‘Lungulula Makani Oonse aa Leza’
1 Iciindi nomukkomana kapati akaambo kakuti mwapegwa cintu cibotu, sena inga tamukutondenzyi kulumba kwanu kwiinda mukucita cintu cimwi? Inzya, akaka inga mwacita oobo! Amubone mbuli mwaapostolo Paulo mbwaakacita kujatikizya bubotu alimwi aluzyalo Jehova ndwaakacitila bantu. Wakati: “Alumbwe Leza nkaambo kacipo cakwe citaambiki!” Ino “cipo cakwe” cibikkilizya nzi? “Luzyalo lwa-Leza luinda loko” ndwaakatondezya kulindiswe, ncitondezyo cipati kapati cacipego ca Mwanaakwe kali cinunuzyo kuzibi zyesu.—2 Kor. 9:14, 15; Joh. 3:16.
2 Sena kulumba kwa Paulo kwakali buyo kwaamulomo? Nee! Mumbazu zinji, wakatondezya kulumba kwini-kwini. Wakali kubikkila maano kuzintu zyakumuuya ku Banakristonyina alimwi wakali kuyanda kucita mbuli mbwakonzya kutegwa bagwasyigwe bweelede kuluzyalo lwa Leza. Ikujatikizya baabo, Paulo wakati: “Mbuli mbotwakali kumusukamina, cintu ncitwakali kuyanda kumwaambila kaciteensi Makani aa-Leza luzutu pele amyoyo yesu tubeni, nkaambo mwakali bayandwi besu.” (1 Tes. 2:8) Ikuyungizya kugwasya baabo bakali kale cibeela cambungano ikutegwa bajane lufwutuko, Paulo wakakambauka makani mabotu cakulitakata, wakeenda amaulu alimwi amato mulwizi kwamakkilomita aali zyuulu-zyuulu kutegwa ajane “basalidwe buumi butamani.” (Inc. 13:48) Ikulumba kwini-kwini kuli Jehova Paulo nkwaakacita akaambo kazintu nzyaakacitilwa, kwakamupa kuti “alungulule makani oonse aa-Leza.”—Kol. 1:25.
3 Sena mbotumulumba Jehova kuzintu zyoonse nzyaatucitila kutupa kuti tupe lugwasyo munzila yakumuuya kulibaabo bayanda kugwasyigwa mumbungano? (Gal. 6:10) Sena masimpe tacitukulwaizyi ikutola lubazu kusikila mpotujinkila mukukambauka makani mabotu aa Bwami mucilawo cesu coonse mbocizulwa?—Mt. 24:14.
4 Ciindi Cakutondezya Kulumba: Amwaka Ciibalusyo calufwu lwa Kristo cilatupa ciindi cibotu cakulumba zintu nzyaakatucitila Jehova alimwi a Jesu. Ooyu tauli buyo muswaangano uumbi pe naa ciibalusyo cacintu-cintu buyo cakacitika. Jesu wakati: “amukacite obo kuti mukandiyeeye.” (Lk. 22:19) Ciibalusyo calufwu lwa Kristo nciindi cakuzinzibala kuyeeya kubona Jesu mbwabede. Nciindi cakuzyiba kuti ulapona alimwi ulabeleka sunu, mubulemu alimwi abwami mbwaakapegwa akaambo kakusyomeka mubuumi bwakwe boonse alimwi akulyaaba. Ikujanika ooku akwalo kutondezya kulibombya kwesu kubusilutwe bwa Kristo mbwali mukweendelezya makani alimwi amilimo yambungano Yabunakristo. (Kol. 1:17-20) Bantu ba Leza boonse beelede kujanika ku Ciibalusyo calufwu lwa Kristo. Uuno mwaka ciyakucitwa muli Bwane mu March 28, 2002 lyaakubbila buyo zuba.
5 Akaambo kakubeleka canguzu, ibantu bakajanika ku Ciibalusyo mwaka wamana mu Zambia balasika ku 514, 277. Ino bali bongaye uuno mwaka baya kujanika? Ciyakuya buyo ambotuya ‘kuwoonda mulimo alimwi akulwanina’ kugwasya bantu banji kuti bakajanike.—1 Tim. 4:10.
6 Kunze lyaboobo, ikujanika ku Mulalilo walufwu lwa Mwami inga catupa kuyungizya ciindi mumulimo wesu. Cakutadooneka, zyuulu-zyuulu zyabakwesu abacizyi baya kulilembya mumulimo wabupainiya bwakugwasyilizya mwezi omwe naa iiyinda aawo. Amwaka kwamyaka iili musanu yainda, kwakali mweelwe waakati-kati uusika ku 17,488 wabapainiya bagwasyilizya ciindi ca Ciibalusyo kuzwa mu March kusikila mu May. Sena tamukonzyi kuzibambulula zintu nzyomucita ikutegwa mukabe umwi wabaabo bapainiya bagwasyilizya uuno mwaka? iyakuba nzila mbotu yakutondezya kulumba kwini-kwini kuluzyalo lwa Leza akaambo kacipego cacipaizyo ca Kristo. Jehova uyoomulongezya kweelana azyakacitika ziccilila mbozitondezya.
7 Mucizi umwi wakali kubeleka mulimo wakumubili wakalemba kujatikizya cakamucitikila mubupainiya bwakwe bwakugwasyilizya mwaka wakamana mu March: “Mulimo Wesu Wabwami wamu February 2001, wakakulwaizya boonse bajisi bukkale bukonzya kubapa ciindi cakulilembya bupainiya bwakugwasyilizya ciindi ca Ciibalusyo. Mbwaanga mwezi wa March wakajisi Nsondo zili 5, eeci cakapa mulongo wangu wazintu kuti ubeleke kabotu. Eelyo ndakabapa foomu yangu.” Mwezi niwakatalika, wakalibikkila mbaakani yakutalisya ciiyo ca Bbaibbele caaŋanda. Sena wakazwidilila? Inzya, wakabeleka mawoola aali 52 mumwezi ooyo. Ino kumamanino wakaamba nzi? “Wakati kuli zilongezyo zitaliboteli kaka ciindi notubeleka canguzu.”
8 Ino nkugwasyigwa kuli buti nkobajana bamumukwasyi bacita bupainiya antoomwe? Bamukwasyi omwe ibali bone bakacita bupainiya mu April mwaka wamana, wakaba mwezi uutalubiki kulimbabo. Banyina bakati: “Elo kaka twakalikkomenyi buzubaa buzuba mbwaanga twakali kamantenyi mumulimo! Ikubandika mulimo wesu wabuzubaa buzuba cakali kupa kuti ciindi camangolezya nitwakali kulya kaciba ciindi cikondelezya kapati.” Mwana musankwa wakati: “Cali cintu cibotu kubeleka a Bataata mumuunda mumvwiki, iciindi balo lyoonse nobabeleka mumulimo wakumubili.” Bawisi bakayungizya kuti: “Mbwaanga ndime silutwe wamukwasyi, ndakalimvwa kulemunukwa kwiinda mukuzyiba kuti twakali kubeleka antoomwe mumulimo mupati weelede kucitwa muciindi cesu cino.” Sena mukwasyi wanu inga wacita bupainiya antoomwe? Ino nkaambo nzi ncomutacibandiki eeci mumukwasyi kutegwa mubone kuti naa inga cakonzyeka ŋanda yoonse kucita bupainiya bwakugwasyilizya ciindi cino ca Ciibalusyo?
9 Sena Mwezi wa March Tulakonzya Kuucita Kuba Mwezi Mubotu Kwiinda? Kumatalikilo aamwaka wa 2000, mu Mulimo Wesu Wabwami wakabuzya mubuzyo wakuti: “Sena Mwezi wa April 2000 Tulakonzya Kuucita Kuba Mwezi Mubotu Kwiinda?” Ino bwiinguzi bwakali buti? Kwakaba kuyungizyigwa kupya kuli mbokubede. Mumwezi omwe kwakaba mweelwe wabapainiya bwakugwasyilizya bali 10,083. Kuyunguzya waawo, kwakaba kuyungizyigwa kupya kwamawoola, kumwaya mamagazini, kubaa ziiyo zya Bbaibbele alimwi anyendo zyakupilukila. Sena mulayeeya busungu bwakali mumbungano yanu akaambo kakubelekela antoomwe mumulimo wakumuuya mumwezi ooyo waalubazu? Sena uuno mwaka inga twacita mbuli mbotwakacitide mwaka wamana ndiza buya akwiinda waawo? Ikuti naa twabelekela antoomwe canguzu mu March 2002, “Tulakonzya Kuucita Kuba Mwezi Mubotu Kwiinda.” Ino nkaambo nzi ncokwaambwa mwezi wa March?
10 Kuli twaambo tobilo tupa kuti March ube mwezi waalubazu wamulimo. Cakutaanguna, Ciibalusyo ciyakuba kumamanino aa March, calo ciyootupa ciindi kumatalikilo aamwezi cakutamba bantu banji kuti bakajanike. Cabili ncakuti, uuno mwaka imwezi wa March ulijisi nsondo zikkwenyi zili musanu calo cikonzya kupa kuti cikonzyeke kucita bupainiya bwakugwasyilizya kulibaabo babeleka alimwi abasicikolo. Ino nkaambo nzi ncomutakkali ansi akubamba mulongo wazyakucita ngomukonzya kuccilila kabotu-kabotu kwiinda mukubelesya kkalenda iili mupepa lyamukati eeli? Bupainiya bwakugwasyilizya tabukatazyi mbuli mbomukonzya kubuyeeyela. Mucikozyanyo, kwiinda mukubikka aambali mawoola aali 8 amumuunda aansondo zili musanu, inga kwayandika buyo kuyungizya mawoola aali 10 mumwezi woonse kutegwa musike amawoola aayandika aali 50.
11 Ino ncinzi baalu ncobakonzya kucita kutegwa babagwasye boonse bamumbungano kuti ‘bakambauke Ijwi lya Leza cakusinizya’? Amubakulwaizye iciindi nomupa makani alimwi anomubandika ambabo cacigaminina. Basikweendelezya Ciiyo Cabbuku Cambungano alimwi abagwasyilizyi babo balakonzya kubweza ntaamu yakubandika kumuntu amuntu wakatuminwa kulimbabo alimwi akumugwasya cacigaminina. Majwi masyoonto buyo aakukulwaizya naa kubelesya nzila zibeleka, ncintu ciyandika kapati. (Tus. 25:11) Banji bayoobona kuti kucinca buyo asyoonto kumulongo wabo wazintu zyakucita, bayookonzya kuba acoolwe cakubeleka kabali bapainiya bagwasyilizya. Mbungano zinjaanji ambweni zyoonse buya, baalu abakaintu babo alimwi abakutausi abakaintu babo, balatondezya citondezyo cibotu kwiinda mukucita bupainiya bwakugwasyilizya antoomwe ciindi ca Ciibalusyo. Eeci capa kuti basikumwaya banji babasangane. Bamwi basikumwaya cabaalila kucita bupainiya bwakugwasyilizya akaambo kakuciswa-ciswa ambweni akaambo kabukkale bwabo, pele balakonzya kukulwaizyigwa kulumba kwabo kwiinda mukubeleka canguzu mumulimo abasimbungano.
12 Kuzwidilila kulakonzya kucitika lilikke baalu nibacita bweelede. Miswaangano yamulimo, yeelede kucitwa aciindi cili kabotu munsondo yoonse. Ikuti kacikonzyeka, mulangizi wamulimo uyakutumina bakwesu balaaluzibo muciindi ceelede kutegwa kabasololela miswaangano yoonse yamulimo. Kulibambila kuyooyandika ikutegwa miswaangano yamulimo kaitaindilili kumaminiti aali 15, kubikkilizya akubabikka mutubunga mbubatiiyende, kwaabila zilawo zyakukambaukila alimwi amupailo. (Amubone Kabbokesi Kamubuzyo ka Mulimo Wesu Wabwami wamu September 2001.) Mulongo wamulimo wamwezi ooyo weelede kupandululwa kabotu-kabotu kumbungano alimwi akuubikka abboodi lyamakani.
13 Cilawo cakubelekela ceelede kacizyibidwe. Mulangizi wamulimo weelede kubonanaa mukwesu waabila zilawo kutegwa babambe bubambe bwakubelekela muzilawo zitabelekwi-belekwi. Kukankaizya kweelede kuba kwakubandika abantu batajaniki aŋanda, kukambauka mumigwagwa, kucintoolo acintoolo alimwi abukambausi bwakumangolezya. Kuti kacikonzyeka, basikumwaya balakonzya kugwasyigwa kuti kabacita bukambausi bwaaluwaile.
14 Amubagwasye Ikuti Bakambauke Alimwi: Sena kuli baliko mucilawo canu cambungano batacisungweede mukukambauka makani mabotu? Aabo bacili cibeela cambungano baciyandika lugwasyo. (Int. 119:176) Mbwaanga mamanino aanyika eeyi ya Saatani alaafwiifwi alimwi acalo cisi cipya cilaafwiifwi, tulijisi twaambo tulimvwisya ncotweelede kubeleka canguzu ikugwasya baabo batacisungweede. (Rom. 13:11, 12) Kwamyaka iili yosanwe yainda, bantu bainda ku 14,500 amwaka, balutambula lugwasyo alimwi basungwaala. Ino mbuti mbotunga twabagwasya banji kuyeeyesya luyando alimwi alusyomo ndobakajisi kumatalikilo?—Heb. 3:12-14.
15 Ikabunga kabaalu kayakuyanda kubandika akubona mbuli mbobanga babagwasya aabo batacisungweede kwamyaka misyoonto yainda. (Mt. 18:12-14) Imulembi weelede kubona makkaadi Aalembelwa Zyasikumwaya Aambungano akubona baabo ibatacisungweede. Kweelede kuba bubambe bwaalubazu bwakubagwasya kwiinda mukuswaya kwabweembezi. Imwaalu inga wayanda kuswaya sikumwaya umwi akaambo kakuti bakali bwenyenyi musyule alimwi akuyanzana anguwe naa basikumwaya bamwi inga balombwa kuti bagwasye. Ambweni wakali kwiiya asikumwaya uutacisungweede lino alimwi weelede kukutambula kugwasyigwa ooku kwaalubazu kupegwa ciindi cino. Tusyoma kuti, bunji bwabaabo batacisungweede baya kuliyeeya akutalika kukambauka Ijwi lya Leza alimwi. Ikuti naa bakasike azyeelelo ziyandika, iciindi ca Ciibalusyo ciyakuba nceciindi cibotu cakutalika kukambauka alimwi!—Ikuti kamuyanda makani aayungizidwe, amubone Kabbokesi Kamubuzyo ka Mulimo Wesu Wabwami wamu November 2000.
16 Sena Bamwi Balasika Azyeelelo Ziyandika Kutegwa Batalike Kukambauka? Jehova wazumanana kubapa bulumbu bantu bakwe kwiinda mukuleta “zintu ziyandisi zyazisi.” (Hag. 2:7) Amwaka bantu basika zyuulu-zyuulu balasika azyeelelo ziyandika kabali basikumwaya batabbapatizidwe. Ino mbaani aabo? Mbana ba Bakamboni ba Jehova alimwi abasikwiiya Bbaibbele bayaambele. Ino mbuti mbotunga twazyiba kuti lino basika azyeelelo ziyandika kuti babe basikumwaya bamakani mabotu?
17 Bana Baba Kamboni ba Jehova: Ibunji bwabana bali kukambauka abazyali babo mubukambausi bwakuŋandaa ŋanda kwamyaka minji, nokuba kuti tabana talika kukambauka kabali basikumwaya batabbapatizidwe. Mu March cilakonzya kuba ciindi cibotu cakubatalisya kucita boobo. Ino mbuti mbomukonzya kuzyiba kuti mwanaanu ulisikide azyeelelo ziyandika? Kupeeji 100 mubbuku lya Tuliyanzene Mukumanizya Mulimo Wesu, lyaamba kuti: “Iciindi mwana napa cikozyanyo cibotu cabukkale alimwi kakonzya kulyaambilila lusyomo lwakwe kwiinda mukwaambaula abambi makani mabotu, kalisungu[de] mwini kuzwa mumoyo wakwe.” Ikuti naa muyeeya kuti mwana wanu ulisikide azyeelelo ziyandika, amubandike amwaalu aumwi wamu Kkomitii Yambungano Yamilimo.
18 Basikwiiya Bbaibbele Ibasikide Azyeelelo Ziyandika: Sikwiiya Bbaibbele abaa luzibo alimwi akutalika kujanika kumiswaangano kwaciindi cili mbocibede, inga wayanda kuba sikwaambilizya zya Bwami. Ikuti naa kamwiiya ciiyo asikwiiya uuli boobo, amwiilange-lange mibuzyo eeyi: Sena uli mukuya ambele kweelana aciimo cakwe? Sena wakatalika kale kwaambila bantu bamwi kujatikiya lusyomo ndwajisi? Sena wakatalika kale ‘kulisamika buntu bupya’? (Kol. 3:10) Sena ulasika azyeelelo zyakuba sikumwaya uutabbapatizidwe kweelana ambokutondezyedwe kumapeeji 97-9 mubbuku lyesu lya Mulimo Wesu? Ikuti kacili boobo, amubabone bali mu Kkomitii Yamulimo Yambungano ikutegwa kukabe bubambe bwabaalu bobilo mbomuyooswaangana limwi alimwi ayooyo ngomwiiya limwi. Ikuti wasika azyeelelo ziyandika, bakwesu bobilo baya kumwaambila kuti atalike kutola lubazu mumulimo wakubuleya.
19 Ino Mbuti mu April amu May? Ayalo eeyi myezi iyooba yaalubazu mumulimo uuyungizyidwe wamumuunda. Ibanji bakacita bupainiya bwakugwasyilizya mu March, balakonzya kucita oobo alimwi amu April naa mu May. Mu April alimwi amu May, tuyakubikkila maano mukumwaya mamagazini aa Ngazi Yamulindizi alimwi a Galamukani! mumuunda. Elo kaka balagwasyigwa bantu mubuumi bwabo aabo babala! Aaya mamagazini alagwasya kapati mukupa kuti kube kuyungizyigwa kwabantu munyika yoonse. Ikubeleka cakulitakata kuya kucitwa mu April alimwi May kwiinda mukwaabila mamagazini kubantu banji. Amulibambilile lino kutegwa mukatole lubazu.
20 Kwiinda mukuyungizyigwa kwamulimo wakukambauka nkumwaabamba, sena mulayanda kuyungizya mamagazini ngomutambula mumbungano? Mumwaka oonse wamulimo, tulamwaya Ngazi Yamulindizi alimwi a Galamukani! Buzuba bwa Mujibelo mbobuzuba bwesu bubikkidwe bwakumwaya Mamagazini. Nokuba boobo, mbwaanga banji baya kutola lubazu mumulimo wabupainiya bwakugwasyilizya alimwi akuti toonse tunakumwaya mamagazini mumyezi yobilo, inga cainda kubota kuyungizya maoda aamagazini kumbungano. Ikuti kacili boobo, amumuzyibye cakufwambaana mubelesi wamagazini mumbungano yanu. Alimwi mubelesi wamabbuku, weelede kubona kwaamba kuti tulakiti yakuti, Sena Mulayanda Kuzyiba Zinji Kujatikizya Bbaibbele? nkwiili alimwi akuti ilakonzya kubelesyegwa kufwumbwa ciindi.
21 Ibantu banji balumbaizya cibeela ca Mulimo Wesu Wabwami cakuti: “Nzyotweelede Kwaamba Kujatikizya Mamagazini.” Sena kuli nimwaatola kale ntaamu kububambe oobu kwiinda mukwiiya zitondezyo zyakwaabila mamagazini? Ino mulekela nzi kucibelesya cibeela cimwi ciindi caciiyo ca Bbaibbele camukwasyi ansondo ikwiiya zitondezyo eezyi?
22 Iciindi ca Ciibalusyo Acibe Ciindi Cakucita Kabotu: Mbweena mbuli mwaapostolo Petro, aakubone Jehova kulumba kwesu “nkaambo kacipo cakwe citaambiki” kwiinda mukutola lubazu bweelede mumulimo wakumuuya ngumwaalibambila muciindi ca Ciibalusyo ciboola. Eeci cilabikkilizya (1) ikujanika kumuswaangano mupati waamwaka wa Mulalilo wa Mwami muli Bwane mu March 28, 2002; (2) ikugwasya baabo batacisungweede ‘bakabula luyando ndobakajisi kukusaanguna’ (Ciy. 2:4; Rom. 12:11); (3) ikugwasya bana besu alimwi abasikwiiya Bbaibbele boonse kusika azyeelelo ziyandika ikutegwa babe basikumwaya batabbapatizidwe alimwi (4) akutola lubazu kapati mumulimo wakukambauka alimwi akucita bupainiya bwakugwasyilizya mu March alimwi amyezi iizya kumbele.—2 Tim. 4:5.
23 Tupailila kuti toonse tukacikonzye kutola lubazu mukukambauka makani mabotu aa Bwami ciindi ca Ciibalusyo, nkokuti ikulumba kuzintu Jehova nzyatucitila.
Kabbokesi kali apeeji 6]
Imulongo Wanu Wamulimo Wamumuunda Wamu March 2002
Nsondo Muhhulo Bwabili Bwatatu Bwane Bwasanu Mujibelo
1 2
Buzuba bwa Mamagazini
3 4 5 6 7 8 9
Buzuba bwa Mamagazini
10 11 12 13 14 15 16
Buzuba bwa Mamagazini
17 18 19 20 21 22 23
Buzuba bwa Mamagazini
24 25 26 27 28 29 30
MEMORIAL Buzuba bwa Mamagazini
AFTER
31 SUNDOWN
Sena inga mwabamba mulongo uukonzya kumupa kukkwanisya mawoola aali 50 ikutegwa mukacite bupainiya bwakugwasyilizya mu March?