Ciindi ca Ciibalusyo—Nciindi Cakuyungizya Mulimo!
1. Nkaambo nzi ncotweelede kuyungizya mulimo wesu mumyezi ya March, April alimwi a May?
1 Sena mulakonzya kuyungizya mulimo wenu wamubukambausi lya Ciibalusyo? Basikumwaya bamwi bayoolomba ciindi nkobabeleka naa kucikolo kutegwa batole lubazu mumulimo wakukambauka. Kutalikila mu April 2, tuyootalika mulimo waalubazu wakutamba baabo balaaluyandisisyo ku Ciibalusyo mu April 17. Caakwiinda Ciibalusyo, tuyoobikkila maanu kubakulwaizya aabo bakaboola akubatamba kumakani aalubazu alo aayookananwa mvwiki italikila mu April 25. Ncobeni, kuli twaambo tunji ncotweelede kuyungizya mulimo wesu wamumuunda mumyezi ya March, April alimwi a May.
2. Ino ninzila nzi mbotu iikonzya kutugwasya kuyungizya mulimo wesu?
2 Bupainiya Bwakugwasyilizya: Nzila imwi mbotu iikonzya kutugwasya kuyungizya mulimo wesu nkucita bupainiya bwakugwasyilizya. Akaambo kakuti toonse tujisi bubi, tweelede kulibambilila limwi. (Tus. 21:5) Ndiza mulakonzya kuzibikka ambali zimwi zyintu zitayandiki kapati nzyomucita lyoonse. (Flp. 1:9-11) Mulakonzya kwaambila bamwi mumbungano kuti muyanda kucita bupainiya, ndiza abalo inga bayanda kucita bupainiya bwakugwasyilizya.
3. Mbuti banamukwasyi mbobakonzya kuyungizya mulimo wabo mumuunda?
3 Mwaakucita kukomba kwamumukwasyi kutobela, inga cabota kuti mwabandika mbaakani zyenu amukwasyi. (Tus. 15:22) Kuti naa mwabelekela antoomwe mbuli mukwasyi, ndiza bamwi balakonzya kucita bupainiya bwakugwasyilizya kwamwezi omwe naa iinda waawo. Ino kuti eeci kacitakonzyeki? Banamukwasyi balakonzya kuyungizya mulimo wabo kwiinda mukubeleka mawoola manji naa kubeleka ciindi cilamfwu mumuunda kumamanino amvwiki.
4. Ino tuyoojana zilongezyo nzi twaakuyungizya mulimo wesu lya Ciibalusyo?
4 Jehova ulazibikkila maanu zyoonse nzyotucita mukumubelekela alimwi ulalumba kulyaaba kwesu. (Heb. 6:10) Tulajana lukkomano lunji akaambo kakupa Jehova abamwi. (1 Mak. 29:9; Mil. 20:35) Sena mulakonzya kuyungizya mulimo wenu lya Ciibalusyo kutegwa mujane lukkomano lunji azileleko?