Amwaambilizye Milimo ya Jehova Iitembaulika
1. Ino ncinzi citupa kwaambilizya milimo ya Jehova iitembaulika?
1 “Bupati anguzu abulemu aluzundo abwami, zyoonse nzizyako, O Jehova, nkaambo zintu zyoonse zyakujulu azyaansi nzizyako.” (1 Mak. 29:11) Ino mbuti luyando alimwi akulumba kuli Jehova mbokutujatikizya? Kutupa ‘kwaambilizya milimo iitembaulika yayooyo uwakatwiita kuzwa mumudima akutunjizya mumumuni wakwe uugambya.’ (1 Pet. 2:9) Tatukonzyi kucileka kwaambila bamwi kujatikizya Leza wesu mupati. Tuyooba aciindi cibotu cakwaambilizya milimo ya Jehova iitembaulika mumyezi ya March, April a May.
2. Ino nkwaambilizya kwaalubazu kuli buti kwabambwa kujatikizya Ciibalusyo, alimwi ino mbaani ibanga balatola lubazu?
2 Kwaambilizya Kwaalubazu Kujatikizya Ciibalusyo: Mu Muhulo, April 2, tuyootondezya milimo ya Jehova iitembaulika kwiinda mukucita Mulalilo wa Mwami. Kapepa kaalubazu kakutamba kubuzuba buyandika oobu kayooabilwa munyika yoonse kuzwa mu March 17 kuyoosika mu April 2. Twamukulwaizya nyoonse kuyootola lubazu kusikila mpomukonzya. Eeci inga caakuba ciindi cibotu kubapya kutalika kumwaya makani mabotu ikuti kabeelela. Ikuti naa kuli mbomwiiya limwi Bbaibbele naa mujisi bana bakonzya kweelela, amubweze ntaamu yakubandika abaalu.
3. Ncinzi ncotukonzya kwaamba notutamba bantu ku Ciibalusyo?
3 Kwaambilizya ooku kunookozyenye ancotwakacita kujatikizya Muswaangano Wacooko wa “Lufwutuko Luli Afwaafwi!” Mbungano ziyootuminwa tupepa twakutamba tunji kutegwa aumwi sikumwaya akaabilwe tusika ku 8. Kamuufwiinsya mubandi wanu lyoonse, ambweni kwaamba buyo kuti: “Aaka nkapepa kanu kakumutamba kubuzuba buyandika buboola bwalo bucitwa amwaka. Muyootambulwa amaanza obile. Twaambo toonse tulilembedwe akapepa aaka.” Ikuti naa uuli aŋanda ujisi mibuzyo, amwiingule. Cibalo camakani aayungizyidwe cijatikizya Mulalilo wa Mwami citalikila apeeji 206 mubbuku lya Bbaibbele Ncoliyiisya cilakonzya kumugwasya kujatikizya makani aaya. Mumazuba aamu Mujibelo amu Nsondo, tunooabila mamagazini aabilwa mumwezi ooyu antoomwe akapepa kaalubazu kakutamba. Amubalembe bantu boonse bajisi luyandisyo mbomwajana, alimwi amube abubambe bwakuyoopilukila.
4. Ino kapepa kaalubazu kakutamba bantu ku Ciibalusyo kayooabilwa buti?
4 Ikuti kacikonzyeka, kapepa kakutamba kaalubazu aaka keelede kupegwa cacigaminina kuli aumwi uuli aŋanda. Aboobo, amwiilembe minzi aatajanika muntu alimwi amubikke bubambe bwakuyoopilukila ciindi cimbi. Basikumwaya bali mumbungano zinoojisi tupepa twakutamba bantu tunji tuyoosyala, inga basala kunootusiya aŋanda aatajanika muntu munsondo yamamanino Ciibalusyo kacitanacitika. Pele mutaciti oobo kaitanasika nsondo eeyo. Amube masimpe kuti bantu nkomupilukila, aabo mbomwiiya limwi Bbaibbele, basazinyoko, mbomubeleka limwi, basimukobonyoko, alimwi abaabo mbomuzibidene limwi abalo bapegwa kapepa kakutamba.
5. Ino nkaambo nzi ncotweelede kutalika lino kulibambila kuyoocita bupainiya bwakugwasilizya?
5 Bupainiya Bwakugwasilizya: Sena inga mwaambilizya milimo ya Jehova iitembaulika kwiinda mukucita bupainiya bwakugwasilizya mu March, April a May? Kucita boobu kuyooyanda kuti mucince kujatikizya zintu nzyomucita abuzuba. (Ef. 5:15-17) Amusyome kuti kusolekesya kusikila mpomukonzya mumulimo wa Jehova kuyoomuletela lukkomano alimwi azilongezyo kuzwa kuli Jehova. (Tus. 10:22) Mbokunga ciindi ca Ciibalusyo caswena afwaafwi, eecino nceciindi cakutalika kulibambila.—Tus. 21:5.
6. Ino ncinzi ncotukonzya kwiiya kuli cakuluula camucizi uujisi myaka iili 90 wakacita bupainiya bwakugwasilizya mwaka wamana?
6 Umwi mucizi uujisi myaka yakuzyalwa iili 90 wakaba aciindi cakucita bupainiya bwakugwasilizya mwaka wamana. Wakaamba kuti: “Nokuba kuti ndilakuyandisya kulima zisyu alimwi ndakali kuyanda kutalika kusyanga, ndakabona kuti ndakeelede kubikka ambele zintu ziyandika kapati. Kandijisi makanze aakubikka ziyandika zya Bwami mubusena bwakusaanguna, ndakasala kucita bupainiya bwakugwasilizya mu March.” Sena wakalongezyegwa akaambo kakusoleka kwakwe? Waamba kuti, “Ndilimvwa kuswenenena kapati kumbungano alimwi eeci candipa kuba acilongwe ciyumu a Jehova.” Sena inga twazilanga-langa zintu nzyotuyandisya alimwi akucinca ikuti kakuyandika mbubonya bwakacita mucizi ooyu?
7. Sena cilakatazya kubeleka bupainiya bwakugwasilizya?
7 Kusika ambaakani yamaoola aali 50 kubupainiya bwakugwasilizya tacikonzyi kuba cintu cikatazya mbuli mbomuyeeyela. Amwiipailile milimo yanu yaabuzuba, amubambe mulongo, alimwi akuulemba amulongo wamilimo yakumuuya. Ndinywe mubuzi kabotu-kabotu bukkale bwanu. Ikuti naa mulaciswa-ciswa alimwi tamujisi nguzu, ambweni inga mwatola lubazu mubukambausi kwamaoola aali mbwaabede abuzuba. Ikuti naa mulabeleka naa muli basicikolo, inga mwakonzya kucita bupainiya bwakugwasilizya kwiinda mukutola lubazu mubukambausi bwakumazuba naa mumazuba aamu Mujibelo amu Nsondo.
8. Ino ncinzi cakagwasya banabukwetene bamwi kucita bupainiya bwakugwasilizya?
8 Banji balacikonzya kucita bupainiya bwakugwasilizya antoomwe mumukwasyi. Banabukwetene bamwi myaka yainda bakali kweenkeenka kulilembya nkaambo bakali kuyeeya kuti bukkale bwabo tiibwakali kubazumizya kucita bupainiya bwakugwasilizya. Ino ncinzi ncobakacita kujatikizya makani aaya? Bakaamba kuti: “Twakapaila kuli Jehova kuti atugwasye kuzuzikizya ncotwakali kulombozya kucita kwamyaka minji.” Akaambo kakulibambila kabotu, bakacikonzya kusisya ambaakani yabo. Bakayungizya kuti: “Cakali kukkomanisya. Twakalongezyegwa kapati. Muzeezo wesu ngwakuti, amusoleke andinywe. Mbokunga swebo twakacikonzya, andinywe inga mwacikonzya.”
9. Ino ncinzi ncomukonzya kuyoocita lweendo luboola lyaciiyo canu camukwasyi mukulibambila mulimo mumyezi iiboola yamilimo yaalubazu?
9 Amukazandule ciindi lweendo luboola lyaciiyo canu camukwasyi ikulanga-langa mbomukonzya kuyootola ciindi cinji mumulimo nyoonse mumukwasyi mumyezi iiboola. Nokuba kuti mukwasyi wanu oonse taukonzyi kucita bupainiya bwakugwasilizya, ambweni omwe mumukwasyi ulakonzya kucita oobo kwiinda mukugwasigwa alimwi akubelekela antoomwe abamwi bamumukwasyi. Ikuti kacitakonzyeki, ambweni mukwasyi wanu ulakonzya kubikka mbaakani yakutola ciindi cinji mumulimo mumyezi eeyi yamilimo yaalubazu.
10. Nkaambo nzi ncotweelede kubandika abamwi kujatikizya kulombozya kwesu kwakucita bupainiya bwakugwasilizya ciindi ca Ciibalusyo camwaka uuno?
10 Amugwasyanye: Busungu bulabakulwaizya bamwi. Amubandike kujatikizya kulombozya kwanu kwakucita bupainiya bwakugwasilizya. Eeci cilakonzya kubakulwaizya abamwi kuti balilembye. Kuyungizya waawo, aabo bakacita kale bupainiya myaka yainda balakonzya kumupa mizeezo iikonzya kuyoomugwasya kubambulula zintu nzyomucita alimwi akubikka mulongo kutegwa musisye ambaakani yanu. (Tus. 15:22) Ikuti kamucikonzya kucita bupainiya bwakugwasilizya, amutambe sikumwaya umwi ambweni ooyo uujisi makanze aakucita bupainiya kuti amusangane mumulimo uukkomanisya ooyu.
11. Mbuti baalu mbobakonzya kupa kuti tube basungu kukucita bupainiya bwakugwasilizya mumyezi iiboola?
11 Baalu banji balabikka bubambe bwakuti katutola lubazu mucibeela camulimo waalubazu eeci. (Heb. 13:7) Eeci cilakulwaizya masimpe kumbungano. Alimwi baalu bapa kuti tube basungu kwiinda mumibandi iikulwaizya njobabandika abamwi. Majwi aaluzyalo masyoonto aakulwaizya naa nzila zimwi zigwasya inga caba ncecintu ciyandika mukukulwaizya bamwi kucita bupainiya bwakugwasilizya. Cakutadooneka, mulangizi wamulimo unoobikka bubambe bwamiswaangano aimbi yakuya mumulimo wamumuunda kutegwa boonse kabakonzya kutola lubazu mubukambausi bwamukakamu, nociba ciindi nobakotoka kuzwa kumilimo naa nobazwa kucikolo. Bubambe oobu bweelede kunooambilizyigwa lyoonse. Alimwi uyoobona masimpe kuti boonse balijisi cilawo cipati cakubelekela alimwi amabbuku manji.
12. Ino ncinzi ncomukonzya kucita ikuti kamutakonzyi kucita bupainiya bwakugwasilizya?
12 Nokuba kuti bukkale tabumuzumizyi kucita bupainiya bwakugwasilizya, mulakonzya kubakulwaizya aabo balilembya alimwi mulakonzya kubapailila. (Tus. 25:11; Kol. 4:12) Ambweni mulakonzya kubikka bubambe bwakutola lubazu ambabo mumulimo buzuba abumbi mukati kansondo naa kubeleka kwaciindi cilamfwu kwiinda mbomucita lyoonse.
13. Ino nimbaakani nzi yabikkwa mu Zambia, alimwi ino mbuti mbungano yanu mboikonzya kugwasya mukwiizuzikizya?
13 Mbaakani Yabapainiya Bakugwasilizya Bali 15,000 mu April: Mu April 2000 kwakaba mweelwe uuyungizyidwe kwiinda lyoonse wabapainiya bakugwasilizya mu Zambia bali 10,724. Aboobo, mbaakani mbotu yamwezi uuboola wa April njabapainiya bakugwasilizya basika ku 15,000. Tulakonzya kwiizuzikizya mbaakani eeyi ikuti sikumwaya omwe akati kabasikumwaya bali lusele bali mumbungano aimwi watola lubazu mumulimo wabupainiya bwakugwasilizya. Masimpe, mbungano zimwi ambweni ziyooba abasikumwaya banji ibajisi bukkale buyoobazumizya kucita bupainiya bwakugwasilizya. Kumbungano zinji, ncuuba-uba kwiizuzikizya mbaakani yambungano eeyi. Eelo kaka amweezyeezye buyo kukkomana kuyooba mumbungano yanu akaambo kambaakani eeyi alimwi abasikumwaya mbobayookulwaizigwa mumulimo wakukambauka mucilawo canu!
14. Nkaambo nzi April ncouli mwezi mubotu wakucita bupainiya bwakugwasilizya?
14 Nkaambo nzi April ncouli mwezi mubotu wakucita bupainiya bwakugwasilizya? Ciibalusyo ciyoocitwa kumatalikilo aamwezi calo ciyootupa ciindi cipati cakupilukila kuli baabo bayoojanika. Tunooyoabila mamagazini katujisi mbaakani yakubasiila bbuku lya Bbaibbele Ncoliyiisya alimwi akutalisya ziiyo zya Bbaibbele ciindi notupilukila. Aboobo, mulimo wabupainiya bwakugwasilizya mu April uyootupa ziindi zinji zyakutalisya ziiyo zya Bbaibbele. Mwezi wa April ujisi mazuba aamu Nsondo aali osanwe alimwi amazuba aakulyookezya calo ciyoogwasya baabo babeleka alimwi abasicikolo kuyoolilembya.
15. Ino nkaambo nzi ncotweelede kupakamana ciindi ca Ciibalusyo camwaka uuno mbociyaabuswena afwaafwi?
15 Cainda buyo ciindi ca Ciibalusyo acimwi, cituswenya kumamanino aabukkale bubyaabi oobu. Ciindi cisyeede cakwaambila bamwi kujatikizya Leza wesu mupati, ncifwiifwi. (1 Kor. 7:29) Cainda buyo ciindi ca Ciibalusyo, ziindi zibotu nzyotwakajisi zyakutembaula Taateesu wakujulu azyalo ziyooinda. Atulibambile lino kuyoobeleka kusikila mpotukonzya mukwaambilizya milimo ya Jehova iitembaulika mumwezi wa March, April a May.
[Kabbokesi kali apeeji 4]
Sena Inga Twaakuba Abapainiya Bakugwasilizya Bali 15,000 mu April?
◼ Amuzilange-lange zintu nzyomuyandisya
◼ Amuzibandike mbaakani antoomwe amukwasyi
◼ Amubandike abamwi kujatikizya makanze aanu