Amukkomane Ciindi ca Ciibalusyo Mwaka Uuno
1. Ino muunzila nzi yomwe motukonzya kukkomana kapati ciindi ca Ciibalusyo mwaka uuno?
1 Sena mulayanda kuyookkomana kapati mumyezi ya March, April alimwi a May? Nzila yomwe mbomukonzya kucita oobo nkwiinda mukuyungizya mulimo wanu alimwi kuti kacikonzyeka, inga mwacita bupainiya bwakugwasyilizya. Ino eeci ciyooyungizya buti lukkomano lwanu?
2. Ino kuyungizya mulimo wesu, inga kwapa buti kuti tube alukkomano?
2 Amuyungizye Lukkomano Lwanu: Jehova wakatulenga munzila yakuti katukonzya kukkomana akukkutila mukumukomba notuzuzikizya luyandisisyo lwesu lujatikizya nzyotuyandika kumuuya. (Mt. 5:3) Alimwi wakatulenga munzila yakuti katukonzya kujana lukkomano kwiinda mukupa bamwi. (Mil. 20:35) Mulimo wakukambauka ulatugwasya kucita zyoonse zyobilo, nkokuti, kukomba Leza alimwi akugwasya bantu. Aboobo, cileelela kwaamba kuti kuyungizya mulimo wesu wakukambauka kupa kuti tube aalukkomano kapati. Kuyungizya waawo, kukambauka lyoonse kulakonzya kupa kuti tuuzyibe kabotu mulimo. Ciindi notuyungizya luzyibo lwesu, tuyooba basicamba alimwi akucesya kulibilika. Tuyooba azyoolwe zinji zyakupa bumboni alimwi akutalisya ziiyo zya Bbaibbele. Zyoonse eezyi zipa kuti mulimo wesu kaukkomanisya.
3. Nkaambo nzi mwezi wa March alimwi awa April ncoili myezi mibotu kucita bupainiya bwakugwasyilizya?
3 March alimwi a April inooli myezi mibotu yakucita bupainiya bwakugwasyilizya nkaambo tulakonzya kulisalila kubeleka mawoola aali 30 naa 50. Kuyungizya waawo, kutalikila mu Mujibelo, March 22, kusikila mubuzuba bwa Ciibalusyo mu April 14, tuyootola lubazu mumulimo wakutamba bantu ku Ciibalusyo. Basikumwaya mumbungano bayookkomana ciindi bunji bwabo nobanoobeleka “camoyo woonse” kutegwa bamanizye cilawo muciindi cibikkidwe.—Zef. 3:9.
4. Ino ncinzi ncotweelede kucita kuti katuyanda kucita bupainiya bwakugwasyilizya?
4 Amulibambile Lino: Ikuti kamutanalibambila, amube aaciindi cakuulanga-langa mulongo wanu wazyakucita akubona mbomunga mwaucinca kutegwa muyungizye mulimo wanu wamumuunda mumwezi omwe naa kwiinda waawo. Amwaapailile makani aaya. (Jak. 1:5) Amwaabandike makanze ngomujisi abanamukwasyi alimwi abamwi mumbungano. (Tus. 15:22) Mulakonzya kubona kuti nokuba kuti mujisi bubi kapati naa kuciswa-ciswa, andinywe mulakonzya kuba alukkomano akaambo kakucita bupainiya bwakugwasyilizya.
5. Ino kuyungizya mulimo wesu ciindi ca Ciibalusyo kuyootuletela mpindu nzi?
5 Jehova uyanda kuti babelesi bakwe kabakkomana. (Int. 32:11) Kwiinda mukubeleka canguzu kuyungizya mulimo wesu ciindi ca Ciibalusyo, ciiyoopa kuti tukkomane kapati alimwi akukkomanisya Taateesu wakujulu.—Tus. 23:24; 27:11.