Sena Muyoocita Bupainiya Bwakugwasyilizya?
1. Nkaambo nzi ciindi ca Ciibalusyo ncocili ciindi cibotu cakuyungizya mulimo wesu?
1 Ciindi ca Ciibalusyo nciindi cibotu cakuyungizya mulimo wesu. Nceciindi notuzinzibala kuyeeya luyando lwa Jehova lupati ndwaakatondezya kwiinda mukutupa Mwanaakwe kali cinunuzyo. (Joh. 3:16) Tulamulumba kapati Jehova akaambo kazyintu nzyatucitila, alimwi eeci citupa kuyandisisya kwaambila bamwi kujatikizya Jehova alimwi azyintu nzyacitila bantu. (Is. 12:4, 5; Lk. 6:45) Alimwi nceciindi notutola lubazu mumulimo wakutamba beenzuma abantu bali mucilawo cesu kuti bakajanike ku Ciibalusyo antoomwe andiswe. Cainda Ciibalusyo, tulasola kubagwasya bantu bakajanika kuti bazumanane kuba aluyandisisyo. Sena muyooyungizya mulimo wanu kwiinda mukucita bupainiya bwakugwasyilizya mu March, April, naa mu May?
2. Ncinzi cipa kuti mwezi wa March ube mwezi mubotu kapati wakucita bupainiya bwakugwasyilizya?
2 Mwezi wa March Amuupange Kuba Mwezi Uulibedelede: Mwezi wa March unooli mwezi mubotu kapati kucita bupainiya bwakugwasyilizya. Aabo bayoolilembya balakonzya kusala kubeleka mawoola aali 30 naa 50. Ikuti mulangizi wabbazu kaswaya mbungano yanu mu March, bapainiya bakugwasyilizya bayooba acoolwe cakuyoojanika kusikila kumamanino aamuswaangano ngwayoocita mulangizi wabbazu abapainiya baciindi coonse alimwi abaalubazu. Ciindi cakutamba bantu ku Ciibalusyo iciyoocitwa muli Bwabili, March 26, 2013, cayungizyigwa kwiinda mbocakabede myaka yainda, aboobo kutamba bantu kuyootalika mu March 1. Kuyungizya waawo, mwezi wa March ujisi mvwiki zyosanwe. Aboobo, sena inga tiimwakkala ansi kuyeeya kutegwa mubone naa mulakonzya kutola lubazu mukupanga mwezi wa March kuba mwezi uulibedelede?
3. Mbuti mbotukonzya kulibambila kuyooyungizya mulimo wesu?
3 Amutalike Lino Kulibambila: Ecino nceciindi cakulanga-langa mulongo wanu akubona mbomweelede kulibambila kutegwa mukacite bupainiya. Cilayandika kubelekela antoomwe amukwasyi, aboobo ciindi Cakukomba Mumukwasyi, amubandike mbaakani zyamukwasyi wanu alimwi akupanga mulongo. (Tus. 15:22) Ikuti kamutakonzyi kucita bupainiya bwakugwasyilizya, mutatyompwi pe. Sena inga tiimwacinca mulongo wanu kutegwa kamutola ciindi cilamfwu mazuba ngomubeleka? Sena inga tiimwayungizya buzuba bomwe bwamukati kansondo amazuba ngomubeleka mumulimo?
4. Ino nzilongezyo nzi ziyooboola akaambo kakuyungizya mulimo wesu mu March, April, alimwi amu May?
4 Kuyungizya mulimo wesu mu March, April, alimwi amu May, kuyoopa kuti lukkomano akukkutila kwesu iziboola akaambo kakubelekela Jehova alimwi akupa bamwi ziyungizyigwe. (Joh. 4:34; Mil. 20:35) Ciinda kubota ncakuti, milimo njotucita cakulyaaba iyoomukkomanisya Jehova.—Tus. 27:11.