April—Ciindi ‘Cakoonda Mulimo Akusungwaala’
1 Mvwiki kacitana sika Ciibalusyo alimwi aziccilila, nciindi bantu ba Jehova nobazinzibala kuyeeya. Nciindi cakuzinzibala kuyeeya kujatikizya zintu zyakazuzikizigwa kwiinda mulufwu lwa Kristo alimwi akulanga-langa bulangizi mbotwakasyomezyegwaa Leza kwiinda mubulowa bwa Jesu bwakatilwa. Ikuti naa mwayeeya cakacitika mwaka wamana mu April 19, ino cimuyeezya nzi? Sena inga mwabayeeya bantu mbomwakabona mangolezya aayo? Ikusamausyanya kwakumuuya ikwakaliko lya Ciibalusyo? Mmakani aapa kuyeeya aamu Bbaibbele alimwi amipailo yakacitwa amoyo omwe? Ambweni cakamukulwaizya kubaa makanze aakutondezya kulumba nkomujisi kujatikizya luyando ndwaakamutondezya Jehova alimwi a Jesu. Ino mbuti kuzinzibala kuyeeya kuli boobu mbokumugwasya lino?
2 Tacidoonekwi buya kwaamba kuti bantu ba Jehova balatondezya kulumba kwabo ikutali mukwaambaula buyo pe. (Kol. 3:15, 17) Mwaka wamana ikapati mu April, twakatondezya kulumba kwiinda mukusungwaala mumulimo wa Bunakristo kujatikizya nzila nzyabikkide Jehova zyakufwutukila. Bapainiya ibagwasilizya bakasika kuzyuulu zili mbozibede ikwiindaa mweelwe waatala iwakaliko mu Zambia wa 40 pasenti. Ikusola kwabo alimwi abasikwaambilizya Bwami bambi, kwakapa kuti kube mweelwe waatala wamaola, mamagazini alimwi anyendo zyakupilukila. Twakakkomana kapati ikubona zyuulu zyaziiyo zya Bbaibbele zyaaŋanda zyakatalisigwa alimwi amweelwe mupya wabantu bakajanika ku Ciibalusyo!
3 Masimpe, lusyomo ndotujisi kujatikizya bulangizi bwesu ndolutukulwaizya ikubeleka milimo. Cili buyo mbuli mbwaakalemba mwaapostolo Paulo kuti: “Ncencico eci ncotoondela mulimo akulwanina, nkaambo myoyo yesu ilalangila Leza Muumi, Mufutuli wabantu boonse, kwiindilila ngwabaabo bazumina.”—1 Tim. 4:10.
4 Kuciindi ecino ca Ciibalusyo, ino muyoolutondezya buti lusyomo ndomujisi muzintu nzyaapa Jehova zipa buumi? Mu April mwaka wamana twakasikaa mweelwe waatala wabasikwaambilizya Bwami uutanasikidwe mu Zambia. Sena tuyoowiinda ooyo mweelwe mu April mwaka uno? Cilakonzyeka kuwiinda mweelwe ooyo. Pele basikumwaya boonse, ibabbapatizidwe abataninga bbapatizigwa bayooyandika kutola lubazu. Abambi ibapya balakonzya kutola lubazu ikuti naa kabajisi zyeelelo ziyandika. Aboobo, elyo nomulibambila koonda mulimo alimwi akusungwaala mumwezi ooyu uboola wa April, amulange-lange nzila mbomunga mwabakulwaizya ibambi kubikkilizyaa bapya alimwi abaabo ibatajisi luzibo lunji mumulimo ikutegwa bamusangane.
5 Ikugwasya Bamwi Ikutalika Mulimo Wabo Alimwi: Ikuti kamuzi bamwi ibatali kutola lubazu mumulimo wamumuunda kwamwezi omwe naa yobile, ambweni mulakonzya kubakulwaizya akubatamba kuti bamusangane mumulimo wamumuunda. Ikuti bamwi mumbungano kabatacisungweede, baalu bayoosoleka kubaswaya alimwi akubakulwaizya kutalika alimwi mu April.
6 Toonse tweelede kuzumanana kulomba muuya wa Jehova kuti utuyumye mumulimo wakwe. (Lk. 11:13) Ncinzi ncotweelede kucita kutegwa tuutambule muuya ooyu? Amubale Ijwi lya Leza lyakasololelwaa muuya wakwe. (2 Tim. 3:16, 17) Alimwi tweelede ‘kuswiilila muuya mbowaambila mbungano’ kwiinda mukujanika kumiswaangano yoonse iili musanu mumvwiki. (Ciy. 3:6) Ecino nceciindi cibotu cakugwasya baabo ibaunka buyo aciindi abatacisungweede ikusumpula nzila zyabo zyaciiyo cabo beni alimwi akuti kabajanika lyoonse kumiswaangano. (Int. 50:23) Tulacita oobo kumwi katubikkilide maanu kubukkale bwesu bwakumuuya. Pele nkocili acimwi ciyandika.
7 Imwaapostolo Petro wakapandulula kuti Leza ulapa muuya wakwe uusalala “kulibamumvwa.” (Inc. 5:32) Ikumvwa ooku kubikkilizyaa kutobela malailile aakuti “tukambaukile bantu, tulungulule.” (Inc. 1:8; 10:42) Aboobo, nokuba kuti ncamasimpe kwaamba kuti tuyandika muuya wa Leza kuti utuyumye-yumye mukukambauka, cili masimpe kwaamba kuti notutalika kutondezya luyandisisyo ndotujisi lwakukkomanisya Jehova, ulatugwasya ikuzumanana kucita oobo. Tutaubyi-ubyi mulimo oyu mukubweza ntaamu eezyo zitaanzi zyakulisungula mukumumvwida!
8 Ikugwasya Bana: Nobazyali, sena kuli cimutondezya kuti bana banu balayanda kwaambaula abamwi kujatikizya kasimpe? Sena kuli nobakali kumusangana mumulimo wamumuunda? Sena balapa cikozyanyo cibotu mubukkale bwabo? Ikuti kabacita oobo, nkaambo nzi ncobawayawaya? Amusikile umwi wabaabo bali mu Kkomitii Yambungano Yamulimo akubuzya naa mwanaanu ulisikide azyeelelo ziyandika kutegwa abe sikumwaya mwezi uno wa April. (Amubone bbuku lya Mulimo Wesu, amapeeji 99-100.) Amubone kwaamba kuti bana banu balakonzya kubaa lubazu lupati mukulumbaizya Jehova kuciindi ecino ca Ciibalusyo.—Mt. 21:15, 16.
9 Muzyali umwi Munakristo ku Luanshya lyoonse ulabelekaa mwanaakwe musankwa mumulimo wamumuunda. Mwaka wamana mu April mwanooyu naakali mumulimo abanyina, wakamwaya broshuwa ya Ncayanda kumwanakazi umwi. Wakatalika mubandi kwiinda mukubuzya mwanakazi ooyo naa milandu iliko mumunzi oomo nkoili akaambo kabazyali batayiisyi kabotu bana babo. Mwanakazi wakavwuwa kuti: “Inzya, mbondisyoma.” Wakagambwa kapati ikubuzigwa mubuzyo uuli boobo kumwana muniini pee uuli buyo amyaka yakuzyalwa iili 7. Mpoonya musankwa ooyu wakabweza broshuwa ya Ncayanda yamu Cibemba akuvwununa a Ciiyo 8 muncali wa 5 akwaambila mwanakazi kuti abale. Mwanakazi ooyo taakwe naakaamvwa majwi oonse aakabelesyegwa mubroshuwa yamu Cibemba. Naakabuzya ncolyaamba bbala limwi, wakalangila banyina mwanooyo kuti bamumvwiile akumupandulwida. Pele cakamugambya kumvwa mwanooyo nkwaakapandulula ncolyaamba bbala eelo. Eeci cakapa kuti mwanakazi ooyo abe aluyandisisyo lwakwiiya Bbaibbele alimwi wakayanda kuti mwanooyo kamuyiisya nguwe. Mwanakazi ooyu ngwacikombelo ca UCZ alimwi ulaabana ibali 4. Ulaamukuli wabu Dikonesi. Wakazumina kuti mucikombelo cabo taakwe nobayiisya bana kuti kabayiisya bamwi. Lino musankwa ooyo uleendelezya ziiyo zya Bbaibbele zili 5.
10 Bana banji mbaasikumwaya kale alimwi tulakkomana notubeleka ambabo mumulimo. Ibana aaba balakonzya kubakulwaizya ibananyina. Pele mwezi wa April mubotu kapati kumukwasyi umwi aumwi kuyumya lukamantano lwabo alimwi akusima munzila yakumuuya kwiinda mukubelekela antoomwe mumulimo wamumuunda. Basilutwe bamikwasyi beelede kusololela mukucita ceeci.—Tus. 24:27.
11 Ikugwasya Bapya: Ino mbuti kujatikizya bapya mbomwiiya limwi Bbaibbele? Sena abalo balakonzya kutola lubazu mumulimo utiikacitwe mumwezi uboola wa April? Ambweni balakonzya kuti bakatondezya luyandisisyo lwakwaambila bamwi nzyobakali kwiiya nomwakali kulanga-langa cibalo 2 muncali 22 naa cibalo 11 muncali 14, mubbuku lya Luzibo. Ikuti kamulafwaafwi kumanizya bbuku, amulibambile kuyoobandika makani aaya munzila nguba-uba nomulanga-langa cibalo 18 muncali 8 calo caamba kuti: “Ambweni muliyandide kwaambila basazinyoko, beenzinyoko, abambi zintu nzyomwiiya. Atwaambe kuti ndiza mulitalikide kale kucita ceeci, mbubwena Jesu mbwaakaabila bambi makani mabotu muziindi zyakwiizya. (Lk. 10:38, 39; Joh. 4:6-15) Lino ndiza muyanda kuyungizya aawo.” Sena mbocibede oobu kuli baabo mbomwiiya limwi?
12 Sena muntu ngomwiiya limwi ulalisyoma Ijwi lya Leza? Sena wali kuzibelesya njiisyo zyamu Bbaibbele? Sena buumi bwakwe lino buleendelenaa zyeelelo zya Leza? Sena wali kujanika kumiswaangano yambungano? Sena ulayanda kubelekela Jehova Leza? Ikuti ulacita oobo, ino mulekela nzi kumukulwaizya kuti abaambile baalu kucita kuti babone naa ulisikide azyeelelo ziyandika kutegwa abe sikumwaya uutabbapatizidwe akumusangana mumulimo mumwezi wa April? (Amubone bbuku lya Mulimo Wesu, amapeeji 97-9.) Munzila eeyi ulakonzya kulibonena mbunga ya Jehova mboinoomugwasya mukusola kwakwe kubelekela Jehova.
13 Masimpe, basikwiiya bamwi balafwambaana kuyaambele kwiinda bamwi. Aboobo, kweendelanaa malailile aakapegwa mu Mulimo Wesu Wabwami wamu June 2000 apeeji 4 mincali 5-6, ibanji balikwiiya bbuku lyabili abantu bakatondezya luyandisisyo kusaanguna pele ibakali kuyandika lugwasyo alumbi kutegwa kabayanzana andiswe lyoonse. Kunyina notudooneka pe kwaamba kuti ibabombe myoyo aaba bayooba basikwiiya ba Kristo beni-beni, “nociba ciindi cisyoonto naa cilamfu.” (Mili. 26:29, Ci) Pele naa mwalikwiiya abantu bali boobo kwaciindi cikonzya kwaambwa kuti “cilamfu,” sena ciindi ecino ca Ciibalusyo tacikonzyi kuba ciindi cibotu kuli sikwiiya wanu cakuti atondezye kulumba nkwajisi kujatikizya cinunuzyo ca Kristo?
14 Mbotunga Twabagwasya Kutola Lubazu: Nzinji nzyotwiiya kujatikizya kugwasya baabo ibajisi zyeelelo kuti batalike kuunka mumulimo kwiinda mukulingaula mbuli Jesu mbwaakali kuyiisya bamwi. Tanaakali kwiile kwaambila baapostolo bakwe kuti batalike kubandikaa nkamu yabantu mbwabajanina buyo pe. Wakasaanguna kukankaizya mbouyandika mulimo wakukambauka, wakabakulwaizya kuti babe aluyando lwakupaila lyoonse, mpoonya wakabapa zintu zyotatwe: wakubeleka awalo, cilawo cakubelekela alimwi amulumbe wakukambauka. (Mt. 9:35-38; 10:5-7; Mk. 6:7; Lk. 9:2, 6) Andinywe mulakonzya kucita mbubwenya. Kunyina makani naa muyoogwasya mwanaanu, sikwiiya mupya antela umwi iwatali kulipoota mulimo wakwe kwaciindi cili mbocibede, ncibotu ikusoleka kutobela mbaakani ezi zitobela.
15 Amukankaizye Mbokuyandika: Amumutondezye muntu mbouyandika mulimo wakukambauka. Amusinizye nomwaambaula kujatikizya nguyo. Amuluule zikozyanyo zitondezya zintu zizuzikizigwaa mbungano mumulimo. Amutondezye muuya Jesu ngwakaamba ku Matayo 9:36-38. Amumukulwaizye ooyo uulangilwa kuba sikumwaya naa ooyo uutacisungweede ikupaila kujatikizya kutola lubazu kwakwe mumulimo kubikkilizyaa kuyaambele kwamulimo munyika yoonse.
16 Amumukulwaizye Muntu Ooyo Ikuyeeya Nzila Zinji Ziliko Mwakonzya Kupa Bukamboni: Amwaambe bubambe buliko bwakuswaangana munkamu yaciiyo cabbuku bwakulibambila kuunka mubukambausi bwakuŋandaa ŋanda. Amwaambe zyakubandikaa basazima alimwi abeenzuma naa ikubandikaa mbotubeleka limwi antela mbotwiiya limwi notuli mukupumuna acikobokelo. Eelyo notuli muzyakweendela zyabuleya, muntu ulakonzya kutalisya mubandi kwiinda mukubatondezya kuti tulababikkila maanu aabo mbotweenda limwi. Ikuti naa twabweza ntaamu, kanjikanji eci cipa coolwe cakupa bukamboni bubotu. Masimpe kuli bukkale busiyene-siyene oomo motukonzya kwaabila bamwi lusyomo ndotujisi “mazuba oonse”—Int. 96:2, 3.
17 Ncibotu kuti mubeleke asikumwaya mupya mumulimo wakuŋandaa ŋanda cakufwambaana kufwumbwa nocakonzyeka. Ikuti naa mwakalibikkila mbaakani yakuyungizya mulimo wanu mumwezi wa April, amubuzye mubelesi uulanganya zilawo naa kuli cilawo cili coonse cilaafwaafwi ankomukkala. Ikuti naa kaciliko, eci ciyoomupa coolwe cakubeleka mucilawo coonse akucimanizya. Mucikozyanyo, nomwamana mulimo naa nomuya kumiswaangano antela kubusena bumbi buyo, mulakonzya kubona kuti kuli ŋanda imwi mumwatajana bantu nomwali mumulimo pele lino kuboneka kuti kuli muntu naa kuliwatondezyede luyandisisyo. Ikuti kacikonzyeka, amumuswaye kwaciindi buyo cisyoonto eelyo nokulangilwa kuti ulakonzya kuteelela. Kucita boobo kuyoomupa lukkomano mumulimo kamuzi kuti kuli ncomwazuzikizya.
18 Amulibambile Mulumbe Uukondelezya: Ciliindene muntu naabaaluyandisisyo lwakumwaya mulumbe wa Bwami alimwi akubaa lusyomo kujatikizya nzila nzyabelesya kubandika abamwi, ikapati ikuti naa mmupya antela kakwiindide ciindi cilamfwu kuzwa naakatolede lubazu mumulimo. Ikugwasya bapya alimwi abatacisungweede ikulibambila cintu cigwasya kapati. Miswaangano Yamulimo alimwi amiswaangano yamulimo wamumuunda ilapa nzila zimwi zigwasya, pele eci taceelede kutola lubazu lwakupa lugwasyo lugaminide mukulibambila.
19 Ino mbuti mbomunga mwabagwasya ibapya kulibambila kuunka mumulimo? Amutalike acitondezyo cambokumwaigwa magazini, acibe cuuba-uba alimwi cifwaafwi! Amubaambile bayeeye makani aamwi aakacitika ngobazi bantu boonse alo abapa kulibilika mucilawo, mpoonya amujane kaambo kamwi mumagazini iili yoonse yaino-ino yaamba kujatikizya makani aayo. Amwiinduluke mbokumwaigwa magazini antoomwe ambabo mpoonya akucibelesya ndilyonya citondezyo eco mumulimo.
20 Atubeleke Canguzu Ikusumpula Kuyungizyika Nkotulangila Kumbele: Mwaka wamana ibakajanika ku Ciibalusyo nyika yoonse mbwiizulwa bakainda kutuulunzuma tuli 14.8. Pele mweelwe wabaabo balipoota kabali basikumwaya wakainda buyo kutuulunzuma tuli cisambomwi. Eeci caamba kuti ibatandila kutuulunzuma tuli 8.8 bakali buyo bantu balaaluyandisisyo ibakaboolede kupulogilamu eyi yaalubazu kwalo nkobakamvwa njiisyo imwi mpati yamu Bbaibbele kaipandululwa. Bamwi bandiswe bakatuziba kabotu aaba bantu calo cakutadooneka cakabakondelezya kapati. Ibunji bwabantu aaba balatulumbaizya, balasanga kukugwasilizya mulimo wesu waanyika yoonse alimwi balatwiiminina kuli bamwi. Mbunga mpati eyi iiminina kuyungizyika nkotulangila kumbele. Ncinzi ncotunga twacita kutegwa tubagwasye ikuyaambele?
21 Ibunji bwabaabo bapya balajanika ku Ciibalusyo akaambo kakuti umwi wandiswe wakabatamba buya. Nkokwaamba kuti bunji bwabo kuli muntu umwi ngobazi akati kesu. Ikuti kakuli umwi waboola akaambo kakuti twakamutamba, ndiswe tweelede kubona kuti muntu ooyo twamutambula kabotu alimwi akumugwasya kuti agwasigwe apulogilamu eyi. Mbwaanga kuyooba bantu banji kapati, amumugwasye kutegwa ajane aakukkala. Amumupe Bbaibbele alimwi amubelesye bbuku lyanyiimbo lyanu antoomwe anguwe. Amwiingule mibuzyo iili yoonse njakonzya kubuzya. Ikubikkila maanu kwanu kuyoopa kuti akomezye luyandisisyo lwakwe. Pesi toonse tweelede kucita mbubwenya—ikuti naa twabona muntu mweenzu, atumutambule kabotu alimwi akubandika anguwe kutegwa tumuzibe.
22 Ikujanika ku Ciibalusyo kulakonzya kumugwasya kapati muntu kujatikizya mizeezo yakwe. Kuboola nkwaboola muntu kuzikujanika kumuswaangano caamba kuti taakwe najana ncayandaula kumbi kuli koonse akuti tumupa cintu cimwi ncayeeya kuti weelede kucilanga-langa kabotu. Ibupanduluzi bwacinunuzyo cikondelezya bulakonzya kumupa luzibo lumwi muntu iwatali aluzibo lwaluyando lwa Jehova luteeli. Ulakonzya kubona kuti tulaandene—twaamba zyamasimpe, tulayanzanaa bantu, tulaaluyando alimwi akuti tulabalemeka bamwi. Ŋanda yesu taijisi zintu zili mbuli nzyaakabona mumaandaa zikombelo zimwi mwalo mobabikka zikozyanyo alimwi akucita zilengwa zimwi zitakwe ampindu. Ibapya balakonzya kubona kuti bantu bajanika kumuswaangano bazwa mubukkale bwiindene-indene akuti taakwe weenzyeezya mutiba kubwezelela mali aakusanga pe. Bazibona zyoonse ezi balakonzya kukulwaizigwa kuti bakapilukile alimwi.
23 Camana Ciibalusyo, umwi aumwi weelede kubikkila maanu kwiinda mukubatobela kumaandaabo aaba bapya ibakajanika aciibalusyo ikutegwa mukabagwasye. Ikuti naa kuli bapya mbomwakatamba, mujisi mukuli waalubazu. Kabatanaunka, amubone kwaamba kuti mwabazibya kujatikizya miswaangano imbi njotubaanjiyo ku Ŋanda ya Bwami. Amubaambile mutwe wamakani aabuleya atobela. Amubazibye busena buli kufwaafwi aŋanda yabo alimwi aciindi nokucitwa Ciiyo Cabbuku Cambungano. Mpoonya, amubape bbuku lya Muntu Mupati, akubaambila kuti makani aamumvwiki ya April 30 ayooba aakuti “Imulumbe Uuzibidwe Kwiinda Iwakakambaukwa.” Amubapandulwide kuti kuli miswaangano yacooko iicitwa amwaka kwalo zyuulu zyabantu nkozyiswaangana kubusena bomwe kutegwa zyiyumizigwe munzila iyakumuuya.
24 Amulibambile kuyoobaswaya kumaandaabo. Amubone kwaamba kuti balijisi makkopi aabo aabroshuwa ya Ncayanda alimwi abbuku lya Luzibo zyalo zibazibya njiisyo zipati zyamu Bbaibbele. Ikuti kabatanatalika kwiiya, amubalombe kuti batalike kwiiya Bbaibbele. Amubaambile kuti bakabale amubale broshua litegwa Jehovah’s Witnesses—Who Are They? What Do They Believe?, lyalo lipandulula kabotu mbotweendelezyegwa katuli mbunga. Aabo ibajisi zibelesyo balakonzya kubatamba kulangilila mavidiyo eesu mbuli Our Whole Association of Brothers. Amubazibye kuli bamwi mumbungano. Amubonane abapya mumyezi iiboola; amubatambe kumiswaangano mulangizi wabbazu naswaya naa nomuli amuswaangano wabbazu antela muswaangano waalubazu wabuzuba bomwe. Amubape ciindi cili coonse ikutegwa batondezye kuti “basalidwe buumi butamani”!—Inc. 13:48.
25 Ncobakonzya Kucita Baalu: Ikuyaambele kukusoleka kuyoocitwa mumulimo mumwezi wa April, ikapati kuyeeme abaalu. Ikuti kamuli basikweendelezya ciiyo cabbuku, amubambe mulongo wazintu nzyomukonzya kucita kutegwa mubagwasye boonse ibali munkamu yanu yaciiyo cabbuku ikutola lubazu mumulimo waalubazu. Sena kuli bakubusi, ibapya, ibaunka buyo aciindi naa ibatacisungweede ibakaletwa munkamu yanu? Amulingule mubone naa bazyali, bapainiya antela basikumwaya bamwi bakabweza kale ntaamu zyakubagwasya. Amupe lugwasyo luli loonse ndomukonzya kubapa nywebo lwanu. Mucizi umwi iwakali kuunka buyo aciindi mumulimo wamumuunda kwamyaka yobile, wakabeleka maola ainda ku 50 mumwezi wa April mwaka wamana. Ncinzi cakamupa kuti kube kwiindana? Wakaamba kuti zyakali nyendo zyabweembezi ziyaka nzyobakacita baalu.
26 Baalu alimwi abakutausi beelede kubelekela antoomwe kubona kuti kuli cilawo cipati cakubelekela, mamagazini alimwi amabbuku manji akubelesya mumwezi ooyu uboola. Sena inga kwaba bubambe bwamiswaangano aimbi yamulimo wamumuunda? Ikuti kacili boobo, amubazibye zyabubambe oobu bwaalubazu. Ikapati, mumipailo yanu yabuleya alimwi anjomupaila nyolikke, amumulombe Jehova kuti atulongezye mumwezi ooyo notuyungizya mulimo wesu wa Bwami.—Rom. 15:30, 31; 2 Tes. 3:1.
27 Mwaka wamana mu April baalu mumbungano imwi ku Luanshya bakakulwaizya kuyungizya ciindi mumulimo. Basikumwaya bakakulwaizyigwa kuzinzibala kuyeeya akupaila kutegwa balilembye mumulimo wabupainiya bwakugwasilizya. Kufwumbwa ciindi ncobakajisi, baalu alimwi abakutausi boonse antoomwe bakakanana cakukondwa kujatikizya kucita mwezi wa April kuba mwezi wiinda kubota. Akaambo kaceeco, 46 pasenti yabasikumwaya kubikkilizyaa baalu alimwi abakutausi boonse alimwi abamakaintu babo bakabeleka mulimo wabupainiya mumwezi ooyo! Ibaalu botatwe alimwi amukutausi omwe bakali kale bapainiya baciindi coonse.
28 Ilukkomano Lujanika Akaambo Kakutola Lubazu Luzwide: Nzilongezyo nzi ziliko ‘mukoonda mulimo alimwi akusungwaala’ mumulimo? (1 Tim. 4:10) Kujatikizya mulimo ngoyakacita cabunkutwe mbungano mu April mwaka wamana, mboobu mbubakalemba baalu baambwa atalaawa: “Bakwesu abacizi lyoonse balaamba kujatikizya mbolwakayumizigwa luyando alimwi abulongwe mbobajisi akati kabo kuzwa nobakatalika kuyungizya ciindi ncobatola lubazu mumulimo wamumuunda.”
29 Mukwesu uutacikonzyi kabotu kweenda wakalombozya kutola lubazu mumulimo waalubazu mu April mwaka wamana. Kwiinda mukulibambila kabotu alimwi alugwasyo ndubakamupa banyina alimwi abakwesu abacizi bakumuuya, wakabeleka mulimo wabupaniya bwakugwasilizya mumwezi ooyo. Ino wakalimvwa buti kujatikizya mulimo ooyu? Wakati: “Nceciindi cakusaanguna mubuumi bwangu, kulimvwa mbuli muntu uutalemene.”
30 Takudoonekwi kuti Jehova uyoobalongezya aabo ibabikkila maanu kapati kucoolwe ncobajisi cakwaambaula kujatikizya bwami bwakwe. (Int. 145:11, 12) Notwiibaluka lufwu lwa Mwami wesu, tulizi kwaamba kuti tuyoolongezyegwa azilongezyo zinji kapati kumbele akaambo kakukomba kwesu. Mwaapostolo Paulo wakalombozya kutambula bulumbu bwakupona buumi butamani. Pele, wakalizi kuti eci tiicakali cintu ncaakali kunootambula katabeleki amulimo uuli woonse pele kulangila buyo pe. Wakalemba kuti: “Nciconya eco ncimbelekela akusolekesya mbuli inguzu zyakwe mbuzibelekesya loko mukati kangu.” (Kol. 1:29) Jehova, kwiinda muli Jesu wakamupa nguzu Paulo kuti abeleke mulimo wakufwutula bantu. Ulakonzya kucita mbubwenya buyo akulindiswe sunu. Sena mbociyooba oobu akulindinywe mwaakutola lubazu mumwezi ooyu uboola wa April?
Kabbokesi kali apeeji 3]
Nguni Ngomukonzya Kukulwaizya Kutalika Kumwaya mu April?
Mwanaanu?
Sikwiiya Bbaibbele?
Sikumwaya uutacisungweede?