‘Kukambauka Makani Mabotu’
1. Ino makani nzi mabotu ngotweelede kukambauka?
1 Munyika mwaatali manji makani mabotu, tuli acoolwe cakukambauka “Makani Mabotu aaluzyalo lwa-Leza.” (Inc. 20:24) Eeci cibikkilizya kuzibya banamaleya kuti “mazuba aamamanino” ayoonjililwa busena anyika mpya yabululami, mwalo ‘zintu zyakale niziyoomaninina.’ (2 Tim. 3:1-5; Ciy. 21:4) Kuciindi eeco takukabi limbi kuciswa. (Is. 33:24) Bayandwa besu bakafwa bayoozwa muzyuumbwe akukkala abamukwasyi wabo abeenzinyina. (Joh. 5:28, 29) Inyika yoonse iyoosandulwa kuba paradaiso yeebeka. (Is. 65:21-23) Aaya ngamakani mabotu ngotweelede kukambaukila bantu.
2. Nkaambo nzi ciindi ca Ciibalusyo ncocili ciindi cibotu cakukambauka makani mabotu?
2 Mwezi wa March, April a May inooli myezi mibotu kapati yakukambauka makani mabotu. Mumyezi eeyi takupyi, imvwula taiwi kapati alimwi izuba lilafwambaana kupola akumuka kubbila mumasena manji aali munyika calo cikonzya kupa kuti basikumwaya bakambauke ciindi cilamfwu. Kunze lyaboobo, muswaangano uuyandika kapati mumwaka, wa Ciibalusyo, uyoocitwa nyika yoonse mu Mujibelo, mu March 22 izuba lyaakubbila. Ecino nceciindi cakutalika kulibambila kutola lubazu akuyungizya mulimo wesu wamumuunda.
3. Ino ncinzi cikonzya kugwasya mukwasyi kuyungizya mulimo wabo?
3 Bupainiya Bwakugwasyilizya: Sena mulakonzya kulibambila kucita bupainiya mumwezi omwe, yobilo naa yotatwe? Mulakonzya kwaabandika makani aaya muciiyo citobela camukwasyi. Kwiinda mukubelekela antoomwe, omwe naa bobilo bamumukwasyi balakonzya kucita bupainiya bwakugwasyilizya. (Tus. 15:22) Amukabikkilizye mumupailo kaambo aaka akubona Jehova mbwakonzya kumugwasya. (Tus. 16:3) Nokuba kuti taaku uukonzya kucita bupainiya mumukwasyi, boonse mumukwasyi balakonzya kulibikkila mbaakani yakuyungizya ciindi ncobatola mumulimo wamumuunda kwiinda mukubeleka abapainiya bakugwasyilizya.
4. Ikuti katubeleka, ino mbuti bubambe bubotu mbobukonzya kutugwasya kutegwa tucite bupainiya bwakugwasyilizya?
4 Ikuti kamubeleka, kuba abubambe bubotu kulakonzya kumugwasya kucita bupainiya bwakugwasyilizya. Mulakonzya kukambauka ciindi nomulyookezya. Naa mulakonzya kulomba cilawo cakukambaukila cili afwaafwi aŋanda yenu naa afwaafwi akooko nkomubelekela kutegwa kamukambauka nomutana talika mulimo wanu naa mwakotoka. Mulakonzya kujana ciindi cinji kwiinda mukucita milimo iitayandiki kapati mumwezi uumbi akutola lubazu mumulimo wakukambauka buzuba boonse kumamanino aamvwiki. Bamwi balalomba buzuba bomwe naa obilo kutegwa batole lubazu mumulimo wakukambauka.
5. Ino mbuti mbomukonzya kugwasya bacembeede naa baciswa kucita bupainiya bwakugwasyilizya?
5 Ikuti kamucembede naa kamuciswa, mulakonzya kucita bupainiya bwakugwasyilizya kwiinda mukukambauka ciindi cisyoonto abuzuba. Amumulombe Jehova kutegwa amupe “nguzu zigambya.” (2 Kor. 4:7) Mucizi umwi uujisi myaka yakuzyalwa iili 106 wakacikonzya kucita bupainiya bwakugwasyilizya. Kwiinda mukugwasigwa a Banakristo bamumukwasyi abamumbungano, wakali kukambauka kuŋanda aŋanda, kucita nyendo zyakupilukila, akweendelezya ziiyo zya Bbaibbele alimwi akutola lubazu muzibeela zimwi zyamulimo wakukambauka. Wakatalisya ziiyo zya Bbaibbele kubantu bali kkumi. Wakaamba kuti: “Ndayeeya coolwe citaliboteli ncondakajisi cakubeleka mulimo wabupainiya bwakugwasyilizya, ndilamulumba Jehova, Mwanaakwe alimwi ambunga yakwe mbotu. Mubwini ndilamulumba Jehova!”
6. Ino mbuti bakubusi babbapatizidwe bacili kucikolo mbobakonzya kucita mulimo wabupainiya bwakugwasyilizya?
6 Ikuti koli mukubusi uubbapatizidwe uucili kucikolo, andiwe ulakonzya kulilembya bupainiya bwakugwasyilizya. Mbubonya mbuli baabo babeleka, andinywe mulakonzya kuunka mumulimo wakukambauka kumamanino aansondo. Ambweni mulakonzya kucita oobo kwaola lyomwe mumazuba aamwi mwazwa kucikolo. Sena kuli buzuba bwakulyookezya kucikolo mbomukonzya kubelesya kuunka mumulimo wakukambauka? Ikuti kamuyanda kucita bupainiya bwakugwasyilizya, amwaabandike makani aaya abazyali banu.
7. Ino ncinzi ncobakonzya kucita baalu kutegwa bakulwaizye bamwi ciindi ca Ciibalusyo?
7 Amubagwasye Kuba Abusungu: Baalu balakonzya kukulwaizya mbungano kwiinda mucikozyanyo cabo. (1 Pet. 5:2, 3) Balakonzya kubikka bubambe bwakuba amiswaangano yamulimo wamumuunda iimwi kutegwa aabo bajisi ciindi kabaunka mumulimo wamumuunda cifwumo-fwumo, bazwa kucikolo naa kumulimo. Mulangizi wamulimo wamumuunda weelede kucita bubambe bwakuti kakuli basikumwaya beelede ibakonzya kweendelezya miswaangano eeyo akubona kuti kuli cilawo cakubelekela, mabbuku amagazini mumyezi eeyi yamulimo uulibedelede.
8. Ncinzi ncotwiiya kuzwa kukuluula kwambungano imwi?
8 Mumbungano imwi baalu bakatalika kukulwaizya bamwi kuba bapainiya bakugwasyilizya kakucili myezi iili mbuli mboibede. Bakali kwaambilizya amvwiki mweelwe wabasikumwaya bakeelela kuba bapainiya bakugwasyilizya. Aabo ibakali kuyanda kuyungizya ciindi cakukambauka bakakulwaizigwa ikuziba kuti banakujisi bakubeleka abalo. Kwakacitwa bubambe bwakuba amiswaangano yamulimo wamumuunda cifwumo-fwumo aciindi cakumazuba. Aboobo basikumwaya batandila kucisela cambungano nkokuti bali 53 bakacita bupainiya bwakugwasyilizya mu April.
9. Nkaambo nzi ciindi ca Ciibalusyo ncocili ciindi cibotu kuli baabo beelela kutalika kukambauka makani mabotu?
9 Amubagwasye Bamwi Kukambauka: Ikuti naa bapya abakubusi beelela kuba basikumwaya, balakonzya kubeleka antoomwe abasikumwaya bajisi luzibo. Coolwe cili boobo cilakonzya kuba ciindi ca Ciibalusyo banji mumbungano nobaya kuyungizya mulimo wabo. Sena mulijisi sikwiiya Bbaibbele uuyaambele uupona kweelana azyeelelo zya Jehova zyabululami? Sena mulijisi bana balilemeka alimwi ibacita kabotu pele batanaba basikumwaya? Ikuti bantu bali boobu baamba kuti bayanda kuba basikumwaya batabbapatizidwe alimwi mwabona kuti baleelela, mweelede kwaambila umwi wabaalu. Mulangizi weendelezya uyakucita bubambe bwakuti baalu bobilo babandike andinywe antoomwe amwana wanu naa sikwiiya Bbaibbele.
10. Ino ncinzi baalu ncobakonzya kucita kutegwa bagwasye baabo batacisungweede?
10 Myezi iitobela ayalo inakuli myezi mibotu kuli baabo batacisungweede kuti batalike kuswaangana alimwi ambungano. Balangizi ba Ciiyo Cabbuku Cambungano abaalu bamwi balakonzya kubaswaya bali boobo, akubalomba kubeleka ambabo mumuunda. Ikuti naa tiibalisungweede kwaciindi cilamfwu, ibaalu bobilo balakonzya kubandika ambabo kutegwa babone naa baceelela kukambauka.—km 11/00 p. 3.
11. Ino ncintu nzi cipati cakacitwa citondezya “luzyalo lwa-Leza?”
11 Kulibambila Ciibalusyo: Cinunuzyo ncintu cipati cakacitwa kutondezya “luzyalo lwa-Leza.” (Inc. 20:24) Zyuulu zyabantu bacikkomanina cinunuzyo nyika yoonse, bayakuswaangana mu Mujibelo mu March 22, lyaakubbila zuba ku Ciibalusyo calufwu lwa Kristo. Tuyanda kutamba bantu bali aluyandisisyo akubagwasya kuti bakajanike ku Ciibalusyo ciyandika kapati calo citondezya luzyalo lwa Jehova ndwaakatondezya kubantu.
12. Ino mbaani mbotweelede kutamba ku Ciibalusyo?
12 Amubalembe aabo mbomuyanda kutamba. Tacidoonekwi kuti aabo mbomulemba baya kubikkilizya bamumukwasyi, mbomubeleka limwi, mbomwiiya limwi kucikolo, mbomwiiya limwi Bbaibbele abaabo mbomwakali kwiiya limwi kutaluba abaabo mbomulaakutamba lyoonse. Ikuti naa mbomwatamba bali amibuzyo kujatikizya Ciibalusyo, inga camugwasya kubelesya makani aayungizyidwe aamba zya Mulalilo wa Mwami aali apeeji 206-208 mubbuku lya Bbaibbele Ncoliyiisya. Eeci cilakonzya kupa kuti mutalisye ciiyo ca Bbaibbele akaambo kakuti muna kubelesya ibbuku ndimunya ndotubelesya notwiiya abamwi Bbaibbele.
13. Ino mbuti Jehova mbwaakabalongezya basikumwaya bobilo bakabeleka canguzu kutamba bamwi ku Ciibalusyo?
13 Mucizi umwi wakalemba bantu bakutamba bamu mikwasyi iili 48. Naakali kubaambila kuti batambwa, wakali kweenga keengo kakumuzibya kuti wabaambila akubikka buzuba mbwaabaambila. Wakakkomana kapati naakabona bantu bali 26 akati kabaabo mbaakatamba nibakasika ku Ciibalusyo. Mukwesu uuli acintoolo wakatamba umwi wababelesi bakwe wakali mupaizi kaindi. Ooyu muntu wakajanika ku Ciibalusyo kumane wakati, “Ndayiya zinji kapati muwoola lyomwe kwiinda nzindakaiya mumyaka iili 30 nindakacili mu Cikombelo ca Katolika.” Mbocakamanina buyo Ciibalusyo, wakazumina kwiiya mubbuku lya Bbaibbele Ncoliyiisya.
14. Ino mulimo nzi uuyandika kapati uuya kucitwa munyika yoonse kutalikila mu March 1?
14 Kwaambilizya: Kutalikila mu Mujibelo mu March 1 kusika mu March 22 kuyakuba mulimo waalubazu wakutamba bantu ku Ciibalusyo uuyoocitwa nyika yoonse. Boonse basikumwaya bayanda kuti bakatole lubazu mumulimo ooyu uuyandika kapati. Inga cainda kubota kuti mwamupa buya kapepa kakumutamba mukamwini ŋanda muciindi cakukasiya amulyango. Nokuba boobo, ikuti naa cilawo canu kacili cipati, ibaalu balakonzya kusala kuti tupepa ootu tulakonzya kusiigwa abusena aali kabotu aŋanda aatajanika bantu. Kumamanino aansondo tuna kubaabila amamagazini mapya.
15. Ino ncinzi ncotweelede kwaamba notupa tupepa twakutamba bantu ku Ciibalusyo?
15 Mbwaanga tujisi buyo ciindi cisyoonto cakumwaya tupepa ootu twakutamba bantu, inga cagwasya kuba anzila njomukonzya kubelesya iikonzya kucitwa mubufwaafwi. Mulakonzya kwaamba caluyando alimwi acabusungu. Inga mwaamba majwi mbuli yaaya: “Twamutamba nywebo amukwasyi wanu abeenzinyoko ku Ciibalusyo ciyandika kapati ciyakucitwa mu March 22. Nkaaka kapepa kakumutamba. Itwaambo toonse nkotuli mukapepa aaka.” Mukamwini ŋanda ulakonzya kuba amibuzyo. Naa ulakonzya kukatambula kapepa aaka akusyomezya kuti uyakuboola. Amubalembe aabo batondezya luyandisisyo akulibambila kupilukila.
16. Ino ncinzi cakacitika akaambo kakutamba bantu bali mucilawo ku Ciibalusyo?
16 Mwakali sikalumamba umwi wakajana kapepa kakumutamba ku Ciibalusyo amulyango wakwe. Wakasala kuti akajanike nokuba kuti wakeelede kutaanguna kulomba kumupati wamulimo. Nakamutondezya kapepa aaka mupati wamulimo wakaumuna amane wakamwaambila kuti bazyali bangu Mbaakamboni alimwi bakali kunditoolela kumiswaangano. Tanaakamuzumizya buyo kuti akajanike sikalumamba ooyo, pele bakaukka limwi ku Ciibalusyo.
17. Ino mbuti mbotutondezya kuti tulalubikkila maano luzyalo lwa Leza?
17 Kulumba: Mbuciya buswena Ciibalusyo camu 2008, toonse tuyandika kulubikkila maano luzyalo ndwaakatondezya Jehova kulindiswe. Imwaapostolo Paulo wakalemba kuti: “Tulamukumbila, kuti luzyalo lwa-Leza ndumutambwide lutabi lwabuyo.” (2 Kor. 6:1) Ino mbuti mbotutondezya kuti tulalubikkila maano luzyalo lwa Leza? Paulo wakalemba kuti: “Pele muzintu zyoonse tulatondezya kuti tuli basimilimo benibeni ba-Leza.” (2 Kor. 6:4) Aboobo, tulacita oobo notulumba cipego ncaakatupa Jehova kwiinda mukulilemeka kabotu akubeleka cabusungu mukukambauka makani mabotu. Ciindi eeci ca Ciibalusyo ciyakuba ciindi cibotu cakuyungizya mulimo wesu wakwaambilizya makani mabotu.
[Kabbokesi kali apeeji 3]
Ino Mbaani Bakonzya Kubikkilizyigwa Akati Kabaabo Bakonzya Kucita Bupainiya Bwakugwasyilizya?
◼ Bamukwasyi
◼ Ibabeleka mulimo wakumubili
◼ Baceembede abaciswa
◼ Basicikolo
[Kabbokesi kali apeeji 4]
Nomumwaya Tupepa Twakutamba Bantu ku Ciibalusyo:
◼ Kamwaamba mubufwaafwi alimwi cabusungu.
◼ Kamubalemba aabo batondezya luyandisisyo akulibambila kupilukila.
◼ Amwaabile mamagazini kumamanino aansondo.