela?

Ino nzisani zili buti nzyobeelede kusama aabo ibaunka kuyoobbapatizyigwa? (1Tim. 2:9, 10; Joh. 15:19; Flp. 1:10)

Tweelede kusama “cabulemu alimwi acakulibatamika” kutegwa tutondezye kuti ‘tulilyaabide kuli Leza.’ Aboobo, aabo baunka kuyoobbapatizyigwa tabeelede kusama zisani zibalangala, izilembedwe mabala amwi, izijisi mazina aamakwebo naa mbunga. Beelede kusama zisani zyabulemu, izitajisi tombe alimwi izyeelela aciindi eeci ciyandika kapati.

Ino muntu weelede kulilemeka buti ciindi nabbapatizyigwa? (Lk. 3:21, 22)

Lubbapatizyo lwa Jesu ncecikozyanyo ncobatobela Banakristo mazuba aano ciindi nobabbapatizyigwa. Jesu wakalizyi kuti lubbapatizyo nintaamu iitali yakusobanina pe, alimwi eeci cakalibonya mumuuya ngwaakatondezya alimwi anzyaakacita. Aboobo, busena bwakubbapatizyilwa tabweelede kuba busena bwakucitila masesya, bwakusobanina, bwakusambila, naa bwakucitila zintu zimwi izikonzya kuubya-ubya ciindi eeci cisetekene; alimwi Munakristo mupya teelede kucita mbuli kuti wazunda buya mumuzundano. Nokuba kuti ciindi calubbapatizyo nciindi cikkomanisya, lukkomano lwesu lweelede kutondezyegwa munzila iipa bulemu.

Mbuti kujanika lyoonse kumiswaangano alimwi akuyanzana ambungano mbokukonzya kumugwasya kuzumanana kupona kweelana akulyaaba kwanu kuli Jehova?

Lwainda lubbapatizyo lwanu, nkaambo nzi ncomuyandika kuba abubambe bubotu bwaciiyo canu nobeni alimwi akutola lubazu mumulimo ciindi coonse?

MALAILILE KUBAALU BAMBUNGANO

Ciindi sikumwaya uutabbapatizyidwe naamba kuti uyanda kubbapatizyigwa, uyandika kukulwaizyigwa kucibala cakulomya cibeela cakuti “Mibuzyo Yakubuzya Baabo Bayanda Kubbapatizyigwa,” icili amapeeji 185-207. Weelede kwaambilwa kuti acibikkile maano cibeela cakuti “Mulumbe Kuli Sikumwaya Uutabbapatizyidwe,” icitalikila apeeji 182, eeco icipandulula mbwakonzya kulibambila mibandi njanoojisi abaalu. Mbubonya mbokulembedwe mucibeela eeco, ooyo uuyanda kubbapatizyigwa ulakonzya kubelesya twaambo ntwalembede alimwi ulakonzya kujalula akulanga mubbuku eeli ciindi camibandi. Nokuba boobo, takuyandiki kuti muntu umbi amwiinzye mumibuzyo eeyi katanaswaangana abaalu.

Kufwumbwa uuyanda kubbapatizyigwa weelede kwaambila sicuuno wakabunga kabaalu. Muntu ooyo uuyanda kubbapatizyigwa aakumana kucibala cakulomya cibeela cakuti “Mibuzyo Yakubuzya Baabo Bayanda Kubbapatizyigwa,” sicuuno wakabunga kabaalu uyoomubuzya muntu ooyo naa wakalyaaba kuli Jehova mumupailo kutegwa acite kuyanda kwakwe. Ikuti naa muntu ooyo wakalyaaba, nkokuti sicuuno wakabunga kabaalu uyoobikka bubambe bwakuti baalu bobilo bakabandike amuntu ooyo “Mibuzyo Yakubuzya Baabo Bayanda Kubbapatizyigwa.” Aumwi mwaalu akati kabaalu aabo bobilo ibasalwa weelede kupegwa cibeela comwe. Takuyandiki kulindila kuti mane ukaambilizyigwe muswaangano wabbazu naa wacooko naaya abandikwe makani aaya.

Cibeela cimwi acimwi cazibeela eezyi zyobilo cilakonzya kubandikwa muwoola lyomwe, nokuba boobo ikuti kakuyandika kunyina bubi ikuti mwabelesya ciindi cinji kwiinda waawo. Kacitanatalikwa cibeela cimwi acimwi kuyandika kutalika amupailo alimwi akumanizya amupailo. Kunyina weelede kubinzyigwa, abe ooyo uuyanda kubbapatizyigwa naa mwaalu ciindi nobalanga-langa mibuzyo. Baalu ibapedwe mukuli wakuba amibandi eeyi beelede kuulanganya cakufwambaana.

Kanji-kanji cilainda kubota kwiinduluka mibuzyo amuntu umwi aumwi uuyanda kubbapatizyigwa, ikutali kabali kakamu. Kwiinda mukubona masimpe kuti ooyo uuyanda kubbapatizyigwa waingula mubuzyo umwi aumwi, baalu bayoozyiba mpasikide mukumvwisya kasimpe, alimwi akusalalilwa ncobeni naa uleelela kubbapatizyigwa. Kuyungizya waawo, ooyo uuyanda kubbapatizyigwa ulakonzya kulimvwa kwaanguluka kubandika mubukkale oobu. Banabukwetene ibayanda kubbapatizyigwa balakonzya kuba amibandi eeyi antoomwe.

Ciindi ooyo uuyanda kubbapatizyigwa nali mucizyi, mibandi eeyi yeelede kucitilwa mubusena bulibonya kubantu bamwi pele kabatakonzyi kumvwa zibandikwa. Ikuti kwayandika kuti kujanike muntu aumbi, muntu ooyo weelede kuti kali mwaalu naa mukutausi, kweelana acibeela cibandikwa, mbubonya mbokutondezyedwe mumuncali uutobela.

Mumbungano eezyo izijisi baalu basyoonto kapati, bakutausi ibeelela ibatondezya kuti bazibona kabotu zintu alimwi mbapampu balakonzya kubandika mibuzyo yabaabo baunka kukubbapatizyigwa iili mu “Cibeela 1—Njiisyo zya Bunakristo.” Balikke baalu mbabeelede kulanga-langa “Cibeela 2—Kupona Buumi bwa Bunakristo.” Ikuti mbungano kaitajisi bakwesu banji ibeelela, mulangizi wabbazu ulakonzya kuzyibisyigwa kutegwa abone naa mbungano iili munsi-munsi ilakonzya kugwasya.

Ikuti ooyo uuyanda kubbapatizyigwa kali mwana, muzyali naa bazyali bakwe ibasyoma beelede kujanika ciindi nabuzyigwa mibuzyo. Ikuti kacitakonzyeki kuti bazyali bajanike, nkokuti baalu bobilo (naa mwaalu alimwi amukutausi, kweelana acibeela iceelede kulangwa-langwa) beelede kuti kabali antoomwe ciindi nobalanga-langa cibeela cimwi acimwi.

Baalu bayakubona masimpe kuti muntu ooyo uuyanda kubbapatizyigwa ulijisi luzyibo lukkwene lwanjiisyo zyantalisyo zyamu Bbaibbele. Kunze lyaboobo, bayakuyanda kubona masimpe kuti muntu ulalumba kapati akaambo kakuzyiba kasimpe alimwi ulatondezya kuti ulailemeka mbunga ya Jehova. Ikuti muntu ooyo katazizyi kabotu njiisyo zyantalisyo zyamu Bbaibbele, baalu bayoobikka bubambe bwakuti agwasyigwe kutegwa kumbele akeelele kubbapatizyigwa. Ibambi inga bayandika kupegwa ciindi cakutondezya kuti balizyi mbuuyandika mulimo wamumuunda naa kuti balalibombya kububambe bwamumbunga. Cili kubaalu kubona mbobayakwaabanya ciindi nobalanga-langa cibeela cimwi acimwi kutegwa bazyibe naa muntu ooyo uleelela kubbapatizyigwa. Nokuba kuti mibuzyo imwi ilakonzya kutola ciindi cilamfwu kubandikwa kumane imwi ilakonzya kutola ciindi cisyoonto, mibuzyo yoonse yeelede kulangwa-langwa.

Baalu ibapedwe mukuli wakulanga-langa mibuzyo eeyi bayakuswaangana caakumana cibeela cabili akusala naa muntu ooyo uleelela kubbapatizyigwa naa pe. Baalu bayakulanga-langa bukkale bwamuntu umwi aumwi, nzyakonzya kucita anzyatakonzyi, alimwi azimbi zijatikizyidwe. Tuyanda bantu baabide myoyo yabo kuli Jehova alimwi ibazimvwisya njiisyo zyantalisyo zyakasimpe kamu Bbaibbele. Kwiinda mukubagwasya caluyando, aabo ibabbapatizyigwa banoolibambilide kabotu kuzuzikizya mulimo uuyandika kabali babelesi bamakani mabotu.

Mpoonya, mwaalu omwe naa bobilo akati kabaalu aabo weelede kuswaangana amuntu ooyo akumwaambila naa uleelela kubbapatizyigwa naa pe. Ikuti naa muntu ooyo uleelela kubbapatizyigwa, baalu beelede kubandika anguwe cibeela cakuti “Mubandi Wamamanino Abaabo Bayanda Kubbapatizyigwa,” icijanika amapeeji 206-207. Ikuti ooyo uuyanda kubbapatizyigwa taningamanizya kwiiya bbuku lya Bbaibbele Ncolituyiisya alimwi alya Luyando lwa Leza, baalu beelede kumukulwaizya kucita oobo lwaakwiinda lubbapatizyo. Amumwaambile muntu ooyo kuti deeti yalubbapatizyo lwakwe iyoolembwa a Kkaadi Yambungano Aalembwa Milimo Yasikumwaya. Amumwaambile kuti baalu balabweza makani aajatikizya sikumwaya ooyu kutegwa mbunga icikonzye kulanganya milimo iijatikizya bukombi ya Bakamboni ba Jehova nyika yoonse alimwi kutegwa sikumwaya ooyu acikonzye kutola lubazu mumilimo yakumuuya akutambula lugwasyo lwakumuuya. Kuyungizya waawo, baalu balakonzya kumuzyibya sikumwaya mupya ooyu kuti makani oonse aajatikizya nguwe alayobolwa kweelana a Global Data Protection Policy ya Bakamboni ba Jehova iijanika aa jw.org. Mubandi ooyu utola maminiti aali kkumi naa kutasika aawo.

Kwainda mwaka omwe kuzwa ciindi sikumwaya naabbapatizyigwa, baalu bobilo beelede kuswaangana anguwe kutegwa bamukulwaizye akumupa mizeezo iigwasya. Umwi wabaalu aaba weelede kuba mulangizi wakabunga mwazulilwa sikumwaya ooyo. Ikuti ooyo mupya kali mwana, muzyali naa bazyali bakwe ibasyoma beelede kujanika. Mubandi ooyu weelede kusangalizya alimwi akukulwaizya. Baalu bayakubandika anguwe kujatikizya mbwaayaambele kumuuya alimwi akumupa mizeezo iigwasya kujatikizya mbwakonzya kuzumanana abubambe bwakuba aciiyo cakwe mwini alimwi akubala Bbaibbele buzuba abuzuba, kukomba mumukwasyi mvwiki amvwiki, kujanika lyoonse kumiswaangano akutola lubazu mulinjiyo, alimwi akuunka mumulimo wamumuunda mvwiki amvwiki. (Ef. 5:15, 16) Ikuti taningamanizya kwiiya bbuku lya kuti Amupone Kukabe Kutamani!, baalu beelede kubikka bubambe bwakuti sikumwaya umwi kamuyiisya kutegwa aamanizye. Baalu beelede kumulumbaizya camoyo woonse. Bunji bwaziindi inga wayandika buyo kupegwa lulayo naa mizeezo mukaambo komwe naa tobilo.